“Anang Enda Bemunyi, Tang Terus meh Bejaku”

1-3. Nama kebuah Paul datai ngagai Korint, lalu nama sekeda penanggul ke ditapi iya?

BA UJUNG taun 50 M., rasul Paul datai ngagai Korint. Korint nya pusat pengawa dagang ti kaya. Lalu mayuh orang Gerika, Rome sereta Judah diau ba Korint.a Tang, Paul datai kia ukai deka bedagang tauka ngiga kereja. Iya datai laban bisi kebuah ti penting agi ari ngiga kereja. Paul deka meri saksi enggau silik pasal Perintah Petara. Ba Korint, Paul begunaka endur diau. Tang, iya amat enggai nating bala menyadi ari segi duit. Endang amat, iya bebendar ngenuluka pengawa nginjil. Taja pia, Paul enggai ngasuh orang berunding, iya bepanggai ba bala menyadi ngambika melanja iya. Nyadi, nama deka digaga iya?

² Paul landik ngaga langkau kain. Enda senang ngaga langkau kain. Tang iya sanggup ngereja nya laban deka ngiga belanja ke diri empu. Kati iya ulih tetemuka kereja ba Korint? Kati iya ulih tetemuka rumah ba dia? Taja pan iya napi penanggul tu, tang iya tetap ngemeratka pengawa nginjil.

³ Paul lama diau ba Korint, lalu pengawa nginjil iya ba Korint ngenataika asil ti amat manah. Nama ulih dipelajarka kitai ari pengawa Paul ba Korint, ke ulih nulung kitai meri saksi enggau silik pasal Perintah Petara ba endur kitai nginjil?

“Akuila enggau Prisila Mega Gawa Ngaga Langkau Kain” (Surat Kereja Rasul 18:1-4)

4, 5. (a) Dini alai Paul diau ba Korint, lalu nama kereja ke digaga iya? (b) Baka ni Paul tau bisi pengelandik ngaga langkau kain?

⁴ Enda lama pengudah datai ba Korint, Paul betemu enggau Akuila enggau Prisila. Seduai iya sepasang laki bini ke bebansa Judah, lalu rindu nerima temuai. Seduai iya pindah ngagai Korint laban Raja Besai Klaudius ngasuh “semua orang Judah mupuk ari Rome.” (SKR. 18:1, 2) Akuila enggau Prisila ukai semina mai Paul diau ba rumah sida aja, tang mega mai iya kereja enggau seduai iya. Bup Kudus madahka: “Ketegal Akuila enggau Prisila mega gawa ngaga langkau kain baka Paul, nya alai Paul diau enggau seduai iya lalu sama gawa enggau seduai iya.” (SKR. 18:3) Paul diau ba rumah Akuila enggau Prisila sekumbang iya ngereja pengawa nginjil ba Korint. Pia mega, sekumbang iya diau ba rumah Akuila enggau Prisila, Paul engka bisi nulis sekeda surat. Udah nya, semua surat nya nyadi sebagi ari Bup Kudus.b

⁵ Paul orang ti bepelajar, laban iya “diajar Gamaliel.” Nya alai, baka ni Paul tau bisi pengelandik ngaga langkau kain? (SKR. 22:3) Orang Judah ba abad keterubah suah ngajar anak sida ngaga langkau kain. Lalu, sida enda ngasaika nya utai ti ngemaluka sida. Taja pan bala anak sida bisi nerima pelajar ke bukai, tang sida agi ngajar anak sida ngaga langkau kain. Kelimpah ari nya, Paul datai ari Tarsus di Silisia. Endur nya tebilang laban bisi kain cilicium ke kasar sereta keras ti dikena ngaga langkau kain. Kenyau ari iya agi biak, Paul engka belajar pasal pengawa bisnis bekaul enggau langkau kain. Pengawa tu engka nyengkaum nenun, tauka mutung sereta nyait kain nya. Pengawa nya sigi tusah digaga!

6, 7. (a) Nama runding Paul pasal pengawa ngaga langkau kain, lalu baka ni kitai nemu Akuila enggau Prisila mega bisi runding ti sama? (b) Baka ni orang Kristian kemayaharitu nitihka teladan Paul, Akuila, enggau Prisila?

⁶ Ba runding Paul, pengawa ngaga langkau kain ukai pengawa ti utama ba pengidup iya. Paul ngereja pengawa nya ngambika iya ulih ngereja mayuh agi ba pengawa nginjil. Tu ketegal, iya “nadai nerima bayar” ba pengawa nginjil. (2 Kor. 11:7) Akuila enggau Prisila mega ngaga langkau kain. Ba senentang tu, seduai iya nitihka runding Paul. Ketegal seduai iya orang Kristian, seduai iya mega enda ngumbai nya pengawa ti utama ba pengidup. Baka ni kitai nemu utai tu? Ba taun 52 M., Paul ninggalka Korint. Maya nya, Akuila enggau Prisila sanggup ninggalka pengawa ngaga langkau kain, lalu nitihka Paul ngagai Epesus. Pia mega, rumah seduai iya ba Epesus nyadi endur bala menyadi begempuru. (1 Kor. 16:19) Udah nya, sida pulai baru ngagai Rome lalu nikal baru ngagai Epesus. Akuila enggau Prisila ransing ngenuluka pengawa Perintah Petara ba pengidup. Seduai iya mega rindu nulung orang bukai. Nya alai, “semua raban gempuru bansa bukai” beterima kasihka pengawa seduai.—Rom. 16:3-5; 2 Tim. 4:19.

⁷ Kemayaharitu, orang Kristian nitihka teladan Paul, Akuila enggau Prisila. Bala penginjil ke ransing kemayaharitu bebendar gawa “ngambika enda balat nating” orang bukai. (1 Tes. 2:9) Mayuh bala menyadi ke gawa penuh jam ke Jehovah ba pengawa nginjil kereja part-time. Sida ngereja tu ngambika ulih ngereja mayuh agi ba pengawa nginjil. Nya alai, sida patut dipuji. Baka Akuila enggau Prisila, mayuh bala menyadi rindu mai tuai ti ngabas datai ngagai rumah sida. Sida ke “nelebaka diri ngintu orang bukai” nemu, pengawa ke baka tu ulih meransang sida empu enggau orang ke ditulung sida.—Rom. 12:13.

“Mayuh Orang Korint . . . Arap lalu Dibaptisa” (Surat Kereja Rasul 18:5-8)

8, 9. Nama utai ke digaga Paul pengudah pengawa nginjil iya disakal orang Judah, lalu kini tunga pejalai iya kena nginjil pengudah nya?

⁸ Runding Paul bekaul enggau kereja majak agi ulih dipeda pengudah Silas enggau Timoti meri iya mayuh utai ke diguna kena beridup besehari-hari. Kebendar iya, utai ke diberi seduai iya datai ari bala menyadi ba Masedonia. (2 Kor. 11:9) Enggau jampat, Paul “ngena mayuh awak ngerembaika jaku Petara.” (SKR. 18:5) Taja pia, pengawa nginjil Paul balat disakal orang Judah. Ketegal nya, Paul ngumbai diri enda agi betanggungjawapka sida. Orang Judah enggai nerima pesan pasal Kristus ti ulih nyelamatka nyawa sida. Ketegal nya, Paul nesaika gari iya, lalu madah ngagai semua orang Judah ke ngelaban: “Enti kita enda diselamatka, nya salah kita empu, ukai salah aku. Berengkah ari diatu, aku deka mupuk ngagai orang bansa bukai.”—SKR. 18:6; Esk. 3:18, 19.

⁹ Pengudah nya, ba dini endur Paul nginjil? Bisi siku lelaki ke benama Titius Justus ngelaluka penatai Paul ngagai rumah iya. Titius engka megai pengarap Judah, lalu rumah iya sepiak balai gempuru. Nya alai, Paul mindah ari balai gempuru lalu diau ba rumah Titius. (SKR. 18:7) Taja pia, Paul tetap diau ba rumah Akuila enggau Prisila sepemanjai masa iya ba Korint. Tang Paul ngena rumah Titius Justus nyadika endur alai iya ngereja pengawa nginjil.

10. Nama utai ke nunjukka Paul ukai semina deka nginjil ngagai orang bansa bukai aja?

¹⁰ Kati jaku Paul nunjukka iya semina deka nginjil ngagai orang bansa bukai? Kati Paul enggai agi nginjil ngagai semua orang Judah tauka orang ke megai pengarap Judah, indah ngagai sida ke bisi ati deka ningaka pesan Berita Manah? Enda. Baka ni kitai nemu? Bup Kudus madah: “Krispus ke nyadi tuai balai gempuru nya enggau sida ke serumah enggau iya arapka Tuan.” Pengudah nya, bisi mayuh orang ba balai gempuru nitihka Krispus, laban Bup Kudus mega madahka: “Mayuh orang Korint ke ninga Berita Manah pan arap lalu dibaptisa.” (SKR. 18:8) Ketegal nya, raban gempuru Kristian ba Korint ditumbuhka. Lalu rumah Titius Justus nyadi endur alai orang Kristian begelumu. Taja pia, kemaya orang Judah enggau orang ke megai pengarap Judah ba Korint nerima pengarap Kristian? Iya ke amat, enti bup Surat Kereja Rasul ditulis Luke, semua utai tu nyadi pengudah Paul nesaika gari iya. Semua utai ke nyadi tu nunjukka, Paul sanggup ngaga ubah nitihka siti-siti situasi.

11. Baka ni Saksi-Saksi Jehovah kemayaharitu neladan Paul seraya sida nguji deka nyapai orang ke agi ba gerija?

¹¹ Ba mayuh menua kemayaharitu, bisi mayuh gerempung gerija Kristian ti amat kering, lalu sida meri kesan ti besai ngagai orang ke nitihka gerija sida. Pia mega, ba mayuh menua sereta endur ba dunya tu, mayuh penginjil ari gerija mai orang nukar pengarap nyadi orang Kristian. Tang baka orang Judah ba abad keterubah di Korint, mayuh orang kemayaharitu ngumbai diri Kristian laban sida dibesaika enggau chara nya. Taja pia, kitai ke nyadi Saksi-Saksi Jehovah deka nitihka teladan Paul. Kitai deka ransing nguji deka nyapai orang ke baka tu, lalu nulung sida ngemansangka penemu pasal Bup Kudus. Sida tauka tuai pengarap sida engka deka ngelaban kitai. Tang kitai enggai putus asa, laban bisi entara sida ke “ransing nyembah Petara. Tang sida enda nitihka penemu ti betul.” Sida tu meh ke deka digiga kitai ba pengawa nginjil.—Rom. 10:2.

“Mayuh Orang Ba Nengeri Tu Deka Arapka Aku” (Surat Kereja Rasul 18:9-17)

12. Baka ni genera ke diterima Paul ngasuh iya yakin agi deka ngereja pengawa nginjil?

¹² Paul engka kakang ati deka neruska pengawa nginjil ba Korint. Tang, semua asai ati ke baka nya lenyau pengudah Tuan Jesus pegari ngagai iya dalam siti genera. Ku Jesus madah ngagai Paul: “Anang takut. Anang enda bemunyi, tang terus meh bejaku, laban aku bisi enggau nuan. Nadai orang deka nyerang sereta ngemediska nuan laban mayuh orang ba nengeri tu deka arapka aku.” (SKR. 18:9, 10) Paul tentu berasai diperansang pengudah nerima genera nya! Jesus madah, iya deka nyaga Paul ari sebarang utai ti tau ngemediska. Lalu, Jesus mega madah bisi mayuh orang ba Korint deka nerima pesan ke ditusui Paul. Nyadi, nama digaga Paul pengudah nerima genera nya? Bup Kudus madahka: “Pengelama setaun setengah, Paul diau ba dia sereta ngajar jaku Petara ngagai orang mayuh.”—SKR. 18:11.

13. Nama engka diperundingka Paul lebuh ngagai endur iya deka diakim, tang nama kebuah iya pechaya iya enda diukum bunuh?

¹³ Nyau kelama, udah setaun Paul diau ba Korint. Tang maya nya, iya nerima bukti ke bukai ti nunjukka Jesus endang nyukung iya. Bisi sekali, “orang Judah besaup nyerang Paul lalu mai iya ngambika diakim.” Endur alai Paul deka diakim sereta dipechara dikumbai beʹma. (SKR. 18:12) Sekeda orang madahka, beʹma nya siti pentas ti diias enggau ukiran sereta batu marmar ke bewarna biru enggau burak. Pia mega, beʹma bisi ba tengah pasar Korint. Endur ba depan beʹma nya amat besai laban mayuh orang ulih begelumu dia. Sekeda bukti ke ditemu pakar arkeologi nunjukka, endur Paul deka diakim nya enda jauh ari balai gempuru. Reti iya, endur nya mega enda jauh ari rumah Titius Justus. Lebuh Paul bejalai ngagai beʹma, iya engka berundingka baru pasal Stepen, iya nya menyadi Kristian ti keterubah ke diukum mati ketegal ngetanka pengarap. Suba, Stepen dituku ngena batu nyentukka mati. Lalu Paul, ke mega dikumbai Saul suba, udah setuju ngambika “Stepen dibunuh.” (SKR. 8:1) Nya alai, kati Paul mega deka diukum bunuh? Enda, laban Jesus udah besemaya: “Nadai orang deka . . . ngemediska nuan.”—SKR. 18:10.

14, 15. (a) Nama jaku tuduh ke dikena orang Judah ngelaban Paul, lalu nama kebuah Galio nutup kes nya? (b) Nama nyadi ngagai Sostenis, lalu nama utai bukai ke engka nyadi ngagai iya pengudah nya?

¹⁴ Nama nyadi ngagai Paul lebuh iya datai ba endur iya dipechara? Maya nya, gabenor Akaya ke benama Galio betanggungjawap ngatur pechara nya. Galio nya menyadi tuai ke ahli falsafah Rome ke benama Seneca. Lebuh maya nya, orang Judah nuduh Paul enggau madahka: “Lelaki tu ngasut orang mayuh nyembah Petara ngena chara ti ngelaban undang-undang.” (SKR. 18:13) Orang Judah nuduh Paul laban iya udah nulung orang nerima pengarap Kristian. Sida madahka, Paul ngereja tu enggau chara ti enda sah ba undang-undang. Taja pia, Galio ngumbai Paul nadai “ngereja penyalah” sereta enda “ngelaban undang-undang.” (SKR. 18:14) Galio enggai masuk champur ba penanggul orang Judah. Kebendar iya, Paul enda sempat madahka nama-nama kena ngetanka diri empu, laban Galio dulu agi nutup kes nya! Nya alai, orang Judah balat amat ringat. Sida lalu ngelepaska pengeringat sida ba Sostenis. Sostenis engka nganti pengawa Krispus nyadi tuai balai gempuru. Maya nya, orang Judah nangkap Sostenis “lalu malu iya ba mua endur pechara nya.”—SKR. 18:17.

¹⁵ Nama kebuah Galio enda nagang orang nyerang Sostenis? Galio engka ngumbai Sostenis udah nguluka pengawa ngelaban Paul, lalu ngumbai iya endang patut dipalu orang. Enda ngira sekalika nya betul tauka enda, utai ke nyadi ba Sostenis udah mai asil ti manah. Kebendar iya, beberapa taun pengudah nya, Paul nulis surat ti keterubah ngagai raban gempuru di Korint. Maya nya, Paul bisi nyebut pasal siku menyadi lelaki ke benama Sostenis. (1 Kor. 1:1, 2) Kati tu Sostenis ke sama ke udah dipalu suba? Enti pia, pengalaman Sostenis ke pedis nya udah nulung iya nerima pengarap Kristian.

16. Baka ni ngingatka jaku Jesus ke madah, “Anang enda bemunyi, tang terus meh bejaku, laban aku bisi enggau nuan,” ulih nulung kitai ba pengawa nginjil?

¹⁶ Ni maya Jesus madah ngagai Paul, “Anang takut. Anang enda bemunyi, tang terus meh bejaku, laban aku bisi enggau nuan”? Iya nya, semina pengudah orang Judah nulak pesan ke dibai Paul. (SKR. 18:9, 10) Kitai pan patut ingatka jaku Jesus, kelebih agi lebuh orang enggai nerima pesan ke dibai kitai. Anang meh enda ingat, Jehovah ulih macha ati orang lalu mai orang datai semak ngagai Iya. (1 Sam. 16:7; Jhn. 6:44) Tu tentu meransang semua kitai ngambika ransing ba pengawa nginjil! Ninting taun, beratus ribu iku orang dibaptisa. Reti iya, bisi beratus iku orang dibaptisa tiap hari. Nya alai, ngagai kita ke bebendar nitihka pesan Jesus iya nya, “ajar sida [semua bansa] nyadi murid,” dingaka meh jaku Jesus ngagai nuan ke madah: “Aku deka seruran enggau kita nyentuk ngagai pengujung dunya.”—Mat. 28:19, 20.

“Enti Nya Peneka Jehovah” (Surat Kereja Rasul 18:18-22)

17, 18. Nama utai ke engka diperundingka Paul lebuh iya belayar ngagai Epesus?

¹⁷ Kati pemutus Galio ke nulung Paul udah ngasuh raban gempuru ke baru ditumbuhka ba Korint ngasaika timpuh pemaik? Kitai enda nemu. Taja pia, Paul diau “beberapa hari ba dia” sebedau iya mupuk ari Korint. Ba musin bungai kena taun 52 M., Paul ngaga pelan kena belayar ngagai Siria. Iya belayar ari penyangkai kapal ba Kenkria, kira-kira 11 kilometer ari begian timur ba Korint. Sebedau Paul mupuk ari Kenkria, iya “nguntin buk iya pandak nyadika tanda iya udah besumpah ngagai Petara.”c (SKR. 18:18) Pengudah nya, iya mai Akuila enggau Prisila enggau iya. Lalu sida tiga sama belayar nengah Tasik Aegea ngagai Epesus ke bisi ba begian Asia Minor.

¹⁸ Lebuh Paul belayar ari Kenkria, iya engka ngenang baru semua utai ke nyadi ba Korint. Iya bisi mayuh pengingat ti chukup manah, lalu iya berasai amat puas ati. Udah 18 bulan iya nginjil ba Korint, lalu pengawa nginjil iya udah ngenataika mayuh asil ti manah. Ambika chunto ba Korint, bisi raban gempuru ti keterubah ditumbuhka. Lalu, rumah Titius Justus nyadika alai bala menyadi begempuru. Pia mega, bisi mayuh orang arap, nyengkaum Titius Justus, Krispus enggau ruang bilik iya. Paul amat sayauka sida ke baru udah nyadi orang Kristian, laban iya empu ke udah nulung sida. Pengudah nya, iya nulis surat ngagai orang Kristian ba Korint. Paul ngumbai sida ke udah ditulung iya baka surat ke ditulis ba ati iya. Baka Paul, enti kitai kala nulung orang nyembah Jehovah, kitai pan deka bisi kaul ti rapat enggau orang nya. Kitai tentu berasai amat puas ati, laban sida ke ditulung kitai baka “surat ti ditulis ba ati” kitai!—2 Kor. 3:1-3.

19, 20. Nama utai ke digaga Paul lebuh iya datai ba Epesus, lalu nama ulih dipelajarka kitai pasal Paul bekaul enggau nyapai juluk ati ba pengarap?

¹⁹ Lebuh datai ba Epesus, Paul enggau jampat ngereja pengawa nginjil. Iya “tama ngagai balai gempuru lalu besilih penemu enggau orang Judah.” (SKR. 18:19) Taja pia, Paul enda lama aja diau ba Epesus. Bala menyadi ngasuh iya diau dia lama mimit, “tang iya enggai.” Paul meri jaku selamat tinggal ngagai sida, lalu madah: “Aku deka datai baru ngagai kita enti nya peneka Jehovah.” (SKR. 18:20, 21) Paul nemu, bisi mayuh agi pengawa nginjil ke patut digaga ba Epesus. Nya alai, iya bisi pelan deka pulai baru. Tang Paul milih deka nejuka Jehovah nentuka pekara nya. Endaka tu teladan ti manah ke kitai semua? Endang amat, kitai bebendar deka nyapai juluk ati ba pengarap. Reti iya, kitai deka ngambi semua peluang ke bisi. Taja pia, kitai patut seruran bepanggai ba iring Jehovah, lalu bebendar ngereja utai ti sejalai enggau peneka Iya.—Jas. 4:15.

²⁰ Akuila enggau Prisila tinggal ba Epesus, lalu Paul belayar ngagai Kaisaria. Iya engka “nemuai” Jerusalem lalu ngabas raban gempuru ba dia. (SKR. 18:22) Udah nya, Paul pulai baru ngagai endur asal iya ba Siria di Antiok. Nyadi, pejalai nginjil iya kedua udah mujur. Tang nama utai ke deka nyadi ngagai Paul ba pejalai nginjil iya ke penudi?