Jesus Meri Beribu Orang Makai Ngena Kereja Ajih

12 iku rasul Jesus udah gaga ati nginjil ba serata Galili, lalu sida madahka Jesus “semua utai ti udah dikereja enggau diajar sida.” Sida tentu berasai lelak. Sida nadai hari makai laban mayuh orang deka datai ngagai sida. Nya alai Jesus madah: “Aram kitai mupuk ngagai endur ti sunyi, kediri kitai aja lalu belelak ba dia.”—Mark 6:30, 31.

Sida nepan siti perau, ke bisi semak Kapernaum, laban sida deka ngagai siti endur ti sunyi enda jauh ari Betsaida. Tang, orang bisi meda sida mupuk ari endur nya. Nya alai orang berumban nitihka sida ari tebing sungai, lalu datai ba endur nya dulu agi ari sida.

Lebuh Jesus datai ba tebing, iya meda mayuh amat orang. Iya kasihka sida laban sida baka bedus ti nadai orang ngibun. Nya alai iya “ngajar sida mayuh utai” pasal Perintah Petara. (Mark 6:34) Iya mega ngeraika “orang ke sakit.” (Luke 9:11) Maya nya hari pan udah lemai, bala murid iya madah ngagai iya: “Endur tu jauh lalu hari pan nyau udah laun. Asuh orang mayuh tu mupuk, ngambika sida bejalai ngagai endur ke bisi genturung pendiau, lalu meli pemakai ke diri empu.”—Matthew 14:15.

Jesus nyaut: “Sida enda ibuh mupuk. Kita empu meri sida utai diempa.” (Matthew 14:16) Jesus nemu utai ke deka digaga iya, tang iya deka nguji Philip. Ku iya nanya Philip: “Dini kitai ulih meli roti ke diempa bala orang tu?” Jesus nanya Philip, laban Philip datai ari endur ke enda jauh ari Betsaida. Taja pan sida ulih meri roti, tang nya enda chukup kena meri beribu orang makai. Maya nya bisi kira-kira 5,000 iku lelaki. Penyampau sida maya nya mayuh agi laban bisi sida ke indu enggau bala anak mit! Nya alai Philip nyaut: “Taja pan kitai ngena 200 denari [1 denari nya gaji sehari] meli roti, enti disadung mimit-mimit ngagai tiap iku orang, enda meh roti nya chukup.”—John 6:5-7.

Andrew madahka: “Siku anak mit lelaki ba ditu bisi lima iti tuku roti enggau dua iku ikan ti mit. Tang ni nya chukup ke bala mayuh ditu?” (John 6:9) Andrew bejaku munyi nya laban iya ka nunjuk ngagai Jesus, nya mustahil deka meri makai beribu iku orang.

Maya nya musin bungai, lalu Pengerami Paska 32 M. nyau semak. Maya nya bukit penuh enggau rumput. Jesus ngasuh semua orang duduk dalam raban ba atas rumput. Sekeda raban bisi 100 iku orang lalu sekeda nya bisi 50 iku orang. Iya ngambi lima iti tuku roti enggau dua iku ikan nya, engkadah ke langit lalu besampi meri terima kasih. Jesus mechahka roti nya lalu magi ikan ngagai bala murid iya. Udah nya, bala murid iya nyuaka semua pemakai tu ngagai orang mayuh. Semua orang makai nyentukka kenyang!

Pengudah nya, Jesus madah ngagai bala murid iya: “Gumpul teda roti nya ngambika enda tebasau ngapa.” (John 6:12) Teda roti ke digumpul sida ngemenuhka 12 iti bakul!