Penerang ke Bup Kereja Pengidup enggau Pengawa Kristian
6-12 OGOS
RETA ARI BUP KUDUS | LUKE 17-18
“Ayanka Asai Beterima Kasih”
(Luke 17:11-14) Lebuh Jesus benung majakka pejalai iya ngagai Jerusalem, iya bejalai nengah menua entara menua Samaria enggau menua Galili. 12 Lebuh iya tama ngagai sebuah genturung pendiau, sepuluh iku orang ke sakit lan mansang ngagai iya. Sida bediri ari jauh 13 lalu ngangau enggau nyawa ti inggar. Ku sida, “Jesus! Pengajar! Kasihka kami!” 14 Lebuh iya tepedaka sida, iya lalu bejaku ngagai sida, “Mupuk kita, lalu asuh sida imam meresa kita.” Lebuh sida benung di rantau jalai, sida lalu nyadi tuchi.
nota pelajar nwtsty ke Luk. 17:12, 14
sepuluh iku orang ke sakit lan: Ba jeman Bup Kudus, orang ke sakit lan kesuah agi begelumu tauka diau begulai dalam raban ngambika sida ulih nulung pangan diri. (2 Raj. 7:3-5) Adat Petara madahka orang ke sakit lan patut diau jauh ari orang bukai. Sida mega patut nangkan orang bukai pasal penatai sida iya enggau nyebut: “Enda tuchi! Enda tuchi!” (Lew. 13:45, 46) Sejalai enggau Adat nya sepuluh iku orang ke sakit lan nya bediri jauh ari Jesus.
asuh sida imam meresa kita: Lebuh iya ba dunya, Jesus Kristus nemu iya di baruh Adat Moses. Iya nemu bala imam ke datai ari peturun Aron bisi tanggung pengawa bejalaika Adat tu. Nya alai iya ngasuh sida ke sakit lan betemu enggau bala imam. (Mat. 8:4; Mrk. 1:44) Nitihka Adat Moses, imam deka nentuka sekalika orang ke sakit lan nya udah gerai tauka bedau. Enti orang nya udah gerai, iya patut mansang ngagai Rumah Sembiang mai pemeri nitihka utai ti dipinta ba Adat nya.—Lew. 14:2-32.
(Luke 17:15, 16) Lebuh siku ari bala sida meda diri udah gerai, iya nikal, lalu muji Petara enggau nyawa ti inggar. 16 Iya nyungkurka diri di kaki Jesus, lalu meri terima kasih ngagai iya. Lelaki nya orang Samaria.
(Luke 17:17, 18) Jesus lalu nanya, ‘Ukai enda sepuluh iku digeraika? Kini ke tunga sida ke semilan iku? 18 Kati sida nadai nikal kitu lalu muji Petara, kelimpah ari orang kampar tu?’
w08 1/8 14-15 ¶8-9
Nama Kebuah Ngayanka Asai Beterima Kasih?
Nama runding Jesus pasal ulah ti enda nemu beterima kasih? Ba ayat nya bisi madahka: “Jesus lalu nanya, ‘Ukai enda sepuluh iku digeraika? Kini ke tunga sida ke semilan iku? Kati sida nadai nikal kitu lalu muji Petara, kelimpah ari orang kampar tu?’”—Luke 17:17, 18.
Semilan orang ke sakit lan ukai orang ke jai. Sebedau nya, sida enggau terang madahka pengarap sida ngagai Jesus. Sida mega ngasika jaku Jesus ke ngasuh sida mansang ngagai Jerusalem betemu enggau bala imam. Sida tentu gaga ati enggau pemanah ke dikereja Jesus tang sida enda ngayanka asai beterima kasih ngagai iya. Tu ngasuh Jesus berasai enda senang ati. Baka ni enggau kitai? Lebuh orang manah enggau kitai, kati kitai enggau jampat ngayanka asai beterima kasih, lalu enti ulih, nulis surat madahka asai ati kitai nya?
Ngulihka Penemu Bup Kudus ti Berega
(Luke 17:7-10) “Sapa ari bala kita deka bejaku ngagai ulun iya ke baru pulai ngeradu tanah tauka ngibun bedus, ‘Datai kitu enggau jampat lalu duduk makai?’ 8 Enda ka kita deka bejaku ngagai ulun iya, ‘Sediaka pemakai ke aku. Rasukka pekayan nuan, lalu intu aku lebuh aku makai ngirup. Udah nya baru nuan tau makai?’ 9 Kati nuan meri terima kasih ngagai ulun nya ketegal iya udah ngereja pengawa iya? 10 Kita pen baka nya mega. Lebuh kita udah ngereja semua utai ti diasuh kereja kita, sebut, ‘Kami tu ulun ke nadai guna. Kami semina udah ngereja pengawa ti patut dikereja kami.’
nota pelajar nwtsty ke Luk. 17:10
nadai guna: Lebuh Jesus ngena leka jaku tu ba sempama iya, tu ukai reti bala ulun, iya nya bala murid iya patut ngumbai diri enda beguna tauka enda berega. Nitihka konteks tu, “nadai guna” mai reti ulun patut baruh ati. Sida patut ngembuan runding ti betul pasal diri empu, enda minta dibasa tauka dipuji. Sekeda pakar Bup Kudus madahka leka jaku ke dikena ba ayat tu mai reti “kami semina ulun aja. Kami enda patut diberi basa tauka dipuji.”
(Luke 18:8) Aku madah ngagai kita, iya deka nulung sida enggau jampat. Tang lebuh Anak Mensia datai, kati iya bisi tetemuka [pengarap ti baka tu, NW] di dunya tu?”
nota pelajar nwtsty ke Luk.18:8
pengarap ti baka tu, NW: Tauka “pengarap tu.” Pengarap ke dipadah Jesus ba ayat tu sama enggau pengarap ti diayanka seiku indu balu ba sempama ke dikena Jesus. (Luk. 18:1-8) Tu nyengkaum andal enggau kuasa sampi sereta andalka Petara deka ngelepaska bala nembiak Iya ari pengawa ti enda lurus. Jesus enda nyaut tanya pasal pengarap laban iya deka bala murid iya berundingka kualiti pengarap sida empu. Sempama pasal sampi enggau pengarap endang ngena laban Jesus baru udah madahka penguji ke deka ditapi bala murid iya.—Luk. 17:22-37.
Macha Bup Kudus
(Luke 18:24-43) Jesus merening ngagai iya, lalu bejaku, ‘Mar amat meh orang ke kaya tama ngagai Perintah Petara! 25 Nyamai agi jelu unta tama nengah lubang jarum, ari orang ke kaya tama ngagai Perintah Petara.’ 26 Orang ke ninga nya lalu bejaku, “Enti pia, sapa ulih diselamatka?” 27 Jesus lalu nyaut, ‘Utai ti enda ulih dikereja mensia, ulih dikereja Petara.’ 28 Peter lalu bejaku, “Peda nuan! Kami udah ninggalka rumah kami lalu nitihka nuan.” 29 Jesus lalu bejaku ngagai sida, ‘Enggau bendar aku madah ngagai kita, nadai orang ke udah ninggalka rumah, tauka bini, tauka menyadi lelaki, tauka apai indai, tauka anak, ketegal Perintah Petara, 30 enda nerima berapa kali lipat mayuh agi di dunya tu, enggau dunya ti deka datai, pengidup ti meruan belama iya.’ 31 Jesus lalu mai murid ke dua belas iku ke tisi, lalu bejaku ngagai sida, ‘Dinga kita! Kitai deka mansang ngagai Jerusalem, lalu semua utai ti ditulis sida nabi pasal Anak Mensia deka dikamatka. 32 Laban iya deka diserahka ngagai orang bansa bukai, lalu dikeduan, dipechat, lalu diludah. 33 Lebuh sida udah nyipat iya, sida deka munuh iya, lalu ba hari ti ketiga iya deka angkat idup baru.’ 34 Tang sida enda meretika utai nya. Iya ti bendar, utai ti disebut iya udah dipelalaika ari sida, lalu sida enda nemu utai ti disebut Jesus. 35 Lebuh Jesus datai semak Jeriko, siku orang ke buta bisi duduk ba tisi jalai raya, minta sedekah. 36 Lebuh iya ninga bala orang mansa, iya lalu nanyaka utai ti nyadi. 37 Sida lalu madah ngagai iya, “Jesus orang Nasaret benung mansa.” 38 Iya lalu manjung, “Jesus! Anak David! Kasihka aku!” 39 Orang ke di mua lalu balat amat ngasuh iya badu agi ragak. Tang iya manjung inggar agi, “Anak David! Kasihka aku!” 40 Jesus lalu ngetu, lalu ngasuh orang mai orang ke buta nya ngagai iya. Lebuh orang ke buta nya datai semak, Jesus lalu nanya iya, 41 ‘Nama utai ti diasuh nuan kereja aku ke nuan?’ Iya lalu nyaut, ‘Tuan, awakka aku ulih meda baru.’ 42 Jesus lalu bejaku ngagai iya, “Awakka nuan ulih meda! Pengarap nuan udah ngeraika nuan.” 43 Orang nya lalu tekala nya ulih meda baru, lalu nitihka Jesus, ngemuliaka Petara. Lebuh orang mayuh meda nya, semua sida lalu muji Petara.
13-19 OGOS
RETA ARI BUP KUDUS | LUKE 19-20
“Belajar Ari Sempama Jesus Pasal Sepuluh Mina”
(Luke 19:12, 13) Nya alai ku iya bejaku, “Siku orang ke tinggi pangkat bejalai ngagai menua ti jauh, ngambika iya dichiri nyadi raja, lalu udah nya pulai baru ngagai menua iya empu. 13 Iya ngangauka sepuluh iku orang gaji iya, lalu meri sida [sepuluh mina, NW] lalu bejaku ngagai sida, “Aku ngasuh kita bedagang ngena duit tu nyentuk ngagai maya aku pulai kitu baru.”
jy 232 ¶2-4
Sempama Jesus Pasal Sepuluh Mina
Nya alai ku iya bejaku, “Siku orang ke tinggi pangkat bejalai ngagai menua ti jauh, ngambika iya dichiri nyadi raja, lalu udah nya pulai baru ngagai menua iya empu.” (Luke 19:12) Pejalai nya begunaka mayuh hari. Endang terang Jesus nya “seiku orang ke tinggi pangkat” ke mansang ngagai “menua ti jauh,” iya nya serega, alai Apai iya nyiri iya nyadi Raja.
Ba sempama tu, sebedau “siku orang ke tinggi pangkat” mupuk, iya ngangauka sepuluh iku orang gaji iya lalu meri tiap iku sida duit. Iya ngasuh sida: “Bedagang ngena duit tu nyentuk ngagai maya aku pulai kitu baru.” (Luke 19:13) Penyampau duit ke diberi nya sama enggau upah orang ke gawa ba kebun dalam kandang lebih ari tiga bulan.
Bala murid engka ulih nyangka sida baka sepuluh iku orang gaji ba sempama tu. Tu ketegal Jesus mandingka sida enggau orang ke ngetau. (Matthew 9:35-38) Jesus ukai ngasuh sida mai asil utai ke diketau. Tang reti ku Jesus, sida deka ngetau tauka ngiga orang ke deka nerima Perintah Petara. Bala murid Jesus ngena awak, pengering sereta utai ti dikemisi sida kena ngiga orang ke dipilih merintah ba Perintah Petara.
(Luke 19:16-19) Iya ke terubah datai lalu bejaku, “Tuan, sesingkap duit nuan udah bulih sepuluh singkap.” 17 Lalu ku iya bejaku ngagai orang nya, “Manah pengawa nuan. Nuan tu orang gaji ti manah! Laban nuan tau dikarapka ngemataka utai ti mimit, aku deka ngasuh nuan ngemataka sepuluh buah nengeri.” 18 Iya ti kedua datai lalu bejaku, “Tuan, sesingkap duit nuan udah bulih lima singkap.” 19 Lalu ku tuan iya bejaku ngagai iya, “Nuan deka ngemataka lima buah nengeri.”
jy 232 ¶7
Sempama Jesus Pasal Sepuluh Mina
Enti bala murid Jesus neladan ulun ba sempama nya tadi, iya nya enggau naka ulih ngena awak, pengering sereta utai ti dikemisi sida ngaga murid, Jesus tentu gaga ati enggau pengawa sida, lalu merekatka pemagas sida. Endang amat, ukai semua bala murid Jesus ulih ngereja pengawa ti sama tauka ngembuan pengelandik ti sama. Tang Jesus ke udah “dichiri nyadi raja” ingatka utai ke udah digaga sida lalu deka merekat pemagas sida ba pengawa ngaga murid.—Matthew 28:19, 20.
(Luke 19:20-24) Iya ti siku datai lalu bejaku, “Tuan, tu duit nuan. Aku mungkus duit tu ngena perecha, 21 laban aku takutka nuan, laban nuan orang ke terit. Nuan ngambi utai ti ukai disimpan nuan, lalu ngetau utai ti ukai ditanam nuan.” 22 Ku tuan nya bejaku ngagai orang gaji nya, “Aku deka ngakim nuan ngena leka jaku nuan empu, nuan orang gaji ti jai! Nuan nemu aku endang terit, ngambi utai ti ukai disimpan aku, lalu ngetau utai ti ukai ditanam aku. 23 Nya alai nama kebuah nuan enda nyimpan duit aku dalam bank, ngambika lebuh aku pulai kitu baru, aku ulih nerima iya sama enggau bungai iya?” 24 Udah nya iya lalu bejaku ngagai orang ke bediri semak dia, “Ambi duit nya ari iya, lalu beri ngagai iya ke bisi sepuluh singkap.”
jy 233 ¶1
Sempama Jesus Pasal Sepuluh Mina
Ketegal enda gawa bebendar nambahka pengaya ke perintah tuan iya, orang gaji tu napi pengerugi. Bala rasul Jesus nganti Jesus merintah ba Perintah Petara. Nyadi ari utai ke disebut iya pasal orang gaji ti penudi tu, sida enda bulih penuduk ba Perintah Petara enti sida enda bagas gawa.
Ngulihka Penemu Bup Kudus ti Berega
(Luke 19:43) Maya deka datai alai bala munsuh nuan deka ngaga kuta tanah [“pagar kayu ti tajam,” NW] ngelingi nuan kena ngelulung nuan, lalu mekulka nuan.
nota pelajar nwtsty ke Luk. 19:43
pagar kayu ti tajam: Tauka “kuta.” Leka jaku Gerika khaʹrax semina ayan ba ayat tu di Sempekat Baru. Iya ulih mai reti “kayu ke tajam ba ujung lalu dikena nyadika pagar; tiang.” Jaku Jesus amat nyadi ba taun 70 M. lebuh Titus ngiring bala soldadu Rome, lalu ngaga dinding tauka pagar ngelulung Jerusalem. Bisi tiga iti tuju Titus ngereja nya. Kesatu, iya deka nagang orang Judah ari ngerarika diri. Kedua, iya deka sida nyerahka diri, lalu ketiga, iya deka rayat lapar ngambika sida tunduk ngagai perintah Rome. Kena ngulihka kayu ngaga pagar nya, bala soldadu Rome nebang mayuh pun kayu ba luar menua.
(Luke 20:38) Petara ukai Petara ke orang ke mati, tang ke orang ke idup, laban ba Petara semua orang idup magang.’
nota pelajar nwtsty ke Luk. 20:38
laban ba Petara semua orang idup magang: Tauka “ba runding Iya, sida agi idup.” Bup Kudus nunjukka orang ke nadai kaul enggau Petara, taja pan sida agi idup, ba runding Iya orang nya baka ke udah mati. (Eps. 2:1; 1 Tim. 5:6) Pia mega, nembiak Petara ke udah mati agi idup ba runding Petara, laban Iya tentu deka ngidupka sida baru.—Rom. 4:16, 17.
Macha Bup Kudus
(Luke 19:11-27) Lebuh orang mayuh agi benung mendingka iya bejaku, iya lalu madahka siti sempama ngagai sida, laban iya nyau datai semak Jerusalem, enggau laban sida ngumbai Perintah Petara baru deka pegari. 12 Nya alai ku iya bejaku, “Siku orang ke tinggi pangkat bejalai ngagai menua ti jauh, ngambika iya dichiri nyadi raja, lalu udah nya pulai baru ngagai menua iya empu. 13 Iya ngangauka sepuluh iku orang gaji iya, lalu meri sida sepuluh singkap duit emas, lalu bejaku ngagai sida, “Aku ngasuh kita bedagang ngena duit tu nyentuk ngagai maya aku pulai kitu baru.” 14 Tang bala nembiak iya begedika iya, lalu sida ngasuh bala seruan nitihka iya, ku sida, “Kami enggai meda orang tu nyadi raja kami.” 15 Lebuh iya pulai, udah bekau iya ke dichiri nyadi raja, iya lalu ngasuh orang manggil orang gaji ke udah alai iya nyuaka duit, deka nemu untung ti udah ulih sida bedagang. 16 Iya ke terubah datai lalu bejaku, “Tuan, sesingkap duit nuan udah bulih sepuluh singkap.” 17 Lalu ku iya bejaku ngagai orang nya, “Manah pengawa nuan. Nuan tu orang gaji ti manah! Laban nuan tau dikarapka ngemataka utai ti mimit, aku deka ngasuh nuan ngemataka sepuluh buah nengeri.” 18 Iya ti kedua datai lalu bejaku, “Tuan, sesingkap duit nuan udah bulih lima singkap.” 19 Lalu ku tuan iya bejaku ngagai iya, “Nuan deka ngemataka lima buah nengeri.” 20 Iya ti siku datai lalu bejaku, “Tuan, tu duit nuan. Aku mungkus duit tu ngena perecha, 21 laban aku takutka nuan, laban nuan orang ke terit. Nuan ngambi utai ti ukai disimpan nuan, lalu ngetau utai ti ukai ditanam nuan.” 22 Ku tuan nya bejaku ngagai orang gaji nya, “Aku deka ngakim nuan ngena leka jaku nuan empu, nuan orang gaji ti jai! Nuan nemu aku endang terit, ngambi utai ti ukai disimpan aku, lalu ngetau utai ti ukai ditanam aku. 23 Nya alai nama kebuah nuan enda nyimpan duit aku dalam bank, ngambika lebuh aku pulai kitu baru, aku ulih nerima iya sama enggau bungai iya?” 24 Udah nya iya lalu bejaku ngagai orang ke bediri semak dia, “Ambi duit nya ari iya, lalu beri ngagai iya ke bisi sepuluh singkap.” 25 Tang ku sida bejaku ngagai iya, “Tuan, iya udah bisi sepuluh singkap!” 26 “Aku madah ngagai kita, genap iku orang ke bisi utai deka diberi mayuh agi, tang orang ke nadai utai, indah utai ti mimit ti dikemisi sida deh deka diambi ari sida. 27 Nyadi pasal bala munsuh aku ke enggai nerima aku nyadi raja sida, bai sida kitu, lalu bunuh sida di mua aku!”
20-26 OGOS
RETA ARI BUP KUDUS | LUKE 21-22
“Pengelepas Kita Nyau Semak”
(Luke 21:25) “Tanda deka pegari ba mata hari, ba bulan enggau ba bintang, lalu semua bansa di dunya deka tusah sereta irau ninga pemalat munyi segum tasik enggau pangka gelumbang.
kr 226 ¶9
Perintah Petara Ngemunaska Munsuh Iya
9 Utai ti ngalitka ati ba langit. Jesus madahka utai ti deka nyadi: “Mata hari deka piam, lalu bulan nadai agi manchar, lalu bintang deka labuh ari langit.” Maya nya orang mayuh enda agi arapka bala tuai pengarap. Kati Jesus mega bejaku pasal utai ti ngalitka ati ba langit? Engka. (Isa. 13:9-11; Joel 2:1, 30, 31) Nama deka digaga orang mayuh lebuh meda utai tu? Sida deka berasai “tusah sereta irau” laban enda nemu chara ngelepaska diri. (Luk. 21:25; Sep. 1:17) Endang amat, munsuh Perintah Petara, ari ‘bala raja nyentukka bala ulun’ deka “luput laban takut, irauka utai ti deka ninggang dunya” lalu rari ngiga endur belalai. Tang sida enda ulih tetemuka endur ti ulih ngelindung sida ari pengeringat Raja kitai.—Luk. 21:26; 23:30; Pem. 6:15-17.
(Luke 21:26) Orang deka luput laban takut, irauka utai ti deka ninggang dunya, laban kuasa ti di langit deka begegar.
(Luke 21:27, 28) Udah nya baru sida deka meda Anak Mensia datai dalam remang ngena kuasa enggau mulia ti besai. 28 Lebuh utai tu belabuh nyadi, bediri lalu angkatka pala kita, laban pengelepas kita nyau semak.”
Aram Meh Kitai “Majak Rinduka Diri Menyadi Dalam Kristus”!
17 “Kempang ati [ati ti berani].” (Bacha Hebrew 13:6.) Arapka Jehovah meri kitai pemerani kena natka penguji ti besai. Pemerani tu nulung kitai ngembuan runding ti betul. Lalu lebuh runding kitai betul, kitai ulih ngayanka pengerindu ngagai menyadi dalam Kristus enggau meransang sereta ngelantangka ati sida. (1 Tes. 5:14, 15) Indah lebuh maya penusah ti besai, kitai ulih berani laban nemu pengelepas kitai nyau semak.—Luk. 21:25-28.
“Pengelepas Kita Nyau Semak”!
13 Nama deka digaga sida ke enda tetap ati lebuh sida nemu sida deka dipunaska? Sida “deka ngulit.” (Mat. 24:30) Tang nama deka digaga orang ke diiri ngena roh kudus enggau orang ke nyukung sida? Sida deka ngereja utai ke dipadah Jesus: “Lebuh utai tu belabuh nyadi, bediri lalu angkatka pala kita, laban pengelepas kita nyau semak.”—Luk. 21:28.
Ngulihka Penemu Bup Kudus ti Berega
(Luke 21:33) Langit enggau dunya deka lenyau, tang jaku aku enda lenyau.
nota pelajar nwtsty ke Luk. 21:33
Langit enggau dunya deka lenyau: Ayat bukai bisi nunjukka langit enggau dunya deka mengkang bisi belama iya. (P-kal. 9:16; Mas. 104:5; P-jar. 1:4) Nya alai rambai jaku Jesus ba ditu mai reti, enti sema langit enggau dunya amat lenyau, jaku Jesus mega tetap dikeamatka. (Banding Mat. 5:18.) Taja pia, langit enggau dunya ba ayat tu dikena ngambarka “langit ti dulu enggau dunya ti dulu” ba Pem. 21:1.
jaku aku enda lenyau: Tauka “jaku aku tentu enda lenyau.” Chara ayat tu ditulis dalam jaku Gerika nunjukka jaku Jesus tentu deka dikeamatka.
(Luke 22:28-30) “Kita udah begulai enggau aku lebuh aku natka semua pemerinsa aku, 29 lalu aku meri kita kuasa merintah, baka Apai ti udah [“ngaga sempekat enggau aku,” NW] kena merintah, 30 ngambika kita ulih makai ngirup ba mija aku dalam Perintah aku, lalu kita deka duduk ba kerusi diraja, ngakim dua belas raban bansa orang Israel.
w14 15/10 16-17 ¶15-16
Kita Deka Nyadi “Perintah Imam”
15 Pengudah ngepunka Makai Malam Tuan, Jesus ngaga sempekat enggau murid iya ti tetap ati. Sempekat tu dikumbai sempekat Perintah. (Bacha Luke 22:28-30.) Jehovah nadai bisi kaul enggau sempekat tu. Sempekat tu semina entara Jesus enggau orang ke dipilih ke serega. Lebuh Jesus madahka, ‘baka Apai ti udah [“ngaga sempekat enggau aku,” NW] kena merintah,’ iya nyebut pasal sempekat entara Jehovah enggau iya ke nyadi “imam belama iya murihka Melkisedek.”—Heb. 5:5, 6.
16 Sebelas iku rasul iya ke tetap ati udah ‘begulai enggau Jesus natka semua pemerinsa iya.’ Sempekat Perintah nunjukka sida deka merintah nyadi raja sereta imam ba serega enggau Jesus. Taja pia, ukai semina sebelas iku aja ke bisi peluang tu. Jesus ngayanka diri ba rasul John ngena genera lalu madah: ‘Orang ke menang deka dibai aku duduk enggau aku ba kerusi diraja aku, baka aku ke udah menang lalu duduk enggau Apai aku ba kerusi diraja Iya.’ (Pem. 3: 21) Sempekat Perintah digaga enggau 144,000 iku orang Kristian ke dipilih. (Pem. 5:9, 10; 7:4) Sempekat tu nunjukka sida ke dipilih deka merintah enggau Jesus ba serega enggau sah. Tu sebaka enggau seiku indu ari ruang bilik ti bepangkat tinggi ti deka ditikah enggau seiku Raja lalu seduai iya deka bekunsi kuasa merintah. Kebendar iya ayat Bup Kudus madah sida ke dipilih ke serega nya “tunang” Kristus, “dara bungas” ke deka jadi enggau Kristus.—Pem. 19:7, 8; 21:9; 2 Kor. 11:2.
Macha Bup Kudus
(Luke 22:35-53) Ku Jesus bejaku ngagai sida, ‘Lebuh aku ngasuh kita bejalai, lalu enda nyagi kita mai kandi duit, tauka kambut, tauka selipar, kati kita bisi suntuk utai?’ “Nadai,” ku sida nyaut. 36 Ku iya bejaku ngagai sida, ‘Tang diatu, barang sapa bisi kandi duit, enda tau enda mai kandi nya, lalu baka nya mega orang ke bisi kambut. Lalu orang ke nadai pedang, enda tau enda nyual kelambi iya, lalu meli pedang. 37 Laban aku madah ngagai kita, jaku ti disebut dalam Bup Kudus, “Iya deka begulai enggau orang ke jai,” enda tau enda dikamatka ba aku, laban utai ti ditulis pasal aku endang benung dikamatka diatu.’ 38 Sida murid iya lalu bejaku, ‘Peda nuan, Tuan! Tu dua bilah pedang!’ Iya lalu nyaut, “Umbas meh nya.” 39 Iya pansut lalu mupuk baka selama ngagai Bukit Kana, lalu sida murid nitihka iya. 40 Lebuh iya datai ba endur nya, iya lalu nyebut ngagai sida, “Besampi ngambika kita enda kena laban penguji.” 41 Iya lalu bejalai jauh mimit ari sida, kira sepenikau batu ari sida, besugang lalu besampi, 42 ‘Apai, enti Nuan deka, ambi mangkuk tu ari aku; ukai nitihka peneka aku, tang awakka peneka Nuan nyadi.’ 43 Udah nya siku melikat ari serega pegari di mua iya, lalu ngeringka iya. 44 Enggau ati ti balat tusah, iya bebendar agi besampi, datai ke peluh iya nyau baka darah neritik ngagai tanah. 45 Lebuh iya angkat ari endur iya ke besampi, iya pulai ngagai sida murid iya, lalu nemu sida tinduk, laban sida lelak laban ati ti kelalu balat tusah. 46 Iya lalu bejaku ngagai sida, “Nama kebuah kita tinduk? Angkat, lalu besampi, ngambika kita enda kena laban penguji.” 47 Lebuh iya agi benung bejaku, bala orang lalu ngenyit datai, diuluka Judas, siku ari sida ke dua belas. Judas mansang ngagai Jesus, deka nyium iya. 48 Tang ku Jesus bejaku ngagai iya, “Judas, kati nuan nyual Anak Mensia ngena sium?” 49 Lebuh sida murid ke sama enggau Jesus meda utai ti deka nyadi, sida lalu nanya, ‘Tuan, kati kami tau mantap sida ngena pedang?’ 50 Siku ari bala sida lalu mantap ulun imam besai, mutuska pending kanan iya. 51 Tang ku Jesus bejaku, “Badu agi!” Iya lalu negu pending orang nya, lalu ngeraika iya. 52 Jesus lalu bejaku ngagai sida tuai imam enggau bala polis ke nyaga Rumah Sembiang, enggau sida tuai bansa ke udah datai nangkap iya, ‘Kati aku tu penyamun alai kita datai mai pedang enggau pemalu? 53 Lebuh aku begulai enggau kita tiap hari dalam Rumah Sembiang, kita enda nangkap aku. Tang tu endang maya kita, maya kuasa pemetang merintah.’
27 OGOS–2 SEPTEMBER
RETA ARI BUP KUDUS | LUKE 23-24
“Sedia Deka Ngampun Orang Bukai”
(Luke 23:34) Udah nya Jesus bejaku, “Apai, ampun sida, laban sida enda nemu utai ti dikereja diri.” Sida lalu bedua gari iya ngena chara bechabut undi.
cl 297 ¶16
Kelala “Pengerindu Kristus”
16 Jesus mega enggau sempurna ngayanka pengerindu Apai iya—iya besedia “ngampun.” (Masmur 86:5) Tu diayanka lebuh iya ba tiang perinsa. Pemati iya ke dipantang enggau paku lawang ba jari enggau ba kaki amat ngemaluka. Tang nama utai ku Jesus pasal tu? Kati iya ngasuh Jehovah ngukum orang ke munuh iya? Enda! Ku Jesus: “Apai, ampun sida, laban sida enda nemu utai ti dikereja diri.”—Luke 23:34.
(Luke 23:43) Jesus lalu nyaut, ‘Enggau bendar aku madah ngagai nuan, sehari tu nuan deka sama enggau aku di [“Paradais,” NW].’
g 2/08 11 ¶5-6
Kati Petara Ngampun Dosa ti Besai?
Ukai semina dosa aja tang ulah orang ke ngaga dosa nya mega dipeda Jehovah. (Isaiah 1:16-19) Perundingka dua iku orang ti jai dipantang ba tiang perinsa enggau Jesus. Seduai iya ngereja penyalah ti besai lalu seiku ari lelaki nya ngaku: “Tua endang patut diukum laban tua amat udah ngereja penyalah, tang orang tu [Jesus] nadai udah ngereja penyalah.” Jaku tu nunjukka iya nemu sekeda utai pasal Jesus lalu tu ngubah ulah iya. Pengudah nya iya minta Jesus: ‘Kingatka aku lebuh nuan datai ngagai Perintah nuan!’ Baka ni Jesus nyaut iya? Ku Jesus, ‘Enggau bendar aku madah ngagai nuan, sehari tu nuan deka sama enggau aku di [“Paradais,” NW].’—Luke 23:41-43.
Perundingka: Jaku Jesus ti penudi ba dunya nunjukka pengasih iya ngagai lelaki ke ngaku diri patut diukum mati. Tu amat meransang kitai! Kitai ulih arapka Jesus Kristus enggau Apai iya Jehovah deka ngayanka penyiru ngagai orang ke nesal ati, enda ngira penyalah ke kala digaga sida.—Rome 4:7.
(Luke 24:34) Ku sida bejaku, ‘Tuan amat udah angkat idup baru, lalu iya udah pegari di mua Simon!’
cl 297-298 ¶17-18
Kelala “Pengerindu Kristus”
17 Siti agi chunto ke negu ati pasal Jesus ke besedia ngampun orang, ulih dipeda lebuh iya enggau rasul Peter. Kitai nemu Peter endang rinduka Jesus. Maya 14 Nisan, malam ke penudi pengidup Jesus, Peter madah ngagai iya: ‘Tuan, aku sedia deka ditutup dalam rumah jil lalu mati enggau nuan.’ Tang beberapa jam udah nya, Peter tiga kali ngumbai diri enda ngelala Jesus! Bup Kudus madahka kitai nama utai ti nyadi lebuh Peter nyangkal iya kali ketiga: ‘Tuan nguing lalu merening ngagai Peter.’ Ketegal iya balat tusah ati enggau penyalah diri empu, Peter “pansut lalu duie-duie nyabak.” Pengudah Jesus mati, Peter engka berunding, ‘Kati Tuan udah ngampun aku?’—Luke 22:33, 61, 62.
18 Peter enda ibuh nganti lama kena nemu saut nya. Jesus diangkat idup baru ba pagi 16 Nisan lalu ba hari ti sama iya betemu enggau Peter. (Luke 24:34; 1 Korint 15:4-8) Nama kebuah Jesus ngayanka pemanah ngagai Peter ke udah bebendar ngumbai diri enda ngelala Jesus? Jesus engka deka Peter nemu iya agi dikerindu sereta berega ba mata Jesus. Tang Jesus ngereja lebih agi ari nya kena merindang Peter.
Ngulihka Penemu Bup Kudus ti Berega
(Luke 23:31) Laban enti sida ngereja nya lebuh kayu agi idup, nama utai ti deka nyadi lebuh kayu nya udah rangkai?”
nota pelajar nwtsty ke Luk. 23:31
lebuh kayu agi idup, . . . lebuh kayu nya udah rangkai: Tu ditujuka ngagai bansa Israel. Sida disempamaka baka kayu ke udah rangkai tang agi bisi ai lebuh Jesus agi bisi enggau sida, lalu maya nya bisi orang Israel ke pechayaka Jesus. Taja pia, Jesus deka dibunuh lalu orang Israel ke tetap ati deka dipilih ngena roh kudus sereta nyadi sebagi ari orang ti dipilih ke serega. (Rom. 2:28, 29; Gal. 6:16) Maya nya bansa Israel enda agi tegap ba pengarap lalu sida disempamaka baka kayu ti rangkai.—Mat. 21:43.
(Luke 23:33) Lebuh sida datai ba endur ti dikumbai “Keruntuk,” sida lalu [“mantang,” NW] iya dia sama enggau dua iku orang ke udah ngereja penyalah, siku muak ari kanan, lalu siku muak ari kiba iya.
media nwtsty
Paku Lawang ba Tulang Tumbit
Tu gambar replika tulang tumbit mensia ke dipantang ngena paku lawang pemanjai 11.5 cm (4.5 in.). (Peda mwb17.12 5.) Artifak ke asal ditemu ba taun 1968, maya pengawa ngelabak ba utara Jerusalem, lalu artifak tu udah bisi ba jeman Rome. Bukti arkeologi tu nunjukka paku lawang dikena lebuh mantang orang ke diukum ba tiang kayu. Paku lawang tu engka sama enggau paku lawang ti dikena bala soldadu Rome lebuh mantang Jesus Kristus ba tiang kayu. Artifak tu ditemu dalam kutak batu, ke dikumbai ossuary, endur tulang orang ke udah mati disimpan pengudah bangkai iya luluh. Tu nunjukka orang ke diukum bunuh ba tiang kayu ulih dikuburka.
Macha Bup Kudus
(Luke 23:1-16) Semua raban Kunsil lalu angkat sereta, lalu mai Jesus ngagai Pilate. 2 Sida lalu belabuh bedawaka iya, ku sida, ‘Kami nemu orang tu nesatka bansa kami, nagang kami mayar chukai ngagai Raja Besai, lalu ngumbai diri Kristus, reti nya raja.’ 3 Pilate lalu nanya iya, ‘Kati nuan raja orang Judah?’ Jesus lalu nyaut iya, “Munyi ti ku nuan.” 4 Pilate lalu bejaku ngagai sida tuai imam, enggau ngagai bala orang mayuh, “Aku nadai nemu kebuah kita bedawaka orang tu.” 5 Tang sida bebendar agi bejaku, ku sida, ‘Iya megau orang mayuh, ngajar di serata menua Judea, kenyau ari Galili alai iya ke berengkah, nyentuk ngagai endur tu.’ 6 Lebuh Pilate ninga nya, iya lalu nanya enti Jesus nya orang Galili. 7 Lebuh iya ninga Jesus datai ari menua ti dipegai Herod, iya lalu ngasuh Jesus dibai ngagai Herod, ke bisi di Jerusalem lebuh maya nya. 8 Lebuh Herod meda Jesus, iya gaga amat ati, laban iya lama udah keran deka betemu enggau Jesus, laban iya udah ninga berita pasal Jesus, lalu ngarapka diri ulih meda Jesus ngereja kereja ajih. 9 Herod lalu lama nanya Jesus, tang Jesus enda nyaut iya. 10 Sida tuai imam enggau sida pengajar Adat bisi bediri dia, bebendar amat bedawaka Jesus. 11 Indah Herod enggau bala soldadu iya deh beduan sereta ngeleseka Jesus. Udah nya iya ngerasukka baju panjai ti manah ba Jesus, lalu ngirumka Jesus pulai baru ngagai Pilate. 12 Ba hari nya Herod seduai Pilate lalu bebaik enggau pangan diri. Sebedau nya, seduai iya endang bemunsuh enggau pangan diri. 13 Pilate lalu ngempuruka sida tuai imam, tuai bansa, enggau orang mayuh, 14 lalu bejaku ngagai sida, ‘Kita udah mai orang tu ngagai aku, madahka iya udah nesatka orang mayuh. Aku udah mansik iya di mua kita empu, lalu aku nadai nemu iya bisi udah ngereja penyalah munyi ti ku kita. 15 Herod pen nadai mega nemu penyalah iya, laban iya udah ngirumka iya pulai baru ngagai aku. Orang tu nadai udah ngereja utai ti tau ngasuh iya kena ukum bunuh. 16 Nya alai aku deka ngasuh iya disipat, lalu ngelepaska iya.’