PELAJAR 10
Baka Ni Gempuru Saksi-Saksi Jehovah Ulih Nulung Nuan?
Kala nuan dibai enggau gempuru Saksi-Saksi Jehovah? Enti nuan bedau kala enggau, nuan tentu berasai irau lebuh keterubah kali datai. Nuan engka berunding: ‘Nama nyadi ba gempuru nya? Nama kebuah iya beguna? Nama kebuah aku patut enggau?’ Ba pelajar tu, nuan deka belajarka baka ni begempuru ulih nulung nuan semak ngagai Petara, sereta penguntung ke deka diulih nuan empu.
1. Nama kebuah nya beguna kitai begempuru?
Seiku penulis Bup Kudus madahka: ‘Aku muji Jehovah lebuh aku begempuru enggau bala nembiak Iya.’ (Masmur 26:12) Di serata dunya, Saksi-Saksi Jehovah berasai amat gaga ati lebuh sida begulai ba gempuru. Tiap minggu, sida begulai nyembah Jehovah, lagu muji Iya, sereta besampi. Tiap taun, sida mega bisi beberapa iti gempuru ti besai agi.
2. Nama ulih dipelajarka nuan ba gempuru?
Lebuh begempuru, kami seruran ngena Bup Kudus, “nerangka iya ngambika orang mayuh meretika iya.” (Bacha Nehemiah 8:8.) Ba gempuru, nuan ulih belajar pasal Jehovah sereta kualiti Iya baka pengerindu. Tu deka nulung nuan datai semak ngagai Iya. Pia mega, Jehovah deka ngajar nuan chara idup enggau lantang ati.—Isaiah 48:17, 18.
3. Baka ni orang ke bejaku enggau nuan ba gempuru ulih nulung nuan?
Jehovah meransang kitai ngambika “berundingka chara kitai tau nyungkak pangan diri ngayanka pengerindu lalu ngereja pengawa ti badas.” Iya mega nangkan kitai ngambika “enda ngelengkaka pengawa begempuru.” (Hebrew 10:24, 25) Ba gempuru, nuan ulih betemu enggau orang ke datai ari mayuh bengkah gaya pendiau. Nuan deka betemu enggau kaban ti manah sereta rindu belajar pasal Petara. Nuan ulih nemu asai ati sida pasal Petara enggau Bup Kudus. (Bacha Rome 1:11, 12.) Nuan mega ulih bekunsika penanggul ke ditapi nuan enggau sida sereta belajarka chara mutarka penanggul nya ari sida. Tu meh sekeda ari berekat ke ulih diasaika nuan lebuh datai begempuru enggau tetap!
BELAJAR MAYUH AGI
Belajar mayuh agi pasal gempuru Saksi-Saksi Jehovah sereta kebuah kitai patut enggau naka ulih datai begempuru.
4. Gempuru Saksi-Saksi Jehovah
Orang Kristian jeman kelia seruran begelumu nyembah Jehovah. (Rome 16:3-5) Bacha Kolosi 3:16, lalu kerandauka tanya tu:
Baka ni orang Kristian ba abad keterubah nyembah Jehovah?
Kemayaharitu, Saksi-Saksi Jehovah mega begempuru enggau tetap. Kena nemu utai ke nyadi ba gempuru sida, mainka VIDEO. Udah nya, ayanka gambar ke nunjukka pengawa begempuru, lalu kerandauka tanya tu:
Nama utai ti sama entara utai ke nyadi ba Palan Gempuru Saksi-Saksi Jehovah enggau utai ke dibacha nuan ba Kolosi 3:16?
Sejalai enggau video tauka gambar pasal pengawa begempuru, nama utai ti dikerinduka nuan?
Bacha 2 Korint 9:7, lalu kerandauka tanya tu:
Nama kebuah nuan enda ibuh mayar duit pupu lebuh datai ngagai gempuru Saksi-Saksi Jehovah?
Kelansa program ke siti ari gempuru minggu tu enggau pengajar Bup Kudus nuan.
Ni begian ke dikerinduka nuan tauka ke beguna ba nuan?
Nemu nuan?
Ba jw.org, nuan ulih ngiga endur sereta jam begempuru ba serata dunya.
Bisi cheramah, lakun, sereta video maya gempuru. Gempuru tu berengkah sereta ditutup enggau lagu sereta sampi
Ba sekeda begian, sida ke datai bisi peluang meri komen sereta madahka runding sida
Enda ngira diri sebilik, orang ke bedau kawin, sida ke tuai, bala anak—semua orang dikelaluka datai
Gempuru kitai pechuma. Saksi-Saksi Jehovah nadai ngumpul duit pupu. Tama mega enda bebayar
5. Bebendar nguji datai ke gempuru
Ninting taun, Jesus sebilik bejalai kira-kira 100 km ngambika ulih enggau siti pengawa ti spesial. Ari Nasaret sida patut bejalai nengah endur ti bebukit ngambika ulih datai ngagai Jerusalem. Bacha Luke 2:39-42, lalu kerandauka tanya tu:
Ba runding nuan, kati pejalai tu begunaka mayuh pengawa?
Nama utai ke patut digaga tauka dilengkaka nuan ngambika ulih datai begempuru?
Ba runding nuan, kati nuan patut bebendar nguji datai ke gempuru taja pan nya tusah? Nama kebuah?
Bup Kudus madahka pengawa begempuru nya amat beguna. Bacha Hebrew 10:24, 25, lalu kerandauka tanya tu:
Nama kebuah kitai patut datai begempuru enggau tetap?
BISI ORANG MADAH: “Nadai guna datai gempuru. Belajar ba rumah aja udah chukup.”
Nama ayat tauka chunto dalam Bup Kudus ke nunjukka utai ti dikedekaka Jehovah kereja kitai?
LANSA
Enti nuan ngagai gempuru, nuan ulih belajar mayuh utai pasal Jehovah, negapka kaul nuan enggau Iya, sereta nyembah Iya begulai enggau orang bukai.
Ulang Kaji
Nama kebuah Jehovah dekaka kitai begempuru?
Nama utai ke deka dipelajarka nuan ba gempuru Saksi-Saksi Jehovah?
Nama penguntung bukai ke deka diulih nuan ari gempuru Saksi-Saksi Jehovah?
ARAM BELAJAR
Kati nuan takut datai ngagai gempuru? Peda meh peneleba seiku lelaki ke kala ngasaika nya, lalu baka ni iya berengkah rindu datai begempuru.
Dinga meh asai ati seiku nembiak pasal gempuru sereta utai ke digaga iya ngambika ulih begempuru enggau tetap.
Nama asai orang bukai pasal begempuru? Bacha meh artikel tu.
“Nama Kebuah Begempuru ba Palan Gempuru?” (Artikel ba laman web jw.org)
Peda meh baka ni seiku gangster berubah pengudah iya datai ngagai gempuru Saksi-Saksi Jehovah.