Jaku Benabi 2. Lapar Pungkang

“Lapar pungkang deka nyadi.”—MARK 13:8.

● Seiku lelaki udah pindah ngagai sebuah kampung di Quaratadji Niger, lalu ngarapka bulih pemakai ke sida sebilik. Tang diatu iya semina gegaring aja ba atas lantai. Nama kebuah? Sidi, tuai kampung nya madahka, “Iya enda ulih meri ruang bilik iya pemakai, lalu iya enda tan meda sida lapar.”

NAMA FAKTA IYA? Ba serata dunya, nyauka 1 ari 7 iku orang enda bulih chukup pemakai ninting hari. Penyampau tu balat agi ba sekeda endur di Afrika. Ba dia, 1 ari 3 iku orang enda chukup pemakai ba timpuh ti lama. Gambarka, dalam siti ruang bilik bisi seiku apai, indai enggau seiku anak mit. Seiku ari sida nadai bulih pemakai. Nyadi, sapa ke deka tinduk enggau perut kusung? Nya meh pemutus ke patut digaga sida ninting hari.

NAMA RUNDING SEKEDA ORANG? Bumi ulih ngasilka pemakai ti chukup ke semua orang. Mensia patut pandai nyaga nya.

KATI RUNDING TU BETUL? Taja pan mensia ulih ngasilka tauka nyadung pemakai enggau chara ti manah, tang penanggul lapar pungkang agi enda ulih diputarka. Perintah udah naka ulih mutarka penanggul tu dalam bepuluh taun, tang sida tetap enda mujur.

NAMA RUNDING NUAN? Kati nuan ngasaika ayat ba Mark 13:8 benung nyadi? Kati teknologi mujur mutarka penanggul lapar pungkang?

[Blurb]

“Lebih ari satu pertiga anak mit mati ketegal pneumonia, chirit enggau penyakit bukai ulih diselamatka enti sida ngembuan pemakai sereta nutrisi ti chukup.”—ANN M. VENEMAN, BEKAS PENGARAH EKSEKUTIF TABUNG KANAK-KANAK PBB (UNICEF).