1. Sapa Jesus?

Jesus seiku melikat ti bekuasa ke diau ba serega. Iya dikumbai “Anak ke terubah diadaka ari atas semua utai ti digaga,” laban iya utai keterubah ke ditempa Petara. (Kolosi 1:15) Kelimpah ari nya, Jesus mega dikumbai “Anak Tunggal” Petara laban semina iya aja ke ditempa Petara Empu. (John 3:16) Jehovah enggau Jesus bisi kaul ti amat rapat. Ambika chunto, lebuh Jehovah nempa semua utai, Jesus bisi ngimbai Iya sereta nulung Iya. (Bacha Jaku Dalam 8:30.) Jesus mega dikumbai “Jaku,” laban iya nyadi pengari jaku Petara sereta ngenataika pesan ari Petara.—John 1:14.

Ketegal Adam enggau Awa ngelaban Petara, semua kitai merinsa lalu bulih dosa sereta mati.a Tang Petara meri kitai semaya ti manah. Jehovah udah meri Anak Iya kena ngelepaska kitai ari dosa enggau pemati. Enggau nyerahka nyawa iya ti sempurna, Jesus nyadi genselan tebus ke semua mensia. (Bacha Matthew 20:28.) Tebus nya rega ke dibayar kena ngulihka baru utai ti udah lenyau. Pemati Jesus muka jalai ngambika kitai tau bulih pengidup ti meruan belama iya. Pemati Jesus mega nunjukka penalam pengerindu iya enggau Jehovah ke kitai. Pelajar tu deka nulung kitai beterima kasih agi ke tebus Jesus.

1. Baka ni pemati Jesus nulung kitai kemayaharitu?

Ketegal kitai enda sempurna, kitai ngereja utai ti salah sereta ngemediska ati Jehovah. Tang, enti kitai amat nesal ati ke utai ti udah digaga kitai lalu besampi nengah nama Jesus minta ampun ari Jehovah, dosa kitai ulih diampun. Kelimpah ari nya, kitai mega patut bebendar ngambika enda ngulang penyalah nya agi. Bup Kudus madah: ‘Kristus mega kena perinsa ketegal dosa sekali aja ke belama-lama iya, iya nya orang ke lurus mati ngarika orang ke bedosa, ngambika iya mai kitai ngagai Petara.’ (1 Peter 3:18) Amat, taja pan kitai mensia ti enda sempurna, tang tebus Jesus nulung kitai bisi kaul ti manah enggau Jehovah.—1 John 2:1.

2. Maya jemah ila, nama penguntung ke diulih kitai ari tebus Jesus?

Kemayaharitu, kitai semua merinsa ketegal dosa Adam. Tang nengah tebus Jesus, Jehovah deka muai semua pemerinsa kitai. Bup Kudus madah: “Genap iku orang ke arapka [Jesus] enda mati tang bulih pengidup ti meruan belama iya.” (John 3:16) Nya alai, enti kitai bisi pengarap ngagai tebus Jesus, kitai mega bisi peluang idup belama iya ba dunya paradais jemah ila!—Isaiah 65:21-23.

BELAJAR MAYUH AGI

3. Tebus Jesus ngelepaska kitai ari dosa enggau pemati

VIDEO: Nama Kebuah Jesus Mati?—Begian 1 (2:01)

• Nama utai ti dilenyauka Adam pengudah iya ngelaban Petara?

Bacha Rome 5:12, lalu kerandauka tanya tu:

• Baka ni dosa Adam meri empas ngagai pengidup nuan?

Bacha John 3:16, lalu kerandauka tanya tu:

• Nama kebuah Jehovah nganjung anak Iya ke dunya?

1. Adam sempurna tang iya enda mendingka Jaku Petara. Ketegal nya, iya mai dosa enggau pemati ngagai semua mensia

2. Jesus sempurna lalu iya mendingka Jaku Petara. Ketegal nya, iya meri mensia peluang nyadi sempurna sereta idup belama iya

4. Tebus Jesus mai penguntung ngagai semua orang

VIDEO: Nama Kebuah Jesus Mati?—Begian 2 (2:00)

• Baka ni pemati seiku orang ulih mai penguntung ngagai semua mensia?

Bacha 1 Timoti 2:5, 6, lalu kerandauka tanya tu:

• Adam sempurna. Tang ketegal iya, semua orang bulih dosa sereta mati. Baka Adam, Jesus mega sempurna. Tang nama utai ke digaga Jesus?

5. Tebus nya pemeri ari Petara

Genselan tebus nya pemeri ti diberi Jehovah ngagai tiap iku kitai. Bacha Galatia 2:20, lalu kerandauka tanya tu:

• Baka ni jaku Paul nunjukka iya ngumbai tebus nya baka pemeri ti diberi ngagai iya empu?

Pengudah Adam bedosa, iya diukum mati, lalu pemati ngelekai ngagai semua mensia. Tang Jehovah nganjung anak Iya mati ke kitai ngambika kitai bisi peluang ulih idup belama iya.

Seraya nuan macha ayat Bup Kudus tu, uji gambarka asai ati Jehovah lebuh meda anak Iya merinsa. Bacha John 19:1-7, 16-18, lalu kerandauka tanya tu:

• Nama asai ati nuan pasal utai ke udah digaga Jehovah enggau Jesus ke nuan?

LANSA

Nengah genselan tebus Jesus, Jehovah ulih ngampun dosa kitai lalu meri kitai peluang idup belama iya.

Ulang Kaji

• Nama kebuah Jesus mati?

• Nama kebuah nyawa Jesus ti sempurna ulih dikumbai tebus ti setipak?

• Nama penguntung ke diulih nuan ari tebus Jesus?

ARAM BELAJAR

Belajarka kebuah nyawa Jesus ti sempurna dikumbai tebus.

“Nama Kebuah Pemati Jesus Ulih Dikumbai ‘Kena Nebus Orang Mayuh’?” (Artikel ba laman web jw.org)

Peratika utai ti patut digaga kitai ngambika ulih selamat.

“Baka Ni Jesus Nyelamatka Kitai?” (Artikel ba laman web jw.org)

Ulih Jehovah ngampunka dosa ti besai?

“Saut ari Bup Kudus” (Menara Jaga, 1 Mei 2013)

Peratika baka ni tebus Jesus nulung seiku orang ngaga ubah ba ulah iya.

“Aku Badu Nyadi Ulun Penyai” (Artikel ba laman web jw.org)

1. Nama siti chara kena ngayanka diri beterima kasih?

Bup Kudus madahka kitai, “genap iku orang ke arapka [Jesus]” deka bulih pengidup ti meruan belama iya. (John 3:16) Nya alai, siti chara kitai ngayanka diri beterima kasih iya nya, ngembuan pengarap ngagai Jesus. Baka ni kitai ulih ngereja nya? Kitai patut ngayanka pengarap nengah jaku, ulah, sereta pemutus ke digaga kitai. (James 2:17) Enti kitai bebendar ngayanka pengarap ba pengidup kitai, kitai deka negapka kaul kitai enggau Jehovah sereta Jesus.—Bacha John 14:21.