Sapa Apai Sida—Abraham tauka Sitan?

Jesus agi ba Jerusalem ngintu Pengerami Belangkau. Ba dia, Jesus ngajar pemendar ti penting. Maya nya, bisi sekeda orang Judah madah ngagai Jesus: “Kami peturun Abraham. Kami enda kala nyadi ulun sapa-sapa.” Jesus nyaut sida: “Aku nemu kita peturun Abraham, tang kita deka munuh aku, laban kita enda nerima utai ke diajar aku. Aku nyebut pasal utai ke dipeda aku lebuh aku enggau Apai, tang kita ngereja utai ke didinga kita ari apai kita.”—John 8:33, 37, 38.

Reti ku Jesus nya: Apai iya enda sebaka enggau apai sida. Tang sida enda mereti jaku Jesus, lalu sida majak madahka: “Apai kami Abraham.” (John 8:39; Isaiah 41:8) Sida nya endang peturun Abraham. Nya alai, sida ngasaika diri ngembuan pengarap ti sama baka Abraham.

Taja pia, utai ke dipadahka Jesus ngagai orang Judah ngasuh sida tekenyit: “Enti kita anak Abraham, kita tentu ngereja utai ke digaga Abraham.” Kesuah iya, siku anak neladan apai iya. Nya alai, Jesus madah ngagai sida: “Tang diatu, kita deka munuh aku taja pan aku madahka pemendar ke didinga aku ari Petara. Abraham enda ngereja utai ke baka nya. Kita ngereja utai ke digaga apai kita.”—John 8:39-41.

Taja pia, orang Judah agi enda faham reti ku Jesus. Laban sida ngumbai diri diadaka secara sah, nyadi sida madah: “Kami ukai anak ke enda sah. Kami bisi siku Apai, iya nya Petara.” Tang kati Petara endang amat Apai sida? Jesus madahka: “Enti Petara nya Apai kita, kita tentu rinduka aku, laban aku dikirumka Petara kitu. Aku ukai datai ketegal peneka aku empu, tang ketegal Iya ngirumka aku. Kita enda meretika utai ku aku, laban kita enggai nerima jaku aku.”—John 8:41-43.

Sebedau tu, Jesus kala madah pasal utai ke deka nyadi ngagai sida ketegal sida nulak iya. Tang diatu Jesus terus terang madah: “Kita datai ari apai kita, Sitan, lalu kita ingin deka ngereja peneka apai kita.” Nama sifat ke dikembuan apai sida? Ku Jesus: “Iya nyadi pemunuh, kenyau ari maya iya bula pasal Petara. Iya enda bepegai tegut ba pemendar.” Udah nya, Jesus nampung baru: “Orang ke datai ari Petara ningaka jaku Petara. Kita enggai ninga, laban kita enda datai ari Petara.”—John 8:44, 47.

Utai ke disebut Jesus ngasuh sida ringat. Nya alai, sida madah: “Endang amat utai ku kami, ‘Nuan tu orang Samaria lalu dirasuk melikat ti jai.’” Lebuh sida ngumbai Jesus nya “orang Samaria,” sida benung ngemaruhka iya. Tang Jesus enda kiruhka jaku sida, iya madahka: “Aku enda dirasuk melikat ti jai. Aku bebasaka Apai aku, tang kita enda bebasaka aku.” Iya ke amat, orang ke nerima Jesus deka diselamatka laban iya madahka: “Barang sapa ke nitihka jaku ajar aku, iya enda mati.” Tu ukai reti iya, bala rasul enggau bala murid Jesus ke bukai enda ulih mati. Tang sida enda napi “pemati ti kedua,” iya nya dipunaska belama iya, lalu nadai peluang diangkatka idup baru.—John 8:48-51; Pemandang 21:8.

Tang orang Judah salah faham enggau jaku Jesus. Nyadi, sida madah: “Diatu kami nemu, nuan sigi amat dirasuk melikat ti jai. Abraham udah mati, pia mega enggau sida nabi. Tang nuan madahka, ‘Barang sapa ke nitihka jaku ajar aku, iya enda mati.’ Kati nuan besai agi ari apai kami, Abraham? Abraham udah mati . . . Sapa nuan nya ku nuan?”—John 8:52, 53.

Utai ke disebut Jesus nunjukka iya nya Messiah. Tang ari ke madah ngagai sida pasal sapa iya ti bendar, Jesus nyebut munyi tu: “Enti aku ngemuliaka diri empu, mulia nya nadai reti. Iya ke ngemuliaka aku nya Apai aku, ke dikumbai kita Petara kita. Kita enda ngelala Iya, tang aku ngelala Iya. Enti aku madahka diri enda ngelala Iya, aku deka nyadi pemula, baka kita.”—John 8:54, 55.

Jesus lalu merujuk ngagai teladan Abraham ke tetap ati, iya madahka: “Apai kita, Abraham, balat gaga laban iya bisi peluang meda hari penatai aku. Iya udah meda nya, lalu iya gaga ati.” Ketegal Abraham amat arapka semaya Petara, iya nganti penatai Messiah. Tang orang Judah enda nerima jaku Jesus, ku sida madah ngagai Jesus: “Umur nuan bedau agi 50 taun, tang nuan udah meda Abraham?” Tang Jesus nyaut sida: “Enggau bendar aku madah ngagai kita: Sebedau Abraham ada, aku endang udah bisi.” Jaku Jesus nya merujuk ngagai maya iya idup ba serega nyadi siku melikat ti bekuasa sebedau iya nurun ke dunya.—John 8:56-58.

Orang Judah balat ringat laban Jesus madahka iya udah bisi sebedau Abraham ada. Nya alai, sida ngambi batu deka nuku Jesus. Tang Jesus mupuk ari endur nya enggau selamat.