Kati Neraka Amat Bisi? Nama Dipadah Bup Kudus pasal Neraka?

Saut ari Bup Kudus

Bisi sekeda salin Bup Kudus, baka Bup Kudus Baru, ti ngena leka jaku “neraka” dalam beberapa ayat. (Masmur 16:10; Surat Kereja Rasul 2:27 a) Baka dipeda dalam gambar ba artikel tu, mayuh orang pechaya, neraka nya endur alai api mau belama iya, lalu orang jai diukum ba dia. Kati tu utai ti diajar Bup Kudus?

Dalam artikel tu

Kati neraka nya endur alai orang diperinsa belama iya?

Enda. Leka jaku asal ti disalin nyadi “neraka” dalam sekeda salin Bup Kudus (“Sheol” dalam jaku Hebrew; “Hades” dalam jaku Gerika) mai reti “Kubur,” iya nya endur alai semua orang ke udah nadai. Bup Kudus nerangka semua orang dalam “Kubur” enda agi idup sereta enda wujud agi.

Orang ke udah nadai enda nemu utai, nyadi sida enda berasai sakit. “Di neraka ila endang nadai pengawa, nadai runding, nadai penemu, nadai penemu-dalam.” (Bup Pengajar 9:10, Douay-Rheims Version) Nadai bunyi orang diperinsa ba neraka. Bup Kudus madah: “Awakka orang ke jai, dipechat. Awakka sida enda bemunyi mansang ngagai dunya pemati. [neraka, Douay-Rheims].”—Masmur 31:17; King James Version (30:18, Douay-Rheims); Masmur 115:17.
Petara udah madahka upah dosa nya pemati, ukai pemerinsa ba api neraka. Petara udah madah ngagai mensia ti keterubah, Adam, enti orang ngelanggar adat Petara, sida deka mati. (Pemungkal 2:17) Iya nadai nyebut pasal pemerinsa ba api neraka. Pengudah Adam bedosa, Petara madah: “Nuan endang digaga ari amau, nya alai ngagai amau meh nuan pulai.” (Pemungkal 3:19) Reti nya, Adam deka nadai agi. Enti Petara deka nganjung Adam ngagai api neraka, Iya tentu deka madahka nya. Ukum ti ditetapka Petara kena orang ke ngelanggar adat Iya enda kala berubah. Lama pengudah Adam bedosa, Petara ngasuh siku penulis Bup Kudus nulis: “Upah dosa nya pemati.” (Rome 6:23) Nadai agi ukum ti bukai, laban “orang ke udah mati udah dilepaska ari dosa iya.”—Rome 6:7.
Ajar pasal pemerinsa ba neraka belama iya ngenusahka ati Petara. (Jeremiah 32:35) Ajar pasal pemerinsa ba neraka enda sejalai enggau utai ti dipadah Bup Kudus laban “Petara nya pengerindu.” (1 John 4:8) Iya deka kitai nyembah Iya laban kitai rinduka Iya, ukai ketegal kitai takut diperinsa ba neraka.—Matthew 22:36-38.
Orang manah mega ngagai neraka. Salin Bup Kudus ti ngena leka jaku “neraka” madahka bisi orang ke tetap ati, baka Jakop enggau Jop, ti ngagai neraka. (Pemungkal 37:35; Jop 14:13) Indah Jesus Kristus ngagai neraka sebedau iya diangkat ari pemati. (Surat Kereja Rasul 2:31, 32) Leka jaku “neraka” ti dikena dalam salin Bup Kudus tu, semina mai reti Kubur.b

Nama reti sempama Jesus pasal orang kaya enggau Lasarus?

Sempama ti dipadah Jesus tu ditulis ba Luke 16:19-31. Sempama dalam Bup Kudus ngajar kitai pasal runding Jehovah. Sempama pasal orang kaya enggau Lasarus ukai cherita ti amat. (Matthew 13:34) Enti nuan deka nemu mayuh agi pasal sempama tu, peda meh artikel “Sapa Siku Lelaki ti Kaya sereta Lasarus?”

Kati neraka semina mai reti orang nemu diri nadai kaul enggau Petara?

Enda. Ajar pasal orang mati ti nemu diri nadai kaul enggau Petara enda sejalai enggau utai ti dipadah Bup Kudus. Bup Kudus ngajar, orang ke mati nadai nemu utai.—Masmur 146:3, 4; Bup Pengajar 9:5.

Kala bisi orang dibibaska ari neraka?

Kala. Dalam Bup Kudus bisi cherita pasal semilan iku orang ti kala ngagai Kubur (disalin nyadi “neraka” dalam sekeda salin Bup Kudus) lalu diangkat ari pemati.c Enti sida sedar lebuh sida ba neraka, sida tentu deka madah ngagai orang pasal utai ti udah nyadi ngagai sida. Tang, nadai siku pan ari sida ti madahka diri diperinsa. Nama kebuah? Baka diajar dalam Bup Kudus, lebuh sida mati sida nadai nemu utai. Sida baka ke “tinduk” jenak.—John 11:11-14; 1 Korint 15:3-6.

a Diatu, mayuh salin Bup Kudus nadai agi ngena leka jaku “neraka” ba Surat Kereja Rasul 2:27. Sekeda salin ngena leka jaku “kubur,” (New Century Version); “dunya pemati,” (New International Version); “pemati” (The Passion Translation). Sekeda salin ti bukai semina ngena leka jaku Gerika “Hades.”—Holman Christian Standard Bible, NET Bible, New American Standard Bible, English Standard Version.

b Peda meh kutak “Leka Jaku Bup Kudus dalam Bansa Jaku Asal .”

c Peda 1 Raja 17:17-24; 2 Raja 4:32-37; 13:20, 21; Matthew 28:5, 6; Luke 7:11-17; 8:40-56; John 11:38-44; Surat Kereja Rasul 9:36-42; Surat Kereja Rasul 20:7-12.

Ayat Bup Kudus pasal neraka, tauka Kubur

Jop 14:13: “Naka meh pemanah enti Nuan ngelalaika aku di dunya pemati [“neraka,” Douay-Rheims Version] . . . Udah nya, letak meh maya alai Nuan ngingatka aku.”

Reti: Jop, ke tetap ati, nemu ba neraka (Kubur) iya deka dibibaska ari pemedis ti benung ditapi iya. Iya mega nemu ari dia, Petara deka ngangkatka iya idup baru.

Masmur 145:20: “Iya nyaga semua orang ke rinduka Iya, tang Iya deka ngerusak orang ke jai.”

Reti: Petara deka ngerusak, tauka ngemunaska, orang ke jai belama iya. Iya enda mai sida ngagai neraka lalu merinsaka sida.

Bup Pengajar 9:10: “Di dunya pemati ila [“neraka,” Douay-Rheims Version], endang nadai pengawa, nadai runding, nadai penemu, nadai penemu-dalam. Kia ke meh nuan deka mupuk.”

Reti: Orang dalam Kubur, tauka neraka, nadai nemu utai lalu enda ulih diperinsa. Kelebih agi, ayat Bup Kudus tu dituju ngagai orang ke jai sereta orang ke manah.

Surat Kereja Rasul 2:31: “Iya madahka Petara enda ninggalka Kristus ba neraka lalu tubuh iya enda nyadi reput.”—King James Version.

Reti: Jesus Kristus ngagai neraka (Kubur) lebuh iya mati.

Rome 6:23: “Upah dosa nya pemati.”

Reti: Pemati nya ukum dosa, ukai pemerinsa ba neraka.

Pemandang 20:13: “Pemati enggau neraka mega nyerahka orang mati ke bisi ba dalam seduai iya.”—King James Version.

Reti: Orang ba neraka udah mati. Sida deka diangkat idup baru ila.

Pemandang 20:14: “Pemati enggau neraka pan ditikauka ngagai danau api.”—King James Version.

Reti: Pengudah semua orang diangkat ari pemati, neraka (Kubur) deka nyadi kusung lalu deka dirusak belama iya, baka dirusak api. Pengudah nya, pemati ke datai ketegal dosa Adam, deka nadai agi.—Rome 5:12.

Leka jaku Bup Kudus dalam bansa jaku asal

Baka dipeda ba baruh, sekeda salin Bup Kudus nyalin leka jaku ti enda sama nyadi “neraka”. Tu ulih ngasuh pemacha charut runding. Kekadang tu digaga laban penyalin deka orang pechayaka orang ke jai diperinsa belama iya.

Sheol (Hebrew שְׁאוֹל), Hades (Gerika ᾅδης)

Reti: Kubur umum semua mensia.—Masmur 16:10; Surat Kereja Rasul 2:31

Disalin nyadi: Kubur, neraka, lubang (King James Version); dunya orang mati (New International Version)
Gehenna (Gerika γέεννα)

Reti: Dipunaska belama iya.—Matthew 5:30

Disalin nyadi: Gehenna; neraka (King James Version, New International Version)
Tartarus (Gerika ταρταρόω)

Reti: Keadaan ti paling ngemaluka ke bala melikat ti jai.—2 Peter 2:4

Disalin nyadi: Tartarus; neraka (King James Version, New International Version); neraka ti dalam agi (Douay-Rheims Version)
Apoleia (Gerika ἀπώλεια)

Reti: Pengerusak.—Matthew 7:13

Disalin nyadi: Pengerusak; neraka (Good News Bible)
Pyr (Gerika πῦρ)

Reti: Api.—Luke 17:29; Jude 23

Disalin nyadi: Api; api neraka (God’s Word Translation)

Sejarah pasal ajar api neraka

Bepun ari orang ke enda arapka Petara: Orang Ejip kelia menya pechayaka api neraka. Book Ȧm-Ṭuat (Amduat), sesiti bup pasal adat ngubur ari abad ke-16 S.M., madahka pasal “orang ke deka dibuai ke dalam lubang api; lalu . . . enda ulih ngelepaska diri ari api ti mau.”—The Egyptian Heaven and Hell.

Enda diajar orang Kristian ba abad keterubah: “Dalam S[empekat] B[aru], kitai ulih beratika ajar pasal api neraka enda ditusui [orang Kristian ba abad keterubah].”—A Dictionary of Christian Theology.

Dikuingka penemu Gerika: “Berengkah ari tengah abad kedua M., orang Kristian ti belajar penemu Gerika berengkah nyampurka ajar Gerika enggau pengarap sida . . . Sida pemadu rindu ajar ke datai ari Plato.” (Encyclopædia Britannica) Ajar Plato nyengkaum ajar pasal api ti mau, endur alai orang ke mati deka diperinsa. “Ari semua orang ke ngajar penemu Gerika, Plato meh ke bejaku paling mayuh pasal Neraka.”—Histoire des enfers (The History of Hell).

Ajar pasal api neraka dikena nyadi alasan merinsaka orang: Lebuh maya Pasitan Sepanyol, orang ke ngelaban ajar gerija ditanchang ba tiang lalu ditunu nyentukka mati. Tu digaga ngambika sida ulih “ngasaika pemedis ti deka diasaika ba api neraka” sebedau sida mati lalu nesal ati. (The Spanish Inquisition, ditulis Jean Plaidy) Kuin Mary I ari England mega nunu 300 iku orang Protestan ba tiang laban iya pechaya “orang ke ngelaban ajar gerija deka ditunu belama iya dalam neraka. Nya alai, manah meh neladan Petara, lalu nunu orang nya lebuh sida agi ba bumi.”—Universal History, ditulis Alexander Tytler.

Ubah kemayaharitu: Sekeda pengarap Kristian udah ngelempungka ajar sida pasal neraka. Tu ukai ketegal sida nulak ajar ti pelesu tu, tang ketegal sida deka ngenyamaika ati bala sida. (2 Timoti 4:3) “Orang lebih rinduka Petara ti manah ati . . . Orang kemayaharitu enda rindu bejaku pasal dosa tauka asai ati ti salah.”—Professor Jackson W. Carroll.