Jehovah Rinduka Sida ke “Bebuah Enggau Ati ti Liat Sereta Tan”

1, 2. (a) Nama kebuah kitai berasai diperansang ulih bala menyadi Kristian ke terus nginjil ba endur ke mayuh orang enggai ninga? (Peda gambar ba pun artikel.) (b) Nama dipadah Jesus pasal nginjil ba ‘menua diri empu’? (Peda nota kaki.)

SERGIO SEDUAI OLINDA nya melaki-bini ke nyadi pengerintis di Amerika Serikat. Seduai iya bela beumur lebih 80 taun. Apin lama ti udah, seduai iya tusah deka bejalai ketegal pedis kaki. Tang baka ke suah digaga seduai iya betaun-taun, pukul tujuh pagi seduai iya bejalai ngagai padang ba nengeri nya, ke selalu bisi mayuh orang. Seduai iya semak endur alai nganti bas lalu nyadung litaricha kitai ngagai orang ke mansa. Mayuh orang enda bedulika Sergio seduai Olinda, tang seduai iya tetap dia lalu tuchum ngagai orang ke malik ngagai seduai iya. Maya tengah hari, seduai iya belubah-lubah bejalai pulai. Pagi siti, pukul tujuh pagi, seduai iya napatka endur nya baru. Seduai iya nginjil ba endur nya ninting pagi, enam kali seminggu. Lalu ngereja nya sepemanjai taun.

² Baka Sergio seduai Olinda, bisi mayuh bala menyadi Kristian ke tetap ati udah nginjil ba menua diri bepuluh taun, taja pan mayuh orang enggai ninga. Nuan mega engka nginjil ba endur ke baka nya. Enti pia, kami muji nuan laban nuan ulih liat ati sereta tan lalu terus nginjil taja pan nya tusah.a (Peda nota kaki.) Teladan nuan meransang mayuh bala menyadi Kristian, nyengkaum sida ke udah lama nginjil. Peratika utai ti dipadah sekeda tuai ti ngabas: “Lebuh aku gawa enggau bala menyadi Kristian ke tetap ati nya ba pengawa nginjil, aku berasai dikeringka ulih teladan sida.” “Penetap ati sida meransang aku tan sereta berani ba pengawa nginjil aku empu.” “Teladan sida ngagaka ati aku.”

3. Nama tiga iti tanya ke deka dikerandauka kitai, lalu nama kebuah?

³ Ba artikel tu kitai deka nyaut tiga iti tanya: Nama kebuah kitai kadang-kadang berasai lemi? Nama reti bebuah? Nama ulih nulung kitai seruran bebuah enggau ati ti liat sereta tan? Nemu saut ngagai semua tanya tu ulih meransang kitai terus ngereja pengawa nginjil ke diberi Jesus.

NAMA KEBUAH KITAI BERASAI LEMI?

4. (a) Baka ni asai ati Paul lebuh mayuh orang Judah enggai ninga? (b) Nama kebuah Paul berasai baka nya?

⁴ Kati nuan kala berasai lemi ketegal orang di menua nuan enggai ningaka pesan pasal Perintah Petara? Enti kala, nuan ulih nemu baka ni asai ati rasul Paul. Iya udah nginjil kira-kira 30 taun, lalu nulung mayuh orang nyadi murid Kristus. (SKR. 14:21; 2 Kor. 3:2, 3) Taja pia, iya enda ulih nulung mayuh orang Judah nyadi penyembah ti bendar. Mayuh ari sida enggai ningaka Paul, lalu sekeda nya indah merinsaka iya. (SKR. 14:19; 17:1, 4, 5, 13) Baka ni asai ati Paul? Iya berasai ‘sinu enggau tusah ati.’ (Rom. 9:1-3) Nama kebuah? Laban iya rindu nginjil. Paul nginjil ngagai orang Judah ketegal iya ibuhka sida. Nya alai iya berasai tusah ati lebuh sida nulak pengasih Petara.

5. (a) Nama meransang kitai nginjil? (b) Nama kebuah kitai kadang-kadang berasai lemi?

⁵ Baka Paul, kitai nginjil ngagai orang laban kitai ibuhka sida sereta deka nulung sida. (Mat. 22:39; 1 Kor. 11:1) Ari peneleba diri, kitai nemu gawa ke Jehovah nya chara pengidup ti pemadu manah. Lalu kitai deka nulung orang nemu pengidup sida ulih meruan agi! Nya kebuah kitai majak meransang sida belajarka pemendar pasal Jehovah sereta tuju Iya ke mensia. Kitai baka ke mai pemeri ti manah lalu ngumbuk sida: ‘Terima meh pemeri tu.’ Nya alai lebuh sida nulak pemeri nya, kitai berasai ‘tusah ati,’ baka ke diasai Paul. Kitai ngasaika penusah ati tu, ukai ketegal kitai kurang pengarap tang ketegal kitai balat rinduka orang. Nya alai taja pan kitai kadang-kadang berasai lemi, kitai terus nginjil. Kitai setuju enggau utai ke disebut Elena, ke udah ngerintis lebih 25 taun: “Aku ngasaika pengawa nginjil nya tusah. Tang, nadai pengawa bukai ke ka digaga aku kelimpah ari nginjil.”

NAMA RETI BEBUAH?

6. Nama tanya ti deka disaut kitai?

⁶ Nama kebuah kitai pechaya kitai ulih mujur ba pengawa nginjil enda ngira dini alai? Kena nyaut tanya tu, aram kitai berandauka dua iti sempama ke alai Jesus bisi nyebut pasal kebuah patut “bebuah.” (Mat. 13:23) Sempama ti keterubah nya pasal pun anggur.

7. (a) Dalam sempama Jesus, “tukang kebun,” “pun anggur,” enggau “dan” ngambarka sapa? (b) Nama tanya ti patut disaut kitai?

⁷ Bacha John 15:1-5, 8. Dalam sempama tu, Jesus madahka Jehovah nya “tukang kebun,” Jesus empu nya “pun anggur,” lalu bala murid iya nya “dan.”b (Peda nota kaki.) Udah nya Jesus ngasuh bala murid iya: ‘Apai aku dimuliaka, enti kita bebuah lebat lalu nyadi murid aku.’ Nyadi, nama reti bebuah? Dalam sempama tu, Jesus nadai madah enggau nyemetak bansa buah nya, tang iya meri kelai ke ulih nulung kitai nemu saut ngagai tanya nya.

8. (a) Dalam sempama Jesus, nama kebuah ulih “bebuah” ukai reti nya ngaga orang nyadi murid? (b) Utai ke baka ni diasuh Jehovah kereja kitai?

⁸ Ku Jesus madah pasal Apai iya: ‘Iya muai ari aku genap iti dan ti enda bebuah.’ Reti nya kitai ulih nyadi nembiak Jehovah enti kitai bebuah. (Mat. 13:23; 21:43) Nya alai dalam sempama tu, bebuah ukai reti kitai ngaga orang nyadi murid. (Mat. 28:19) Enti baka nya, bala Saksi ke tetap ati ti enda nulung orang nyadi murid Jesus deka baka dan ke enda bebuah. Tang tu ukai baka nya! Nama kebuah? Laban kitai enda ulih ngansak orang nyadi murid. Jehovah ngembuan pengerindu. Iya semina ngasuh kitai ngereja utai ke ulih dikereja kitai, ukai ngereja utai ke enda ulih dikereja kitai.—U-dat. 30:11-14.

9. (a) Baka ni kitai bebuah? (b) Nama sempama ke deka dikerandauka kitai?

⁹ Tang nama reti bebuah? Nya tentu utai ke ulih dikereja semua kitai. Nama pengawa ke udah diberi Jehovah ngagai semua nembiak Iya? Pengawa nya nusui berita manah pasal Perintah Petara.c (Peda nota kaki.) (Mat. 24:14) Pekara tu nyata dipeda ari sempama Jesus pasal orang ke naburka benih. Aram kitai berandauka sempama nya.

10. (a) Nama reti benih enggau tanah ke dikena dalam sempama Jesus? (b) Nama diasilka setangkai gandum?

¹⁰ Bacha Luke 8:5-8, 11-15. Dalam sempama pasal orang ke naburka benih, Jesus madahka benih nya ‘jaku Petara’ tauka pesan pasal Perintah Petara. Tanah nya ati seiku-seiku orang. Benih ti labuh ba tanah ti ami tumbuh urat, matuk, lalu nyadi utai tumbuh. Udah nya, utai tumbuh nya “bebuah seratus kali lipat.” Enti utai tumbuh nya tangkai gandum, buah ke baka ni deka diasilka iya? Tangkai gandum ti mit? Ukai, iya deka ngasilka leka benih, ti deka tumbuh lalu nyadi tangkai gandum. Dalam sempama tu, seleka benih ngasilka 100 leka benih. Nama ulih dipelajarka kitai pasal pengawa nginjil ari sempama tu?

11. (a) Nama ulih dipelajarka kitai pasal pengawa nginjil ari sempama pasal orang ke naburka benih? (b) Baka ni kitai ngasilka benih ti baru?

¹¹ Lebuh apai indai kitai ke Kristian tauka bala Saksi bukai berengkah ngajar kitai pasal Perintah Petara, sida baka ke nanam benih ba tanah ti ami. Sida gaga lebuh meda kitai nerima pesan nya. Benih nya majak tumbuh nyentuk ke iya bebuah. Lalu baka tangkai gandum ke enda ngasilka tangkai ti baru tang ngasilka benih ti baru, kitai enda ngaga orang nyadi murid ke baru tang ngaga benih ke baru.d (Peda nota kaki.) Baka ni kitai ngereja nya? Tiap kali kitai madah ngagai orang pasal Perintah Petara, kitai baka ke mayuh bebuah lalu naburka benih ti sama ke udah ditanam ba ati kitai. (Luk. 6:45; 8:1) Nya alai, seagi-agi kitai terus nusui pesan pasal Perintah Petara, kitai “bebuah enggau ati ti liat sereta tan.”

12. (a) Nama ulih dipelajarka kitai ari sempama Jesus pasal pun anggur enggau orang ke naburka benih? (b) Baka ni asai ati nuan pasal utai ti ditemu ari sempama nya?

¹² Nama ulih dipelajarka kitai ari sempama Jesus pasal pun anggur enggau orang ke naburka benih? Kitai nemu, “bebuah” ukai bepanggai ba sekalika orang ningaka pesan tauka enda. Nya bepanggai ba sekalika kitai terus nginjil tauka enda. Paul nyebut utai ti sama lebuh iya nerangka: “Genap iku deka diupah nitihka pengawa ti dikereja siku-siku orang.” (1 Kor. 3:8) Jehovah meri upah ketegal pengawa ti dikereja kitai, ukai ketegal asil pengawa ti dikereja kitai. Matilda, ke udah ngerintis 20 taun, madahka, “Aku berasai gaga laban nemu Jehovah meri upah ketegal kitai bebendar ngereja pengawa ke Iya.”

BAKA NI KITAI ULIH BEBUAH ENGGAU ATI TI LIAT SERETA TAN?

13, 14. Nitih ku Rome 10:1, 2, nama kebuah Paul enda ngetu nginjil?

¹³ Nama deka nulung kitai “bebuah enggau ati ti liat sereta tan”? Aram kitai meda teladan Paul enggau mayuh agi. Kitai nemu Paul berasai lemi laban orang Judah nulak pesan pasal Perintah Petara. Taja pia, Paul enda ngetu nginjil ngagai sida. Iya madahka asai ati diri pasal orang Judah: ‘Utai ti dikinginka ati aku, enggau sampi aku ngagai Petara ke sida, iya nya, minta sida diselamatka. Aku berani besaksi madahka sida balat angkunka Petara, tang pengangkun sida ke Iya ukai beduduk ba penemu ti bendar.’ (Rom. 10:1, 2) Nya alai, nama kebuah Paul terus nginjil?

¹⁴ Kesatu, Paul madahka iya deka nginjil ngagai orang Judah laban nya ‘utai ti dikinginka ati iya.’ Iya amat deka sida diselamatka. (Rom. 11:13, 14) Kedua, iya ngenataika ‘sampi iya ngagai Petara ke sida.’ Paul minta Jehovah nulung tiap iku orang Judah nerima pesan pasal Perintah Petara. Ketiga, Paul madahka: ‘Sida balat angkunka Petara.’ Paul beratika pemanah ke bisi ba orang, lalu pechaya sida ulih gawa ke Jehovah dudi hari. Iya nemu orang Judah ke angkun nya ulih nyadi murid Kristus ke ransing, baka Kristus empu.

15. Baka ni kitai ulih neladan Paul? Padahka sekeda chunto.

¹⁵ Baka ni kitai ulih neladan Paul? Kesatu, kitai keran deka ngiga orang ke “udah dipilih nerima pengidup ti meruan belama iya.” Kedua, kitai minta Jehovah nulung orang ke lurus ati ninga lebuh kitai nginjil ngagai sida. (SKR. 13:48; 16:14) Nya meh utai ti udah digaga Silvana, ke udah ngerintis nyau deka 30 taun. Ku iya madahka, “Sebedau mupuk nginjil ari rumah ke rumah, aku besampi minta Jehovah meri aku runding ti positif.” Kitai mega besampi ngambika bala melikat nulung kitai tetemuka orang ke deka ninga. (Mat. 10:11-13; Pem. 14:6) Robert, ke udah nginjil lebih 30 taun, madahka, “Begulai gawa enggau bala melikat ke nemu pasal utai ti nyadi ba pengidup orang ke bempu rumah endang ngagitka ati.” Ketiga, kitai nguji beratika pemanah ke bisi ba orang, lalu pechaya sida ulih gawa ke Jehovah dudi hari. Carl, seiku tuai gempuru ke udah dibaptisa lebih ari 50 taun, madahka, “Aku beratika utai ke nunjukka orang nya amat-amat deka nemu, baka ari tuchum, manah mua, tauka bisi tanya ke datai ari ati.” Enti kitai ngereja semua utai nya, kitai ulih “bebuah enggau ati ti liat sereta tan” baka Paul.

“ANANG BELELAK”

16, 17. (a) Nama ulih dipelajarka kitai ari Pengajar 11:6? (b) Baka ni pengawa nginjil kitai ulih meri ubah ngagai orang ke beratika kitai?

¹⁶ Kitai patut ingat pengawa nginjil kitai ulih meri ubah ti besai ba orang, taja pan orang nya baka ke enggai ninga. (Bacha Pengajar 11:6 ari nota kaki.)e Orang beratika kitai. Sida meda kitai begari enggau kemas, kitai bisi basa sereta deka begulai enggau orang. Tu ulih narit ati sida, lalu nyau kelama, indah orang ke kala bisi runding ti enda manah pasal kitai nyau bisi runding ti manah. Sergio seduai Olinda ngasaika tu amat.

¹⁷ Ku Sergio madahka: “Sekumbang ke enda tentu dapat, kami duai nadai ngagai padang enda lama. Lebuh kami duai nginjil baru, orang ke mansa nanya, ‘Kini penunga seduai. Kami lelengauka seduai.’” Olinda nyaut enggau tuchum: “Bala ke deriba bas ngepaika jari ngagai kami duai lalu sekeda nya nyebut enggau nyawa ti inggar ari endur sida deriba. ‘Gaga ati meda seduai datai baru!’ Sida mega minta majalah kitai.” Sergio seduai Olinda amat tekenyit lebuh seiku lelaki datai ngagai troli pemandang litaricha seduai iya, meri bungai, lalu beterima kasih ke pengawa seduai iya.

18. Nama kebuah nuan keran deka “bebuah enggau ati ti liat sereta tan”?

¹⁸ Seagi-agi nuan ‘enda belelak’ madah pasal Perintah Petara ngagai orang, nuan bisi ungkup ti besai dalam meri “saksi ngagai semua bansa.” (Mat. 24:14) Kelebih agi, nuan deka bulih pengaga ti besai laban nemu diri ngagaka ati Jehovah. Iya rinduka semua orang ke “bebuah enggau ati ti liat sereta tan”!