Jesus Meri Jaku Lalau pasal Pengaya

Lebuh Jesus makai ba rumah siku orang Parisi, beribu-ribu iku orang begelumu ba luar nganti iya. Utai tu pan kala nyadi ba Galili. (Mark 1:33; 2:2; 3:9) Ba Judea, mayuh orang deka betemu enggau Jesus sereta ninga ajar ari iya. Sida ngayanka ulah ti jauh bebida ari orang Parisi ke sama makai enggau Jesus.

Utai ti disebut Jesus mai reti ti besai ngagai bala murid iya, ku iya: “Bejaga ari ragi orang Parisi, iya nya ulah sida ke pura-pura ngapa.” Suba, Jesus kala meri jaku tangkan tu. Tang utai ke baru nyadi ba rumah orang Parisi nya nunjukka jaku lalau Jesus tu amat penting. (Luke 12:1; Mark 8:15) Orang Parisi nunjukka diri alim laban sida deka ngelalaika penyai sida. Nya alai, penyai sida patut dipandangka ngambika orang nemu. Jesus madah: “Semua utai ti dilalaika enggau bebendar deka diayanka. Lalu nama-nama utai ti diresiaka deka ditemu.”—Luke 12:2.

Engka mayuh orang ke begelumu ba dia datai ari Judea, lalu sida engka nadai kala ninga ajar Jesus maya iya ba Galili. Nya alai, iya ngulang baru poin utama ke kala diajar iya suba. Jesus meransang sida: “Anang takutka sida ke ulih munuh tubuh tang udah nya enda ulih ngereja nama-nama utai agi.” (Luke 12:4) Baka ke kala digaga Jesus sebedau tu, iya meransang bala peninga iya arapka Petara tentu deka nyaga sida. Sida mega patut nerima sapa Anak Mensia ti bendar, lalu bepanggai ba Petara nyediaka utai ke diguna sida.—Matthew 10:19, 20, 26-33; 12:31, 32.

Udah nya siku lelaki ari bala orang mayuh bejaku ngagai Jesus: “Pengajar, asuh menyadi lelaki aku meri sebagi ari reta ke ditinggalka apai kami ngagai aku.” (Luke 12:13) Adat madahka anak tuai patut nerima reta dua kali lipat mayuh agi ari ungkup anak ke bukai. (Ulang Adat 21:17) Tang, lelaki nya engka deka nerima mayuh agi ari ke patut diterima iya. Jesus enggai masuk champur enggau penanggul nya. Nya alai iya nanya lelaki nya: “Sapa ke milih aku ngakim pekara tu tauka magi reta nya ke seduai?”—Luke 12:14.

Udah nya Jesus meri jaku lalau ngagai sida: “Bejimat kita lalu seliahka diri ari semua macham pengamu. Taja pan sesiku orang bisi mayuh reta, reta nya enda ulih meri iya pengidup.” (Luke 12:15) Enda ngira berapa mayuh reta dikembuan sesiku orang, iya tentu mati lalu ninggalka semua utai nya. Nya alai, Jesus madah siti jaku sempama kena nunjukka ngembuan nama ti manah ba mua Petara, berega agi ari reta tengkira:

“Tanah siku lelaki ke kaya mansutka mayuh asil. Nya alai, iya berunding: ‘Nama patut digaga aku? Diatu aku nadai endur nyimpan asil utai ke ditanam aku.’ Ku iya berunding agi: ‘Tu utai ke deka digaga aku: Aku deka ngerubuhka setor aku lalu ngaga setor ke besai agi, ngambika aku ulih nyimpan semua gandum enggau reta aku ba dia. Aku deka madah ngagai diri empu: “Aku udah ngumpul mayuh reta ke ulih dikena aku betaun-taun. Diatu aku ulih idup senang, makai, ngirup sereta ngelantangka ati diri.”’ Tang Petara madah ngagai iya: ‘Nuan orang ke enda nemu berunding enggau manah. Malam tu, nuan deka mati. Nyadi sapa ke deka ngempu utai ke udah disimpan nuan?’ Nya meh utai ke nyadi ngagai orang ke nyimpan reta ke diri empu, tang enda kaya ba mata Petara.”—Luke 12:16-21.

Murid Jesus enggau orang bukai ulih dipanjuk enti sida ngiga tauka nyimpan mayuh pengaya. Lalu pengirau pasal pengidup ulih ngelimpangka sida ari nyembah Jehovah. Nya alai, Jesus ngulang baru jaku lalau ke diberi iya setaun setengah sebedau nya lebuh iya meri Jaku Ajar ba Atas Bukit:

“Anang agi irauka pasal pengidup kita tauka utai ke deka diempa kita. Anang irau pasal tubuh enggau gari ke deka dikena kita. . . . Peratika burung kak: Sida nadai betanamka utai tauka ngetau. Sida nadai setor tauka rumah kena nyimpan pemakai. Taja pia, Petara nupi sida. Endaka kita berega agi ari burung? . . . Peratika bungai: Sida enda gawa tauka ngaga gari ke diri empu. Tang aku madah ngagai kita: Indah Raja Solomon ke ngembuan mayuh utai ti manah pan nadai gari ngemanah siti ari bungai nya. . . . Nya alai, anang agi kelalu berundingka utai ke deka diempa enggau utai ke deka diirup kita, lalu badu agi kelalu irau. . . Apai kita nemu kita begunaka semua utai nya. . . . Anang ngetu ngenuluka Perintah Iya, lalu semua utai nya deka diberi ngagai kita.”—Luke 12:22-31; Matthew 6:25-33.

Sapa ke deka ngenuluka Perintah Petara? Jesus madah sida nya siti ‘raban ti mit,’ iya nya mensia ti tetap ati lalu penyampau semua sida nya 144,000 iku. Nama berekat ke dianti sida? Ku Jesus besemaya ngagai sida: “Apai kita gaga ati deka meri Perintah Iya ngagai kita.” Sida enda ngumpul reta ba dunya alai penchuri ulih ngenchuri reta sida. Tang, sida deka ngumpul “reta ba serega ke enda nemu abis,” alai sida deka merintah enggau Kristus.—Luke 12:32-34.