“Ngeringka Raban Gempuru”

1-3. (a) Sapa enggau Paul ba pejalai nginjil iya, lalu nama ulih ditemu kitai pasal orang nya? (b) Nama deka dipelajarka kitai ba pelajar tu?

LEBUH seduai iya bejalai nengah jalai ti bebatu ngagai nengeri siti ke nengeri siti, rasul Paul tentu bisi berunding nama deka nyadi ngagai nembiak ke benung bejalai enggau iya. Nembiak nya Timoti, lalu iya amat ransing. Timoti engka beumur kira-kira 20 taun. Pejalai tu deka mai iya jauh ari menua iya empu. Majak lama seduai iya bejalai, Listra enggau Ikonium majak jauh ditinggalka seduai. Nama utai ke deka nyadi pengudah nya? Ba pengawa pejalai nginjil Paul ti kedua nya, Paul tentu udah nyangka utai ke deka nyadi. Iya nemu seduai deka napi mayuh bahaya enggau penanggul. Nya alai, kati Timoti sanggup tan napi semua nya?

² Sekalika Timoti kurang pechayaka diri empu tauka enda, Paul agi arap ngagai iya. Nama ke ngasuh Paul berasai baka nya? Ketegal bisi utai ke nyadi baru-baru tu, nya ngasuh Paul amat yakin ngagai Timoti laban Paul begunaka orang ke ulih enggau iya ba pengawa nginjil. Paul nemu bala menyadi ke ngereja pengawa ngemataka raban gempuru sereta meransang bala menyadi patut sama sepenemu enggau bisi pengeran deka beserakup. Nama kebuah Paul ulih berasai baka nya? Siti ari kebuah iya, Paul enggau Barnabas kala belaya lalu ngujungka seduai iya enda begulai.

³ Ba pelajar tu, kitai deka belajarka mayuh chara kena mutarka laya. Kitai mega deka belajar kebuah Paul milih Timoti enggau iya bejalaika pengawa nginjil. Lalu, kitai mega deka nemu mayuh peranan penting ke digaga tuai ti ngabas kemayaharitu.

“Aram Tua Pulai Baru ngagai Bala Menyadi” (Surat Kereja Rasul 15:36)

4. Nama deka digaga Paul lebuh ba pejalai nginjil iya ti kedua?

⁴ Ba pelajar sebedau tu, kitai udah nemu pasal empat iku menyadi lelaki ke nyadi pengari iya nya, Paul, Barnabas, Judas, enggau Silas. Sida tu madahka pemutus raban ti ngiring bekaul enggau pengawa besunat, lalu nya ulih ngeringka raban gempuru ba Antiok. Nama deka digaga Paul pengudah nya? Iya madah ngagai Barnabas tuju pejalai iya ti baru. Bup Kudus madahka: “Pengudah siti timpuh, Paul madah ngagai Barnabas: “Aram tua pulai baru ngagai tiap iti nengeri ke alai tua udah nusui jaku Jehovah, ngambika ulih meda baka ni gaya bala menyadi ba dia.” (SKR. 15:36) Ba senentang tu, Paul ukai semina deka ngelawa bala menyadi ke baru udah nyadi orang Kristian. Bup Surat Kereja Rasul madahka tuju Paul ba pejalai nginjil iya ti kedua. Kesatu, Paul deka madahka atur ke udah digaga raban ti ngiring. (SKR. 16:4) Kedua, Paul keran deka ngeringka raban gempuru lalu nulung bala menyadi ngambika majak tegap ba pengarap. (Rom. 1:11, 12) Nya alai, baka ni gerempung Saksi-Saksi Jehovah kemayaharitu ulih nitihka teladan bala rasul ba abad keterubah?

5. Baka ni Raban ti Ngiring kemayaharitu meri iring sereta peransang ngagai semua raban gempuru?

⁵ Kemayaharitu, Jesus ngena Raban ti Ngiring Saksi-Saksi Jehovah kena ngiring raban gempuru. Sida meri iring enggau jaku peransang ngagai raban gempuru di serata dunya nengah surat, litaricha ke dichelak tauka nengah online, gempuru besai sereta perengka komunikasi ke bukai. Pia mega, Raban ti Ngiring enggau naka ulih deka nyaga kaul ti rapat enggau tiap iti raban gempuru. Kena ngereja tu, sida nganjung bala tuai ti ngabas. Enggau chara nya, Raban ti Ngiring udah ngelantik beribu iku tuai gempuru ke layak di serata dunya nyadi tuai ti ngabas.

6, 7. Nama sekeda tanggung pengawa tuai ti ngabas?

⁶ Tuai ti ngabas kemayaharitu nunjukka pengibuh sereta meransang semua bala menyadi ba raban gempuru. Baka ni? Sida nitihka utai ti digaga bala menyadi Kristian ba abad keterubah. Tu meh utai ke dipadahka Paul ngagai bala menyadi lelaki ke mega ngintu raban gempuru ba abad ti keterubah. Iya meransang sida nusui “jaku Petara enggau lengkas enda ngira ba maya ti senang tauka ba maya ti tusah. Rara meh orang lalu beri jaku tangkan sereta jaku lalau. Kereja nya enggau amat sabar sereta ngena chara ngajar ti landik. . . . Kereja pengawa ke digaga orang ke nyadi penginjil.”—2 Tim. 4:2, 5.

⁷ Sejalai enggau ayat nya tadi, bala tuai ti ngabas kemayaharitu, lalu enti sema iya udah kawin, iya enggau bini iya deka enggau bala penginjil ba pengawa nginjil. Bala tuai ti ngabas ransing ngereja pengawa nginjil sereta pengajar ti landik. Semua sifat tu meri kesan ti manah ke ulih nulung bala menyadi. (Rom. 12:11; 2 Tim. 2:15) Bala tuai ti ngabas rindu sereta sanggup nulung bala menyadi Kristian lalu sanggup ngagai endur ti bahaya sereta endur ti bisi gaya hari ti enda entu manah. (Plp. 2:3, 4) Kelimpah ari nya, sida meri cheramah ti bepelasarka Bup Kudus kena meransang sereta ngajar bala menyadi ba tiap iti raban gempuru ke dilawa sida. Nya alai, semua menyadi bulih penguntung lebuh beratika teladan tuai ti ngabas sereta nunda pengarap sida.—Heb. 13:7.

“Balat Belaya” (Surat Kereja Rasul 15:37-41)

8. Nama reaksi Barnabas lebuh Paul mai iya ngabas bala menyadi?

⁸ Barnabas nerima cadangan Paul ke deka “meda baka ni gaya bala menyadi.” Ngelama tu, seduai iya udah bekerejasama enggau manah. Lalu seduai iya udah teleba enggau endur nya sereta orang ke deka dilawa seduai iya. (SKR. 13:2–14:28) Nya alai, cadangan pasal seduai iya begulai gawa ba pengawa tu amat manah. Tang bisi penanggul nyadi. Surat Kereja Rasul 15:37 madahka: “Barnabas keran deka mai John, ke mega dikumbai Mark.” Maya nya, Barnabas ukai semina meri cadangan aja, tang iya keran deka mai petunggal iya Mark enggau sida bejalai ngabas bala menyadi sereta nginjil.

9. Nama kebuah Paul enda sepenemu enggau Barnabas?

⁹ Nama kebuah Paul enda sepenemu enggau Barnabas? Bup Kudus madahka: “Paul enggai mai iya, laban iya udah ninggalka seduai iya lebuh ba Pampilia, lalu enda bejalaika pengawa begulai enggau seduai iya.” (SKR. 15:38) Mark bisi enggau Paul seduai Barnabas lebuh pejalai nginjil sida ti keterubah. Taja pia, Mark enda nitihka sida nyentukka pengawa nya abis. (SKR. 12:25; 13:13) Lebuh sida baru ngepunka pejalai sida, iya nya ba Pampilia, Mark ninggalka pengawa iya lalu pulai baru ngagai Jerusalem. Bup Kudus nadai madahka kebuah Mark ninggalka pengawa iya. Tang ba rasul Paul, utai ke digaga Mark nunjukka iya enda bejalaika pengawa iya enggau manah lalu iya engka enda ulih dikearapka.

10. Nama nyadi pengudah Paul seduai Barnabas balat belaya, lalu nama nyadi pengujung iya?

¹⁰ Barnabas agi keran deka mai Mark. Tang, Paul agi madahka diri enggai mai Mark. Nama nyadi pengudah nya? Surat Kereja Rasul 15:39 madahka: “Ketegal nya, Paul enggau Barnabas balat belaya, lalu seduai iya beserara ari pangan diri.” Barnabas belayar ngagai menua iya empu, iya nya, pulau Saiprus, lalu iya mai Mark. Paul terus enggau pelan iya. Bup Kudus madahka: “Paul milih Silas. Seduai iya mupuk pengudah bala menyadi besampi ngambika Jehovah meri pemanah ati Iya ti besai ngagai Paul.” (SKR. 15:40) Paul seduai Silas “bejalai ngagai serata Siria enggau Kilikia, ngambika ngeringka raban gempuru ba dia.”—SKR. 15:41.

11. Nama kualiti ke ulih nulung kitai nyeliahka laya enggau orang ke ngemediska ati kitai?

¹¹ Cherita tu nulung kitai sedar, kitai enda sempurna. Paul seduai Barnabas dipilih nyadika pengari raban ti ngiring. Pia mega, Paul empu udah dilantik nyadi siku ari raban ti ngiring maya nya. Taja pia, ari utai ke nyadi ba seduai iya, Paul enggau Barnabas udah nejuka ulah ti enda sempurna ngachau kaul seduai iya. Kati seduai iya nejuka laya tu terus nyadi? Taja pan enda sempurna, Paul seduai Barnabas baruh ati sereta ngembuan runding Kristus. Nya alai, seduai iya nunjukka pengerindu sereta deka ngampun. (Eps. 4:1-3) Nyau kelama, Paul enggau Mark terus begulai ngereja pengawa teokratik ke bukai.a—Kol. 4:10.

12. Baka ni tuai ti ngabas kemayaharitu ulih nunda Paul enggau Barnabas?

¹² Laya entara Paul enggau Barnabas ukai reti iya, seduai iya orang ke rindu belaya. Mayuh orang nemu Barnabas nya orang ke bisi pengerindu sereta manah ati. Nya alai, bala rasul ngangauka iya Barnabas, ti mai reti “Orang ke Mai Pengelantang,” ukai ngangauka nama asal iya, iya nya Joseph. (SKR. 4:36) Pia mega, mayuh orang nemu Paul nya orang ke nelap sereta siru. (1 Tes. 2:7, 8) Baka Paul enggau Barnabas, semua menyadi ke ngemataka raban gempuru kemayaharitu nyengkaum bala tuai ti ngabas, enggau naka ulih nunjukka pemaruh ati sereta nelap ngagai bala tuai gempuru sereta bala menyadi Kristian.—1 Pet. 5:2, 3.

“Timoti Dipuji Bala Menyadi” (Surat Kereja Rasul 16:1-3)

13, 14. (a) Sapa Timoti, lalu baka ni Paul betemu enggau Timoti? (b) Nama utai ke narit ati Paul pasal Timoti? (c) Nama pengawa ke diterima Timoti?

¹³ Ba pejalai nginjil Paul ti kedua, iya ngagai Galatia, iya nya siti nengeri ke dipegai perintah Rome. Ba dia udah bisi beberapa iti raban gempuru ditumbuhka. Paul “datai ba Derbe, lalu udah nya iya mupuk ngagai Listra.” Pengudah nya Bup Kudus madahka: “Ba dia, bisi siku murid ke benama Timoti. Indai iya orang bansa Judah ke arapka Jesus. Tang apai iya orang bansa Gerika.”—SKR. 16:1.b

¹⁴ Kebendar iya, lebuh Paul bejalaika pengawa nginjil iya ti keterubah ba Listra kira-kira ba taun 47 M., iya betemu enggau sida Timoti sebilik. Lalu dua tauka tiga taun udah nya, maya Paul bejalaika pengawa nginjil iya ti kedua, iya bisi beratika siku nembiak ke benama Timoti. Nama kebuah? Laban Timoti “dipuji bala menyadi.” Timoti ukai semina dikerinduka bala menyadi Kristian ba endur iya empu, tang mega ngembuan nama ti manah ba raban gempuru ke bukai. Bup Kudus madahka, bala menyadi ba Listra enggau Ikonium ke penyauh 30 kilometer muji Timoti. (SKR. 16:2) Ketegal iring ari kuasa kudus, bala tuai gempuru meri tanggung pengawa ti besai ngagai Timoti, iya nya nulung Paul seduai Silas bejalaika pengawa ngemataka raban gempuru.—SKR. 16:3.

15, 16. Nama kebuah Timoti bisi nama ti manah?

¹⁵ Baka ni Timoti tau bulih nama ti manah maya iya agi biak? Kati nya ketegal pemintar iya, penyigat gamal iya, tauka pengelandik iya? Semua mensia suah beratika pekara nya. Indah, nabi Samuel pan kala beratika penyigat gamal sesiku orang. Taja pia, Jehovah ngingatka iya: “Anang ngira peninggi tauka penyigat gamal orang. Aku udah nulak iya, laban Aku enda ngira mensia ngena chara mensia. Mensia meda gamal, tang Aku meda ati.” (1 Sam. 16:7) Nya alai bala menyadi ulih beratika, Timoti bulih nama ti manah ukai ketegal pengelandik iya, tang ketegal iya bisi kualiti Kristian ti manah.

¹⁶ Beberapa taun udah nya, rasul Paul nyebut beberapa iti kualiti manah ke dikembuan Timoti. Paul madahka, Timoti nya orang ke manah ati, ngembuan pengerindu ti enda berundingka diri empu, sereta bagas ngereja pengawa teokratik. (Plp. 2:20-22) Pia mega, orang ulih beratika Timoti ngembuan pengarap ti “enda pura-pura.”—2 Tim. 1:5.

17. Baka ni bala nembiak kemayaharitu ulih nunda Timoti?

¹⁷ Bala nembiak kemayaharitu ulih nunda Timoti enggau chara ngemansangka kualiti ti ngelantangka ati Jehovah. Lebuh sida ngereja tu, sida ulih ngembuan nama ti manah ba mata Jehovah sereta ba bala menyadi taja pan sida agi biak. (J-lam. 22:1; 1 Tim. 4:15) Sida mega ngayanka pengarap ti bendar sereta enda idup enggau chara ti bepura-pura ngapa. (Mas. 26:4) Asil iya, baka Timoti, mayuh bala nembiak ulih bejalaika tanggung pengawa ti besai ba raban gempuru. Bala nembiak Petara tentu amat diperansang lebuh meda sida ke agi biak nyadi penginjil Berita Manah, lalu nyerahka diri ngagai Jehovah sereta dibaptisa!

‘Pengarap Majak Tegap’ (Surat Kereja Rasul 16:4, 5)

18. (a) Nama penguntung ke diulih Paul enggau Timoti lebuh bejalaika pengawa ngemataka raban gempuru? (b) Baka ni raban gempuru diberekat?

¹⁸ Betaun-taun Paul enggau Timoti begulai gawa. Ketegal ngereja pengawa ngemataka raban gempuru, seduai iya nyadi pengari raban ti ngiring. Bup Kudus madahka: “Lebuh sida bejalai ari siti nengeri ngagai siti nengeri, sida nusui pesan bala rasul enggau bala tuai gempuru ba Jerusalem ngagai bala menyadi ba dia, ngambika bala menyadi ba dia nitihka pesan nya.” (SKR. 16:4) Bala menyadi ba raban gempuru nitihka iring ti diberi bala rasul enggau tuai gempuru ari Jerusalem. Asil iya, “pengarap raban gempuru ba dia majak tegap, lalu ninting hari penyampau sida majak nambah.”—SKR. 16:5.

19, 20. Nama kebuah bala menyadi Kristian patut ngasika “sida ke ngiring”?

¹⁹ Kemayaharitu, Saksi-Saksi Jehovah mega diberekat sereta bulih pengaga ati ketegal ngasika “sida ke ngiring.” (Heb. 13:17) Keadaan ba dunya seruran berubah. Nya alai, bala menyadi Kristian patut nitih sereta ngasika iring ke baru ari “ulun ke tetap ati sereta bepenemu-dalam.” (Mat. 24:45; 1 Kor. 7:29-31) Lebuh kitai ngasika sida ke ngiring, dunya tu enda ulih ngelimpangka kitai ari pemendar.—Jas. 1:27.

²⁰ Endang amat, bala menyadi ke ngemataka raban gempuru nyengkaum tiap iku bala menyadi lelaki ba Raban ti Ngiring enda sempurna. Sida sama baka Paul, Barnabas, Mark, sereta bala tuai gempuru ba abad keterubah. (Rom. 5:12; Jas. 3:2) Taja pia, Raban ti Ngiring amat bebendar nitihka jaku ari Bup Kudus sereta nitihka teladan ke udah ditetapka bala rasul. Sida nunjukka diri amat ulih dikearapka. (2 Tim. 1:13, 14) Asil iya, bala menyadi ba raban gempuru dikeringka sereta ditegapka dalam pengarap.