Penerang ke Bup Kereja Pengidup enggau Pengawa Kristian
3-9 DISEMBER
RETA ARI BUP KUDUS | KEREJA RASUL 9-11
“Orang ke Balat Ngelaban Nyadi Penginjil ti Ransing”
(Kereja Rasul 9:1, 2) Lebuh maya nya Saul, ke agi majak ngemba lalu munuh murid Tuan, betemu enggau imam besai 2 lalu minta surat penerang kena iya madahka pejalai diri ngagai balai gempuru di Damaskus, ngambika, enti iya bisi tetemuka lelaki tauka indu ke nitihka Jalai Tuan, iya tau nangkap sida, lalu mai sida ngagai Jerusalem.
Eklisia “Nadai Agi Pengachau”
RABAN orang ke bejalai mansang ngagai Damaskus bisi pelan ti jai. Sida deka ngiga murid Jesus lalu ngirit sida ari rumah, nanchang sida, ngemaluka sida sereta mai sida ngagai Jerusalem ngambika ulih diakim raban Kunsil.
2 Tuai raban nya, ke benama Saul, bisi enggau ba pengawa munuh murid Jesus. Empai lama ke udah, iya ngemendarka bala soldadu ke dikumbai zealots nuku Stepen, murid Jesus ti tetap ati, enggau batu. (SKR. 7:57–8:1) Ketegal pengeringat iya ti balat ngagai murid Jesus ke diau ba Jerusalem, Saul besedia deka merinsaka murid Jesus ba endur bukai. Iya deka ngemunaska raban ke dikumbai ‘Jalai Tuan.’—SKR. 9:1, 2.
(Kereja Rasul 9:15, 16) Tang ku Tuan bejaku ngagai Ananias, ‘Mupuk meh nuan, laban iya udah dipilih aku nyadika perengka kena aku madahka nama aku ngagai orang bansa bukai, ngagai raja, enggau ngagai orang Israel. 16 Aku empu deka madah ngagai iya pemalat pemerinsa ti enda tau enda ditatka iya ketegal nama aku.’
Beterima Kasih ngagai Jehovah ti Nyadi Tukang Periuk Kitai
4 Jehovah enda meda orang ngena chara mensia meda. Tang, Iya meresa ati sereta meda sapa tiap iku kitai ke bendar. (Bacha 1 Samuel 16:7b.) Jehovah nunjukka tu lebuh Iya numbuhka gempuru Kristian. Iya mai mayuh orang ke dikumbai sekeda orang enda berega ngagai Iya Empu sereta ngagai Anak Iya. (Jhn. 6:44) Ngambika chunto, seiku ari orang nya orang Parisi ke benama Saul, ke ‘bejaku busung ngelaban iya [Jesus], lalu udah merinsaka iya.’ (1 Tim. 1:13) Tang Jehovah meresa ati Saul, lalu enda ngumbai iya tanah liat ti enda beguna. (J-lam. 17:3) Jehovah meda Saul ulih ditempa nyadi “perengka” ke deka dikena nginjil “ngagai orang bansa bukai, ngagai raja, enggau ngagai orang Israel.” (SKR. 9:15) Jehovah mega milih orang bukai ke ulih ditempa “dikena tiap hari,” nyengkaum orang ke kala nyadi pemabuk, orang ke ngereja ulah ti kamah sereta penchuri. (Rom. 9:21; 1 Kor. 6:9-11) Seraya sida belajarka Bup Kudus, sida ngeringka pengarap sida ngagai Jehovah sereta ngawakka Iya nempa sida.
(Kereja Rasul 9:20-22) lalu tekala nya belabuh nusui pasal Jesus dalam balai gempuru. Ku iya, ‘Iya Anak Petara.’ 21 Semua orang ke ninga iya balat alit ati. Ku sida, “Ukai enda iya tu ke udah munuh orang ke arapka Jesus di Jerusalem suba? Lalu iya udah datai ditu deka nangkap lalu mai sida ngagai bala tuai imam?” 22 Tang Saul majak mansang dalam kuasa, datai ke orang Judah ke diau di Damaskus nyau enda ulih mantah iya agi lebuh iya besaksi madahka Jesus nya Kristus.
Eklisia “Nadai Agi Pengachau”
15 Ulih nuan ngambarka asai ati orang mayuh ti tekenyit sereta pedis ati lebuh Saul berengkah nginjil pasal Jesus ba balai gempuru? Ku sida, “Ukai enda iya tu ke udah munuh orang ke arapka Jesus di Jerusalem suba?” (SKR. 9:21) Lebuh iya madahka diri udah berubah, orang bukai “nyau enda ulih mantah iya agi lebuh iya besaksi madahka Jesus nya Kristus.” (SKR. 9:22) Taja pan iya ulih ngena penerang ke enda ulih dibantah agi, tang nya empai entu chukup kena ngubah runding orang ti keran deka nitihka adat tauka sumbung. Taja pia, Saul enda putus pengarap.
Ngulihka Penemu Bup Kudus ti Berega
(Kereja Rasul 9:4) Iya rebah ke tanah, lalu ninga nyawa bejaku ngagai iya, ‘Saul, Saul! Nama kebuah nuan merinsaka aku?’
Eklisia “Nadai Agi Pengachau”
5 Lebuh Jesus nagang pejalai Saul ngagai Damaskus, iya enda nanya Saul: “Nama kebuah nuan merinsaka bala murid aku?” Tang iya nanya: “Nama kebuah nuan merinsaka aku?” (SKR. 9:4) Endang terang, Jesus ulih ngasaika penguji ke ditapi bala murid iya.—Mat. 25:34-40, 45.
6 Enti nuan benung diperinsa ketegal arapka Kristus, pechaya meh Jehovah enggau Jesus nemu utai ke ditapi nuan. (Mat. 10:22, 28-31) Ba maya tu, penguji nya engka agi bisi. Kingatka, Jesus meda utai ke dikereja Saul lebuh Stepen dibunuh, lalu Jesus meda Saul ngirit bala murid ke tetap ati pansut ari rumah sida di Jerusalem. (SKR. 8:3) Tang Jesus enda ngereja nama-nama utai tekala nya. Taja pia, nengah Jesus, Jehovah meri Stepen enggau bala murid ke bukai pengering ngambika sida ulih tetap ati.
(Kereja Rasul 10:6) Iya diau ba rumah Simon, ke tukang samak. Rumah nya ngimbai tebing tasik.”
nota pelajar nwtsty ke SKR. 10:6
Simon, tukang samak: Seiku tukang samak gawa niti kulit jelu. Iya ngena ai kapu muai bulu tauka isi enggau gemu jelu nya. Udah nya iya ngena ai kimia ke digaga ari utai tumbuh, kena ngaga bemacham utai ari kulit nya. Pengawa tu amat bau lalu begunaka mayuh ai. Nya kebuah Simon diau ngimbai tebing tasik, engka ba luar menua Joppa. Nitihka Adat Moses, orang ke gawa enggau bangkai jelu nya enda tuchi. (Lew. 5:2; 11:39) Nya alai, mayuh orang Judah ngemaruhka tukang samak lalu enggai diau enggau sida. Kelebih agi, Talmud madahka pengawa tukang samak baruh agi ari pengawa orang ke ngumpul tai. Taja pia, Peter enda bechiping lalu diau enggau Simon. Runding Peter ti manah ba pekara tu nyikap iya ke pengawa baru, iya nya ngabas seiku orang bansa bukai ba rumah orang nya. Sekeda pakar ngumbai jaku Gerika ke “tukang samak” (byr·seusʹ) nya nama kangau ti ditujuka ngagai Simon.
Macha Bup Kudus
(Kereja Rasul 9:10-22) Nyadi di Damaskus bisi siku murid benama Ananias. Tuan bejaku ngagai iya dalam genera, “Ananias!” Ananias lalu nyaut, ‘Tu aku, Tuan.’ 11 Tuan lalu bejaku ngagai iya, “Angkat nuan, lalu bejalai ngagai jalai ti dikumbai Rurus, lalu lebuh nuan datai ba rumah Judas, tanyaka orang siku ke benama Saul, ke asal ari Tarsus. Iya diatu benung besampi, 12 lalu iya udah begenera meda orang ke benama Ananias tama, lalu ngengkahka jari ba atas iya, ngambika iya ulih meda baru.” 13 Tang ku Ananias nyaut, ‘Tuan, aku udah ninga pasal orang tu ari mayuh orang bukai, pasal iya ke udah balat merinsaka bala nembiak nuan di Jerusalem, 14 lalu iya udah datai ditu ngena kuasa ari tuai imam, deka nangkap semua orang ke ngangauka nama nuan.’ 15 Tang ku Tuan bejaku ngagai Ananias, ‘Mupuk meh nuan, laban iya udah dipilih aku nyadika perengka kena aku madahka nama aku ngagai orang bansa bukai, ngagai raja, enggau ngagai orang Israel. 16 Aku empu deka madah ngagai iya pemalat pemerinsa ti enda tau enda ditatka iya ketegal nama aku.’ 17 Ananias lalu mupuk, lalu tama rumah nya. Iya ngengkahka jari iya atas Saul, lalu bejaku. ‘Menyadi aku, Saul, Tuan Jesus Kristus, ke udah pegari di mua nuan lebuh nuan di rantau jalai mansang kitu, udah ngasuh aku datai, ngambika nuan ulih meda baru, lalu dipenuhka enggau roh kudus.’ 18 Tekala nya utai ti baka tisik ikan lalu labuh ari mata Saul, lalu iya ulih meda baru. Udah nya iya angkat lalu dibaptisa, 19 lalu lebuh iya udah makai, iya lalu berasai kering baru. Saul lalu diau dua tiga hari enggau sida murid di Damaskus, 20 lalu tekala nya belabuh nusui pasal Jesus dalam balai gempuru. Ku iya, ‘Iya Anak Petara.’ 21 Semua orang ke ninga iya balat alit ati. Ku sida, “Ukai enda iya tu ke udah munuh orang ke arapka Jesus di Jerusalem suba? Lalu iya udah datai ditu deka nangkap lalu mai sida ngagai bala tuai imam?” 22 Tang Saul majak mansang dalam kuasa, datai ke orang Judah ke diau di Damaskus nyau enda ulih mantah iya agi lebuh iya besaksi madahka Jesus nya Kristus.
10-16 DISEMBER
RETA ARI BUP KUDUS | KEREJA RASUL 12-14
“Barnabas enggau Paul Ngaga Murid ba Endur ti Jauh”
(Kereja Rasul 13:2, 3) Lebuh sida benung nyembah Tuhan sereta bepasa, roh kudus bejaku ngagai sida, ‘Pilih ke aku Barnabas seduai Saul ke udah dikangauka aku ngereja pengawa ti diasuh aku kereja seduai iya.’ 3 Lebuh sida udah bepasa sereta besampi, sida lalu ngengkahka jari sida atas seduai iya, lalu ngasuh seduai iya mupuk.
“Gaga Amat Ati, sereta Penuh Laban Roh Kudus”
4 Tang nama kebuah Barnabas enggau Saul dipilih roh kudus “ngereja pengawa”? (SKR. 13:2) Bup Kudus nadai meri saut. Tang kitai nemu roh kudus ngasuh seduai iya dipilih. Nadai bukti ti nunjukka bala nabi enggau pengajar ba Antiok ngelaban pemutus nya. Tang sida nyukung pemutus nya. Uji gambarka asai ati Barnabas enggau Saul lebuh menyadi Kristian sida ke enda kepapas, ‘bepasa sereta besampi, lalu ngengkahka jari sida atas seduai iya, lalu ngasuh seduai iya mupuk.’ (SKR. 13:3) Kitai mega patut nyukung orang ke nerima pengawa teokratik, nyengkaum sida ke dipilih nyadi tuai gempuru. Ari ke ngembuan asai kepapas ngagai orang ke nerima pengawa nya, kitai patut meri “basa enggau pengerindu ti pemadu besai ngagai sida ketegal pengawa sida.”—1 Tes. 5:13.
(Kereja Rasul 13:12) Lebuh tuan gabenor meda utai nya nyadi, iya lalu arap laban iya balat alit ati ke ajar pasal Tuhan.
(Kereja Rasul 13:48) Lebuh orang bansa bukai ninga nya, sida gaga ati, lalu muji jaku Petara, lalu sida ke [deka] nerima pengidup ti meruan belama iya, arap.
(Kereja Rasul 14:1) Di Ikonium seduai iya, baka selama tama ngagai balai gempuru orang Judah lalu bejaku, lalu mayuh amat orang Judah enggau orang bansa bukai arap.
‘Bejaku enggau Berani Ngarika Jehovah’
5 Keterubah iya, Paul enggau Barnabas ngetu ba Ikonium, endur mayuh orang Gerika diau, sereta siti ari kuta ti besai ba Galatia, ke dipegai perintah Rome. Kuta tu bisi mayuh orang Judah ti dipebasa sereta mayuh orang ari bansa bukai. Baka selama, Paul enggau Barnabas tama ngagai balai gempuru lalu berengkah nginjil. (SKR. 13:5, 14) Seduai iya “bejaku, lalu mayuh amat orang Judah enggau orang bansa bukai arap.”—SKR. 14:1.
(Kereja Rasul 14:21, 22) Lebuh seduai iya udah nusui Berita Manah ngagai orang di nengeri nya, lalu mayuh orang nyadi murid, seduai iya lalu pulai baru ngagai Listra, Ikonium, enggau ngagai Antiok. 22 Dia seduai iya ngeringka semengat sida murid, lalu meransang sida seruran tetap dalam pengarap. Ku seduai iya, ‘Kitai endang enda tau enda ngasaika mayuh macham penusah enti kitai deka tama ngagai Perintah Petara.’
w14 15/9 13 ¶4-5
Sembah Petara enggau Tetap Ati Taja Pan Napi “Mayuh Macham Penusah”
4 Pengudah ngabas Derbe, Paul enggau Barnabas “pulai baru ngagai Listra, Ikonium, enggau ngagai Antiok. Dia seduai iya ngeringka semengat sida murid, lalu meransang sida seruran tetap dalam pengarap. Ku seduai iya, ‘Kitai endang enda tau enda ngasaika mayuh macham penusah enti kitai deka tama ngagai Perintah Petara.’” (SKR. 14:21, 22) Kebendar iya, utai ku seduai nya amat nyelai, laban lebuh kitai ngasaika “mayuh macham penusah,” tu deka ngenusahka kitai, ukai meransang kitai. Nya alai, baka ni Paul enggau Barnabas ngeringka sida murid ngena pesan ti nunjukka sida deka napi mayuh agi penusah?
5 Kitai ulih tetemuka saut lebuh kitai meratika jaku Paul enggau silik. Iya ukai semina madahka: “Kitai patut betan napi mayuh macham penusah.” Tang ku iya: ‘Kitai endang enda tau enda ngasaika mayuh macham penusah enti kitai deka tama ngagai Perintah Petara.’ Nyadi Paul ngeringka bala murid enggau madahka upah ke deka diberi ngagai sida ke taluk ngagai Petara. Ku Jesus: “Tang orang ke tan datai ke ujung, deka diselamatka.”—Mat. 10:22.
Ngulihka Penemu Bup Kudus ti Berega
(Kereja Rasul 12:21-23) Ba hari ti udah diletak, Herod begari ngena gari diraja, duduk ba kerusi diraja iya, lalu bejaku ngagai sida. 22 Sida lalu majak manjung, “Munyi nyawa petara! Ukai munyi nyawa mensia!” 23 Tekala nya melikat Tuhan lalu nampar Herod, laban iya enda ngemuliaka Petara. Iya diempa ulat, lalu mati.
w08 15/5 32 ¶7
Penerang Ari Bup Kereja Rasul
12:21-23; 14:14-18. Herod dekaka mulia ke patut diberi ngagai Petara. Tu amat bebida ari Paul enggau Barnabas ke bebendar nulak puji enggau mulia tekala nya! Kitai enda patut minta diri dimuliaka lebuh mujur ba pengawa ke Jehovah.
(Kereja Rasul 13:9) Tang Saul, ke mega dikumbai Paul, penuh laban Roh Kudus, merening ngagai iya,
nota pelajar nwtsty ke SKR. 13:9
Saul, mega dikumbai Paul: Berengkah ari tu, Saul dikumbai Paul. Rasul Paul orang Hebrew tang peranak Rome. (SKR. 22:27, 28; Plp. 3:5) Nya alai, ari mit iya engka bisi nama Hebrew, Saul, enggau nama Rome, Paul. Ba maya nya, orang Judah biasa ngembuan dua iti nama, kelebih agi sida ke diau ba luar menua Israel. (SKR. 12:12; 13:1) Ambika chunto, sekeda kaban belayan Paul bisi nama Rome tauka Gerika, kelimpah ari nama Hebrew sida. (Rom. 16:7, 21) Ketegal iya “rasul ke orang bansa bukai,” Paul diasuh madahka berita manah ngagai orang bansa bukai. (Rom. 11:13) Iya mutuska deka ngena nama Rome iya laban ngasaika orang deka nerima iya enggau manah agi. (SKR. 9:15; Gal. 2:7, 8) Sekeda orang madahka iya ngena nama Rome iya, Paul, ketegal deka bebasaka Sergius Paulus. Tang tu engka enda amat, laban Paul terus ngena nama nya indah pengudah iya ninggalka Saiprus. Orang bukai madahka Paul nyeliahka ari ngena nama Hebrew iya laban chara nyebut dalam jaku Gerika nyauka sama bunyi enggau leka jaku Gerika ti ngambarka orang (tauka jelu) ti ngerigangka diri lebuh bejalai.
Paul: Dalam Sempekat Baru, nama Pauʹlos, ari jaku Latin Paulus, reti iya “Mit,” dikena 157 kali lebuh ditujuka ngagai rasul Paul lalu sekali ditujuka ngagai Gabenor menua Saiprus ke benama Sergius Paulus.—SKR. 13:7.
Macha Bup Kudus
(Kereja Rasul 12:1-17) Ba urung maya nya Raja Herod belabuh merinsaka sekeda raban eklisia. 2 Iya ngasuh orang munuh James, menyadi John, ngena pedang. 3 Lebuh iya meda orang Judah rindu meda nya, iya lalu nangkap Peter. (Utai tu nyadi lebuh Pengerami Roti Ti Enda Beragi.) 4 Lebuh iya udah nangkap Peter, iya lalu nutup Peter dalam rumah jil, lalu ngasuh empat bengkah raban soldadu nyaga iya, laban iya berunding deka nyara Peter di mua orang mayuh udah bekau Pengerami Paska. 5 Lebuh Peter benung ditutup dalam rumah jil, raban eklisia bebendar amat besampi ke iya ngagai Petara. 6 Malam sebedau Herod mai Peter ngagai orang mayuh, Peter tinduk entara dua iku soldadu, ditanchang ngena dua iti rantai. Mua pintu rumah jil nya mega dijaga soldadu. 7 Tekala nya siku melikat Tuhan pegari, lalu penampak ti terang manchar dalam rumah jil nya. Iya nempik rusuk Peter, lalu ngerak iya. Ku melikat nya bejaku, “Angkat jampat!” Rantai nya lalu tebelengka ari rekuan Peter. 8 Melikat nya lalu bejaku ngagai iya, “Begari nuan, lalu rasukka selipar nuan.” Peter lalu ngereja nya. Melikat nya lalu bejaku ngagai iya, “Rasukka serayung nuan, lalu titihka aku.” 9 Peter lalu pansut lalu nitihka melikat nya. Iya enda nemu sekalika utai ti nyadi ulih saup melikat nya amat tauka enda. Iya ngumbai diri begenera. 10 Lebuh seduai iya udah mansa jejaga ti keterubah, enggau ti kedua, seduai iya lalu datai ba pintu besi ti nuju ngagai nengeri. Pintu nya tebuka kediri empu ke seduai iya. Seduai iya pansut lalu bejalai nengah siti jalai raya, lalu melikat nya tekala nya ninggalka iya. 11 Nya baru Peter sedarka diri empu, lalu ku iya bejaku, “Diatu baru aku nemu Tuhan udah ngirumka melikat Iya ngambika iya ngelepaska aku ari jari Herod, enggau ari semua utai ti disadang orang Judah.” 12 Lebuh iya nyau sedarka nya, iya lalu mansang ngagai rumah Maria, indai John ke mega dikumbai Mark, alai mayuh orang begempuru sereta besampi. 13 Lebuh Peter nekung pintu penama, siku indu kuli ke benama Roda datai deka muka pintu nya. 14 Iya ngelala munyi nyawa Peter, lalu ati balat amat gaga, datai ke iya nyau enda muka pintu nya, tang belanda ke dalam baru lalu madahka Peter bisi ba mua pintu. 15 Sida lalu bejaku ngagai iya, “Gila nuan tu!” Tang iya majak madahka utai nya endang amat. Ku sida, “Nya melikat iya.” 16 Lebuh utai tu benung nyadi, Peter majak nekung pintu. Lebuh sida muka pintu, sida meda iya, lalu sida balat alit ati. 17 Tang Peter ngepaika jari enda ngasuh sida inggar, lalu madah ngagai sida jalai Tuhan udah mai iya pansut ari rumah jil. Lalu ku iya bejaku, “Padahka tu ngagai James, enggau ngagai orang bukai ke arap.” Udah nya iya mupuk lalu bejalai ngagai endur bukai.
17-23 DISEMBER
RETA ARI BUP KUDUS | KEREJA RASUL 15-16
“Pemutus ti Bepelasarka Jaku Petara”
(Kereja Rasul 15:1, 2) Tang sekeda orang datai ari Judea lalu ngajar bala menyadi, ku sida, “Enti kita enda ditutus nitihka adat asal Moses, kita enda ulih diselamatka.” 2 Lalu lebuh Paul seduai Barnabas udah bebendar bekelikuh ngelaban sida pasal pekara nya, Paul seduai Barnabas, enggau sekeda orang bukai lalu diasuh mupuk ngagai Jerusalem ngambika sida berandauka pasal pekara tu enggau sida rasul enggau tuai [gempuru].
Nya Ukai Kelikuh ti Mit
8 Luke madahka Paul seduai Barnabas “udah bebendar bekelikuh ngelaban sida [“sekeda orang datai”] pasal pekara nya.” Nya alai bala tuai gempuru ngatur “Paul seduai Barnabas, enggau sekeda orang bukai lalu diasuh mupuk ngagai Jerusalem ngambika sida berandauka pasal pekara tu enggau sida rasul enggau tuai [gempuru].” (SKR. 15:2) Pengawa “bebendar bekelikuh” nunjukka asai ati dua piak ti balat sereta enggai ngalahka diri, lalu eklisia ba Antiok enda ulih mutarka penanggul tu. Ngambika ulih ngetanka pemaik enggau penyerakup, tuai gempuru ngaga pemutus madahka penanggul nya ngagai “sida rasul enggau tuai [gempuru]” ba Jerusalem, ke megai pengawa raban ti ngiring. Nama ulih dipelajar kitai ari tuai gempuru di Antiok?
(Kereja Rasul 15:13-20) Lebuh seduai iya udah badu bejaku, James lalu nyaut, ‘Menyadi, pendingka aku! 14 Simon udah nusui pasal jalai Petara terubah nurunka pengasih Iya ngagai orang bansa bukai, lalu ngaga sekeda sida nyadi nembiak Iya. 15 Tu besetuju enggau jaku sida nabi, munyi ti udah ditulis, 16 “Udah bekau nya, Aku deka pulai baru, lalu ngaga baru rumah David ti udah runtuh lalu ngaga iya baru ti udah nyadi tembawai, lalu nirika iya baru, 17 ngambika semua bansa ngiga Tuhan, nyengkaum semua orang bansa bukai ke udah dikangauka nyadi nembiak Aku. Ku Tuhan bejaku ke udah madahka utai tu 18 kenyau ari dulu kelia.” 19 Nya alai, aku udah mutuska runding, kitai enda patut ngenusahka orang bansa bukai ke nguingka diri ngagai Petara, 20 tang kitai patut nulis ngagai sida, madahka sida enda tau makai utai ti kamah laban engkeramba, enda tau ngereja ulah ti kamah, enda tau makai jelu ti udah mati dichekal, lalu enda tau makai darah.
w12 15/1 5 ¶6-7
Orang Kristian ti Bendar Bebasaka Jaku Petara
6 Ayat ke dikena lebuh mutarka penanggul tu, iya nya Amos 9:11, 12. Baka ke diambi ari Kereja Rasul 15:16, 17, ayat tu madahka: “Aku deka pulai baru, lalu ngaga baru rumah David ti udah runtuh lalu ngaga iya baru ti udah nyadi tembawai, lalu nirika iya baru, ngambika semua bansa ngiga Tuhan, nyengkaum semua orang bansa bukai ke udah dikangauka nyadi nembiak Aku. Ku Tuhan bejaku ke udah madahka utai tu.”
7 Tang sekeda orang engka berunding: ‘Ayat tu nadai madahka menyadi ari bansa bukai enda ibuh ditutus.’ Nya endang amat. Taja pia, orang Judah ke nyadi orang Kristian deka meretika reti ayat tu. Sida enda ngumbai menyadi bansa bukai ke ditutus nya “orang bansa bukai,” tang menyadi Kristian sida. (P-sut. 12:48, 49) Ambika chunto, nitihka Septuagint ke disalin Bagster, ayat Ester 8:17 munyi tu: “Mayuh orang ari bansa bukai ditutus, lalu nyadi bansa orang Judah.” Nya alai, lebuh Jaku Petara madahka ruang bilik bansa Israel (orang Judah enggau orang bansa bukai ke nyadi orang Judah ke udah ditutus) nyengkaum “semua orang bansa bukai” (bansa bukai ke enda ditutus) deka beserakup nyadi siti bansa ti ngarika nama Petara, pesan tu endang terang. Orang ari bansa bukai enda ibuh ditutus enti deka nyadi orang Kristian.
(Kereja Rasul 15:28, 29) Laban dalam runding roh kudus enggau dalam runding kami, kami enda patut nating kita enggau utai bukai, kelimpah ari atur tu, iya nya: 29 anang makai pemakai ti udah diberi ngagai engkeramba, anang makai darah, anang makai jelu ti mati dichekal, anang ngereja ulah ti kamah. Enti kita enda ngereja utai nya, nya manah amat. Selamat tinggal.”
(Kereja Rasul 16:4, 5) Lebuh seduai iya bejalai ari nengeri siti ngagai nengeri siti, seduai iya meri pemutus aum bala rasul enggau bala tuai [gempuru] di Jerusalem, lalu ngasuh sida nitihka nya. 5 Nya alai, eklisia dikeringka dalam pengarap, lalu pemayuh tubuh sida nambah-menambah tiap hari.
Raban Eklisia Dikeringka
18 Paul enggau Timoti betaun-taun begulai gawa. Seduai nyadi tuai ti ngabas, lalu ngereja mayuh pengawa ke diberi raban ti ngiring. Bup Kudus madahka: “Lebuh seduai iya bejalai ari nengeri siti ngagai nengeri siti, seduai iya meri pemutus aum bala rasul enggau bala tuai [gempuru] di Jerusalem, lalu ngasuh sida nitihka nya.” (SKR. 16:4) Eklisia nitihka atur ari bala rasul enggau tuai gempuru di Jerusalem. Asil iya, “eklisia dikeringka dalam pengarap, lalu pemayuh tubuh sida nambah-menambah tiap hari.”—SKR. 16:5.
Ngulihka Penemu Bup Kudus ti Berega
(Kereja Rasul 16:6-9) Seduai iya bejalai nengah menua Prigia enggau Galatia, laban roh kudus enda nyagi seduai iya nusui pesan Tuhan di menua Asia. 7 Lebuh seduai iya datai ba garis entara menua Misia, seduai iya nguji mansang ngagai Bitinia, tang roh Jesus enda nyagi seduai iya. 8 Nya alai, seduai iya lalu bejalai mansa menua Misia terus ngagai Troas. 9 Malam nya Paul bisi genera meda siku orang Masedonia bediri minta iya datai, ku iya, “Datai ngagai menua Masedonia lalu saup kami.”
w12 15/1 10 ¶8
Belajar Bejaga Ari Teladan Bala Rasul Jesus
8 Nama ke ulih dipelajar kitai ari cherita tu? Peratika, roh kudus Petara ngiring Paul pengudah iya ngagai menua Asia. Udah nya, pengudah Paul semak enggau Bitinia, nya baru Jesus ngiring iya. Ke penudi iya, pengudah Paul datai ba Troas, nya baru Jesus ngiring iya ngagai Masedonia. Jesus ke jadi Kepala eklisia engka ngiring kitai enggau chara ti sama. (Kol. 1:18) Ambika chunto, nuan engka berunding deka nyadi pengerintis tauka mindah ngagai endur ke begunaka bantu. Tang Jesus, nengah roh kudus Petara, semina ulih ngiring nuan pengudah nuan ngereja pengawa kena ngulihka juluk ati nuan. Kena ngambarka tu: Seiku deriba ulih ngasuh kerita iya nguing ke kiba tauka kanan enti kerita nya udah bejalai. Pia mega, Jesus engka ngiring kitai ngereja mayuh agi ke Jehovah enti kitai bebendar ngereja pengawa kena ngulihka juluk ati.
(Kereja Rasul 16:37) Tang ku Paul nyaut, “Sida udah nyipat kami duai di mua orang mayuh, taja pen kami duai apin diukum. Kami tu peranak Rome, lalu sida udah nutup kami duai dalam rumah jil. Patut tauka enda sida diatu ngelepaska kami ngena chara belalai? Enggai nyadi baka nya! Awakka sida hakim empu datai lalu mai kami duai pansut.”
nota pelajar nwtsty ke SKR. 16:37
Kami tu peranak Rome: Paul enggau Silas sama peranak Rome. Undang-undang Rome madahka rayat iya patut dipechara enggau manah lalu enda patut diukum ba mua orang mayuh enti apin dipechara. Peranak Rome meri hak spesial ngagai seseiku orang enda ngira ni bagi nengeri ke dituju iya, seagi-agi nengeri nya dipegai perintah nya. Peranak Rome di baruh undang-undang perintah Rome, ukai di baruh undang-undang menua ke dipegai Rome. Lebuh iya didawa, iya ulih ngemendarka diri dipechara nitihka undang-undang nengeri endur iya didawa. Tang iya mega bisi hak dipechara ba kot perintah Rome. Enti sema iya ngereja penyalah ti ngujungka ukum mati, iya bisi hak minta dipechara raja besai. Rasul Paul nginjil ngagai serata nengeri ke dipegai Perintah Rome. Iya ngena hak iya ke nyadi peranak Rome tiga kali. Kali keterubah nya di Pilipi, lebuh iya madahka bala hakim orang Pilipi udah ngelanggar hak iya maya sida nyipat iya.
24-30 DISEMBER
RETA ARI BUP KUDUS | KEREJA RASUL 17-18
“Tunda Rasul Paul ba Pengawa Nginjil enggau Ngajar”
(Kereja Rasul 17:2, 3) Baka ti selalu dikereja iya, Paul lalu tama ngagai balai gempuru nya lalu dalam tiga hari Sabat beturut-turut, iya betalat enggau sida ari Bup Kudus, 3 madah sereta nerangka Kristus endang enda tau enda kena perinsa, lalu angkat idup baru ari mati. Ku Paul bejaku, “Jesus ke dipadahka aku ngagai kita nya meh Kristus.”
nota pelajar nwtsty ke SKR. 17:2, 3
betalat: Paul ukai semina madahka sida berita manah. Iya nerangka sereta meri saksi ari Jaku Petara, iya nya ari Sempekat Lama. Iya ukai semina macha ayat; iya nerangka ayat nya, lalu ngubah chara nerangka ayat nya nitihka gaya orang ke ninga. Leka jaku Gerika di·a·leʹgo·mai mai reti “besilih jaku; berandau.” Tu nunjukka pengawa berandau enggau orang bukai. Leka jaku Gerika tu mega dikena ba SKR. 17:17; 18:4, 19; 19:8, 9; 20:7, 9.
madah sereta nerangka: Dalam jaku Gerika, rambai jaku tu mai reti “engkah ba sepiak.” Tu nunjukka Paul enggau bejimat mandingka utai ke ditulis bala nabi pasal Messiah ba Sempekat Lama enggau pengidup Jesus, lalu nerangka baka ni Jesus udah ngamatka semua nya.
(Kereja Rasul 17:17) Nya alai iya betalat enggau orang Judah dalam balai gempuru sereta enggau orang bansa bukai ke angkunka Petara, enggau sebarang orang ke enggau iya betemu tiap hari ba sebelah pasar.
nota pelajar nwtsty ke SKR. 17:17
pasar: Pasar Atens ba Barat Laut Akropolis, lalu sais iya kira-kira 5 hektar (12 ikar). Pasar tu ukai semina endur bebeli tauka bejual barang. Pasar tu endur semua pengawa dagang, politik sereta adat asal dipejalaika. Orang Atens rindu betemu ba pasar ngambika ulih berandau lalu besilih penemu enggau pangan diri.
(Kereja Rasul 17:22, 23) Nya alai Paul bediri di mua raban Areopagus, lalu bejaku, “Kita orang Atens, aku meda kita tu orang ke kering amat ba agama. 23 Laban lebuh aku bejalai nengah nengeri kita, lalu meratika utai ti disembah kita, aku tetemuka siti alta ti ditulis enggau leka jaku tu, ‘Ke Petara ti enda dikelala.’ Petara ti enda dikelala kita, ke disembah kita, nya meh Petara ti dipadahka aku ngagai kita.
nota pelajar nwtsty ke SKR. 17:22, 23
Ke Petara ti enda dikelala: Leka jaku Gerika A·gnoʹstoi the·oiʹ sebagi ari rambai jaku ke ditulis ba alta di Atens. Orang Atens nunjukka sida nangika petara lalu ngaga mayuh rumah sembiang sereta alta, indah alta ke petara ti enda ulih dipeda, baka Tebilang, Pengumbas iya, Pengering, Pengumbuk enggau Penyinu. Engka sida takut bisi petara ke bedau disengkaum lalu tau ngasuh petara nya ringat, sida ngaga alta ‘ke Petara ti enda dikelala.’ Enggau ngaga alta tu, sida ngaku bisi Petara ke enda dikelala sida. Paul enggau landik ngena alta tu nyadika topik kena nulung orang Atens ngelala Petara ti bendar.
Ngulihka Penemu Bup Kudus ti Berega
(Kereja Rasul 18:18) Lebuh Paul udah lama diau dia, iya lalu meri selamat tinggal ngagai sida ke arap, lalu belayar ngagai menua Siria, disempulang Prisila seduai Akuila. Di Kankria iya ngukur buk iya, laban iya udah ngaga sumpah.
w08 15/5 32 ¶5
Penerang Ari Bup Kereja Rasul
18:18—Nama sumpah ke digaga Paul? Sekeda pakar madahka Paul udah ngaga sumpah nyadi Nasir. (P-pau. 6:1-21) Taja pia, Bup Kudus nadai madahka nama sumpah ke digaga Paul. Nambahka nya, Bup Kudus nadai madahka kemaya Paul ngaga sumpah tu, sekalika sebedau tauka pengudah iya nyadi orang Kristian, tauka enti iya baru berengkah tauka udah ngamatka sumpah nya. Enda ngira kemaya iya ngaga sumpah nya, tu ukai dosa.
(Kereja Rasul 18:21) Tang lebuh iya meri selamat tinggal ngagai sida, iya bejaku, ‘Aku deka nemuai baru ngagai kita, enti nya peneka Petara.’ Udah nya iya lalu belayar ari Epesus.
nota pelajar nwtsty ke SKR. 18:21
enti nya peneka Petara: Rambai jaku tu ngemeratka pengawa berundingka peneka Petara lebuh ngereja tauka merambu semua utai. Rasul Paul seruran ingatka prinsip tu. (1 Kor. 4:19; 16:7; Heb. 6:3) James mega meransang pemacha iya nyebut: ‘Enti nya peneka Jehovah, kitai deka ngereja tu, tauka ngereja nya.’ (Jas. 4:15) Rambai jaku tu ukai semina jaku ngapa. Barang sapa ke nyebut ‘enti nya peneka Jehovah’ patut ngereja pengawa sejalai enggau peneka Jehovah. Rambai jaku tu suah disebut ba ati aja, enda ibuh disebut enggau inggar.
Macha Bup Kudus
(Kereja Rasul 17:1-15) Lebuh Paul seduai Silas udah bejalai nengah menua Ampipolis enggau menua Apolonia, seduai iya lalu datai di Tesalonika, ti bisi sebuah balai gempuru orang Judah. 2 Baka ti selalu dikereja iya, Paul lalu tama ngagai balai gempuru nya lalu dalam tiga hari Sabat beturut-turut, iya betalat enggau sida ari Bup Kudus, 3 madah sereta nerangka Kristus endang enda tau enda kena perinsa, lalu angkat idup baru ari mati. Ku Paul bejaku, “Jesus ke dipadahka aku ngagai kita nya meh Kristus.” 4 Sekeda sida arap, lalu nitihka Paul seduai Silas, lalu baka nya mega mayuh amat orang bansa Gerika ke angkunka Petara lalu udah masuk pengarap orang Judah, enggau mayuh indu ke tinggi pangkat. 5 Tang orang Judah kepapas, lalu ari saup orang ke jai ba sebelah pasar, sida ngempuruka lalu nyungkak orang dalam nengeri nya begau. Lebuh sida begigaka Paul seduai Silas, deka mai seduai iya ngagai bala mayuh, sida nyerang rumah Jason. 6 Lebuh sida nadai tetemuka seduai iya, sida lalu ngirit Jason enggau sekeda sida ke arap ngagai bala pemesai di nengeri nya. Ku sida manjung, “Orang tu udah ngaga pengachau di semua endur, lalu seduai iya udah mega datai ditu, 7 lalu Jason udah nerima seduai iya nyadika temuai iya. Seduai iya ngelaban atur Raja Besai, madahka bisi siku agi raja ke benama Jesus.” 8 Orang mayuh enggau bala pemesai di nengeri nya lalu irau ati ninga nya, 9 lalu lebuh sida udah ngambi duit jamin, [sida ngelepaska Jason enggau sida ti bukai, NW]. 10 Malam nya sida ke arap lalu nganjung Paul seduai Silas ngagai Beria, lalu lebuh seduai iya datai di Beria, seduai iya lalu mansang ngagai balai gempuru. 11 Nyadi orang Judah di Beria tebuka agi ati ari orang Judah ke di Tesalonika, laban sida ransing amat nerima pesan Tuhan, sereta mansik Bup Kudus tiap hari keran deka nemu enti jaku nya amat tauka enda. 12 Nya alai mayuh sida arap, nyengkaum mayuh indu enggau lelaki bansa Gerika ke tinggi pangkat. 13 Tang lebuh orang Judah ke di Tesalonika ninga Paul udah mega nusui jaku Petara di Beria, sida lalu mansang ngagai nengeri nya mega lalu belabuh nyungkak sereta megau orang mayuh. 14 Sida ke arap lalu tekala nya nganjung Paul ngagai tebing tasik, tang Silas seduai Timoti tinggal di Beria. 15 Orang ke nganjung Paul lalu mai iya nyentuk ngagai Atens. Lebuh sida udah nerima atur ari Paul ngasuh Silas seduai Timoti datai ngagai iya di Atens enggau naka pengelengkas, sida lalu ninggalka iya.
31 DISEMBER–6 JANUARI
RETA ARI BUP KUDUS | KEREJA RASUL 19-20
‘Jaga Diri Empu enggau Semua Raban Eklisia’
(Kereja Rasul 20:28) Nya alai, jaga diri empu, enggau semua raban eklisia ke udah diasuh roh kudus ibun kita, ngibun eklisia Petara, ke udah ditebus Iya ngena darah Anak Iya Empu.
w11 15/6 20-21 ¶5
Ibun Bala Nembiak Petara ke Dibaruh Jaga Kita
5 Rasul Peter nulis, tuai gempuru patut ngibun bala nembiak Petara ke dibaruh jaga sida. Amat beguna sida nemu nembiak Petara enggi Jehovah enggau Jesus Kristus. Tuai gempuru megai tanggung pengawa pasal chara sida ngibun nembiak Petara. Enti sema seiku pangan nuan ngasuh nuan nyaga anak iya lebuh iya nadai ba rumah, endaka nuan deka nyaga sida enggau manah sereta meri sida makai? Enti seiku ari sida sakit, nuan tentu deka meri iya ubat. Pia mega, tuai gempuru ba eklisia patut ‘ngibun eklisia Petara, ke udah ditebus Iya ngena darah Anak Iya Empu.’ (SKR. 20:28) Sida patut ingat tiap iku nembiak Petara dibeli ngena darah Jesus Kristus ti berega. Tuai gempuru bisi tanggung pengawa ngintu, ngelindung sereta ngibun nembiak Petara.
(Kereja Rasul 20:31) Nya alai, bejaga, lalu kingatka aku ke udah, dalam kandang tiga taun, enggau ai mata, enda ngetu-ngetu siang malam meri kita jaku tangkan.
w13 15/1 31 ¶15
Tuai Gempuru—‘Bekereja enggau Kitai ke Pengaga Kitai’
15 Pengibun bedus patut bebendar gawa. Kekadang, tuai gempuru enda ulih tinduk ba malam hari ketegal deka besampika tauka meri sukung ngagai nembiak Petara. (2 Kor. 11:27, 28) Taja pia, baka Paul, tuai gempuru agi ngereja tanggung pengawa sida iya enggau gaga ati. Paul nulis ngagai menyadi ba Korint: “Aku gaga ati ngabiska semua utai aku, nyengkaum aku empu, kena nulung kita.” (2 Kor. 12:15) Amat, ketegal pengerindu iya ngagai bala menyadi, Paul ngena awak iya meransang sida. (Bacha 2 Korint 2:4; Plp. 2:17; 1 Tes. 2:8) Nya alai, bala menyadi amat sayauka Paul!—SKR. 20:31-38.
(Kereja Rasul 20:35) Dalam semua utai nya, aku udah meri kita teladan, ngambika ari kitai ke bebendar bekereja, kita ulih nulung nyukung orang ke lemi, laban kitai ingatka jaku Tuan Jesus, laban iya empu ke nyebut, “Beberekat agi orang ke meri, ari orang ke nerima.”
“Aku Enda Betanggungjawapka Nyawa Kita”
20 Jalai pengidup Paul jauh bebida ari jalai pengidup sekeda tuai gempuru ke idup ba maya ti nangkanka iya, laban sida ngambi ulih ba bala menyadi. Paul gawa ngambika iya enda nyadi penanggul ngagai bala menyadi ba eklisia. Iya gawa bebendar ke bala menyadi Kristian ukai ketegal deka ngelantangka diri empu. Paul ngumbuk bala tuai gempuru di Epesus ngambika enda berundingka diri empu. Ku iya: ‘Kita ulih nulung nyukung orang ke lemi, laban kitai ingatka jaku Tuan Jesus, laban iya empu ke nyebut, “Beberekat agi orang ke meri, ari orang ke nerima.”’—SKR. 20:35.
Ngulihka Penemu Bup Kudus ti Berega
(Kereja Rasul 19:9) Tang lebuh sekeda sida kieh ati, lalu enggai arap, sereta bejai Jalai Tuan di mua semua raban sida, Paul ninggalka sida, lalu mai sida murid mupuk enggau iya, lalu tiap hari iya betalat enggau sida dalam balai Tiranus.
“Ngelekai sereta Mansang” Taja Pan Diperinsa
11 Paul engka bejaku ba balai sekula ninting hari ari pukul 11:00 pagi ngagai 4:00 lemai. (SKR. 19:9) Nya engka maya ti pemadu sunyi sereta angat lalu mayuh orang ngetu gawa ngambika ulih makai enggau belelak. Uji gambarka enti Paul nitihka jadual terit tu pengelama dua taun, tu reti iya Paul udah ngajar lebih ari 3,000 jam! Tu meh kebuah iya Jaku Petara ngelekai sereta majak mansang. Paul gawa enggau bagas lalu nemu nitihka gaya orang ba endur iya nginjil. Iya nemu ngaduka jadual iya ngambika ulih betemu enggau orang ba endur nya. Nama asil iya? “Semua orang ke diau di menua Asia, nyengkaum orang Judah enggau orang bansa bukai, udah bela ampit magang ninga jaku Tuhan.” (SKR. 19:10) Naka meh pemanah pengawa nginjil Paul!
(Kereja Rasul 19:19) Mayuh manang datai mai bup sida, lalu nunu bup nya di mua orang mayuh. Lebuh rega semua bup nya diitung, rega semua utai nya nyau deka bulih lima puluh ribu singkap duit pirak.
“Ngelekai sereta Mansang” Taja Pan Diperinsa
15 Pengudah bala anak lelaki Skeba dimaluka, mayuh orang nangika Petara nyentukka sida nerima pengarap Kristian lalu muai pengawa manang. Adat orang Epesus mayuh ngena pengawa bemanang. Puchau, pengaruh enggau jaku jampi nya biasa dikena. Mayuh orang Epesus nunu bup ti bekaul enggau pengawa bemanang taja pan rega bup nya kira-kira bepuluh ribu dolar kemayaharitu. Luke madahka: “Nya alai jaku Tuhan balat amat ngelekai sereta mansang dalam kuasa.” (SKR. 19:17-20) Tu nunjukka pemendar ulih ngalahka pemula enggau pengawa bemanang! Menyadi ti tetap ati nya ngayanka teladan ti manah ke kitai kemayaharitu. Kitai mega idup di dunya ti penuh enggau pengawa bemanang. Enti kitai bisi utai ti bekaul enggau pengawa bemanang, kitai patut muai utai nya enggau jampat, baka ke digaga orang Epesus kelia. Aram meh kitai nyeliahka diri ari pengawa bemanang, enda ngira nama nyadi.