“Kami Setuju Ngaga Pemutus”

1, 2. (a) Nama tanya ti penting ke patut diterangka raban ti ngiring ba abad keterubah? (b) Nama nulung raban ti ngiring ngaga pemutus ti betul?

BALA rasul enggau bala tuai gempuru begelumu ba siti endur di Jerusalem. Maya nya, sida merening ngagai pangan diri laban nemu sida patut ngaga pemutus ti penting. Bisi beberapa iti tanya ke patut diterangka ketegal penanggul pengawa besunat. Kati orang Kristian agi dibaruh Adat Moses? Kati bisi bida entara orang Kristian bansa Judah enggau orang Kristian bansa bukai?

² Bala menyadi ba raban ti ngiring udah beratika mayuh bukti. Sida berundingka jaku benabi dalam Bup Kudus, lalu udah ngasaika berekat Jehovah ba pengawa sida. Sida pan udah madahka penemu diri enggau beterus terang. Bisi mayuh bukti ke udah nulung sida ngaga pemutus. Tu terang nunjukka, kuasa kudus Jehovah ngiring sida. Kati sida deka nitihka iring Jehovah?

3. Nama penguntung ke deka diulih kitai lebuh mansik Surat Kereja Rasul bagi 15?

³ Bala menyadi amat begunaka pengarap sereta pemerani kena nitihka iring ari kuasa kudus. Pemutus sida deka ngasuh bala tuai pengarap orang Judah majak agi begedika orang Kristian. Lalu, bisi mega menyadi lelaki ke keran deka mai bala menyadi ba raban gempuru nitihka baru Adat Moses. Ketegal tu, nama deka digaga raban ti ngiring? Aram kitai meda. Seraya kitai belajarka tu, kitai deka meda baka ni Raban ti Ngiring kemayaharitu nunda utai ti digaga raban ti ngiring ba abad keterubah. Ketegal kitai orang Kristian, kitai patut nitihka chara nya lebuh ngaga pemutus sereta napi penanggul.

“Sejalai enggau Utai ke Udah Ditulis ba Ajar Sida Nabi” (Surat Kereja Rasul 15:13-21)

4, 5. Dalam randau nya, baka ni James nerangka ajar ari jaku benabi ba Bup Kudus?

⁴ Dalam randau nya, James, menyadi tiri Jesus, berengkah bejaku.a Iya meh ke nguluka randau maya raban ti ngiring begelumu. Utai ke dipadah James nunjukka, raban ti ngiring besetuju enggau pemutus ke udah digaga sida. Ku James bejaku ba mua sida: “Simeon udah madahka enggau terang baka ni Petara berengkah beratika orang bansa bukai, ngambika Iya ulih milih orang ari bala sida nyadi nembiak ke dikangau ngena nama Iya. Lalu utai tu sejalai enggau utai ke udah ditulis ba Ajar Sida Nabi.”—SKR. 15:14, 15.

⁵ Baka ni James ulih ingatka ayat Bup Kudus ke ulih nulung sida meretika pekara ti dikerandauka sida? Iya engka ingat jaku Simeon, tauka Simon Peter. Iya mega engka ingatka bukti ke dipadah Barnabas enggau Paul. (Jhn. 14:26) Pengudah James madahka pekara ti “sejalai enggau utai ke udah ditulis ba Ajar Sida Nabi,” James nandu utai ke dipadah Amos 9:11, 12. Bup Amos sebagi ari begian Sempekat Lama, lalu suah dikumbai “Ajar Sida Nabi.” (Mat. 22:40; SKR. 15:16-18) Taja pia, nuan tentu bisi beratika utai ke dipadah James enda entu sama enggau utai ke ditulis ba bup Amos. Tu ketegal, James engka nandu baru ari Septuagint, iya nya begian Sempekat Lama dalam jaku Hebrew ke disalin ngagai jaku Gerika.

6. Baka ni ayat Bup Kudus nulung sida ba randau nya?

⁶ Nengah nabi Amos, Jehovah madahka Iya deka nirika baru “perintah David.” Bisi siku raja ke datai ari garis peturun David ke deka merintah nyadi raja ba Perintah Petara. (Esk. 21:26, 27) Kati Jehovah sekali agi deka bisi kaul ti spesial enggau bansa Israel? Enda. Tu ketegal, jaku benabi bisi madahka “orang ari semua bansa” deka dibai sama begulai enggau “orang ke dikangau ngena nama [Petara].” Peter kala madahka, Petara enda meda bida entara orang Kristian bansa Judah enggau orang ari bansa bukai. “Tang Iya ngasuh ati sida tuchi laban sida arap.” (SKR. 15:9) Reti iya, peneka Petara nya, Iya deka orang bansa Judah enggau orang ari bansa bukai dibai begulai nyadi waris Perintah Petara. (Rom. 8:17; Eps. 2:17-19) Pia mega, nadai jaku benabi ke madahka orang bansa bukai patut dulu disunat tauka megai pengarap Judah enti sida deka bempu Perintah Petara.

7, 8. (a) Nama runding ke dipadah James? (b) Baka ni kitai ulih meretika jaku James?

⁷ Tu meh utai ke dipadah James ngagai semua orang pengudah beratika bukti ari Bup Kudus sereta bukti ke dipadahka Paul enggau Barnabas. Ku James: “Nya alai, ba runding aku, anang ngenusahka orang ari bansa bukai ke ingin deka nyembah Petara. Tang kitai patut nulis surat ngagai sida, madahka sida patut nyeliahka diri ari nama-nama utai ti bekaul enggau engkeramba, ari ulah seks ti kamah, ari makai dagin jelu ti mati dichekal, sereta ari darah. Ari kelia menya, bisi orang madah pasal Moses ba tiap iti nengeri, laban utai ke ditulis iya nya dibacha ba balai gempuru ninting Hari Sabat.”—SKR. 15:19-21.

⁸ Lebuh James nyebut “ba runding aku,” kati tu reti iya James ngena kuasa iya kena ngaga pemutus ke semua menyadi ba raban ti ngiring? Enda! Jaku James ke madahka “ba runding aku” enda nunjukka iya deka bekuasa ba semua menyadi ba raban ti ngiring. Tang, iya madahka penemu iya ngambika semua sida ulih berundingka utai ti patut digaga pengudah ningaka bukti ari Barnabas enggau Paul sereta mansik ayat Bup Kudus.

9. Nama penguntung ke diulih ari utai ke dipadah James?

⁹ Kati runding James nya manah? Au. Nama kebuah? Laban bala rasul enggau bala tuai gempuru nerima penemu iya. Nama sekeda penguntung iya? Kesatu, runding ari James tu enda “ngenusahka” orang Kristian bansa bukai, lalu enda mejal sida nitihka Adat Moses. (SKR. 15:19) Kedua, pemutus tu nunjukka basa ngagai asai ati orang Kristian ke bebansa Judah, laban sida udah betaun-taun ningaka Adat “Moses . . . dibacha ba balai gempuru ninting Hari Sabat.”b (SKR. 15:21) Ketiga, penemu ari James mega ngerapatka kaul entara orang Kristian bansa Judah enggau orang Kristian ke datai ari bansa bukai. Ke pemadu beguna, pemutus tu ngelantangka ati Petara Jehovah. Lalu tu nunjukka, peneka Iya seruran mansang. Tu endang chara ti manah kena mutarka penanggul ke ulih ngachau penyerakup bala nembiak Petara! Lalu tu ulih nyadi teladan ngagai semua ba raban gempuru kemayaharitu!

10. Baka ni Raban ti Ngiring kemayaharitu nitihka teladan raban ti ngiring ba abad keterubah?

¹⁰ Baka ke udah dipelajarka kitai ba pelajar sebedau tu, Raban ti Ngiring kemayaharitu ngiga iring ari Jehovah enggau Jesus Kristus. Tu ketegal, Jehovah nya Pemerintah Alam Semesta ti Pemadu Bekuasa, lalu Jesus Kristus nya Tuai Raban Gempuru. Tu mega utai ke digaga raban ti ngiring ba abad keterubah.c (1 Kor. 11:3) Baka ni chara sida ngiga iring ari Jehovah? Peratika menyadi ke benama Albert D. Schroeder, ke kala nyadi siku ari Raban ti Ngiring ari taun 1974, nyentukka maya iya nembuka pengawa iya ba dunya kena Mac 2006. Ku iya madahka: “Ba hari tiga, Raban ti Ngiring baum. Sida deka ngepunka aum nya ngena sampi lalu minta iring kuasa kudus Jehovah. Raban ti Ngiring enggau naka ulih nitihka jaku ajar Bup Kudus ba tiap iti pekara sereta pemutus ke digaga.” Pia mega, menyadi Milton G. Henschel, ke kala nyadi siku ari Raban ti Ngiring nanya tanya tu ngagai bala menyadi ke graduet kelas ke-101 ba Sekula Gilead. Menyadi Milton ngabiska pengawa iya ba dunya kena Mac 2003. Ku iya nanya: “Kati bisi gerempung bukai ba dunya tu kelimpah ari Raban ti Ngiring ke mansik Bup Kudus sebedau ngaga pemutus ti penting?” Kitai tentu nemu saut iya.

“Nganjung Seduai Iya” (Surat Kereja Rasul 15:22-29)

11. Baka ni pemutus ke digaga raban ti ngiring dipadah ngagai semua raban gempuru?

¹¹ Raban ti ngiring ba Jerusalem udah sama setuju ngaga siti pemutus bekaul enggau pengawa besunat. Taja pia, pemutus tu patut dipadah ngagai semua raban gempuru dalam chara ti terang sereta meransang. Tu amat penting ngambika semua menyadi ba raban gempuru ulih beserakup. Baka ni tu ulih digaga? Ku Bup Kudus madahka: “Udah nya, bala rasul, bala tuai gempuru, enggau semua raban gempuru, ngaga pemutus deka milih dua iku orang ari bala sida lalu nganjung seduai iya ngagai Antiok begulai enggau Paul sereta Barnabas. Nya alai, Silas enggau Judas, ke mega dikumbai Barsabas, dipilih. Seduai nya meh ke ngiring bala menyadi.” Pia mega, raban ti ngiring ngirumka surat ngagai semua raban gempuru ba Antiok, Siria sereta Kilikia. Sida mega nganjung Judas enggau Silas ngambika macha surat nya ba mua bala menyadi.—SKR. 15:22-26.

12, 13. Nama penguntung ke diulih laban nganjung (a) Judas enggau Silas? (b) surat ari raban ti ngiring?

¹² Ketegal Judas enggau Silas “ngiring bala menyadi,” seduai iya layak nyadi pengari raban ti ngiring. Bisi empat iku menyadi lelaki ke dianjung ngenataika pesan iya nya, Paul, Barnabas, Judas enggau Silas. Pesan ke dibai sida empat iku tu ukai semina saut ngagai utai ke ditanya bala menyadi. Tang nya iring ti terang ari raban ti ngiring. Penatai empat iku menyadi lelaki ke “dipilih” tu deka ngerapatka kaul entara bala menyadi Kristian ke bebansa Judah enggau bala menyadi Kristian ke datai ari bansa bukai ba raban gempuru. Tu siti atur ti manah sereta ngayanka pengerindu! Tu tentu meransang pemaik sereta penyerakup entara bala nembiak Petara.

¹³ Surat ke diberi raban ti ngiring ngagai orang Kristian ke datai ari bansa bukai ukai semina pasal penanggul besunat aja. Tang mega, pasal chara sida ulih ngelantangka ati Jehovah sereta diberekat Iya. Ba surat nya, bisi madahka: “Kuasa kudus nulung kami mutuska ngambika kita enda ibuh ditating enggau pekara bukai kelimpah ari utai tu: nyeliah ari nama-nama utai ke diberi ngagai engkeramba, ari darah, ari makai dagin jelu ti mati dichekal, sereta ari ulah seks ti kamah. Enti kita seruran bejimat sereta ngenyauhka diri ari semua pekara tu, kita deka mujur. Ngarapka semua kita seruran gerai.”—SKR. 15:28, 29.

14. Nama kebuah nembiak Jehovah ulih beserakup ba dunya ti bepechah-belah tu?

¹⁴ Kemayaharitu, Saksi-Saksi Jehovah beserakup sereta arapka utai ti sama. Ba serata dunya, bisi lebih ari 8 juta iku bala menyadi, sereta bisi lebih ari 100,000 iti raban gempuru Kristian. Kemayaharitu, orang ba dunya bepechah-belah. Tang baka ni nembiak Jehovah ulih beserakup? Tu ketegal, kitai nerima iring ti terang ari Jesus Kristus, iya nya Tuai Raban Gempuru. Iya meri iring nengah “ulun ke tetap ati sereta bepenemu-dalam,” iya nya Raban ti Ngiring. (Mat. 24:45-47) Pia mega, kitai ulih beserakup laban semua menyadi ba serata dunya nitihka iring Raban ti Ngiring.

“Sida Gaga Ati Lebuh Ninga Jaku Peransang” (Surat Kereja Rasul 15:30-35)

15, 16. Nama asil ti penudi pengudah pemutus bekaul enggau pengawa besunat digaga lalu nama kebuah tu ngenataika asil ti manah?

¹⁵ Begian penudi Surat Kereja Rasul bagi 15 madahka kitai, lebuh bala menyadi dianjung raban ti ngiring ari Jerusalem datai ngagai Antiok, sida “ngempuruka semua bala murid Jesus ba dia lalu nyuaka surat nya ngagai sida.” Pengudah nerima iring ari raban ti ngiring, nama reaksi bala menyadi ba Antiok? Bup Kudus madahka: “Pengudah macha surat nya, sida gaga ati lebuh ninga jaku peransang nya.” (SKR. 15:30, 31) Nambahka nya, Judas enggau Silas “madahka mayuh jaku peransang kena negapka bala menyadi ba dia.” Enggau nya, Judas sereta Silas dikumbai “nabi.” Seduai iya pan baka Barnabas, Paul, sereta bala menyadi bukai ke mega dikumbai bala nabi. Leka jaku nabi dituju ngagai orang ke madah tauka nusui pasal tuju Petara.—SKR. 13:1; 15:32; P-sut. 7:1, 2.

¹⁶ Jehovah merekatka atur ke digaga. Asil iya semua orang gaga ati enggau chara penanggul nya diputarka. Nama utai ke nulung sida nyapai asil ti manah? Tu ketegal raban ti ngiring meri iring ti terang sereta ba maya ti ngena. Pia mega iring ti diberi raban ti ngiring bepelasarka Bup Kudus sereta nitihka iring kuasa kudus. Nambahka nya pemutus tu dikenataika ngagai semua raban gempuru enggau chara ti nunjukka pengerindu sereta pengibuh.

17. Baka ni tuai ti ngabas kemayaharitu nitihka utai ke digaga Judas enggau Silas?

¹⁷ Baka raban ti ngiring ba abad keterubah, Raban ti Ngiring kemayaharitu mega meri iring ba maya ti ngena ngagai bala menyadi Kristian di serata dunya. Lebuh pemutus udah digaga, sida madahka pemutus nya ngagai semua raban gempuru enggau chara ti nyemetak sereta terang. Siti chara nya, Raban ti Ngiring nganjung tuai ti ngabas ngagai tiap iti raban gempuru. Bala tuai ti ngabas sanggup ngabas ari siti raban gempuru ngagai raban gempuru ke bukai kena madahka iring sereta jaku peransang ngagai bala menyadi Kristian. Baka Paul seduai Barnabas, sida mega ngena mayuh awak ba pengawa nginjil, “ngajar orang, . . . madahka Berita Manah pasal jaku Jehovah begulai enggau mayuh orang bukai.” (SKR. 15:35) Baka Judas enggau Silas, sida “madahka mayuh jaku peransang kena negapka bala menyadi.”

18. Baka ni nembiak Petara ulih terus nerima berekat ari Jehovah?

¹⁸ Baka ni enggau bala menyadi Kristian ba raban gempuru? Kati bala menyadi Kristian ulih terus ngasaika pemaik sereta penyerakup ba dunya ti bepechah-belah kemayaharitu? Kingatka baru utai ke ditulis James, ku iya: “Tang penemu-dalam ke datai ari serega, keterubah, ngasuh orang tuchi. Lalu udah nya, iya ngasuh orang bebendar deka ngulihka kaul ti manah enggau orang bukai, bisi runding ti masuk akal, sedia deka ngasi. . . . Kelimpah ari nya, orang ke nentuka diri bisi kaul ti manah enggau orang bukai ngemansangka keadaan ti lantang lalu nya ngasuh sida ngereja utai ti lurus.” (Jas. 3:17, 18) Lebuh James nuliska ayat tu, kitai enda pasti sekalika iya tekenangka baru pasal aum sida ba Jerusalem tauka enda. Taja pia, pengudah kitai mansik utai ke nyadi ba Surat Kereja Rasul bagi 15, kitai nemu Jehovah deka merekatka kitai enti beserakup sereta bekerejasama enggau pangan diri.

19, 20. (a) Nama nunjukka bala menyadi ba raban gempuru Antiok bisi pemaik sereta penyerakup? (b) Nama utai ke ulih digaga Paul enggau Barnabas ketegal nya?

¹⁹ Raban gempuru ba Antiok bisi ngasaika pemaik sereta penyerakup. Ari ke ngelaban bala menyadi ke datai ari Jerusalem, bala menyadi ba Antiok gaga ati nerima penatai Judas enggau Silas. Bup Kudus madahka: “Seduai iya lama diau ba Antiok. Lebuh seduai iya deka mupuk, bala menyadi ba dia madahka selamat tinggal ngagai seduai iya. Judas enggau Silas pulai baru ngagai orang ke nganjung seduai iya.” Reti iya, seduai pulai baru ngagai Jerusalem. (SKR. 15:33) Kitai yakin bala menyadi ba Jerusalem mega gaga ati lebuh sida ningaka utai ke nyadi ba Antiok ari Judas enggau Silas. Ketegal pengasih Jehovah, bala menyadi tu mujur nembuka pengawa sida enggau gaga ati.

²⁰ Pengudah nya Paul enggau Barnabas diau ba Antiok. Ketegal penanggul pengawa besunat mujur diputarka, Paul seduai Barnabas ulih ngiring pengawa nginjil. Nya meh utai ke digaga bala tuai ti ngabas lebuh sida ngabas bala menyadi ba raban gempuru. Semua tu nyadika berekat ke bala nembiak Jehovah. (SKR 13:2, 3) Tang, baka ni Jehovah terus ngena sereta merekatka Paul enggau Barnabas ke ransing nginjil? Aram meh kitai meda ba pelajar pengudah tu.