PELAJAR 31
Nama Reti Perintah Petara?
Pesan ti pemadu beguna dalam Bup Kudus nya pasal Perintah Petara. Jehovah deka ngena Perintah tu ngambika ulih ngaga dunya tu nyadi Paradais. Tang nama reti Perintah Petara? Baka ni kitai nemu Perintah Petara benung merintah? Nama utai ke udah sereta ke deka digaga Perintah Petara? Tanya tu deka dikerandauka ba pelajar tu sereta ba dua iti pelajar ke nangkanka tu.
1. Nama reti Perintah Petara, lalu sapa Raja iya?
Perintah Petara nya perintah ti ditumbuhka Petara Jehovah. Raja iya, Jesus Kristus. Iya deka merintah semua orang ba dunya enggau ba serega. (Matthew 4:17; John 18:36) Bup Kudus madah: “[Jesus] deka merintah . . . belama iya.”—Luke 1:32, 33.
2. Sapa deka merintah enggau Jesus?
Bup Kudus madah, “mensia ari semua raban bansa, jaku, menua enggau bansa . . . deka merintah di dunya.” (Pemandang 5:9, 10) Nya alai, Jesus enda kediri merintah. Kenyau ari maya Jesus datai ke dunya, bejuta iku orang udah nyadi nembiak iya. Kati semua sida deka merintah enggau iya? Enda. Semina 144,000 ari sida ke deka ngagai serega lalu merintah enggau Jesus. (Bacha Pemandang 14:1-4.) Orang Kristian ti bukai deka idup ba dunya nyadi rayat Perintah Petara.—Masmur 37:29.
3. Nama kebuah Perintah Petara manah agi ari perintah mensia?
Taja pan perintah mensia deka ngaga utai ti manah sereta nulung rayat, tang sida nadai kuasa ngereja semua utai ke dikedekaka sida. Kelimpah ari nya, perintah ti manah kadang-kadang diganti enggau perintah ti enda ibuhka rayat sida. Tang Perintah Petara enda baka nya. Bup Kudus madahka, Petara deka “numbuhka siti perintah ti enda nemu abis.” (Daniel 2:44) Nya alai, Jesus enda diganti enggau pemerintah bukai. Jesus, seiku pemerintah ti bisi pengerindu, manah ati, sereta enda berat sepiak. Kelimpah ari nya, iya ngajar rayat iya ngayanka ulah ti sama.—Bacha Isaiah 11:9.
BELAJAR MAYUH AGI
Peda bukti ti nunjukka Perintah Petara manah agi ari perintah mensia.
4. Perintah Petara amat bekuasa
Jesus Kristus nya raja ti pemadu bekuasa. Bacha Matthew 28:18, lalu kerandauka tanya tu:
Baka ni kitai nemu kuasa Jesus besai agi ari pemerintah mensia?
Perintah mensia suah beganti, lalu semina merintah sitak ti mit ari dunya tu. Baka ni enggau Perintah Petara? Bacha Daniel 7:14, lalu kerandauka tanya tu:
Bup Kudus madahka Perintah Petara “enda nemu abis.” Nama kebuah utai tu manah?
Nama pemanah nya enti Perintah Petara merintah serata dunya?
5. Perintah mensia enda tau enda diganti
Nama kebuah Perintah Petara patut nganti perintah mensia? Mainka VIDEO, lalu kerandauka tanya tu.
Nama empas ti enda manah ke dibai perintah mensia?
Bacha Pengajar 8:9, lalu kerandauka tanya tu:
Ba runding nuan, kati Perintah Petara patut nganti perintah mensia? Nama kebuah?
6. Pemerintah Perintah Petara ulih meretika kitai
Raja Perintah Petara nya Jesus, lalu iya kala diau ba dunya. Nya alai, iya nemu “sinu ati ke pengelemi kitai.” (Hebrew 4:15) Kelimpah ari nya, 144,000 orang ke dipilih Jehovah kena merintah enggau Jesus datai ari “semua raban bansa, jaku, menua enggau bansa.”—Pemandang 5:9.
Kati nuan berasai lantang lebuh nemu Jesus enggau sida ke deka merintah enggau iya kala idup nyadi mensia? Nama kebuah?
Jehovah udah milih lelaki enggau indu ari bemacham gaya pengidup ngambika merintah enggau Jesus
7. Undang-undang Perintah Petara manah agi ari perintah mensia
Perintah mensia ngaga undang-undang ngambika ulih mai penguntung sereta ngelindung rayat. Perintah Petara mega bisi undang-undang ke patut dititihka. Bacha 1 Korint 6:9-11, lalu kerandauka tanya tu:
Ba runding nuan, baka ni gaya dunya enti semua orang ngasika pesan ke ditetapka Petara?a
Ba runding nuan, kati Jehovah bisi hak ngarapka rayat Iya ngasika pesan tu? Nama kebuah?
Kati orang ke suba ti enda ngasika pesan Petara ulih berubah? Nama bukti iya?—Peda ayat 11.
Perintah mensia netapka undang-undang ngambika mai penguntung ngagai rayat. Perintah Petara bisi undang-undang ti manah agi sereta ulih ngelindung rayat
ORANG ENGKA NANYA: “Nama reti Perintah Petara?”
Baka ni nuan deka nyaut iya?
LANSA
Perintah Petara amat bisi ba serega lalu deka merintah serata dunya.
Ulang Kaji
Sapa bala pemerintah Perintah Petara?
Nama bukti ti nunjukka Perintah Petara manah agi ari perintah mensia?
Nama utai ke dikearapka Jehovah ari rayat Perintah Petara?
ARAM BELAJAR
Peratika utai ke dipadah Jesus pasal Perintah Petara.
“Kati Perintah Petara Bisi ba Ati Nuan?” (Artikel ba laman web jw.org)
Nama kebuah Saksi-Saksi Jehovah nyukung Perintah Petara lalu ukai perintah mensia?
Belajar utai ke dipadah dalam Bup Kudus pasal 144,000 orang ke dipilih Jehovah merintah enggau Jesus.
Nama utai ke ngasuh seiku indu ba rumah jil andal semina Petara aja ke ulih mai dunya ti lurus?
“Aku Tetemuka Saut ngagai Utai ti Enda Lurus” (Peratika!, November 2011)