Penerang ke Bup Kereja Pengidup enggau Pengawa Kristian
2-8 JULAI
RETA ARI BUP KUDUS | LUKE 6-7
“Beri enggau Gerah Jari”
(Luke 6:37) “Anang ngakim, nya baru kita enda diakim. Anang ngukum, nya baru kita enda diukum. [“Terus ngampun,” NW], nya baru kita diampun.
nota pelajar nwtsty ke Luk. 6:37
Terus ngampun, nya baru kita diampun: Tauka “Terus ngelepaska, lalu kita deka dilepaska.” Leka jaku Gerika ke “ngampun” mai reti “lepaska (chunto, orang ke dijil).” Ba ayat tu, lebuh dikena ba pengawa ngakim, iya mai reti ngampun taja pan orang nya patut diukum.
w08 15/5 9-10 ¶13-14
Terus Ngereja Utai ti Manah
13 Injil Matthew madahka jaku Jesus: “Anang ngakim, ngambika kita enda diakim.” (Mat. 7:1) Nitihka Luke, Jesus madah: “Anang ngakim, nya baru kita enda diakim. Anang ngukum, nya baru kita enda diukum. [“Terus ngampun,” NW], nya baru kita diampun.” (Luk. 6:37) Ba kurun ti keterubah orang Parisi balat ngakim orang bukai ngena adat mensia. Semua orang ke ningaka jaku Jesus ti ngasuh “anang ngakim” patut badu ngereja nya. Tang, sida patut terus ngampun penyalah orang bukai. Rasul Paul meri jaku lalau pasal ngampun baka ke disebut ba atas.
14 Enggau terus ngampun, bala murid Jesus meransang orang bukai ngampun pangan diri. “Laban chara kita ngakim, deka dikena ngakim kita,” ku Jesus, “lalu takar ti dikena kita nakar deka dikena nakar utai ke kita.” (Mat. 7:2) Enti kitai manah enggau orang, orang deka manah enggau kitai.—Gal. 6:7.
(Luke 6:38, NW) Telebaka diri meri, lalu orang bukai mega deka meri kita. Sida deka nepu ba gari luar kita takar ti chukup, ti dienyak, ti digusak, ti meruap lalu lilih. Laban takar ti dikena kita nakar deka dikena nakar utai ke kita.”
nota pelajar nwtsty ke Luk. 6:38, NW
Telebaka diri meri: Tauka “Anang ngetu meri.” Leka jaku pengawa Gerika ke dikena ba ditu ulih disalin “meri” lalu mai reti pengawa ti terus dikereja.
(Luke 6:38, NW) Telebaka diri meri, lalu orang bukai mega deka meri kita. Sida deka nepu ba gari luar kita takar ti chukup, ti dienyak, ti digusak, ti meruap lalu lilih. Laban takar ti dikena kita nakar deka dikena nakar utai ke kita.”
nota pelajar nwtsty ke Luk. 6:38, NW
gari luar kita: Dalam jaku Gerika tu mai reti “dada kita,” tang ba konteks tu ditujuka ngagai gari luar ke dilipat ari atas belulang. “Nepu ba gari luar” tu engka bekaul enggau chara sekeda orang ke bedagang ke nepuka barang ti udah dibeli ba gari luar ke dilipat nya.
Ngulihka Penemu Bup Kudus ti Berega
(Luke 6:12, 13) Lebuh maya nya, iya niki ngagai bukit sigi, deka besampi, lalu iya besampi semalam-malam nya ngagai Petara. 13 Ba urung rerak tawas, iya ngangauka sida murid iya, lalu milih dua belas iku ari bala sida, lalu iya ngumbai sida nya rasul:
w07 1/8 6 ¶1
Kaul enggau Petara—Baka ni Nuan Ulih Ngulihka Nya?
Jesus selalu besampi ngena awak ti panjai. (John 17:1-26) Ambika chunto, sebedau iya milih 12 iku rasul iya, Jesus ‘niki ngagai bukit sigi, deka besampi, lalu iya besampi semalam-malam nya ngagai Petara.’ (Luke 6:12) Taja pan enda besampi semalam-malam, orang ke ngemeratka kaul enggau Petara deka nitihka teladan Jesus. Sebedau ngaga pemutus ti berat ba pengidup, sida meri awak ti panjai besampi ngagai Petara, ngiga iring ari roh kudus ngambika ulih ngaga pemutus ti ngeringka pengarap sida.
(Luke 7:35, NW) Tang taja pia, penemu-dalam nyata dipeda ari asil iya.”
nota pelajar nwtsty ke Luk. 7:35, NW
asil iya: Tauka “anak iya.” Ba ditu penemu-dalam disempamaka baka bisi anak. Ba Mat. 11:19 penemu-dalam digambarka ari “utai ti dikereja.” Anak penemu-dalam, tauka utai ti dikereja ulih dipeda ari pengawa ke digaga John Pemaptisa enggau Jesus lalu nunjukka jaku tuduh ngagai seduai iya nya bula. Jesus baka ke madah: ‘Peda pengawa enggau ulah ti lurus lalu kita deka nemu jaku tuduh nya bula.’
9-15 JULAI
RETA ARI BUP KUDUS | LUKE 8-9
“Nama Utai ti Diguna Lebuh Nyadi Murid Jesus?”
(Luke 9:57, 58) Lebuh sida benung di rantau jalai, siku orang bejaku ngagai Jesus, ‘Aku deka nitihka nuan, ngagai sebarang endur nuan bejalai.’ 58 Jesus lalu bejaku ngagai iya, ‘Munsang bisi lubang, lalu burung bisi tansang, tang Anak Mensia nadai endur alai ngalika diri.’
it-2 494
Tansang
Lebuh seiku ari pengajar Adat madah ngagai Jesus: ‘Aku deka nitihka nuan, ngagai sebarang endur nuan bejalai,’ Jesus lalu nyaut: ‘Munsang bisi lubang, lalu burung bisi tansang, tang Anak Mensia nadai endur alai ngalika diri.’ (Mat. 8:19, 20; Luk. 9:57, 58) Ba ditu, Jesus madahka seiku orang patut muai pengingin deka bulih pengidup ti senang sereta patut bepanggai ba Jehovah enggau pengabis ati enti deka nyadi murid iya. Prinsip tu bisi kaul enggau sampi ke diajar Jesus ngagai murid iya: “Beri ngagai kami sehari tu pemakai umbas dipakai kami.” Nambahka nya, iya mega nyebut: ‘Nya alai, baka nya mega kita: nadai siku kita tau nyadi murid aku enti kita enda ngelengkaka semua reta tengkira kita.’—Mat. 6:11; Luk. 14:33.
(Luke 9:59, 60) Ku iya bejaku ngagai siku ti bukai, ‘Titihka aku.’ Tang ku orang nya bejaku, “Tuan, awakka aku pulai dulu lalu nguburka apai aku.” 60 Tang ku Jesus bejaku ngagai iya, ‘Awakka orang ke mati, nguburka bala sida empu ke mati. Tang nuan empu enda tau enda bejalai lalu nusui pasal Perintah Petara.’
nota pelajar nwtsty ke Luk. 9:59, 60
nguburka apai aku: Rambai jaku tu ukai mai reti apai lelaki nya udah nadai lalu iya deka ngaga atur kena nguburka apai iya. Enti tu amat, iya tentu enda ba dia bejaku enggau Jesus. Ba menua Timur Tengah kelia, enti orang nya udah nadai, sida sebilik deka nguburka iya ba hari ti sama. Nya alai, apai lelaki nya engka benung sakit tauka udah tuai. Lalu Jesus tentu enda ngasuh lelaki nya ninggalka apai indai ti benung sakit tauka begunaka bantu, enti nadai diri sebilik ke bukai ulih nulung ngibun apai indai iya. (Mrk. 7:9-13) Reti ku lelaki nya, ‘Aku deka nitihka nuan, tang ukai diatu laban apai aku agi idup. Nganti iya udah nadai baru aku ulih enggau nuan.’ Tang ba runding Jesus, lelaki nya nulak peluang ngenuluka Perintah Petara ba pengidup iya.—Luk. 9:60, 62.
Awakka orang ke mati, nguburka bala sida empu ke mati: Baka ke dipadah ba nota pelajar ke Luk. 9:59, apai lelaki ke enggau Jesus bejaku nya engka benung sakit tauka udah tuai. Nya alai, reti ku Jesus nya: ‘Awakka orang ke nulak pemendar, nguburka bala sida empu ke mati.’ Tu reti iya, lelaki nya enda patut betangguh enti deka nitihka Jesus, laban diri sebilik iya ke bukai ulih nyaga apai iya nyentukka apai iya mati. Enti nitihka Jesus, lelaki tu deka bulih pengidup ti meruan belama iya lalu bulih kaul ti manah enggau Petara. Ari saut iya, Jesus nunjukka ngenuluka Perintah Petara ba pengidup seseiku orang nya amat beguna kena mengkang tegap ba pengarap.
(Luke 9:61, 62) Siku ti bukai bejaku, ‘Aku deka nitihka nuan, Tuan, tang awakka aku meri selamat tinggal ngagai kami sebilik dulu.’ 62 Ku Jesus bejaku ngagai iya, ‘Orang ke belabuh ngeradu tanah lalu malik kebelakang, enda tau nyadi nembiak Perintah Petara.’
media nwtsty
Ngeradu tanah
Pengawa ngeradu tanah suah dikereja maya musin ruruh, lebuh ujan ngelembutka tanah ti rangkai pengudah musin panas. (Peda Lampiran B15-ML.) Pengeradu tanah digaga ari kayu ke bisi besi ti tajam ba ujung kayu nya, lalu dijantil enggau batang kayu sereta ditarit ngena seiku tauka lebih ari seiku jelu. Pengudah ngeradu tanah, benih ditabur. Ba Sempekat Lama, pengawa ngeradu tanah bisi dikena ba sempama. (P-ulu. 14:18; Isa. 2:4; Jer. 4:3; Mik. 4:3) Jesus seruran ngena pengawa betanam kena ngambarka ajar ti beguna. Ambika chunto, iya ngena pengawa ngeradu tanah kena madahka kebuah murid iya patut meri sembah ti pengabis ati. (Luk. 9:62) Enti orang ke ngeradu tanah ngelakka runding iya limpang, iya deka ngaga bakut ti enda lurus. Baka nya mega, murid Kristus ke limpang ari ngereja tanggung pengawa iya enda ulih tama ngagai Perintah Petara.
w12 15/4 15-16 ¶11-13
Mengkang Nyembah Jehovah enggau Pengabis Ati
11 Kena meretika sempama ke disebut Jesus, aram kitai nambahka penerang ngagai sempama pasal seiku orang ke bekebun ke benung ngeradu tanah. Lebuh iya ngereja nya, iya enda ngetu berundingka pasal rumah iya, endur diri sebilik enggau bala pangan iya diau. Iya mega berundingka pasal pemakai, musik, utai ti dikerinduka iya sereta endur beteduh. Iya inginka semua utai tu. Pengudah ngeradu tanah, pengingin iya ke utai tu majak balat nyentukka iya “malik kebelakang.” Taja pan mayuh agi pengawa ke patut dikereja sebedau betanam, orang ke bekebun nya limpang lalu tu meri asil ti enda manah ngagai pengawa iya. Lebuh meda tu, tuan iya amat asa ati ketegal iya ke udu limpang.
12 Perundingka chunto tu enggau chunto kemayaharitu. Orang ke bekebun nya ulih ngambarka orang Kristian ke baka ngembuan pengarap ti tegap tang ke bendar iya enda. Kitai ulih ngambarka seiku menyadi Kristian ke ngena mayuh jam ba pengawa nginjil. Taja pan iya datai ngagai gempuru sereta nginjil, iya enda badu berundingka gaya pengidup dunya ti dikerinduka iya. Iya majak berundingka utai nya. Pengujung iya, pengingin iya ke utai nya majak balat nyentukka iya “malik kebelakang.” Taja pan agi mayuh pengawa patut dikereja, iya enda “bepegai teguh ba jaku ti meri pengidup,” lalu tu ngachau pengawa nginjil iya. (Plp. 2:16) Jehovah, ‘Orang ke bempu umai,’ tusah ati enggau orang ke baka tu.—Luk. 10:2.
13 Utai ke ulih dipelajar kitai ari sempama tu endang terang. Kitai ngereja utai ti manah enti kitai datai ke gempuru sereta enggau nginjil. Tang kitai patut ngereja lebih agi ari nya enti kitai deka nyembah Jehovah enggau pengabis ati. (2 Ban. 25:1, 2, 27) Enti kitai terus rinduka utai ti udah dilengkaka kitai, kaul kitai enggau Jehovah deka rusak. (Luk. 17:32) Kitai ‘tau nyadi nembiak Perintah Petara,’ enti kitai “begedika penyai [sereta] bepegai teguh ba utai ti badas.” (Luk. 9:62; Rom. 12:9) Nya alai, semua kitai patut nentuka nadai utai ari dunya Sitan nekul kitai ari ngereja peneka Petara enggau pengabis ati.—2 Kor. 11:14; bacha Pilipi 3:13, 14.
Ngulihka Penemu Bup Kudus ti Berega
(Luke 8:3) enggau Joana, (bini Chusa, siku pemesai dalam opis Herod), enggau Susana, enggau mayuh indu ke bukai, ke ngena duit sida empu nulung Jesus enggau sida murid iya.
nota pelajar nwtsty ke Luk. 8:3
nulung Jesus enggau sida murid iya: Tauka “nyukung (nyediaka utai) ke sida.” Leka jaku Gerika di·a·ko·neʹo ulih mai reti nyediaka utai ti diguna orang bukai enggau ngulihka, manduk, nyediaka pemakai enggau utai bukai. Tu bisi dikena ba Luk. 10:40 (“mela utai”), Luk. 12:37 (“mela”), Luk. 17:8 (“intu”) enggau SKR. 6:2 (“meri orang makai”), tang ulih mega nyengkaum pengawa ke nyau ka sebaka. Bala indu ke disebut ba ayat 2 enggau 3 nyukung Jesus enggau bala murid iya, nulung sida nembuka pengawa ke diberi Petara. Lebuh ngereja nya, bala indu tu ngemuliaka Petara, lalu Iya nunjukka asai beterima kasih lebuh nyebut pasal pengerah jari sida ba Bup Kudus ngambika ulih dibacha orang mayuh nyentukka diatu. (J-lam. 19:17; Heb. 6:10) Leka jaku Gerika ke sama dikena ngambarka bala indu ba Mat. 27:55; Mrk. 15:41.
(Luke 9:49, 50) John lalu nyaut, ‘Pengajar, kami bisi udah meda orang siku muru antu dalam nama nuan, lalu kami nguji nagang iya, laban iya enda nitihka kitai.’ 50 Tang ku Jesus bejaku ngagai iya, “Anang nagang iya, laban orang ke enda ngelaban kita, setanah enggau kita.”
w08 15/3 31 ¶2
Penerang ari Bup Luke
9:49, 50—Nama kebuah Jesus enda nagang seiku lelaki ke muru antu taja pan lelaki nya enda nitihka iya? Jesus enda nagang lelaki nya ari muru antu laban eklisia Kristian bedau agi ditumbuhka. Nya alai, lelaki nya enda ibuh enggau Jesus, kena nunjukka iya bisi pengarap ngagai Jesus sereta muru antu.—Mark 9:38-40.
16-22 JULAI
RETA ARI BUP KUDUS | LUKE 10-11
“Sempama Pasal Orang Samaria ke Siru”
(Luke 10:29-32) Tang pengajar Adat nya ingin deka mandangka diri nemu utai ti disebut diri, nya alai iya lalu nanya Jesus, “Sapa pangan aku?” 30 Jesus lalu nyaut, “Nyadi sekali orang siku nurun ari Jerusalem mansang ngagai Jeriko. Bala penyamun ngamuk iya, nelanjaika iya, malu iya, lalu ninggalka iya setengah mati. 31 Seninjik bendar siku imam bejalai nengah jalai nya, lalu lebuh iya tepedaka orang nya, iya lalu ngelaung nengah tisi sepiak. 32 Baka nya mega siku orang Lewi, lebuh iya datai ba endur nya lalu tepedaka orang nya, iya mega ngelaung nengah tisi sepiak.
media nwtsty
Jalai Ari Jerusalem ngagai Jeriko
Jalai (1) ke dipandangka ba video pandak tu engka nitihka jalai ti sama enggau jalai dulu kelia ti besambungka Jerusalem enggau Jeriko. Pemanjai jalai tu lebih ari 20km (12 batu). Ketegal mayuh bala perumpak ba endur nya, raban soldadu diasuh bepalan ba dia kena nyaga pengelikun orang ke nengah jalai nya. Rome Jeriko (2) ba ujung menua puang Judea. Penyauh kuta Jeriko ti lama nya (3) 2 km (semina lebih ari 1 batu) ari kuta Rome.
w02 1/9 16-17 ¶14-15
“Iya Enda Nyebut Utai Ngagai Sida Enti Enda Ngena Jaku Sempama”
14 Kedua, perundingka sempama pasal seiku orang Samaria ke siru. Jesus madahka: “Nyadi sekali orang siku nurun ari Jerusalem mansang ngagai Jeriko. Bala penyamun ngamuk iya, nelanjaika iya, malu iya, lalu ninggalka iya setengah mati.” (Luke 10:30) Peratika jaku sempama ke dikena Jesus. Jesus ngena jalai “ari Jerusalem mansang ngagai Jeriko” ngambika orang meretika ajar ari sempama tu. Lebuh sempama tu dikena, Jesus ba Judea iya nya menua ke enda jauh ari Jerusalem. Orang ke ninga iya tentu nemu pasal jalai ke disebut iya. Mayuh orang nemu jalai nya enda likun ditengah, kelebih agi enti kediri. Jalai tu belingkuk sereta sunyi, lalu tu ngasuh bala perumpak senang deka belalai.
15 Bisi utai bukai ke ulih diperundingka pasal jalai “nurun ari Jerusalem mansang ngagai Jeriko” ke disebut Jesus. Nitihka cherita tu, seiku imam enggau seiku orang Lewi bisi nengah jalai tu tang seduai iya enda ngetu nulung orang ke dirumpak nya. (Luke 10:31, 32) Imam gawa ba Rumah Sembiang di Jerusalem lalu orang Lewi nulung sida. Mayuh imam enggau orang Lewi diau di Jeriko lebuh sida enda gawa ba Rumah Sembiang laban Jeriko semina 23 km [14 batu] ari Jerusalem. Nya alai, sida tentu nengah jalai nya. Peratika mega, imam enggau orang Lewi nurun “ari Jerusalem,” lebuh sida pulai ari Rumah Sembiang. Nya alai, nadai orang ulih ngumbai, ‘Seduai iya nyeliah ari nulung lelaki ke bakal nya laban iya baka ke mati, lalu sida enda ulih negu bangkai laban tu ngasuh sida enda ulih gawa ba Rumah Sembiang ketegal enda tuchi.’ (Adat Lewi 21:1; Penyampau 19:11, 16) Kati sempama Jesus endang terang nunjukka utai ke biasa ditemu orang ke ninga iya?
(Luke 10:33-35) Tang lebuh siku orang Samaria bejalai nengah jalai nya, iya tepedaka orang nya, lalu kasihka iya. 34 Iya mansang ngagai orang nya, nuang minyak enggau wain ba bakal orang nya, lalu malut bakal iya. Udah nya iya nepanka orang nya ba jelu iya empu, mai iya ngagai rumah numpang, lalu ngintu iya. 35 Hari siti, iya mantaika dua singkap duit pirak, lalu meri duit nya ngagai orang ke bempu rumah numpang nya. Ku iya, “Intu iya. Lebuh aku pulai kitu baru, aku deka mayar nuan ungkus ti lebih ari nya ti dikena nuan ngintu iya.”
nota pelajar nwtsty ke Luk. 10:33, 34
siku orang Samaria: Orang Judah selalu ngemaruhka orang Samaria lalu enggai begulai enggau sida. (Jhn. 4:9) Sekeda orang Judah ngena leka jaku “orang Samaria” lebuh nyalahka sereta enda ngayanka basa ngagai orang Samaria. (Jhn. 8:48) Jaku seiku pengajar bansa Judah bisi disebut ba Mishna: “Orang ke makai roti orang Samaria baka orang ke makai dagin babi.” (Shebith 8:10) Mayuh orang Judah enda pechayaka utai ke dipadah orang Samaria tauka nerima bantu ari orang Samaria. Jesus nemu runding jai ti dikembuan orang Judah ngagai orang Samaria, nya alai iya madahka ajar ti berat bendar ngena sempama tu ke selalu dikumbai sempama pasal orang Samaria ke siru.
nuang minyak enggau wain ba bakal orang nya, lalu malut bakal iya: Ba ditu, lutur Luke nulis sempama Jesus enggau bejimat ke madahka chara ngubat telih orang ke dirumpak maya nya. Minyak enggau wain suah dikena lebuh ngubat telih. Kadang-kadang, minyak nya diunsut ngagai telih kena ngurangka asai pedis ketegal bakal (banding Isa. 1:6), lalu tu mega ulih dikena munuh kuman. Luke mega madahka telih nya dibalut ngambika enda majak balat.
rumah numpang: Leka jaku Gerika mai reti “endur semua orang tauka jelu diterima.” Orang ke bejalai sereta jelu sida ulih diau ba endur ke baka tu. Orang ke nyaga rumah numpang nyediaka utai ti diguna orang ke bejalai lalu ngintu orang ke di baruh jaga iya enggau bebayar.
(Luke 10:36, 37) Dalam penemu nuan, sapa ari sida tiga nya pangan orang ke diamuk penyamun nya?” 37 Ku pengajar Adat nya nyaut, “Orang ke kasihka iya.” Jesus lalu bejaku ngagai iya, “Mupuk meh nuan lalu kereja baka nya.”
w98 1/7 31 ¶2
Orang Samaria Nunjukka Penyiru
Sempama Jesus nunjukka orang ti lurus ukai semina ngasika adat Petara tang mega nunda kualiti Petara. (Epesus 5:1) Ambika chunto, Bup Kudus madahka kitai ‘Petara endang amat enda bepilih mata.’ (Kereja Rasul 10:34) Kati kitai nunda teladan Petara dalam pekara tu? Sempama Jesus meransang kitai ngayanka penyiru ngagai orang enda ngira bansa, adat sereta pengarap. Ke bendar iya, orang Kristian diperansang ngereja “pengawa ti badas ngagai semua orang”—ukai semina ngagai orang ke sama tikas sosial, bansa, menua tauka bala menyadi Kristian.—Galatia 6:10.
Ngulihka Penemu Bup Kudus ti Berega
(Luke 10:18) Ku Jesus bejaku ngagai sida, “Aku meda Sitan labuh ari langit baka kilat.
nota pelajar nwtsty ke Luk. 10:18
Aku meda Sitan labuh ari langit baka kilat: Ke bendar iya, ba ayat tu, Jesus madahka utai ke deka nyadi ngagai Sitan ke deka dibuai ari serega. Tu baka ke udah nyadi. Pem. 12:7-9 madahka perang ke nyadi ba serega bisi kaul enggau lebuh Sitan dialahka pengudah Perintah Petara ditumbuhka. Nambahka nya, Jesus madahka Sitan enggau bala antu iya tentu deka dialahka maya perang nya, laban Petara udah meri kuasa ngagai 70 iku murid Jesus ti enda sempurna kena muru antu.—Luk. 10:17.
w08 15/3 31 ¶11
Penerang ari Bup Luke
10:18—Nama reti ku Jesus lebuh iya madah ngagai 70 iku murid iya: “Aku meda Sitan labuh ari langit baka kilat”? Jesus ukai madahka Sitan udah dibuai ari serega. Tu semina nyadi pengudah Kristus nyadi Raja di serega ba taun 1914. (Pem. 12:1-10) Lebuh Jesus madahka pasal utai ke deka nyadi tu baka ke udah nyadi, iya nunjukka utai tu tentu deka dikeamatka.
(Luke 11:5-9) Lalu ku iya bejaku ngagai sida, “Enti sema siku ari kita bisi siku pangan, lalu iya mansang ngagai pangan iya nya ba urung tengah malam lalu bejaku ngagai iya, “O wai, jali aku tiga iti tuku roti, 6 laban pangan aku ke pegi udah datai lalu aku nadai utai kena aku meri iya makai!” 7 Lalu pangan iya nya deka nyaut ari dalam, “Anang ngiruh aku! Pintu udah dikunchi, lalu kami menyanak udah beterenah tinduk. Aku enda ulih angkat meri nuan utai.” 8 Aku madah ngagai kita, taja pen iya enggai angkat lalu meri pangan iya utai, tang laban iya endang pangan iya, lalu laban pangan iya ituk minta, iya deka angkat lalu meri pangan iya utai ti dipeguna iya. 9 Nya alai aku madah ngagai kita: Pinta, lalu kita deka nerima; giga, lalu kita deka nemu; tekung, lalu pintu deka dibuka ke kita.
nota pelajar nwtsty ke Luk. 11:5-9
O wai, jali aku tiga iti tuku roti: Ba adat Timur Tengah, pengawa nerima temuai enggau pengabis ati ulih dipeda ba sempama tu. Ketegal bisi utai ke nyadi ba pejalai sida, temuai engka datai enggau enda disadang ba tengah malam. Taja pia, orang ke bempu rumah ngasaika diri patut meri pemakai ke temuai nya. Iya mega sanggup ngiruh pangan iya ketegal deka minta jali pemakai.
Anang ngiruh aku: Lelaki ke ba sempama tu tusah deka nulung pangan iya. Tu ukai ketegal iya enda ibuhka pangan iya tang ketegal maya nya iya udah tinduk. Ba jeman nya, rumah orang ke seranta ke suah agi ngembuan semina siti aja bilik ti besai. Enti lelaki nya dani, iya engka ngachau diri sebilik iya kelebih agi bala anak iya ke benung tinduk.
ituk minta: Leka jaku Gerika ke dikena ulih mai reti “enda baruh ati” tauka “enda malu.” Tang ba konteks tu, iya mai reti pengawa ti enda ngetu minta. Orang ke disebut ba sempama Jesus tu enda malu terus minta utai ke diguna iya, lalu Jesus mega ngasuh bala murid iya anang ngetu besampi.—Luk. 11:9, 10.
Macha Bup Kudus
(Luke 10:1-16) Udah nya Tuan lalu milih tujuh puluh iku sida ti bukai, lalu ngasuh sida bejalai dulu ari iya, dua-dua iku begulai, ngagai genap buah nengeri enggau endur ti deka digusung iya empu. 2 Ku iya bejaku ngagai sida, “Utai ti diketau mayuh, tang orang ke ngetau mimit. Nya alai besampi minta orang ke bempu umai ngirumka mayuh agi orang ngetau umai Iya. 3 Mupuk meh kita! Ingat, aku ngasuh kita bejalai baka anak domba ngagai raban ukui kampung. 4 Anang mai kandi duit, tauka kambut, tauka selipar. Lalu anang nabi orang di rantau jalai. 5 Sebarang rumah alai kita tama, sebut dulu, “Awakka pemaik meruan dalam rumah tu.” 6 Enti orang ke rinduka pemaik bisi dalam rumah nya, pemaik kita deka mengkang ba orang nya. Enti enda pia, pemaik nya deka pulai baru ngagai kita. 7 Diau ba rumah nya, lalu empa irup sebarang utai ti diberi sida ngagai kita, laban orang ke gawa endang patut diberi gaji. Anang mindah ari rumah sebuah ngagai rumah sebuah. 8 Genap kali kita datai ba sebuah nengeri, lalu sida nerima kita, empa sebarang utai ti diberi ngagai kita. 9 Geraika orang ke sakit dalam nengeri nya, lalu sebut ngagai sida, ‘Perintah Petara udah datai semak kita.’ 10 Tang genap kali kita tama ngagai nengeri, lalu sida enda nerima kita, bejalai kita nengah jalai raya di nengeri nya lalu sebut, 11 ‘Indah abus ari nengeri kita empu, ti lekat ba kaki kami, deh ditesai kami, kena ngelaban kita. Tang awakka kita nemu tu: Perintah Petara udah datai semak!’ 12 Aku madah ngagai kita, lebuh Hari Pechara ila, Petara deka lebih agi kasihka Sodom ari ke kasihka nengeri nya! 13 ‘Tulah meh nuan, Korasin! Tulah meh nuan, Betsaida! Laban enti kereja ajih ti dikereja dalam seduai, udah dikereja di Tire enggau di Sidon, sida tentu lama udah nesal ati, lalu ngerasuka kain guni, lalu ngerabu pala diri enggau amau. 14 Tang lebuh Hari Pechara ila Tire enggau Sidon deka nyamai agi ari kita. 15 Lalu nuan, Kapernaum! Kati nuan deka diangkat ke serega? Enda. Nuan deka dibuai ngagai [Kubur, NW]!” 16 Barang sapa mendingka kita, mendingka aku, lalu barang sapa nulak kita, nulak aku. Lalu barang sapa nulak aku, nulak Iya ke ngirumka aku.’
23-29 JULAI
RETA ARI BUP KUDUS | LUKE 12-13
“Kita Lebih Agi Berega Ari Burung Pipit”
(Luke 12:6) Ukai enda lima iku burung pipit dijual ngena rega dua sen aja? Tang taja pia, nadai siku sida nya enda dikingatka Petara.
nota pelajar nwtsty ke Luk. 12:6
burung pipit: Leka jaku Gerika strou·thiʹon mai reti sebarang burung mit, tang suah agi nunjuk ngagai burung pipit, burung ti pemadu murah ke dijual nyadika pemakai.
(Luke 12:7) Indah semua lambar buk ba pala kita deh udah diitung magang. Nya alai anang takut. Kita lebih agi berega ari burung pipit!
nota pelajar nwtsty ke Luk. 12:7
indah semua lambar buk ba pala kita diitung magang: Purata penyampau lambar buk mensia nya lebih ari 100,000. Penemu Jehovah ti silik ba pekara ti mit nunjukka Iya amat ibuhka tiap iku murid Kristus.
(Luke 12:7) Indah semua lambar buk ba pala kita deh udah diitung magang. Nya alai anang takut. Kita lebih agi berega ari burung pipit!
cl 241 ¶4-5
Nadai Utai Ulih ‘Nyeraraka Kitai Ari Pengerindu Petara’
4 Keterubah, Bup Kudus madah Petara ngumbai tiap iku nembiak Iya berega ba mata Iya. Ambika chunto, ku Jesus: “Dua iku burung pipit dijual enggau rega sesingkap duit seling ke mit rega, enda pia? Taja pia, nadai siku sida labuh ke tanah, enda ditemu Apai kita. Indah semua lambar buk ba pala kita deh udah diitung magang. Nya alai, anang takut. Kita berega agi ari burung pipit!” (Matthew 10:29-31, NW) Perundingka nama reti jaku Jesus tu ba orang ke ninga maya kurun keterubah.
5 Kitai engka nanya nama kebuah orang maya nya meli burung pipit. Ba jeman Jesus, burung pipit burung ke pemadu murah dijual nyadika pemakai. Peratika enggau sesingkap duit seling ke mit rega, orang ulih meli dua iku burung pipit. Tang Jesus madahka enti orang ngena dua singkap duit seling, iya bulih ukai semina empat iku tang lima iku burung pipit. Burung kelima nya ditambahka laban iya enda berega. Engka burung nya enda berega ba mata mensia, tang baka ni enggau ba mata Penempa? Ku Jesus: ‘Nadai siku sida nya [nyengkaum siku ke ditambah] enda dikingatka Petara.’ (Luke 12:6, 7) Diatu kitai mereti nama reti ku Jesus. Enti seiku burung pipit amat berega ba mata Petara, mensia tentu lebih agi berega ba mata Iya! Nitihka utai ke diterangka Jesus, Jehovah nemu enggau silik pasal kitai. Indah lambar buk ba pala kitai pan iya nemu!
Ngulihka Penemu Bup Kudus ti Berega
(Luke 13:24) ‘Enggau naka ulih tama nengah pintu ti sempit, laban, aku madah ngagai kita, mayuh orang deka nguji tama, tang enda ulih.
nota pelajar nwtsty ke Luk. 13:24
Enggau naka ulih: Tauka “Terus bebendar agi.” Jesus nerangka ngereja utai enggau pengabis ati nya beguna kena nengah pintu ti sempit. Dalam konteks tu, rambai jaku tu mai reti “Kereja enggau pengabis iya.” Jaku pengawa Gerika a·go·niʹzo·mai bisi kaul enggau jaku nama Gerika a·gonʹ, ke suah ditujuka ngagai pekit ba lumba main. Ba Heb. 12:1, jaku nama tu dikena ngambarka “lumba” orang Kristian ba pengidup sida. Jaku nama tu mega suah mai reti “bebendar” (Plp. 1:30; 1 Tim. 6:12) tauka “belaban” (2 Tim. 4:7). Jaku pengawa Gerika ke dikena ba Luk. 13:24 disalin “belumba” (1 Kor. 9:25) enggau “bebendar” (Kol. 1:29; 4:12; 1 Tim. 4:10). Ketegal rambai jaku tu bisi kaul enggau pekit ba lumba main, sekeda ngumbai utai ke dipadah Jesus engka ulih dibandingka enggau orang ke bepekit ba lumba main, ke bebendar ngena semua pengering iya ngambika ulih menang.
(Luke 13:33) Tang aku enda tau enda majakka pejalai aku sehari tu, enggau pagila, enggau lusa, laban nadai nabi kala mati ari luar Jerusalem.
nota pelajar nwtsty ke Luk. 13:33
nadai: Tauka “enda patut (enda ulih digambarka).” Taja pan nadai jaku ti ditulis bala nabi ti madahka Messiah deka mati di Jerusalem, tang runding tu ulih dipeda ari Dan. 9:24-26. Pia mega, enti orang Judah deka munuh seiku nabi kelebih agi Messiah, sida tentu deka ngereja nya di Jerusalem. Raban Kunsil ke bisi 71 iku orang betemu di Jerusalem lalu orang ke dikumbai nabi pelesu deka dipechara ba dia. Jesus mega nemu Jerusalem nya endur pemeri tunu ke Petara sereta endur domba Paska dibunuh. Utai ti nyadi endang amat nitihka jaku Jesus. Iya dibai ngagai mua raban Kunsil di Jerusalem lalu diukum. Nya alai, iya mati nyadi ‘anak domba pengerami Paska’ di Jerusalem.—1 Kor. 5:7.
Macha Bup Kudus
(Luke 12:22-40) Lalu ku iya bejaku ngagai sida murid iya, ‘Nya alai aku madah ngagai kita, anang irauka pengidup kita, utai ti deka diempa kita, tauka pasal tubuh, tauka pasal gari. 23 Laban pengidup beguna agi ari pemakai, lalu tubuh beguna agi ari gari. 24 Peratika burung kak: sida nadai nanam utai, tauka ngetau, lalu sida nadai setor tauka pelabuh, tang taja pia, Petara nupi sida! Kita lebih agi berega ari burung! 25 Kati pengirau kita ulih nambahka umur kita sejam? 26 Enti kita enda ulih ngereja utai ti ngemit nya, nama kebuah kita irauka utai bukai? 27 Peratika bungai bakung, jalai sida tumbuh. Sida enda gawa, tauka betenun. Tang aku madah ngagai kita, indah Solomon enggau semua pengaya iya, deh nadai gari ti ngemanah sida bungai nya. 28 Tang enti Petara meri gari ngagai rumput ti idup sehari tu, lalu pagila dibuai ngagai api, Petara tentu deka lebih agi meri gari ngagai kita, O kita ke mit pengarap! 29 Lalu anang irauka utai ti deka diempa tauka diirup kita. 30 Semina orang ke enda nemu Petara aja ke irauka utai nya lalu Apai kita ti di serega nemu kita begunaka utai nya. 31 Tang giga dulu Perintah Petara, lalu semua utai nya deka mega diberi ngagai kita. 32 “Anang takut, kita ke mimit tu, laban Apai kita endang gaga ati deka meri Perintah ngagai kita. 33 Jual semua reta tengkira kita, lalu beri sedekah ngagai orang ke seranta. Gaga ke diri empu kambut duit ti enda nemu luya, lalu simpan pengaya ke diri empu di serega, alai penchuri, enggau indu gegat enda ulih ngerusak. 34 Laban dia alai pengaya kita, dia meh ati kita. 35 “Seruran besedia, lalu awakka lampu kita seruran menyadi belama, 36 baka orang gaji ke nganti tuan sida pulai ari [pengerami, NW] tikah, ngambika sida ulih muka pintu ke iya, lebuh iya datai lalu nekung pintu. 37 Beberekat meh orang gaji ke ditemu tuan sida enda tinduk lebuh iya datai. Enggau bendar aku madah ngagai kita, iya deka nyendiaka diri, lalu ngasuh sida belatur duduk, lalu mela sida. 38 Beberekat meh orang gaji nya enti tuan sida tetemuka sida udah sedia, lebuh iya datai ba urung tengah malam tauka ba urung dini hari. 39 Tang awakka kita nemu tu: enti orang ke bempu rumah nemu maya penchuri datai, iya tentu deka bejaga enggai ke penchuri tama ngagai rumah iya. 40 Kita pen enda tau enda mega besedia, laban Anak Mensia deka datai ba maya ti enda disangka kita.’
30 JULAI–5 OGOS
RETA ARI BUP KUDUS | LUKE 14-16
“Sempama Pasal Seiku Anak ke Tesat”
(Luke 15:11-16) Lalu ku iya bejaku, “Orang siku bisi dua iku anak lelaki. 12 Anak iya ke biak bejaku enggau apai iya, ku iya, “Apai, beri aku semua ungkup aku ari reta tengkira kitai.” Orang nya lalu bedua reta tengkira iya ngagai anak iya ke dua iku nya. 13 Dua tiga hari udah bekau nya, anak iya ke biak ngempuruka semua reta tengkira iya, lalu bejalai ngagai menua ti jauh, lalu masau reta tengkira iya idup ngena chara ti enda menuku. 14 Lebuh semua reta iya udah abis, lapar pungkang lalu nyadi di serata menua nya, lalu iya belabuh suntuk. 15 Nya alai iya makai gaji ba orang siku di menua nya. Orang nya lalu ngasuh iya gawa ba umai iya, engkani babi. 16 Iya tetenguk amat deka ngisi perut iya ngena [pemakai babi, NW] tang nadai ga orang meri iya utai diempa.
nota pelajar nwtsty ke Luk. 15:11-16
Orang siku bisi dua iku anak lelaki: Sekeda pekara ba sempama pasal anak ke tesat nya amat spesial. Tu siti ari sempama ti pemadu panjai ke kala diberi Jesus. Siti pekara ti narit ati iya nya pasal kaul ba diri sebilik. Ba sempama ke bukai, Jesus suah ngambarka utai ke enda idup, baka bemacham bengkah benih tauka tanah. Pia mega, pasal kaul entara tuan enggau orang gaji iya. (Mat. 13:18-30; 25:14-30; Luk. 19:12-27) Tang, ba sempama tu, Jesus ngemeratka kaul ti rapat entara apai enggau anak lelaki iya. Mayuh orang ke ninga sempama tu engka nadai ngembuan apai ti manah sereta pengasih ke baka nya. Sempama tu ngambarka penyiru enggau pengerindu ti dalam ke dikembuan Apai kitai Jehovah ke anak mensia Iya, enda ngira sida ke tetap ati ngagai Iya tauka sida ke pulai baru ngagai Iya.
anak ke biak: Nitihka Adat Moses, anak ke tuai nerima ungkup pesaka dua kali lipat. (U-dat. 21:17) Tu reti pesaka ke diterima anak ke biak setengah ari menyadi tuai iya.
masau: Leka jaku Gerika ke dikena ba ditu mai reti “mambarka (ngagai endur bukai).” (Luk. 1:51; SKR. 5:37) Ba ditu, leka jaku tu mai reti dibasau sereta dirua.
idup ngena chara ti enda menuku: Tauka “pengidup ti dibasau.” Leka jaku Gerika ke nyau ka sebaka dikena ba Eps. 5:18; Tit. 1:6.
engkani babi: Babi jelu ti enda tuchi nitihka Adat Moses. Nya alai, tu pengawa ti ngemaluka ba orang Judah.—Lew. 11:7, 8.
pemakai babi, NW: Gaya pengidup anak ke biak enda menuku nyentukka iya sanggup makai pemakai babi.—Peda nota pelajar ke Luk. 15:15.
(Luke 15:17-24) Tang lebuh iya nyau sedarka pemeli diri, iya lalu bejaku, “Semua orang gaji apai aku diberi pemakai lebih ari chukup, tang aku ditu mati lapar! 18 Aku deka angkat lalu pulai ngagai apai aku, lalu bejaku ngagai iya, ‘Apai, aku udah bedosa ngelaban serega enggau ngelaban nuan. 19 Aku enda patut agi dikumbai anak nuan. Gaga aku nyadi orang gaji nuan.’ ” 20 Nya alai iya angkat lalu pulai ngagai apai iya. Tang lebuh iya agi jauh ari rumah, apai iya tepedaka iya, lalu sinu ati ke iya. Iya belanda lalu merap iya, lalu nyium iya. 21 Anak iya nya lalu bejaku ngagai iya, “Apai, aku udah bedosa ngelaban serega enggau ngelaban nuan. Aku enda patut agi dikumbai anak nuan.” 22 Tang ku apai iya bejaku ngagai bala ulun iya, “Bai jampat baju panjai ti pemadu manah, lalu rasukka ba iya. Rasukka tinchin ba tunjuk iya, enggau selipar ba kaki iya. 23 Ambi lalu sayat anak sapi ti pemadu gemu. Kitai deka [makai enggau berami, NW]! 24 Laban anak aku tu udah mati, tang diatu iya idup baru. Iya udah lenyau, tang diatu iya udah ditemu.” Sida lalu [berami, NW].
nota pelajar nwtsty ke Luk. 15:17-24
orang gaji: Anak ke biak berunding deka minta apai iya nerima iya nyadi orang gaji. Orang gaji tu ukai pekereja ti tetap tang orang luar ke digaji, ke diambi bekereja ba sesiti hari lebuh begunaka sida.—Mat. 20:1, 2, 8.
nyium iya: Leka jaku Gerika ba ditu ulih disalin “nyium iya enggau lembut,” tauka “nyium iya enggau pengerindu.” Tu nunjukka iya besedia nyambut penatai anak iya ke nesal ati.
dikumbai anak nuan: Sekeda manuskrip nambah: “Gaga aku nyadi orang gaji nuan,” tang mayuh manuskrip ti lama nadai nyebut rambai jaku tu. Sekeda pakar Bup Kudus ngumbai rambai jaku ke ditambah dikena ngambika sejalai enggau Luk. 15:19. Nya alai, New World Translation of the Holy Scriptures edisyen 2013 dalam bansa jaku English nadai ngembuan rambai jaku tu ba Luke 15:21.
baju panjai . . . tinchin . . . selipar: Tu ukai baju panjai biasa tang iya ti pemadu manah—engka baju panjai ti disulam lalu disedia ke temuai ti dipebasa. Pengawa ngerasukka tinchin ba tunjuk anak iya ngayanka pengerindu apai nya lalu mulaika basa enggau pangkat ngagai anak iya. Ke suah iya, orang gaji enda ngena tinchin enggau selipar. Nya alai, apai nya enggau terang nunjukka iya nerima baru anak iya ba ruang bilik iya.
(Luke 15:25-32) “Lebuh maya nya, anak tuai iya agi di umai. Lebuh iya pulai ari umai, lalu datai semak rumah, iya ninga munyi musik enggau munyi orang ke betanda. 26 Iya lalu ngangauka siku ulun, lalu nanyaka reti utai nya. 27 Ku ulun nya nyaut, “Menyadi nuan udah datai, lalu apai nuan udah nyayat anak sapi ti pemadu gemu, laban menyadi nuan udah pulai enggau selamat.” 28 Iya lalu ringat lalu enggai tama. Apai iya pansut, lalu belabuh ngumbuk iya. 29 Tang ku iya nyaut apai iya, “Dinga nuan! Betaun-taun aku udah gawa ke nuan baka ulun, lalu aku nadai udah kala enda ngasika nuan. Taja pia, nuan nadai kala meri aku anak kambin, siku pen nadai, kena aku makai selamat enggau pangan aku. 30 Tang lebuh anak nuan tu datai ditu, ke udah masau semua reta tengkira nuan enggau indu sundal, nuan nyayat anak sapi ti gemu ke iya!” 31 Ku apai iya bejaku ngagai iya, “Anak, nuan endang seruran enggau aku, lalu semua utai ti dikemisi aku endang enggi nuan magang. 32 Tang kitai enda tau enda makai selamat lalu rami gaga ati, laban menyadi nuan tu udah mati, lalu diatu iya udah idup baru. Iya udah lenyau, lalu diatu iya udah ditemu.”
Ngulihka Penemu Bup Kudus ti Berega
(Luke 14:26) ‘Barang sapa datai ngagai aku lalu enda lebih agi rindu ke aku ari iya ke rindu ke apai, indai, bini enggau anak, menyadi lelaki enggau menyadi indu, indah seput iya empu, enda tau nyadi murid aku.
jy Pel. 84 196 ¶2-4
Nama Kebuah Tanggung Pengawa Nyadi Murid Jesus nya Utai ti Berat?
Lebuh sida bejalai, Jesus madahka utai ti ngasuh sekeda tekenyit: ‘Barang sapa datai ngagai aku lalu enda lebih agi rindu ke aku ari iya ke rindu ke apai, indai, bini enggau anak, menyadi lelaki enggau menyadi indu, indah seput iya empu, enda tau nyadi murid aku.’ (Luke 14:26) Tang nama reti jaku iya?
Tu ukai reti semua orang ke nyadi murid Jesus patut begedika diri sebilik enggau kaban belayan sida. Tang, sida patut lebih agi rindu ke Jesus, ukai baka seiku lelaki ke enggai enggau pengerami makai besai ketegal udah bebini baka ke disebut ba sempama Jesus. (Luke 14:20) Peturun orang Judah ke benama Jakop madahka iya rindu agi ke Rachel ari iya ti rinduka Leah.—Pemungkal 29:31.
Peratika, Jesus madahka murid iya patut enda rindu ke “seput iya empu,” tauka nyawa iya. Tu reti iya murid ti bendar patut rinduka Jesus lebih ari iya rinduka nyawa diri empu, indah sanggup mati. Endang terang, nyadi murid Kristus pengawa ti berat. Pemutus deka nyadi murid Kristus patut diperundingka enggau dalam.
(Luke 16:10-13) Barang sapa tau dikarapka ngemataka utai ti mimit, tau mega dikarapka ngemataka mayuh utai, lalu orang ke enda tau dikarapka ngemataka pekara ti mit, enda mega tau dikarapka ngemataka pekara ti besai. 11 Nya alai, enti kita enda tau dikarapka ngemataka pengaya dunya, sapa deka ngarapka kita ngemataka pengaya ti bendar? 12 Lalu enti kita enda tau dikarapka ngemataka utai orang bukai, sapa deka meri kita utai ti endang enggi kita? 13 ‘Nadai orang ulih betuaika dua iku tuan, laban iya deka begedika siku lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’
Ngiga Pengaya ti Bendar
7 Bacha Luke 16:10-13. Ba cherita Jesus, pemesai nya deka begulai manah enggau orang bukai ketegal deka bulih penguntung ke diri empu. Taja pia, Jesus deka bala murid iya nyadi pangan Jehovah enggau iya, tang ukai ke penguntung diri empu. Jesus deka kitai nemu, chara kitai ngena pengaya ti enda lurus ulih nunjukka sekalika kitai tetap ati ngagai Petara. Baka ni kitai ulih ngereja nya?
8 Siti chara kena nunjukka diri tetap ati enggau reta ti dikemisi kitai iya nya enggau meri pemeri ngagai pengawa nginjil di serata dunya ke udah dipadahka Jesus deka nyadi. (Mat. 24:14) Seiku anak mit indu di menua India ngembuan siti tabung duit ke mit, lalu iya mupuk-mupuk nyimpan duit siling dalam tabung nya. Iya mega sanggup enda meli ayam. Pengudah tabung duit nya penuh, iya meri semua duit ke disimpan iya ngambika dikena ba pengawa nginjil. Seiku menyadi Kristian lelaki di menua India bisi ladang buah nyiur. Iya meri mayuh buah nyiur ngagai opis penyalin jaku Malayalam. Ketegal opis nya patut meli buah nyiur, iya ngasaika pemeri iya beguna agi ari ke meri duit. Nya meh “pemintar.” Pia mega, bala menyadi di menua Greece selalu meri minyak kana, kiju, sereta pemakai bukai ngagai ruang bilik Betel.
Macha Bup Kudus
(Luke 14:1-14) Nyadi sekali, lebuh hari Sabat, iya mansang makai ngagai rumah siku tuai orang Parisi, lalu sida bebendar nengkilaka iya. 2 Lebuh maya nya siku lelaki ke sup kaki jari, bisi di mua iya. 3 Jesus lalu nanya ngagai sida pengajar Adat enggau orang Parisi, “Kati kitai tau ngeraika orang lebuh hari Sabat, tauka enda?” 4 Tang sida enda bemunyi. Nya alai Jesus megai orang nya, lalu ngeraika iya. Iya lalu ngasuh orang nya pulai. 5 Iya lalu bejaku ngagai sida, “Enti anak kita, tauka jelu sapi kita labuh ngagai telaga lebuh hari Sabat, enda ke kita deka tekala nya narit iya pansut?” 6 Sida lalu enda ulih nyaut nya. 7 Lebuh Jesus meda chara sekeda bala [ke datai, NW] milih endur ti pemadu manah, iya lalu madahka sempama tu ngagai sida, 8 “Lebuh orang [mai kita datai, NW] ngagai [pengerami, NW] tikah, anang duduk ba endur ti pemadu manah, enggai ke orang ke tinggi agi pangkat ari kita bisi [dipinta datai, NW], 9 lalu orang ke [mai kita datai, NW], deka datai lalu nyebut enggau nuan, “Awakka iya duduk ditu,” lalu nuan deka malu, lalu duduk ba endur ti pemadu baruh. 10 Tang lebuh kita [dipinta datai, NW], mansang ngagai endur ti pemadu baruh lalu duduk dia, ngambika orang ke empu pengawa datai lalu bejaku ngagai nuan, “Unggal, duduk ke atas kitu ke agi.” Nya baru nuan dibasa semua orang ke sama duduk ba mija nya enggau nuan. 11 Laban semua orang ke ngeninggika diri, deka dikemaruhka, lalu orang ke ngemaruhka diri, deka ditinggika.” 12 Lalu ku iya bejaku ngagai orang ke mai iya makai, “Lebuh nuan [mai orang datai makai tengah hari tauka makai malam, NW], anang ngambi pangan tauka menyadi lelaki, tauka kaban belayan nuan, tauka pangan nuan ke kaya, enggai ke sida [minta nuan datai, NW], lalu malas pemanah nuan. 13 Tang lebuh nuan nyendiaka pengerami makai besai, [bai, NW] orang ke seranta, ke kait-kupit, ke lemi, enggau ke buta. 14 Nya baru nuan deka bulih berekat, laban sida enda ulih malas pemanah nuan. Nuan deka dibayar lebuh orang ke lurus diangkatka ari mati.”