Sampi Jesus Dalam Bilik ba Tingkat Atas

Jesus amat rinduka bala rasul iya. Nya alai, iya nyediaka sida sebedau iya ninggalka sida. Diatu iya engkadah ke langit lalu besampi ngagai Apai iya: “Muliaka anak Nuan ngambika anak Nuan ulih ngemuliaka Nuan, Nuan udah meri iya kuasa atas semua orang, ngambika iya ulih meri pengidup ti meruan belama iya ngagai semua orang ke diberi Nuan ngagai iya.”—John 17:1, 2.

Jesus nunjukka meri mulia ngagai Petara nya utai ti pemadu penting. Tang Jesus mega madah pasal peluang idup belama iya ke amat ngelantangka ati! Pengudah Jesus nerima “kuasa atas semua orang,” iya ulih meri berekat ngagai mensia ketegal bisi genselan tebus iya. Tang, ukai semua orang ulih nerima berekat nya. Nama kebuah? Tu ketegal, Jesus semina deka meri pengidup ti meruan belama iya ngagai orang ke nitihka jaku ke disebut iya: “Enti orang ngelala Nuan, siku aja Petara ti bendar, sereta ngelala Jesus Kristus ke dikirumka Nuan, sida deka bulih pengidup ti meruan belama iya.”—John 17:3.

Nyadi, sesiku orang patut ngelala Apai sereta Anak Iya, lalu bisi kaul ti rapat enggau seduai iya. Kelimpah ari nya, iya mesti ngembuan runding ti sama enggau seduai iya, sereta bebendar neladan pemanah seduai iya. Lalu iya mega patut sedar, ngemuliaka Petara penting agi ari pengidup meruan belama iya.

Bekaul enggau pekara nya, Jesus madah: “Aku nembuka pengawa ke diberi Nuan ngagai aku. Enggau nya, aku udah ngemuliaka Nuan ba dunya. Nya alai diatu, Apai, awakka aku dimuliaka ba sepiak Nuan ngena mulia ke dikembuan aku ba sepiak Nuan sebedau dunya digaga.” (John 17:4, 5) Nyadi, Jesus besampi minta diangkatka idup baru lalu nerima mulia ba serega.

Taja pia, Jesus agi ingat asil ari pengawa nginjil iya. Ku iya besampi: “Aku udah ngasuh nama Nuan ditemu orang ba dunya. Sida udah diberi Nuan ngagai aku. Sida enggi Nuan, lalu Nuan nyerahka sida ngagai aku, lalu sida ngasika jaku Nuan.” (John 17:6) Jesus ukai semina madahka nama Jehovah aja. Jesus mega ngajar bala rasul reti nama Jehovah, nyengkaum sifat Jehovah sereta chara Iya ngintu orang.

Bala rasul udah ngelala Jehovah, lalu nemu peranan Jesus sereta utai ke diajar iya. Nyadi Jesus enggau baruh ati madah: “Jaku ke diberi Nuan ngagai aku, udah diberi aku ngagai sida lalu sida nerima jaku nya. Sida amat udah nemu aku datai nyadi pengari Nuan, lalu sida pechaya Nuan meh ke ngirumka aku.”—John 17:8.

Pengudah nya, Jesus madah bida entara murid iya enggau orang ba dunya tu. Ku iya: “Aku besampi ke sida. Aku besampi ukai ke dunya, tang ke sida ke udah diberi Nuan ngagai aku laban sida enggi Nuan . .  . Apai ti kudus, jaga meh sida ketegal nama Nuan ke udah diberi Nuan ngagai aku, ngambika sida beserakup baka tua ke beserakup. . . . Aku udah nyaga sida, lalu nadai siku ari sida ke dipunaska. Semina iya aja ke deka dipunaska.” Iya ke amat, Jesus merujuk ngagai Judas Iskariot. Maya nya, Judas benung ngereja pelan iya kena nyerahka Jesus.—John 17:9-12.

Jesus terus besampi: “Dunya begedika sida. Aku enda minta Nuan ngambi sida ari dunya. Tang aku minta Nuan nyaga sida ari Sitan. Sida ukai sebagi ari dunya, baka aku ke ukai sebagi ari dunya.” (John 17:14-16) Bala rasul enggau bala murid ke bukai diau ba dunya ke dipegai Sitan. Tang sida patut nyeraraka diri ari dunya sereta penyai ari dunya Sitan. Baka ni chara iya?

Sida patut mengkang tuchi lalu nyembah Petara aja. Reti iya, sida patut idup nitihka pemendar ari Bup Kudus Begian Jaku Hebrew enggau pemendar ke diajar Jesus. Nya alai Jesus besampi: “Kuduska sida ngena pemendar. Jaku Nuan nya pemendar.” (John 17:17) Nyau kelama, kuasa kudus deka ngiring sekeda ari bala rasul nulis beberapa iti bup mit dalam Bup Kudus. Semua nya deka nyadi sebagi ari “pemendar” ke ulih nguduska sesiku orang.

Tang maya deka datai alai orang bukai deka nerima “pemendar.” Nya alai Jesus besampi “ukai ke sida [11 iku rasul] aja, tang ke semua orang ke arapka [iya] pengudah ninga utai ke diajar sida.” Nama dipinta Jesus ngagai Jehovah pasal sida nya? Ku iya: “Semua sida deka beserakup, Apai, baka Nuan ke beserakup enggau aku, lalu aku beserakup enggau Nuan, sida mega beserakup enggau tua.” (John 17:20, 21) Jesus beserakup enggau Apai iya laban seduai iya sepenemu ba semua pekara. Nya alai, Jesus pan besampi ngambika bala murid iya mega beserakup enggau iya sereta Apai iya.

Enda lama sebedau nya, Jesus udah madah ngagai Peter enggau bala rasul ke bukai, iya deka mupuk nyediaka endur ke sida ba serega. (John 14:2, 3) Dalam sampi Jesus, iya madah baru pasal nya: “Apai, aku deka minta ngagai Nuan ngambika ba dini endur aku, ba dia meh orang ke udah diberi Nuan ngagai aku mega begulai enggau aku. Enggau nya, sida ulih meda mulia aku ke udah diberi Nuan ngagai aku, laban Nuan rinduka aku sebedau penumbuh dunya.” (John 17:24) Reti iya, indah sebedau Adam seduai Awa bisi anak, Petara udah rinduka Anak tunggal Iya, iya nya Jesus Kristus.

Ba pengujung sampi iya, Jesus ngulang baru dua iti utai ti penting, iya nya nama Jehovah enggau pengerindu Iya ngagai bala rasul sereta sida ke deka nerima “pemendar.” Ku Jesus: “Aku udah ngasuh nama Nuan ditemu sida, lalu aku deka terus ngereja nya, ngambika sida rinduka orang bukai baka Nuan ke rinduka aku, lalu ngambika aku beserakup enggau sida.”—John 17:26.