Jesus Ngajar pasal Sarak sereta Rinduka Bala Anak Mit

Jesus enggau bala murid iya mupuk ari Galili ngagai seberai Sungai Jordan lalu bejalai tunga ke selatan nengah Perea. Sebedau tu lebuh Jesus ba Perea, iya kala madah ngagai orang Parisi runding Petara pasal sarak. (Luke 16:18) Diatu sida nanya Jesus baru pasal sarak laban sida deka nguji iya.

Nitihka Adat Moses, siku lelaki ulih nyarakka bini iya enti bini iya udah ngereja “utai ti enda senunuh.” (Ulang Adat 24:1) Tang orang bisi mayuh runding ti bebida pasal kebuah ulih sarak. Sekeda orang pechaya sida ulih sarak ketegal penanggul ti mit. Nya alai orang Parisi nanya Jesus: “Kati tau laki nyarakka bini iya atas sebarang tegal?”—Matthew 19:3.

Ari ke nitihka runding mensia, Jesus nyebut pasal atur ke digaga Petara bekaul enggau tikah. Ku iya: “Kati kita nadai kala macha pasal Petara ti ngaga mensia, lelaki enggau indu, kenyau ari pun kelia? Ku Petara bejaku: ‘Ketegal nya, lelaki deka ninggalka apai enggau indai iya, lalu mengkang begulai enggau bini iya, lalu seduai iya deka nyadi siti tubuh’? Seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Petara.” (Matthew 19:4-6) Lebuh Petara ngepunka tikah Adam enggau Awa, Iya nadai ngaga atur pasal sarak.

Tang orang Parisi enda setuju enggau Jesus. Sida madah: “Enti pia, nama kebuah Moses ngasuh laki ke deka nyarakka bini iya meri surat sarak ngagai bini iya?” (Matthew 19:7) Jesus nyaut sida: “Moses ngemendarka kita nyarakka bini kita, laban kita kieh. Tang utai tu ukai baka nya kenyau ari pun.” (Matthew 19:8) Iya ke amat, “pun” nya enda berengkah maya jeman Moses, tang maya Petara keterubah kali ngepunka pengawa tikah ba kebun Eden.

Udah nya Jesus madahka pemendar ti penting: “Aku madah ngagai kita: Barang sapa nyarakka bini iya, taja pan bini iya nadai ngereja ulah seks ti kamah [jaku Gerika, por·neiʹa], iya butang enti iya bebini baru.” (Matthew 19:9) Nya alai nitihka ajar Bup Kudus, laki bini semina ulih sarak enti siku ari seduai iya ngereja ulah seks ti kamah.

Ketegal nya, bala murid madah ngagai Jesus: “Enti pia, manah agi enda bebini enda belaki.” (Matthew 19:10) Nya alai, enti sesiku orang deka kawin, iya mesti sedar, iya enda ulih minta deka sarak sepeneka ati.

Jesus lalu madahka kebuah sekeda orang enda nikah. Kesatu, sekeda orang diadaka enggau pengurang enda ulih ngereja pengawa seks. Kedua, laban perengka seks sida udah dibuai. Lalu ketiga, sekeda orang engka milih enda nikah laban deka ngenuluka Perintah Petara. Nyadi Jesus meransang bala peninga iya: “Enti siku-siku orang milih enda nikah, awakka iya enda.”—Matthew 19:12.

Maya nya, bisi orang mai anak mit ngagai Jesus. Tang, bala murid Jesus nganu sida laban enggai sida ngachau Jesus. Lebuh Jesus meda nya, iya pedis ati lalu ngerara bala murid iya: “Awakka anak mit datai ngagai aku. Anang nagang sida, laban Perintah Petara deka diempu orang ke baka sida. Enggau bendar aku madah ngagai kita: Barang sapa ke enda nerima Perintah Petara baka anak mit, iya enda ulih tama ngagai Perintah nya.”—Mark 10:14, 15; Luke 18:15.

Tu ajar ti amat manah! Enti kitai deka tama ngagai Perintah Petara, kitai mesti baruh ati baka anak mit ke deka diajar. Jesus rinduka anak mit lalu merap sereta merekatka sida. Baka nya meh penalam pengerindu Jesus ngagai orang ke “nerima Perintah Petara baka anak mit.”—Luke 18:17.