Beratus Iku Orang Meda Jesus Sebedau Pengerami Pentikos

Pengudah Jesus diangkatka ari mati, iya mai 11 iku rasul iya ngagai siti bukit ba Galili. Ba dia mega bisi kira-kira 500 iku murid ke bukai. Keterubah iya, sekeda sida kakang ati. (Matthew 28:17; 1 Korint 15:6) Tang utai ke deka disebut Jesus ulih nulung sida pechaya iya udah idup baru.

Jesus madahka Petara udah meri iya semua kuasa ba serega enggau ba dunya. Ku Jesus meri pesan ngagai bala murid iya: “Nya alai, mupuk kita ngagai semua bansa, lalu ajar sida nyadi murid aku. Baptisa sida dalam nama Apai, Anak, enggau kuasa kudus Petara. Ajar sida ngasika semua utai ke udah dipadah aku ngagai kita.” (Matthew 28:18-20) Jesus udah idup baru, lalu iya keran deka Berita Manah terus ditusui.

Semua murid Jesus enda ngira lelaki, indu, bala anak mit, nerima pengawa ti sama ari Jesus, iya nya ngaga orang nyadi murid. Taja pan sida ke ngelaban nguji deka ngetuka pengawa nginjil sereta ngajar, tang Jesus meransang bala murid iya: “Semua kuasa ba serega enggau ba dunya udah diberi ngagai aku magang.” Baka ni nya ulih nulung bala murid iya? Iya madahka sida: “Ingat, aku deka seruran enggau kita nyentuk ngagai pengujung dunya.” Taja pia, Jesus nadai madahka sida ke nginjil Berita Manah deka nerima kuasa ngereja pengawa ti luar biasa. Tang, sida deka nerima sukung ari kuasa kudus.

Pengudah Jesus diangkatka idup baru, iya suah ngayanka diri ngagai bala murid iya “pengelama 40 hari.” Taja pan keterubah iya, bala murid enda ngelala Jesus, tang iya “meri sida mayuh bukti ti terang ke nunjukka iya udah idup.” Iya mega ngajar sida “pasal Perintah Petara.”—Surat Kereja Rasul 1:3; 1 Korint 15:7.

Lebuh bala rasul agi ba Galili, Jesus ngasuh sida pulai baru ngagai Jerusalem. Lebuh betemu enggau sida ba dia, iya madah: “Anang ninggalka Jerusalem, tang terus meh nganti pemeri ke udah disemayaka Apai, iya nya pemeri ke kala didinga kita ari aku. John maptisa ngena ai, tang beberapa hari da agi, semua kita deka dibaptisa ngena kuasa kudus Petara.”—Surat Kereja Rasul 1:4, 5.

Pengudah nya, Jesus betemu baru enggau bala rasul iya. Iya “mai sida ngagai Betani,” ba begian timur Bukit Kana. (Luke 24:50) Taja pan Jesus madah iya deka mupuk, tang bala rasul agi ngumbai Jesus deka merintah ba dunya.—Luke 22:16, 18, 30; John 14:2, 3.

Bala rasul nanya Jesus: “Tuan, kati nuan deka mulaika baru Perintah Petara ngagai Israel diatu?” Ku Jesus nyaut sida: “Semina Apai aja ke bisi hak nentuka maya enggau jam iya. Kita enda ibuh nemu pasal tu.” Udah nya, sekali agi Jesus madahka pengawa ke patut digaga sida. Ku iya: “Kita deka bulih pengering lebuh kuasa kudus Petara datai ngagai kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.”—Surat Kereja Rasul 1:6-8.

Iya ke amat, pengudah Jesus diangkatka idup baru, iya ngayanka diri ngena tubuh mensia. Udah nya ba Bukit Kana, Jesus dibai niki ngagai serega. Remang ngelindung iya lalu sida enda ulih meda iya agi. Maya nya meh Jesus niki ke serega ngena tubuh serega. (1 Korint 15:44, 50; 1 Peter 3:18) Lebuh bala rasul merening ngagai langit, “dua iku orang ke ngena gari burak” bediri ba sepiak sida. Sida nya bala melikat, ku sida nanya: “Orang Galili, nama kebuah kita bediri malik ke langit? Jesus ke udah dibai niki ke langit deka datai enggau chara ti sama baka ke dipeda kita lebuh iya niki ke langit.”—Surat Kereja Rasul 1:10, 11.

Lebuh Jesus mupuk ngagai serega, semina murid ti setia ulih meda iya. Nya alai, iya deka pulai baru “enggau chara ti sama.” Reti iya, semina bala murid ti setia aja ulih nemu maya iya nyadi Raja ba Perintah Petara.

Bala rasul lalu pulai ngagai Jerusalem. Beberapa hari pengudah nya, sida begelumu enggau bala murid ke bukai, nyengkaum “bala menyadi lelaki Jesus, sereta Maria indai Jesus.” (Surat Kereja Rasul 1:14) Enggau siti tuju, sida bebendar besampi. Sida deka milih siku murid kena nganti Judas Iskariot, lalu mulaika baru penyampau bala rasul nyadi 12 iku. (Matthew 19:28) Sida deka milih siku murid ke udah meda pengawa Jesus, enggau nyadi saksi pengangkat Jesus ari mati. Sida bechabut undi deka nemu peneka Petara bekaul enggau pekara tu. Tu meh kali ke penudi Bup Kudus nyebut pasal pengawa bechabut undi. (Masmur 109:8; Jaku-Dalam 16:33) Pengujung iya, Matias ke engka siku ari 70 iku murid ke dianjung Jesus nginjil, dipilih nyadi rasul. Nyadi, “iya mega dikumbai rasul baka 11 iku rasul ke bukai.”—Surat Kereja Rasul 1:26.

Pengudah sepuluh hari Jesus niki ke serega, orang Judah pan ngintu Pengerami Pentikos kena taun 33 M. Bisi kira-kira 120 iku murid Jesus begelumu ba bilik tingkat atas dalam siti rumah di Jerusalem. Enda mukai-mukai, sida ninga munyi ribut ti deras datai ari langit, lalu bunyi nya ulih didinga ba semua endur dalam rumah nya. Pengudah nya, sida meda utai baka api ti mit ayan lalu inggap ba atas pala tiap iku sida. Sida belabuh bejaku ngena bemacham bansa jaku. Nya meh kuasa kudus ke udah disemaya Jesus ngagai sida!—John 14:26.