Penerang ke Bup Kereja Pengidup enggau Pengawa Kristian
4-10 JUN
RETA ARI BUP KUDUS | MARK 15-16
“Jesus Ngamatka Utai ti Ditulis Pasal Iya”
(Mark 15:3-5) Sida tuai imam lalu madahka iya udah ngereja mayuh macham penyalah. 4 Pilate lalu nanya iya baru, ‘Kati nuan nadai saut ngagai nya? Dinga nuan pemayuh dawa ti dibantaika sida ngelaban nuan.’ 5 Tang Jesus nadai agi nyaut, lalu Pilate balat alit ati.
(Mark 15:24) Udah nya sida ngeregang iya [“mantang iya ba tiang,” NW], lalu bedua gari iya entara bala sida, ngena chara bechabut undi kena nentuka sapa tau bulih gari iya.
(Mark 15:29, 30) Orang ke mansa ngeleseka iya lalu ngilikka pala sida. Ku sida, ‘Nuan ke deka ngerusak Rumah Sembiang, lalu nirika iya baru dalam tiga hari, 30 selamatka diri empu, lalu nurun ari regang [“tiang perinsa,” NW] nya!’
nota pelajar nwtsty ke Mrk. 15:24, 29
bedua gari iya: John 19:23, 24 nambahka utai ke enda disebut Matthew, Mark, enggau Luke: Soldadu Rome bechabut undi ke gari sereta baju panjai; bala soldadu nya magi gari nya “ngagai empat iti bagi, sebagi ke siku-siku soldadu.” Laban sida enggai magi baju panjai, nya alai sida bechabut undi. Lalu pengawa tu ngamatka jaku pasal bechabut undi ke gari Messiah ba Mas. 22:18. Maya jeman nya, orang ke bejalaika pengawa ngukum suah ngambi gari orang ke deka diukum. Gari enggau utai ti dikemisika sida deka diambi sebedau sida diukum mati, kena ngemaluka sida agi.
ngilikka pala sida: Tu kesuah agi disengkaum enggau jaku. Lalu gaya tu diayanka enggau chara ti enda bebasa sereta ngelese. Orang ke mansa ngamatka utai ti dipadah ba Mas. 22:7.
(Mark 15:43) Josep ke asal ari Arimatea, siku raban Kunsil, ke nganti penatai Perintah Petara, mansang enggau ati ti berani ngagai Pilate, minta bangkai Jesus.
(Mark 15:46) Josep lalu meli kain linin, nurunka bangkai Jesus, mungkus bangkai nya ngena kain linin nya, lalu ngalika bangkai nya dalam kubur ti udah ditebuk ba batu galang. Iya lalu maringka sigi batu ti besai ngagai mua kubur nya.
nota pelajar nwtsty ke Mrk. 15:43
Josep: Gaya tiap iku penulis bup Injil ulih dipeda ari penerang ti bebida ke ditulis sida pasal Josep. Matthew, seiku pengumpul chukai, madahka Josep nya “siku orang ke kaya.” Mark ti nyadi penulis ke bansa Rome madahka, Josep nya “siku raban Kunsil” ke nganti penatai Perintah Petara. Luke, seiku lutur ke pengasih madahka, Josep nya “siku orang ke badas sereta lurus” ke enda besetujuka pelan enggau utai ti dikereja raban Kunsil ngagai Jesus. Semina John aja ke nulis pasal Josep “nyadi murid Jesus ngena chara belalai laban iya takutka orang Judah.”—Mat. 27:57-60; Mrk. 15:43-46; Luk. 23:50-53; Jhn. 19:38-42.
Ngulihka Penemu Bup Kudus ti Berega
(Mark 15:25) Jam nyau pukul semilan pagi lebuh sida ngeregang iya [“mantang iya ba tiang,” NW].
nota pelajar nwtsty ke Mrk. 15:25
semilan pagi: Sekeda orang nunjukka ngagai penerang ti enda sejalai entara ayat tu enggau Jhn. 19:14-16, ti madahka Pilate nyerahka Jesus ngambika diukum “nyau kira ba urung tengah hari.” Taja pan Jaku Petara enda nerangka enggau nyentuk kebuah ayat tu enda sejalai, tang kitai ulih berundingka pekara tu: Bup Injil kebendar iya sejalai lebuh madah pasal utai ke nyadi ba Jesus lebuh hari penudi iya di dunya. Semua empat iti bup Injil nunjukka bala tuai imam enggau tuai bansa baum tumu pagi lalu mai Jesus ngagai Gabenor Rome, iya nya Pontius Pilate. (Mat. 27:1, 2; Mrk. 15:1; Luk. 22:66–23:1; Jhn. 18:28) Matthew, Mark enggau Luke madahka lebuh Jesus udah dipantang ba tiang, semua menua petang magang “ba urung tengah hari . . . nyentuk ngagai pukul tiga.” (Mat. 27:45, 46; Mrk. 15:33, 34; Luk. 23:44) Seiti pekara ke bisi kaul enggau jam Jesus diukum iya nya maya iya disipat. Pengawa nyipat nya sebagi ari atur ba ukum bunuh. Kadang-kadang, orang ke deka diukum nya ulih mati ketegal disipat kelalu balat. Jesus engka balat amat disipat nyentukka iya enda ulih terus mai tiang perinsa iya empu. Nya alai bisi seiku orang nulung iya mai tiang nya. (Luk. 23:26; Jhn. 19:17) Enti kitai ngira atur ukum bunuh berengkah ari pengawa nyipat, reti iya beberapa jam udah ngelebus sebedau Jesus dipantang ba tiang perinsa. Tu disukung Mat. 27:26 enggau Mrk. 15:15 ke nyebut pasal pengawa disipat lalu dipantang ba tiang. Nya alai, tiap iku orang meri jam ti enda sebaka pasal maya ukum bunuh laban tu bepanggai ba chara sida meda baka ni pun atur ukum bunuh dipejalaika. Tu engka nerangka kebuah Pilate tekenyit lebuh ninga Jesus udah mati taja pan baru dipantang ba tiang perinsa, laban Pilate ngumbai atur ukum bunuh nya baru berengkah. (Mrk. 15:44) Nambahka nya, penulis Bup Kudus suah magi hari ngagai empat begian, iya nya tiga jam ke tiap iti begian. Magi hari enggau chara tu nerangka kebuah bisi nyebut pasal pukul 9 pagi, pukul 12 tengah hari, pukul 3 ngalih hari, ke dikira berengkah ari maya mata hari pansut kira-kira pukul 6 pagi. (Mat. 20:1-5; Jhn. 4:6; SKR. 2:15; 3:1; 10:3, 9, 30) Pia mega, orang ba jeman nya nadai perengka kena madahka jam enggau nyemetak, nya alai kitai suah meda rambai jaku “nyau kira ba urung,” baka ke disebut ba Jhn. 19:14. (Mat. 27:46; Luk. 23:44; Jhn. 4:6; SKR. 10:3, 9) Nya alai kitai ulih nyimpulka tu: Mark engka bisi nyengkaum pengawa disipat enggau dipantang ba tiang, tang John semina nerangka pasal pengawa dipantang ba tiang. Mark enggau John engka nyimpul jam ke pemadu semak enggau timpuh 3 jam. Lalu ba ditu John ngena “nyau kira ba urung” lebuh nunjuk ngagai jam ti dipadah iya. Tu meh kebuah jam ke ditulis seduai iya enda sejalai. John nulis bup iya bepuluh taun pengudah Mark nulis bup iya. Lebuh iya nulis jam ke enda sebaka enggau Mark, tu nunjukka iya enda ngupi utai ke ditulis Mark.
(Mark 16:8) Nya alai sida pansut lalu rari ari kubur, laban sida balat takut sereta balat alit ati, lalu sida nadai madahka utai nya ngagai orang, laban sida takut.
nota pelajar nwtsty ke Mrk. 16:8
laban sida takut: Nitihka manuskrip ke dulu agi pasal begian ti penudi ba bup Mark, Injil nya ngetu ba ayat 8. Sekeda ngumbai jaku pengujung nya ukai tulis ti asal, laban iya ngetu enggau ngenyit. Tang, utai ke dipadah nya enda tentu ngena laban gaya Mark nulis endang pandak. Pia mega, kira-kira 300 taun pengudah pemati Jesus, pakar ke benama Jerome enggau Eusebius madahka ayat ti asal ditutup enggau rambai jaku “laban sida takut.”
Bisi beberapa iti manuskrip jaku Gerika enggau salin ngagai bansa jaku bukai ke nambahka jaku pengujung ti panjai tauka jaku pengujung ti pandak pengudah ayat 8. Jaku pengujung ti panjai (ti ngembuan 12 iti ayat tambah) bisi ditemu ba Codex Alexandrinus, Codex Ephraemi Syri rescriptus, enggau Codex Bezae Cantabrigiensis. Semua tu ditulis kira-kira 1,500 taun kelia. Pengujung ti panjai mega bisi ayan ba Latin Vulgate, Curetonian Syriac, enggau Syriac Peshitta. Taja pia, iya nadai ayan ba dua iti manuskrip jaku Gerika ke ditulis lebih ari 1,600 taun kelia, iya nya Codex Sinaiticus enggau Codex Vaticanus. Jaku pengujung ti panjai mega nadai ayan ba Codex Sinaiticus Syriacus ke ditulis kira-kira 1,600 taun kelia, tauka ba manuskrip Sahidic Coptic ti keterubah ke ditulis ba urung 1,500 taun kelia. Nambahka nya, manuskrip Mark ti pemadu lama ba jaku Armenia enggau Georgia ngetu ba ayat 8.
Sekeda manuskrip jaku Gerika ke baru agi enggau salin ngagai bansa jaku bukai bisi nambahka jaku pengujung ti pandak (ti ngembuan beberapa ayat aja). Codex Regius ke ditulis ba urung 1,200 taun kelia ngembuan dua iti jaku pengujung, lalu manuskrip tu berengkah enggau jaku pengujung ti pandak. Codex Regius ngepun tiap iti jaku pengujung enggau penerang ti madahka ayat tu diterima tauka dikena sekeda pakar, taja pan nemu jaku pengujung nya nadai ba salin asal.
JAKU PENGUJUNG TI PANDAK
Jaku pengujung ti pandak pengudah Mrk. 16:8 ukai sebagi ari ayat Bup Kudus. Ayat nya munyi tu:
Sida indu mansang ngagai Peter enggau bala pangan iya lalu nusui pasal utai ti udah dipadahka ngagai sida. Udah nya Jesus empu ngirumka, ngena sida murid iya, kenyau ari timur nyentukka barat, pesan ti kudus sereta idup belama iya pasal pengelepas ti meruan belama iya.
JAKU PENGUJUNG TI PANJAI
Jaku pengujung ti panjai pengudah Mrk. 16:8 ukai sebagi ari ayat Bup Kudus. Ayat nya munyi tu:
9 Tumu pagi hari Minggu lebuh Jesus udah angkat ari mati, iya pengari terubah ngagai Maria Magdalin, ke udah alai iya muru tujuh iku antu. 10 Maria Magdalin mansang lalu madah ngagai orang ke udah begulai enggau Jesus, ke benung ngulit sereta nyabak. 11 Tang lebuh sida ninga Jesus udah idup baru, lalu Maria Magdalin udah meda iya, sida enda arapka nya. 12 Udah nya iya pegari ngena chara bukai ngagai dua iku orang ari bala sida, lebuh seduai iya benung di rantau jalai mansang ngagai menua pesisir. 13 Seduai iya lalu nikal, lalu madah ngagai sida ti bukai. Tang sida enda arapka seduai iya. 14 Udah nya iya pegari ngagai murid ke sebelas iku, lebuh sida benung makai, lalu iya nganu sida laban sida enda arap sereta kieh, laban sida enda arapka orang ke udah meda iya, udah bekau iya ke angkat idup baru. 15 Lalu ku iya bejaku ngagai sida, ‘Bejalai kita ngagai serata dunya, lalu tusui Berita Manah ngagai semua mensia. 16 Orang ke arap lalu dibaptisa, deka diselamatka, tang orang ke enda arap deka diukum. 17 Lalu tu tanda ti deka nyempulang orang ke arap: sida deka muru antu dalam nama aku; sida deka bejaku ngena jaku ti nyelai. 18 Enti sida tepegaika ular, tauka teirupka rachun, utai nya enda ngemediska sida; sida deka ngengkahka jari sida ba orang ke sakit, lalu orang nya deka gerai.’
19 Lebuh Tuan Jesus udah bejaku ngagai sida, iya lalu dibai niki ke serega, lalu duduk muak ari kanan Petara. 20 Sida murid bejalai lalu nusui Berita Manah di semua endur, lalu Tuan bekereja enggau sida lalu netapka pengamat pesan iya ngena kereja ajih ti nyempulang pesan nya.
Macha Bup Kudus
(Mark 15:1-15) Tumu pagi hari siti, sida tuai imam lalu baum enggau bala tuai bansa, bala pengajar Adat, enggau semua raban Kunsil. Sida nanchang Jesus ngena rantai, mai iya ari endur nya, lalu nyerahka iya ngagai Pilate. 2 Pilate lalu nanya iya, ‘Kati nuan tu Raja orang Judah?’ Disaut Jesus, “Munyi ti ku nuan.” 3 Sida tuai imam lalu madahka iya udah ngereja mayuh macham penyalah. 4 Pilate lalu nanya iya baru, ‘Kati nuan nadai saut ngagai nya? Dinga nuan pemayuh dawa ti dibantaika sida ngelaban nuan.’ 5 Tang Jesus nadai agi nyaut, lalu Pilate balat alit ati. 6 Ba genap Gawai [“pengerami,” NW] Paska Pilate endang selalu ngelepaska siku orang tutup ke sida, sebarang orang ke dipinta sida. 7 Nyadi dalam rumah jil bisi orang siku benama Barabas, sama enggau bala orang ke udah munuh orang sereta udah angkat ngelaban perintah. 8 Nya alai bala orang mayuh datai lalu belabuh minta Pilate ngereja utai ke sida baka ti udah dikereja iya ngelama tu. 9 Pilate lalu nanya sida, “Kati kita ngasuh aku ngelepaska Raja orang Judah ke kita?” 10 Laban iya nemu sida tuai imam kepapaska Jesus; nya kebuah sida nyerahka Jesus ngagai iya. 11 Tang sida tuai imam nyungkak orang mayuh minta Pilate ngelepaska Barabas ke sida. 12 Pilate lalu bejaku baru ngagai sida, ‘Enti pia, nama utai ti patut dikereja aku ngagai iya ke dikumbai kita Raja orang Judah?’ 13 Sida lalu manjung nyaut iya, ‘Regang Iya! [“Pantang iya!” NW]’ 14 Pilate lalu nanya sida, ‘Nama kebuah? Nama penyalah ti udah dikereja iya?’ Tang sida manjung inggar agi, ‘Regang Iya! [“Pantang iya!” NW]’ 15 Nyadi laban Pilate endang deka ngenyamaika ati orang mayuh, iya lalu ngelepaska Barabas ke sida. Lebuh Jesus udah disipat, iya lalu nyerahka Jesus ngambika iya diregang [“dipantang,” NW].
11-17 JUN
RETA ARI BUP KUDUS | LUKE 1
“Tunda Pemaruh Ati Maria”
(Luke 1:38) Maria lalu bejaku, “Aku tu nembiak [“ulun,” NW] Tuhan. Awakka utai nya nyadi ba aku nitihka jaku nuan.” Melikat nya lalu ninggalka iya.
ia 149 ¶12
“Aku Tu Ulun Tuhan!”
12 Ari jaku Maria nunjukka iya tunduk sereta baruh ati lalu teladan iya amat beguna ba orang ke bisi pengarap. Iya madah ngagai Gabriel: “Aku tu nembiak [“ulun,” NW] Tuhan. Awakka utai nya nyadi ba aku nitihka jaku nuan.” (Luke 1:38) Ulun nya penuduk ti pemadu baruh ba orang gaji; pengidup iya bepanggai ba tuan iya empu. Baka nya meh asai ati Maria ngagai Tuan iya, Jehovah. Maria nemu iya bisi pengelikun ba Jehovah. Jehovah tetap ati ngagai orang ke tetap ati ngagai Iya. Jehovah deka merekat Maria seraya iya nerima pengawa ti berat tu.—Mas. 18:25.
(Luke 1:46-55) Maria lalu bejaku, ‘Semengat aku ngemesaika Tuhan, 47 lalu ati aku gaga ke Petara ti Juruselamat aku, 48 laban Iya udah kasihka nembiak Iya ke baruh ati. Belabuh ari diatu semua serak deka ngumbai aku beberekat 49 laban Petara ti bekuasa udah ngereja utai ti besai ke aku. Kudus meh nama Iya. 50 Iya mandangka pengasih Iya ngagai orang ke nangika Iya, ari serak siti ngagai serak siti. 51 Iya udah mandangka pengering Iya ngena lengan Iya lalu udah mambarka orang ke sumbung enggau semua pelan sida. 52 Iya udah muai raja ti bekuasa ari kerusi diraja sida, lalu ngeninggika orang ke baruh ati. 53 Iya udah ngenyangka orang ke lapar enggau utai ti manah, lalu muru sida ke kaya pulai puang. 54 Iya udah nulung nembiak Iya Israel, kena Iya ngingatka pengasih Iya, 55 nitihka semaya ti digaga Iya enggau aki ini kitai, ngagai Abraham enggau ngagai peturun iya belama iya.’
ia 150-151 ¶15-16
“Aku Tu Ulun Tuhan!”
15 Maria bejaku. Utai ke disebut iya disimpan enggau manah ba Jaku Petara. (Bacha Luke 1:46-55.) Tu jaku Maria ti pemadu panjai dalam Bup Kudus lalu ngayanka mayuh pemanah pasal iya. Jaku puji iya nunjukka iya beterima kasih ngagai Jehovah laban merekat iya enggau peluang nyadi indai Messiah. Maria ngayanka penegap pengarap iya lebuh iya madahka Jehovah ngemaruhka orang ke sumbung lalu nulung orang ke baruh ati sereta seranta, ti deka nyembah Iya. Tu mega nunjukka Maria amat bepenemu. Iya udah nyebut kira-kira 20 iti utai ari Sempekat Lama.
16 Endang terang, Maria bisi belematika Jaku Petara enggau dalam. Taja pia iya ngayanka pemaruh ati, laban iya bejaku ngena jaku ke diambi ari Jaku Petara ukai ari penemu diri empu. Anak ke majak besai ba kandung iya mega ngayanka pemanah ti sebaka, lebuh anak nya madahka: ‘Ajar ti dibai aku ukai enggi aku, tang enggi Iya ke ngirumka aku.’ (John 7:16) Kitai mega ulih nanya diri empu: ‘Kati aku bebasaka Jaku Petara? Tauka aku rindu agi ngena penemu enggau ajar diri empu?’ Saut Maria ke tanya tu endang terang.
Ngulihka Penemu Bup Kudus ti Berega
(Luke 1:69) Iya udah nyendiaka siku Juruselamat ti bekuasa ke kitai, ari peturun nembiak Iya David,
nota pelajar nwtsty ke Luk. 1:69
Juruselamat ti bekuasa: Tauka “tanduk ke meri pengelepas.” Dalam Bup Kudus, tanduk jelu selalu dikena ngambarka pengering tauka kuasa. (1 Sam. 2:1; Mas. 75:10; 148:14) Pia mega bala penguasa, enda ngira orang manah tauka jai disemaka baka tanduk lalu pemujur sida beperang disemaka baka nanduk. (U-dat. 33:17; Dan. 7:24; 8:2-10, 20-24) Ba konteks tu, “Juruselamat ti bekuasa” ditujuka ngagai Messiah ti bisi kuasa kena ngelepaska, iya nya penyelamat ti bekuasa.
(Luke 1:76) Lalu nuan, anak, deka dikumbai nabi Petara ti Pemadu Tinggi, laban nuan deka bejalai dulu ari Tuhan [Jehovah] nyendiaka jalai ke Iya,
nota pelajar nwtsty ke Luk. 1:76
nuan deka bejalai dulu ari Jehovah: John Pemaptisa deka ‘bejalai dulu ari Jehovah’ reti nya iya deka muka jalai ke Jesus. Jesus deka ngarika Apai iya lalu datai dalam nama Apai iya.—Jhn. 5:43; 8:29; peda nota pelajar ke Jehovah ba ayat tu.
Jehovah: Jaku Sekariah ba begian kedua ayat tu ngembuan rambai jaku ti sebaka enggau Isa. 40:3 enggau Mal. 3:1. Ba ayat tu, nama Petara bisi ditulis ngena empat iti urup Hebrew (YHWH), ke bisi ayan ba salin ti asal. Nitihka Sempekat Lama, nama Petara bisi dikena ba teks asal, taja pan manuskrip jaku Gerika ngena Kyʹri·os (Tuan).
Macha Bup Kudus
(Luke 1:46-66) 46 Maria lalu bejaku, ‘Semengat aku ngemesaika Tuhan, 47 lalu ati aku gaga ke Petara ti Juruselamat aku, 48 laban Iya udah kasihka nembiak Iya ke baruh ati. Belabuh ari diatu semua serak deka ngumbai aku beberekat 49 laban Petara ti bekuasa udah ngereja utai ti besai ke aku. Kudus meh nama Iya. 50 Iya mandangka pengasih Iya ngagai orang ke nangika Iya, ari serak siti ngagai serak siti. 51 Iya udah mandangka pengering Iya ngena lengan Iya lalu udah mambarka orang ke sumbung enggau semua pelan sida. 52 Iya udah muai raja ti bekuasa ari kerusi diraja sida, lalu ngeninggika orang ke baruh ati. 53 Iya udah ngenyangka orang ke lapar enggau utai ti manah, lalu muru sida ke kaya pulai puang. 54 Iya udah nulung nembiak Iya Israel, kena Iya ngingatka pengasih Iya, 55 nitihka semaya ti digaga Iya enggau aki ini kitai, ngagai Abraham enggau ngagai peturun iya belama iya.’ 56 Maria lalu diau enggau Elisabet kira tiga bulan. Udah nya iya pulai ngagai rumah iya empu. 57 Maya pen datai alai Elisabet deka beranak. Iya lalu ngadaka anak lelaki siku. 58 Orang ke berimbai pendiau enggau iya, enggau kaban belayan iya ninga Tuhan udah ngayanka pengasih ti besai ngagai iya, lalu sida sama rami gaga ati enggau iya. 59 Ba hari ti kelapan sida lalu datai deka nutus anak mit nya, lalu sida deka meri iya nama Sekariah, ngangkatka nama apai iya. 60 Tang ku indai iya bejaku, “Ukai nya! Nama iya John.” 61 Sida lalu bejaku ngagai iya, “Nadai kaban belayan nuan bisi nama nya!” 62 Sida lalu bejaku ngena jari enggau apai iya, nanyaka nama ti deka diberi iya ngagai nembiak nya. 63 Sekariah lalu minta papan tulis, lalu nulis, “Nama iya John.” Semua sida lalu balat alit ati. 64 Tekala nya mulut Sekariah tebuka, dilah iya ulih engkebut, lalu iya belabuh bejaku muji Petara. 65 Semua orang ke berimbai pendiau enggau sida bela takut magang. Lalu semua utai nya dikenang orang magang di serata menua ti bebukit di menua Judea. 66 Semua orang ninga nya lalu belematika utai nya. Ku sida, “Namaka penyadi nembiak tu ila?” Laban kuasa Tuhan amat bisi enggau iya.
18-24 JUN
RETA ARI BUP KUDUS | LUKE 2-3
“Bala Nembiak—Kati Kaul Nuan enggau Jehovah Majak Tegap?”
(Luke 2:41, 42) Nyadi genap taun apai indai Jesus mansang ngagai Jerusalem deka ngintu Gawai [“pengerami,” NW] Paska. 42 Lalu lebuh Jesus umur dua belas taun, sida mupuk ngagai Gawai [“pengerami,” NW] nya baka selama.
nota pelajar nwtsty ke Luk. 2:41
genap taun apai indai Jesus: Adat Moses enda mejal orang indu datai ngagai pengerami Paska. Taja pia, Maria mansang enggau Josep ngagai Jerusalem ngintu pengerami Paska ninting taun. (P-sut. 23:17; 34:23) Genap taun, sida bejalai kira-kira 300 km (190 batu) pulai mansang, enggau diri sebilik ke majak nambah.
(Luke 2:46, 47) Tiga hari udah bekau nya, nya baru seduai iya tetemuka iya dalam Rumah Sembiang, duduk enggau bala pengajar, mendingka sida, sereta betanyaka utai ngagai sida. 47 Lalu semua orang ke ninga iya balat alit ati ninga penalam penemu enggau saut iya.
nota pelajar nwtsty ke Luk. 2:46, 47
betanyaka utai ngagai sida: Ari gaya orang ke ninga Jesus nunjukka tanya Jesus ukai tanya ke biasa ditanya nembiak ke semina deka nemu aja. (Luk. 2:47) Rambai jaku Gerika “betanyaka utai” ba sekeda konteks ulih ditujuka ngagai bansa tanya ti betimbal ke dikena lebuh pechara. (Mat. 27:11; Mrk. 14:60, 61; 15: 2, 4; SKR. 5:27) Nitihka pakar sejarah, bala tuai pengarap ti bepangkat tinggi deka mengkang ba Rumah Sembiang pengudah pengerami lalu ngajar orang ba serambi ti luas. Ba dia, orang mayuh deka ninga sereta betanyaka utai ngagai bala tuai pengarap.
balat alit ati: Rambai jaku pengawa Gerika “nyadi alit ati” ke dikena ulih mai reti majak alit ati tauka enda ngetu alit ati.
(Luke 2:51, 52) Iya lalu mupuk enggau seduai iya lalu datai di Nasaret. Iya ngasika seduai iya, lalu indai iya nyimpan semua utai nya dalam ati diri. 52 Jesus mansang besai sereta bepenemu-dalam, lalu dikerinduka Petara enggau mensia.
nota pelajar nwtsty ke Luk. 2:51, 52
ngasika: Tauka “mengkang tunduk; mengkang ngasi.” Jaku pengawa Gerika tu nunjukka pengudah Jesus ngasuh bala pengajar ba Rumah Sembiang alit ati enggau penemu iya pasal Jaku Petara, Jesus pulai ke rumah lalu enggau baruh ati tunduk ngagai apai indai iya. Laban iya patut ngamatka Adat Moses enggau silik, ulah iya ti ngasi bisi reti agi ari anak mit ke bukai.—P-sut. 20:12; Gal. 4:4.
Ngulihka Penemu Bup Kudus ti Berega
(Luke 2:14) ‘Muliaka Petara di serega ti pemadu tinggi, enggau pemaik di dunya ke orang ke dikerinduka Iya!’
nota pelajar nwtsty ke Luk. 2:14
enggau pemaik di dunya ke orang ke dikerinduka Iya: Sekeda manuskrip bisi ngembuan rambai jaku ti nyebut “enggau pemaik di dunya, pemanah ngagai mensia,” lalu rambai jaku tu bisi dikena ba sekeda salin Bup Kudus. Tang rambai jaku ke dikena ba salin New World Translation bepelasarka bukti ari manuskrip ke lama agi sereta ulih dikearapka. Jaku melikat tu ukai ditujuka ngagai semua mensia, enda ngira ulah sereta pengawa ke dikereja sida. Tang tu ditujuka ngagai orang ke dikerinduka Jehovah laban sida nunjukka pengarap ngagai Iya lalu nyadi murid Anak Iya.—Peda nota pelajar orang ke dikerinduka Iya ba ayat tu.
orang ke dikerinduka Iya: Rambai jaku “orang ke dikerinduka Iya” datai ari leka jaku Gerika eu·do·kiʹa. Leka jaku pengawa ke eu·do·kiʹa, iya nya eu·do·keʹo, bisi dikena ba Mat. 3:17; Mrk. 1:11 enggau Luk. 3:22 (peda nota pelajar ke Mat. 3:17; Mrk. 1:11), lebuh Petara bejaku enggau Jesus, Anak Iya sepengudah iya dibaptisa. Jaku pengawa tu mai reti “diterima; rindu enggau; lantang ati enggau.” Nitihka konteks tu, rambai jaku “orang ke dikerinduka Iya” (an·throʹpois eu·do·kiʹas) ditujuka ngagai orang ti dikerindu sereta diterima Petara. Nya alai, jaku melikat tu ukai ditujuka ngagai semua orang tang ngagai orang ti dikerinduka Iya; orang ke ngelantangka ati Iya ketegal pengarap sida lalu nyadi murid Anak Iya. Taja pan leka jaku Gerika eu·do·kiʹa ulih mega dikena nunjukka ngagai utai ti dikinginka mensia (Rom. 10:1; Plp. 1:15), tang iya suah agi ditujuka ngagai orang ke dikerinduka Petara, tauka ditujuka ngagai peneka Iya (Mat. 11:26; Luk. 10:21; Eps. 1:5, 9; Plp. 2:13; 2 Tes. 1:11).
(Luke 3:23) Umur Jesus tiga puluh taun lebuh iya belabuh ngereja pengawa iya. Nitihka penemu orang, iya anak Josep, anak Heli.
wp16.3 9 ¶1-3
Nemu Nuan?
Sapa apai Josep?
Josep, seiku tukang kayu ari Nasaret, apai tiri Jesus. Tang sapa apai Josep? Tusut peturun Jesus ba bup Injil Matthew nyebut Jakop nya apai Josep. Tang Luke madahka Josep nya “anak Heli.” Nama kebuah penerang tu enda sebaka?—Luke 3:23; Matthew 1:16, NW.
Bup Matthew madahka: “Jakop nyadi apai Josep.” Dalam jaku Gerika, tu enggau terang madahka Jakop nya apai kandung Josep. Nya alai, Matthew mansik tusut peturun Josep, ari peturun Raja David nyentukka ngagai anak tiri Josep, iya nya Jesus.
Tang, bup Luke madahka: “Josep, anak Heli.” Leka jaku “anak” ulih mai reti “menantu.” Ambika chunto ba Luke 3:27. Taja pan apai kandung Sealtiel nya Jehoikin, tang iya dikumbai “anak Neri.” (1 Bansa Israel 3:17; Matthew 1:12) Tu nyadi ketegal Sealtiel jadi enggau anak indu Neri, lalu iya nyadi menantu Neri. Nya alai, Josep ulih dikumbai “anak” Heli laban iya jadi enggau anak indu Heli, iya nya Maria. Nyadi Luke nulis pasal “peturun” Jesus nitihka tusut peturun indai iya, Maria. (Rome 1:3) Bup Kudus endang terang meri kitai dua bagi tusut peturun Jesus ti bebida tang beguna bendar.
Macha Bup Kudus
(Luke 2:1-20) Lebuh maya nya, Raja Besai Augustus meri atur ngasuh semua orang di serata dunya ngerejister nama diri. 2 Tu keterubah iya pengawa ngitung tubuh dikereja. Pengawa tu dikereja lebuh Kurinius nyadi gabenor menua Siria. 3 Semua orang lalu mansang ngagai nengeri sida empu, ngerejister nama diri. 4 Josep mega bejalai ari nengeri Nasaret di menua Galili, ngagai menua Judea, ngagai nengeri David, ti dikumbai Betlehem, laban iya ari peturun David. 5 Iya mansang ngerejister nama diri sama enggau Maria, ke betunang enggau iya, ke benung betubuh-bisi. 6 Lebuh seduai iya di Betlehem, Maria pen nyau chukup bulan alai beranak. 7 Iya lalu ngadaka anak tuai iya, medung anak mit nya ngena kain, lalu ngalika iya dalam dulang, laban sida nadai endur dalam rumah numpang. 8 Di menua nya bisi bala pengibun bedus diau di padang, benung ngibun raban bedus sida lebuh malam hari. 9 Siku melikat Tuhan lalu pegari di mua sida, lalu mulia Tuhan manchar ngelingi sida, lalu sida balat amat takut. 10 Tang ku melikat nya bejaku ngagai sida, “Anang takut! Laban aku mai ngagai kita Berita Manah ti ngasuh ati semua mensia gaga: 11 sehari tu, di nengeri David, Juruselamat kita udah ada, iya nya Kristus ti Tuan! 12 Tu tanda ti diberi ngagai kita: kita deka nemu siku anak mit dibedung ngena kain, gali dalam dulang.” 13 Tekala nya bala melikat ari serega lalu pegari sama enggau melikat nya, belagu muji Petara. Ku sida, 14 ‘Muliaka Petara di serega ti pemadu tinggi, enggau pemaik di dunya ke orang ke dikerinduka Iya!’ 15 Lebuh bala melikat nya udah ninggalka sida lalu pulai ke serega, sida pengibun bedus nya lalu bejaku enggau pangan diri, “Aram kitai mupuk ngagai Betlehem, ngambika kitai meda utai ti udah nyadi, ti udah dipadahka Tuhan ngagai kitai.” 16 Nya alai sida lalu beguai-guai mupuk, lalu tetemuka Maria seduai Josep, enggau anak mit nya gali dalam dulang. 17 Lebuh sida meda nya, sida lalu madahka utai ti udah dipadahka melikat pasal anak mit nya, 18 lalu semua orang ke ninga nya balat alit ati ke utai ti dipadahka sida pengibun bedus. 19 Tang Maria nyimpan semua jaku nya lalu belematika jaku nya dalam ati iya. 20 Sida pengibun bedus lalu pulai, ngemuliaka sereta muji Petara ketegal semua utai ti udah didinga enggau dipeda sida, munyi ti udah dipadahka ngagai sida.
25 JUN–1 JULAI
RETA ARI BUP KUDUS | LUKE 4-5
“Nulak Penguji Baka ke Udah Digaga Jesus”
(Luke 4:1-4) Jesus penuh laban Roh Kudus pulai ari Jordan, lalu iya dibai Roh Kudus ngagai menua puang, 2 alai iya ke diuji Sitan empat puluh hari. Iya nadai makai utai dalam kandang empat puluh hari nya, lalu ba ujung empat puluh hari nya, iya lapar. 3 Sitan lalu bejaku ngagai iya, ‘Enti nuan amat Anak Petara, asuh batu tu nyadi roti.’ 4 Disaut Jesus, “Endang udah ditulis, ‘Mensia enda ulih idup makai roti aja.’ ”
Perundingka Gaya Nuan Patut Idup
8 Sitan ngena chara ti sebaka lebuh iya nguji Jesus ba menua puang. Pengudah Jesus bepasa pengelama 40 hari enggau 40 malam, Sitan nguji manjuk Jesus ngena pengingin ke pemakai. Ku Sitan: ‘Enti nuan amat Anak Petara, asuh batu tu nyadi roti.’ (Luke 4:1-3) Jesus patut ngaga pemutus: Iya ulih milih enda ngena kuasa iya, tauka iya ulih milih ngena kuasa iya ngambika ulih makai. Tang Jesus nemu iya enda patut ngena kuasa iya ke pengingin diri empu. Taja pan iya lapar, Jesus beberatka kaul iya enggau Jehovah ari ke ngemuaska pengingin iya ke pemakai. Saut Jesus ngagai Sitan: “Endang udah ditulis, ‘Mensia enda ulih idup makai roti aja, tang beridup ba genap leka jaku ti pansut ari mulut Petara.’ ”—Matthew 4:4; Luke 4:4.
(Luke 4:5-8) Sitan lalu mai iya ngagai siti endur ti tinggi, lalu mandangka ngagai iya dalam sekejap mata semua menua di dunya 6 lalu bejaku ngagai iya, ‘Aku deka meri semua kuasa enggau semua pengaya nya ngagai nuan, laban semua utai nya udah diberi ngagai aku, lalu aku deka meri utai nya ngagai sebarang orang ke dipilih aku. 7 Nya alai, enti nuan deka nyembah aku, semua utai nya deka diempu nuan magang.’ 8 Jesus lalu nyaut iya, “Endang udah ditulis, ‘Sembah Jehovah Petara nuan, lalu betuaika Iya siku aja!’ ”
Perundingka Gaya Nuan Patut Idup
10 Baka ni enggau Jesus? Sitan ‘mandangka ngagai [Jesus] dalam sekejap mata semua menua di dunya lalu bejaku ngagai iya, “Aku deka meri semua kuasa enggau semua pengaya nya ngagai nuan.” ’ (Luke 4:5, 6) Jesus tentu ukai meda semua perintah nya enggau nyengala. Tang tu diayanka ngena genera. Sitan ngumbai pengaya semua perintah tu ulih narit ati Jesus. Sitan enda malu madahka: ‘Enti nuan deka nyembah aku, semua utai nya deka diempu nuan magang.’ (Luke 4:7) Jesus enggai ningaka jaku Sitan. Lalu iya nyaut Sitan tekala nya, ku iya: “Endang udah ditulis, ‘Sembah Jehovah Petara nuan, lalu betuaika Iya siku aja!’ ”—Luke 4:8.
(Luke 4:9-12) Sitan lalu mai Jesus ngagai Jerusalem, lalu ngengkahka iya ba legit perabung Rumah Sembiang, lalu bejaku ngagai iya, ‘Enti nuan amat Anak Petara, terejun nuan ari tu, 10 laban endang udah ditulis, “Petara deka ngasuh melikat Iya nyaga nuan.” 11 Lalu tu mega udah ditulis, “Sida deka nyambut nuan ngena jari sida, ngambika kaki nuan enda terempas ba batu.” ’ 12 Ku Jesus nyaut iya, “Endang udah disebut, ‘Anang nguji Jehovah Petara nuan.’ ”
media nwtsty
Legit Perabung Rumah Sembiang
Sitan mai Jesus ngagai “legit perabung [tauka “tuchung”] Rumah Sembiang” lalu ngasuh Jesus terejun. Tang endur alai Jesus bediri enda ulih ditentuka. Leka jaku “Rumah Sembiang” dikena ba ayat tu nyengkaum semua bengunan ba Rumah Sembiang. Jesus engka bediri tunga tenggara (1) sukut bengunan ba Rumah Sembiang. Tauka iya engka bediri ba sukut bukai bengunan ke bisi ba Rumah Sembiang. Enti nadai tulung ari Jehovah, labuh ari endur ke baka tu ulih ngujungka pemati.
Perundingka Gaya Nuan Patut Idup
12 Jesus enda baka Hawa. Iya meri teladan ti manah ba pemaruh ati! Sitan nguji Jesus ngena siti da agi chara, tang Jesus nulak penguji nya. Jesus enggai ngereja utai ti ulih nguji Petara laban ulah tu ngayanka penyumbung. Saut ari Jesus endang terang: “Endang udah disebut, ‘Anang nguji Jehovah Petara nuan.’ ”—Bacha Luke 4:9-12.
Ngulihka Penemu Bup Kudus ti Berega
(Luke 4:17) Bup [gulung surat] nabi Isaiah lalu disuaka ngagai iya. Iya muka bup nya, lalu tetemuka siti endur alai jaku tu ditulis,
nota pelajar nwtsty ke Luk. 4:17
bup [gulung surat] nabi Isaiah: Gulung Surat Tasik Mati nabi Isaiah digaga ari 17 iti keretas ke bejantil, ti ngembuan pemanjai 7.3 m (24 kaki) enggau 54 iti begian. Gulung surat ke dikena ba balai gempuru di Nasaret mega ngembuan pemanjai ti sebaka. Ba jeman Jesus, gulung surat nya nadai ngembuan bagi sereta ayat. Nya alai, Jesus patut nemu ni bagi endur ayat ke deka dibacha iya. Ketegal iya ulih tetemuka ayat ke deka dibacha nya, tu nunjukka iya nemu Jaku Petara enggau manah.
(Luke 4:25) Tang iya ti bendar: indu ke balu endang mayuh di menua Israel lebuh rambau Elijah menya, lebuh hari enda ujan tiga taun setengah, lalu lapar pungkang nyadi di serata menua tu.
nota pelajar nwtsty ke Luk. 4:25
tiga taun setengah: Nitihka 1 Raj. 18:1, Elijah madahka musin kemarau deka abis “dalam taun ti ketiga.” Nya alai sekeda orang madahka jaku Jesus enda sejalai enggau penerang ba 1 Raja. Taja pia, penerang ba Sempekat Lama nadai nunjukka kemarau nya nyadi kurang ari tiga taun. Rambai jaku “dalam taun ti ketiga” nyadi ba timpuh maya Elijah keterubah iya madahka Ahap pasal kemarau ke deka nyadi. (1 Raj. 17:1) Tu nyadi ba musin panas. Musin panas suah nyadi pengelama enam bulan tauka panjai agi ari nya. Nambahka nya, musin kemarau bedau abis tekala nya, lebuh Elijah betemu enggau Ahap “dalam taun ti ketiga.” Tang kemarau nya abis pengudah utai ke nyadi ba Bukit Karmel. (1 Raj. 18:18-45) Nya alai, jaku Jesus ke dipadah ba ayat tu, enggau utai ke ditulis menyadi tiri iya ba Jas. 5:17, sejalai enggau utai ke nyadi ba 1 Raj. 18:1.
Macha Bup Kudus
(Luke 4:31-44) Iya lalu mupuk ngagai Kapernaum, sebuah nengeri di menua Galili, lalu ngajar orang dia lebuh hari Sabat. 32 Sida alit ati ninga ajar iya, laban iya bejaku ngena kuasa. 33 Dalam balai gempuru nya bisi siku lelaki ke dirasuk antu. Iya nyerauh inggar amat, ku iya, 34 ‘Nama utai ti deka dikereja nuan ngagai kami, Jesus orang Nasaret? Kati nuan deka ngerusak kami? Aku ngelala nuan. Nuan tu iya ti Kudus ari Petara!’ 35 Tang Jesus ngerara iya, “Anang bejaku; pansut nuan ari iya!” Lebuh antu nya udah ngempaska lelaki nya di mua orang mayuh, iya lalu pansut ari orang nya, tang enda ngemediska iya. 36 Semua orang mayuh balat alit ati, lalu bejaku enggau pangan diri, “Jaku nama tu? Iya bisi kuasa merintah sereta muru roh ti jai, lalu sida pansut!” 37 Berita pasal Jesus lalu ngelekai ngagai semua endur di menua nya. 38 Lebuh Jesus udah ninggalka balai gempuru nya, iya tama ngagai rumah Simon. Nyadi mentua indu Simon balat amat sakit chelap angat, lalu sida nanya Jesus pasal iya. 39 Jesus lalu meremi ari atas indu nya, lalu muru penyakit nya. Indu nya lalu gerai. Tekala nya iya lalu angkat, lalu mela sida. 40 Lebuh padam mata panas, semua orang ke bisi pangan ke sakit laban mayuh macham penyakit, mai pangan sida ngagai Jesus. Iya lalu ngengkahka jari iya atas genap iku sida, lalu ngeraika sida. 41 Antu mega pansut ari mayuh orang, lalu nyerauh, ‘Nuan tu Anak Petara!’ Tang iya ngerara sida, lalu enda nyagi sida bejaku, laban sida nemu iya endang Kristus. 42 Ba urung rerak tawas, iya angkat lalu mupuk ngagai endur siti ti sunyi. Orang mayuh lalu begigaka iya. Lebuh sida udah tetemuka iya, sida lalu enda nyagi iya ninggalka sida. 43 Tang ku Iya bejaku ngagai sida, ‘Aku enda tau enda mega nusui Berita Manah pasal Perintah Petara ngagai nengeri bukai, laban nya kebuah aku dikirumka.’ 44 Nya alai iya majak nusui Berita Manah dalam balai gempuru di serata menua Judea.