Jesus Nyaut Tanya Siku Tuai Bansa ti Kaya

Jesus agi neruska pejalai iya nengah Perea ngagai Jerusalem. Maya nya siku lelaki ke biak sereta kaya belanda datai lalu besugang ba mua Jesus. Lelaki nya “siku ari tuai bansa orang Judah.” Iya engka siku tuai balai gempuru tauka siku ari Raban Kunsil Orang Judah. Ku iya nanya Jesus: “Pengajar ti Manah, nama pengawa ke patut dikereja aku, ngambika aku tau bulih pengidup ti meruan belama iya?”—Luke 8:41; 18:18; 24:20.

Ku Jesus nyaut iya: “Nama kebuah nuan ngumbai aku manah? Nadai orang ke manah. Semina Petara siku aja ke manah.” Lelaki nya ngangau Jesus pengajar ti manah, laban iya nunda chara bala Rabbi ngena rambai jaku nya sebagai siti gelar. Taja pan Jesus siku pengajar ti manah, tang iya deka lelaki nya nemu, nadai orang ulih diberi gelar “Manah” kelimpah ari Petara.

Ku Jesus: “Enti nuan deka bulih pengidup ti meruan belama iya, anang ngetu nitihka pesan Petara.” Lelaki nya lalu nanya: “Ni bagi pesan nya?” Jesus nyebut lima iti pesan ari Sepuluh Pesan, iya nya anang munuh orang, anang butang, anang ngenchuri, anang besaksi bula sereta bebasaka apai indai. Udah nya, iya madahka siti da agi pesan ti penting agi: “Rinduka orang bukai baka nuan ke rinduka diri empu.”—Matthew 19:17-19.

Lelaki nya nyaut: “Semua pesan nya udah dititihka aku magang. Nama agi utai bukai ti patut dikereja aku?” (Matthew 19:20) Iya engka ngasaika iya patut ngereja pengawa ke besai agi ngambika ulih idup meruan belama iya. Jesus nemu lelaki nya amat keran deka nemu saut, nya alai Jesus bisi pengerindu ngagai iya. (Mark 10:21) Tang, lelaki nya agi bisi siti da agi utai ke bedau dikereja iya.

Lelaki nya amat rinduka reta tengkira iya, nyadi Jesus madahka: “Siti utai ke bedau dikereja nuan. Mupuk nuan lalu jual semua reta tengkira nuan, lalu beri duit nya ngagai orang ke seranta. Lalu nuan deka bisi reta ba serega. Udah nya, aram nyadi murid aku.” Iya ke amat, lelaki nya ulih meri duit iya ngagai orang ti seranta ke enda ulih malas pemanah iya, lalu nyadi murid Jesus. Tang lebuh ninga nya, iya balat tusah ati lalu mupuk ari endur nya. Ketegal lelaki nya enda ulih ngelengkaka “mayuh reta tengkira” iya, iya lenyau peluang ngulihka reta ba serega. (Mark 10:21, 22) Nyadi, Jesus madahka: “Orang ke kaya endang tusah deka tama ngagai Perintah Petara!”—Luke 18:24.

Jesus madahka: “Kebendar iya, jelu unta senang agi tama nengah lubang jarum ke dikena bejait ari orang ke kaya tama ngagai Perintah Petara.” Bala murid Jesus amat alit ati maya sida ninga jaku ke disebut iya. Nyadi sida nanya Jesus: “Sapa ulih diselamatka?” laban sida engka ngumbai nadai orang ulih diselamatka. Jesus lalu madah ngagai sida: “Utai ti enda ulih dikereja mensia, ulih dikereja Petara.”—Luke 18:25-27.

Peter madahka sida udah ngaga pemutus ke enda sama enggau lelaki ti kaya nya. Ku iya: “Kami udah ninggalka semua utai lalu nitihka nuan. Nama utai ti deka diulih kami?” Nya alai, Jesus madahka berekat ke deka diulih sida laban udah ngaga pemutus ti manah. Iya madah: “Petara deka ngaga semua utai nyadi baru. Lebuh Anak Mensia duduk ba kerusi diraja iya ti bemulia, maya nya kita ke udah nitihka aku deka mega duduk ba 12 iti kerusi diraja, lalu ngakim 12 raban bansa orang Israel.”—Matthew 19:27, 28.

Lebuh Jesus bejaku munyi nya, iya tentu berundingka pasal jemah ila lebuh Petara ngaga semua utai ba bumi nyadi baru baka kebun Eden suba. Ba maya nya, Peter sereta murid ke bukai deka enggau Jesus merintah bumi Paradais. Berekat tu jauh berega agi ari semua utai ke dilengkaka sida!

Tang murid Jesus ukai semina nerima berekat ba jemah ila. Indah diatu sida pan ulih diberekat. Jesus madah: “Barang sapa ke udah ninggalka rumah, tauka bini, tauka diri menyadi, tauka apai indai, tauka anak, ketegal Perintah Petara, deka nerima beberapa kali lipat mayuh agi ba jeman tu, lalu jemah ila, iya deka bulih pengidup ti meruan belama iya.”—Luke 18:29, 30.

Enda ngira dini endur sida, bala murid Jesus ulih ngasaika kaul ti rapat enggau bala menyadi Kristian. Lalu kaul ke baka nya lebih rapat sereta berega agi ari kaul sida enggau diri sebilik. Tuai bansa ti kaya nya ukai semina lenyau berekat nya aja, tang iya enda ulih idup meruan belama iya ba Perintah Petara di serega.

Ku Jesus: “Tang mayuh orang ke dulu deka nyadi dudi, lalu orang ke dudi deka nyadi dulu.” (Matthew 19:30) Nama reti ku iya?

Lelaki ti kaya nya ulih dikumbai “dulu,” laban iya siku ari tuai bansa orang Judah. Ketegal iya nitihka Adat Petara, iya patut nyadi siku ari murid Jesus. Tang, iya ngenuluka reta tengkira ari semua utai bukai ba pengidup iya. Tang orang ke dikumbai “dudi,” iya nya orang ke biasa, nerima pemendar ke diajar Jesus lalu bulih pengidup ti meruan belama iya. Enggau chara tu, sida baka ke nyadi “dulu” laban sida deka nyadi raja merintah bumi Paradais enggau Jesus ba serega.