Jesus Diserahka lalu Diukum Mati

Taja pan Jesus udah balat diperinsa sereta dikelese, tang Pilate enda mujur ngelepaska iya laban bala tuai imam tetap deka Jesus diukum bunuh. Sida manjung madahka: “Pantang iya ba tiang! Pantang iya ba tiang!” Nya alai Pilate madah ngagai sida: “Kita empu meh mai iya lalu mantang iya ba tiang, laban aku nadai tetemuka penyalah iya.”—John 19:6.

Iya ke amat, orang Judah udah nuduh Jesus madahka iya ngelaban perintah, lalu nya meh kebuah Jesus patut diukum bunuh. Tang Pilate enda pechayaka jaku sida. Nya alai, sida nuduh Jesus ngereja utai ti ngelanggar adat orang Judah. Baka ke kala dipadah sida lebuh Jesus dipechara ba Raban Kunsil Orang Judah, sida madahka iya udah bejaku ngelaban Petara. Ku sida: “Kami bisi adat, lalu nitihka adat kami, iya patut mati laban iya madahka diri anak Petara.” (John 19:7) Kebendar iya, jaku tuduh nya baru didinga Pilate.

Pilate pulai baru ngagai istana iya, lalu nguji ngiga chara ngelepaska Jesus ke udah balat diperinsa. Nambahka nya, bini Pilate bisi mimpi pasal Jesus. (Matthew 27:19) Taja pia, Pilate charut runding laban orang Judah nuduh Jesus madahka diri “anak Petara.” Tang Pilate nemu Jesus datai ari Galili. (Luke 23:5-7) Nya alai, iya nanya Jesus: “Ari ni penatai nuan?” (John 19:9) Nyadi, Pilate engka ngumbai Jesus siku petara, lalu berunding sekalika Jesus kala diau ba serega tauka enda.

Sebedau tu, Jesus kala madah ngagai Pilate, iya endang siku raja lalu Perintah iya ukai sebagi ari dunya tu. Tang lebuh orang mayuh nuduh Jesus, iya mengkang enda bemunyi lalu enda meri nama-nama penerang agi. Nya ngasuh Pilate balat pedis ati. Nya alai, iya ringat lalu madah ngagai Jesus: “Kati nuan enggai bejaku enggau aku? Endaka nuan nemu aku bisi kuasa ngelepaska nuan tauka ngasuh nuan diukum bunuh?”—John 19:10.

Ku Jesus nyaut Pilate: “Nuan endang sigi nadai kuasa atas aku, enti Petara enda meri kuasa nya ngagai nuan. Nya meh kebuah orang ke nyerahka aku ngagai nuan deka lebih agi bedosa.” (John 19:11) Lebuh Jesus bejaku munyi nya, iya merujuk ngagai Kaiapas, bala tuai imam, enggau Judas Iskariot. Sida lebih agi bedosa ari Pilate.

Pilate berasai kagum pengudah ninga saut Jesus. Tang iya majak agi takut enggaika Jesus nya amat-amat petara. Nya alai, iya sekali agi nguji deka ngelepaska Jesus. Taja pia, orang Judah ngugut Pilate lalu madah: “Enti nuan ngelepaska orang tu, nuan ukai kaban raja Rome. Barang sapa ke madahka diri raja, ngelaban raja Rome.”—John 19:12.

Sekali agi Pilate mai Jesus pansut, lalu Pilate duduk ba kerusi hakim. Udah nya, iya madah ngagai orang Judah: “Peda! Raja kita!” Tang sida inggar agi manjung madahka: “Bunuh iya! Bunuh iya! Pantang iya ba tiang!” Taja pia, Pilate nyaut sida: “Patut aku ngukum bunuh raja kita?” Iya ke amat, orang Judah enda rindu diperintah orang Rome. Tang, bala tuai imam madah ngagai Pilate: “Kami nadai raja bukai kelimpah ari raja Rome.”—John 19:14, 15.

Ketegal Pilate takutka orang Judah, iya nyerahka Jesus ngagai sida ngambika Jesus diukum bunuh. Bala soldadu muka gari ungu ke dikena Jesus, lalu ngerasukka baru baju jubah iya. Lebuh sida mai Jesus pansut, iya diasuh ngesan tiang perinsa iya empu.

Maya nya nyauka tengah hari Hari Lima, 14 Nisan. Jesus enda tinduk kenyau ari tumu pagi Hari Empat. Iya mega enda ngetu-ngetu diperinsa. Nya alai, iya berasai lemi lalu nadai pengering deka ngesan tiang perinsa iya. Nyadi bala soldadu mejal siku lelaki ke benung mansa, iya nya Simon ari Sairin ba Afrika, ngesan tiang perinsa Jesus lalu mai tiang nya ngagai endur alai Jesus deka dipantang. Mayuh orang nitihka Jesus, lalu sekeda ari sida nyabakka iya, sereta enda badu-badu mandam dada diri ketegal kelalu balat tusah ati.

Ku Jesus madah ngagai bala indu ke benung nyabak: “Bala indu Jerusalem, anang nyabakka aku. Tang nyabak meh ke diri empu enggau ke bala anak kita. Laban maya deka datai alai orang madahka: ‘Gaga ati meh indu ke mandul enggau indu ke enda kala ngadaka anak sereta ke enda kala nusuka anak!’ Maya nya orang deka bejaku ngagai gunung, ‘Lamun kami!’ lalu ngagai bukit, ‘Lalaika kami!’ Enti sida ngereja nya lebuh pun kayu agi idup, nama utai ti deka nyadi lebuh pun kayu nya udah rangkai?”—Luke 23:28-31.

Pun kayu ke dipadahka Jesus merujuk ngagai bansa Judah. Pun kayu nya bedau agi rangkai, laban Jesus agi bisi ba dia, lalu sekeda orang Judah arapka iya. Tang pengudah Jesus mati, bala murid iya enda agi nyadi sebagi ari pengarap Judah. Nya alai, bansa Judah deka nyadi baka pun kayu ti udah rangkai. Reti iya, sida nadai agi ngembuan kaul enggau Petara. Lalu sida deka bekeduie nyabak lebuh Petara ngena bala soldadu Rome ngakim bansa sida!