PELAJAR 15
Sapa Jesus?
Jesus amat tebilang. Tang, kebendar iya mayuh orang enda nemu nama-nama pasal Jesus. Kebukai ngembuan penemu ti enda sebaka pasal iya. Nama utai ti dipadah Bup Kudus pasal Jesus?
1. Sapa Jesus?
Jesus seiku melikat ti bekuasa ke diau ba serega. Iya dikumbai “Anak ke terubah diadaka ari atas semua utai ti digaga,” laban iya utai keterubah ke ditempa Petara. (Kolosi 1:15) Kelimpah ari nya, Jesus mega dikumbai “Anak Tunggal” Petara laban semina iya aja ke ditempa Petara Empu. (John 3:16) Jehovah enggau Jesus bisi kaul ti amat rapat. Ambika chunto, lebuh Jehovah nempa semua utai, Jesus bisi ngimbai Iya sereta nulung Iya. (Bacha Jaku Dalam 8:30.) Jesus mega dikumbai “Jaku,” laban iya nyadi pengari jaku Petara sereta ngenataika pesan ari Petara.—John 1:14.
2. Nama kebuah Jesus datai ke dunya?
Jesus datai ke dunya nyadi Messiah, tauka Kristus, kena nyelamatka mensia.a Semua utai ti dipadah dalam Bup Kudus pasal Messiah udah dikeamatka lebuh Jesus datai ke dunya. Nya kebuah orang nemu Jesus nya ‘Kristus, Anak Petara ti idup.’ (Matthew 16:16) Baka ni Jesus datai ke dunya nyadi mensia? Lebih ari 2,000 taun kelia, Jehovah ngena kuasa kudus Iya mindahka nyawa Jesus ngagai kandung seiku indu dara bungas ke benama Maria.—Bacha Luke 1:34, 35.
3. Dini Jesus diatu?
Pengudah Jesus mati, iya diangkatka nyadi melikat ba serega. Dia, ‘Petara udah ngangkatka Iya tinggi lalu meri Iya nama ti ari atas semua nama.’ (Pilipi 2:9) Diatu, Jesus seiku melikat ti amat bekuasa. Lalu, semina Jehovah aja ke besai agi kuasa ari Jesus.
BELAJAR MAYUH AGI
Belajarka mayuh agi pasal Jesus sereta kebuah nya beguna bendar kitai ngelala iya.
4. Jesus ukai Petara
Bup Kudus madahka, taja pan Jesus seiku melikat ti amat bekuasa ba serega, tang iya mega ngasika Petara ti Apai iya, Jehovah. Peratika ajar Bup Kudus pasal utai tu. Mainka VIDEO.
Ayat tu nulung kitai meretika kaul entara Jehovah enggau Jesus. Bacha tiap iti ayat, lalu kerandauka tanya tu:
Bacha Luke 1:30-32.
Baka ni jaku melikat tu nunjukka Jesus bebida ari Jehovah, ‘Petara ti Pemadu Tinggi’?
Bacha Matthew 3:16, 17.
Pengudah Jesus dibaptisa, nama dipadah nyawa ari serega?
Ba runding nuan, nyawa sapa nya?
Bacha John 14:28.
Ba siti ruang bilik, sapa ke tuai sereta bekuasa agi? Apai tauka anak?
Nama kebuah Jesus ngumbai Jehovah nya Apai iya?
Bacha John 12:49.
Ba runding nuan, kati Jesus ngumbai diri sama enggau Apai iya?
5. Jesus nya Messiah
Messiah nya orang ke dipilih Petara nyelamatka mensia. Bisi mayuh jaku benabi ba Bup Kudus ke nulung kitai ngelala sapa Messiah. Mainka VIDEO kena nemu sekeda jaku benabi ke dikeamatka lebuh Jesus datai ke dunya.
Bacha jaku benabi tu ba Bup Kudus, lalu kerandauka tanya tu:
Bacha Mikah 5:2 kena nemu dini alai Messiah diadaka.b
Kati Jesus ada dia?—Matthew 2:1.
Bacha Masmur 34:20 enggau Sekariah 12:10 kena meda penerang pasal pemati Messiah.
Kati jaku benabi tu nyadi baka ke dipadah?—John 19:33-37.
Kati Jesus ngatur semua utai ngambika jaku benabi tu ulih dikeamatka iya?
Ari semua tu, nama ditemu nuan pasal Jesus?
6. Kitai bulih penguntung ketegal ngelala Jesus
Bup Kudus madahka nya beguna enti kitai ngelala sapa Jesus sereta nemu utai ti dikedekaka Petara kereja iya. Bacha John 14:6 enggau 17:3, lalu kerandauka tanya tu:
Nama kebuah nya beguna kitai ngelala Jesus?
Jesus muka jalai ngambika kitai ulih nyadi pangan Petara. Iya ngajar pemendar pasal Jehovah. Nengah Jesus, kitai bisi peluang bulih pengidup ti meruan belama iya
BISI ORANG MADAH: “Saksi-Saksi Jehovah enda pechayaka Jesus.”
Nama saut nuan?
LANSA
Jesus nya melikat ti amat bekuasa. Iya Anak Petara sereta Messiah.
Ulang Kaji
Nama kebuah Jesus dikumbai “Anak ke terubah diadaka ari atas semua utai ti digaga”?
Nama digaga Jesus sebedau datai ke dunya?
Baka ni kitai nemu Jesus nya Messiah?
ARAM BELAJAR
Belajar pasal tanggung pengawa Jesus ke nyadi Messiah.
“Kati Jesus Nya Messiah Baka ke Dipadah ba Bup Kudus?” (Artikel ba laman web jw.org)
Kati bisi Bup Kudus ngajar pasal Petara ke ngembuan seiku bini ti ngadaka anak ke Iya? Aram meda saut iya.
“Nama Kebuah Jesus Dikumbai Anak Petara?” (Artikel ba laman web jw.org)
Peratika kebuah ajar Triniti ukai ajar ari Bup Kudus.
Peratika baka ni pengidup seiku indu berubah pengudah iya belajar pasal Jesus ari Bup Kudus.
“Seiku Indu Judah Madahka Kebuah Iya Mansik Baru Utai ti Dipechayaka Iya” (Peratika!, Mei 2013)
a Pelajar 26 enggau 27 deka berandauka kebuah mensia patut diselamatka lalu baka ni Jesus nyelamatka kitai.
b Peda Nota Penutup 2 kena nemu jaku benabi pasal kemaya Jesus datai ke dunya.