Penerang ke Bup Kereja Pengidup enggau Pengawa Kristian
7-13 JANUARI
RETA ARI BUP KUDUS | KEREJA RASUL 21-22
“Awakka Peneka Jehovah Nyadi”
(Kereja Rasul 21:8-12) Hari siti kami mupuk, lalu datai di Siseria. Kami datai ba rumah Philip ke Penginjil, siku ari sida ke tujuh iku, lalu diau enggau iya. 9 Iya bisi empat iku anak indu ke apin belaki, ke bisi pemeri benabi. 10 Lebuh kami diau dia dua tiga hari, siku nabi ke benama Agabus datai ari Judea. 11 Iya datai ngagai kami, ngambi belulang Paul, lalu nanchang kaki jari iya empu ngena belulang nya, lalu bejaku, “Tu utai ti disebut Roh Kudus, “Baka tu ku orang Judah di Jerusalem deka nanchang orang ke bempu belulang tu, lalu nyerahka iya ngagai orang bansa bukai.” 12 Lebuh kami ninga nya, kami enggau sida ti bukai lalu nguji nagang Paul mupuk ngagai Jerusalem.
“Awakka Peneka Jehovah Nyadi”
15 Lebuh Paul diau enggau Philip, seiku nabi ke benama Agabus datai. Nabi Agabus kala madahka pasal lapar pungkang ke deka nyadi lebuh Klaudius nyadi Raja Besai. (SKR. 11:27, 28) Menyadi Kristian engka berunding pasal tuju penatai Agabus. Sida meda Agabus ngambi belulang Paul lalu nanchang kaki enggau jari iya empu ngena belulang nya. Ku Agabus : “Tu utai ti disebut Roh Kudus, ‘Baka tu ku orang Judah di Jerusalem deka nanchang orang ke bempu belulang tu, lalu nyerahka iya ngagai orang bansa bukai.’”—SKR. 21:11.
16 Utai ke dipadah Agabus nunjukka Paul endang patut ngagai Jerusalem. Nambahka nya, Paul deka ditangkap orang Judah di Jerusalem lalu diserahka “ngagai orang bansa bukai.” Lebuh bala menyadi Kristian ke begelumu ba rumah Philip ninga pasal tu, ku Luke: “Kami enggau sida ti bukai lalu nguji nagang Paul mupuk ngagai Jerusalem. Paul lalu nyaut, ‘Nama kebuah kita nyabak lalu ngenusahka ati aku? Aku ukai semina sedia deka ditanchang jil di Jerusalem, tang sedia deka mati din ketegal nama Tuan Jesus.’”—SKR. 21:12, 13.
(Kereja Rasul 21:13) Paul lalu nyaut, ‘Nama kebuah kita nyabak lalu ngenusahka ati aku? Aku ukai semina sedia deka ditanchang jil di Jerusalem, tang sedia deka mati din ketegal nama Tuan Jesus.’
“Awakka Peneka Jehovah Nyadi”
17 Gambarka utai ti benung nyadi. Bala menyadi nyengkaum Luke enda ngasuh Paul mansang ngagai Jerusalem. Sekeda nyau nyabak. Paul nemu sida irauka iya. Lebuh iya meda sida nyabak, iya amat tusah ati. Taja pia, iya enda ngemendarka semua tu ngubah runding iya. Iya madahka kebuah iya patut mansang ngagai Jerusalem. Baka Jesus, Paul keran deka mupuk ngagai Jerusalem taja pan iya nemu utai ti deka nyadi. (Heb. 12:2) Indah iya sedia deka mati ketegal nama Tuan Jesus.
(Kereja Rasul 21:14) Lebuh iya enggai dikuingka kami, kami lalu badu agi bejaku, kelimpah ari ke nyebut “Awakka peneka Tuhan [Jehovah] nyadi.”
“Awakka Peneka Jehovah Nyadi”
18 Nama nyadi pengudah nya? Ku Luke: “Lebuh iya enggai dikuingka kami, kami lalu badu agi bejaku, kelimpah ari ke nyebut ‘Awakka peneka Tuhan [Jehovah] nyadi.’” (SKR. 21:14) Bala menyadi bebasaka pemutus Paul. Sida nemu tu peneka Jehovah taja pan sida tusah deka nerima nya. Paul nemu pemutus iya deka ngujungka pemati. Nya alai, enti bala menyadi enda nagang iya neruska pejalai, Paul deka senang agi ngereja peneka Jehovah.
Ngulihka Penemu Bup Kudus ti Berega
(Kereja Rasul 21:23, 24) Nya alai, kereja aja utai ti diasuh kami. Nyadi kitai bisi empat iku orang ke udah besumpah. 24 Bai sida tu lalu tuchi diri empu sama enggau sida, lalu bayar ungkus sida ke ngukur buk sida, ngambika semua orang nemu, utai ti udah ditusui orang pasal nuan endang nadai pengamat mimit. Nya baru sida deka nemu nuan endang amat bepegai ba Adat.
“Pendingka Aku Bejaku”
10 Taja pia, Paul enda ngakim bala menyadi ke agi nitihka sekeda Adat orang Judah. Ambika chunto, sekeda orang enda gawa ba Hari Sabat tauka sida nyeliahka diri ari sekeda pemakai. (Rom. 14:1-6) Paul mega enda mejal orang ngereja pengawa betutus. Taja pan iya kala nutus Timoti, tang tuju iya ngambika Timoti ulih diterima orang Judah. Tu ketegal apai Timoti orang bansa Gerika, bansa ke enda betutus. (SKR. 16:3) Taja pia, tiap iku orang Kristian patut ngaga pemutus sekalika deka ditutus tauka enda. Paul madahka orang Kristian ba Galatia: “Pengawa betutus tauka enda betutus, sigi nadai reti. Utai ti beguna nya pengarap ti ngayanka diri ulih pengerindu.” (Gal. 5:6) Enti sema sida deka ditutus ketegal nitihka Adat Moses tauka ngumbai pengawa nya patut digaga kena ngelantangka ati Jehovah, tu nunjukka sida lemi ba pengarap.
11 Nya alai, taja pan utai ke ditusui orang pasal Paul nya bula, bala menyadi orang Judah agi enda nyamai ati. Ketegal tu, tuai gempuru ngasuh Paul ngereja tu: “Kitai bisi empat iku orang ke udah besumpah. Bai sida tu lalu tuchi diri empu sama enggau sida, lalu bayar ungkus sida ke ngukur buk sida, ngambika semua orang nemu, utai ti udah ditusui orang pasal nuan endang nadai pengamat mimit. Nya baru sida deka nemu nuan endang amat bepegai ba Adat.”—SKR. 21:23, 24.
12 Nama deka digaga Paul? Kati iya deka nyalahka orang Judah ke kelalu bepanggai ba Adat Moses? Enda. Iya nerima iring bala tuai gempuru nya lalu nyadi “baka orang Judah.” Sebedau nya Paul kala nulis: “Ba orang ke di baruh Adat, aku nyadi baka orang ke di baruh Adat, taja pen aku ukai di baruh Adat, ngambika aku ulih mai orang ke di baruh Adat ngagai Kristus.” (1 Kor. 9:20) Tu nunjukka iya ulih nerima penemu orang bukai, asalka nya sejalai enggau ajar Bup Kudus. Teladan Paul ngajar kitai ngasika bala tuai gempuru lalu enda ngereja utai bepanggai ba diri empu.—Heb. 13:17.
(Kereja Rasul 22:16) Nya alai, anang betangguh. Angkat nuan, lalu dibaptisa, ngambika dosa nuan dibuai, lalu besampi dalam nama iya.’
nota pelajar nwtsty ke SKR. 22:16
ngambika dosa nuan dibuai, lalu besampi dalam nama iya: Dosa kitai ulih dibuai enti kitai besampi dalam nama Jesus. Reti iya kitai patut arapka Jesus sereta ngayanka pengarap nya ari pengawa ke digaga kitai.—SKR. 10:43; Jas. 2:14, 18.
Macha Bup Kudus
(Kereja Rasul 21:1-19) Lebuh kami udah ninggalka sida, lalu bekejang, kami lalu belayar terus ngagai Kos, lalu hari siti ngagai Rodes, lalu ari nya ngagai Patara. 2 Lebuh kami tetemuka sebuah kapal ti deka belayar ngagai Poenisia, kami lalu nepan kapal nya, lalu bekejang. 3 Lebuh kami meda pulau Saiprus, kami lalu belayar muak ari selatan pulau nya nuju ngagai menua Siria, lalu sangkai di Tire, laban kapal deka munggah barang dia. 4 Kami lalu ngiga sida murid, lalu kami diau dia tujuh hari. Nitihka iring Roh Kudus, sida nagang Paul mupuk ngagai Jerusalem. 5 Lebuh timpuh kami diau dia nyau abis, kami angkat lalu majakka pejalai kami. Semua sida, sama enggau bini anak sida, nganjung kami pansut ari nengeri. Kami besugang ba tebing tasik lalu besampi, l 6 lalu meri selamat tinggal ngagai pangan diri. Udah nya kami lalu nepan kapal; sida lalu pulai. 7 Lebuh kami udah belayar ari Tire, kami datai di Tolemais. Dia kami betemu enggau sida ke arap, lalu diau enggau sida sehari. 8 Hari siti kami mupuk, lalu datai di Siseria. Kami datai ba rumah Philip ke Penginjil, siku ari sida ke tujuh iku, lalu diau enggau iya. 9 Iya bisi empat iku anak indu ke apin belaki, ke bisi pemeri benabi. 10 Lebuh kami diau dia dua tiga hari, siku nabi ke benama Agabus datai ari Judea. 11 Iya datai ngagai kami, ngambi belulang Paul, lalu nanchang kaki jari iya empu ngena belulang nya, lalu bejaku, “Tu utai ti disebut Roh Kudus, “Baka tu ku orang Judah di Jerusalem deka nanchang orang ke bempu belulang tu, lalu nyerahka iya ngagai orang bansa bukai.” 12 Lebuh kami ninga nya, kami enggau sida ti bukai lalu nguji nagang Paul mupuk ngagai Jerusalem. 13 Paul lalu nyaut, ‘Nama kebuah kita nyabak lalu ngenusahka ati aku? Aku ukai semina sedia deka ditanchang jil di Jerusalem, tang sedia deka mati din ketegal nama Tuan Jesus.’ 14 Lebuh iya enggai dikuingka kami, kami lalu badu agi bejaku, kelimpah ari ke nyebut “Awakka peneka Tuhan [Jehovah] nyadi.” 15 Udah bekau nya, kami besikap, lalu mupuk ngagai Jerusalem. 16 Sekeda sida murid ke ari Siseria mega bejalai enggau kami, lalu mai kami ngagai rumah Mnason ke asal ari Saiprus, ke lama udah arap, lalu kami diau enggau iya. 17 Lebuh kami datai di Jerusalem, sida menyadi gaga amat nyambut penatai kami. 18 Hari siti Paul mupuk enggau kami deka betemu enggau James. Semua tuai eklisia bisi dia magang. 19 Lebuh Paul udah meri tabi basa ngagai sida, iya lalu nusui enggau silik semua utai ti udah dikereja Petara ngagai orang bansa bukai, ngena pengawa ti dikereja Paul.
14-20 JANUARI
RETA ARI BUP KUDUS | KEREJA RASUL 23-24
“Paul Dituduh Nyadi Pengachau”
(Kereja Rasul 23:12) Pagi hari siti, orang Judah lalu bepekat. Sida besumpah enda makai, enda ngirup, datai ke sida udah munuh Paul.
(Kereja Rasul 23:16) Tang anak menyadi indu Paul bisi ninga pasal sida ke deka ngipa Paul. Nya alai iya mansang ngagai berek lalu dikemendarka tama, lalu madah ngagai Paul.
Ayanka Pemerani
5 Paul nerima peransang ba maya ti ngena. Laban ba hari siti, lebih ari 40 iku orang Judah bepekat deka munuh iya. Sida iya “besumpah enda makai, enda ngirup, datai ke sida udah munuh Paul.” Tu nunjukka sida amat keran deka munuh Paul. (SKR. 23:12-15) Sida ngaga pelan mai Paul ngagai raban Kunsil ngambika ulih mansik pekara pasal iya enggau silik agi. Lebuh Paul dibai mansang ngagai raban Kunsil, sida deka nyerang enggau ngenyit lalu munuh iya. Pelan tu disukung bala tuai imam enggau bala tuai bansa.
6 Anak menyadi indu Paul nemu pasal pelan sida lalu madahka nya ngagai Paul. Udah nya Paul ngasuh iya madahka nya ngagai Klaudius Lisias, pemesai soldadu Rome. (SKR. 23:16-22) Kemayaharitu, bisi mayuh bala nembiak ti berani baka anak menyadi indu Paul. Jehovah amat sayauka sida. Sida sanggup berambunka nyawa ke bala menyadi Kristian. Nambahka nya, sida enggau bebendar ngenuluka peneka Petara.
(Kereja Rasul 24:2) Lebuh Paul udah dikangauka tama, Tertulus lalu belabuh bedawaka Paul munyi tu: “Tuan ti Dipebasaka! Nuan endang lama udah mai pemaik ngagai menua kami, lalu ulih pengelandik nuan, mayuh bengkah ubah ti manah udah digaga nuan ke bansa kami.
(Kereja Rasul 24:5, 6) Kami nemu orang tu mai pengachau, ke ngachau semua orang Judah di serata dunya, sereta nyadi tuai ke siti raban ti dikumbai Raban Orang Nasaret. 6 Iya mega bejaku jai ngelaban Rumah Sembiang. Nya alai kami nangkap iya,
Ayanka Pemerani
10 Sebedau orang ke bedawaka Paul datai, Paul “dijaga dalam istana Herod.” (SKR. 23:35) Lima hari pengudah nya, seiku luyar ke benama Tertulus, Imam Besai Ananias enggau bala tuai bansa datai di Siseria. Keterubah, kena ngambi ati Peliks, Tertulus muji pengawa iya ke orang Judah. Udah nya, iya lalu bedawaka Paul. Iya nuduh Paul nya orang ke “mai pengachau, ke ngachau semua orang Judah di serata dunya, sereta nyadi tuai ke siti raban ti dikumbai Raban Orang Nasaret. Iya mega bejaku jai ngelaban Rumah Sembiang.” Nya alai, sida nangkap Paul. Orang Judah ke bukai “mega bedawaka iya, madahka semua utai nya endang amat magang.” (SKR. 24:5, 6, 9) Jaku tuduh tu ulih mai penusah ti besai. Enti sema Peliks pechayaka jaku tuduh tu, Paul ulih diukum mati.
(Kereja Rasul 24:10-21) Lebuh tuan gabenor ngepaika jari ngasuh Paul bejaku, Paul lalu nyaut, ‘Aku gaga ati bejaku ngarika diri empu, laban aku nemu nuan endang lama udah nyadi hakim di menua tu. 11 Tuan empu ulih mansik utai tu. Kira dua belas hari tu ti udah aku mansang ngagai Jerusalem deka nyembah Petara. 12 Orang Judah nadai nemu aku bekelikuh enggau orang, tauka nyungkak orang mayuh ngaga pengachau, nemuka dalam balai gempuru, tauka ba sebelah nengeri. 13 Lalu sida pen enda mega ulih nunjukka enggau terang ngagai nuan kebuah sida bedawaka aku diatu. 14 Tang aku ngaku tu di mua nuan: aku nyembah Petara aki ini kami nitihka Jalai Petara ti dikumbai sida siti raban, lalu aku arapka semua utai ti ditulis dalam Adat, tauka dalam bup sida nabi. 15 Aku bisi siti pengadang baka ti diterima sida empu, iya nya semua orang ke lurus enggau ke enda lurus deka diangkatka ari mati. 16 Nya kebuah aku enggau naka ulih ngintu ati diri beresi di mua Petara enggau di mua mensia. 17 “Lebuh aku udah ninggalka Jerusalem dua tiga taun, aku lalu pulai baru ngagai nengeri nya, mai duit sedekah ngagai bansa aku empu, sereta meri piring. 18 Lebuh aku benung ngereja nya, sida lalu nemu aku dalam Rumah Sembiang, benung nembuka pengawa aku ke nuchi diri. Nadai mayuh orang enggau aku, lalu aku mega nadai ngaga pengachau. 19 Tang sekeda orang Judah ari menua Asia — sida patut bisi ditu bedawaka aku di mua nuan, enti sida amat bisi utai kena bedawaka aku. 20 Tauka, awakka bala sida tu madahka penyalah aku ti ditemu sida lebuh aku bediri di mua Kunsil. 21 Nyangka meh sida besalah aku laban aku udah nyebut di mua sida, “Aku kena pechara sehari tu laban aku arapka orang ke mati deka diangkatka idup baru.”
Ayanka Pemerani
13 Paul netapka teladan ti manah enti sema kitai dipechara perintah ketegal pengarap kitai. Paul enda nguji ngambi ati gabenor Peliks ngena jaku puji. Tang iya nunjukka basa sereta meri saut ti terang sereta bendar. Ku Paul sekeda “orang Judah ari menua Asia” patut mega datai ngambika iya ulih ninga jaku tuduh sida.—SKR. 24:18, 19.
14 Kelebih agi, Paul enda takut bejaku pasal pengarap iya. Sekali agi, iya bejaku pasal pengangkat ari mati. Pekara tu kala ngasuh orang Saduki enggau orang Parisi balat bekelikuh. (SKR. 23:6-10) Nama kebuah Paul bejaku pasal pengangkat ari mati? Laban orang Judah ti ngelaban Paul enggai ngaku Jesus udah diangkatka idup baru. Nya alai, Paul besaksi pasal Jesus sereta pengangkat Jesus ari mati.—SKR. 26:6-8, 22, 23.
Ngulihka Penemu Bup Kudus ti Berega
(Kereja Rasul 23:6) Lebuh Paul nemu sekeda orang ke dia nya orang Saduki, lalu sekeda ti bukai orang Parisi, iya lalu bejaku enggau nyawa ti inggar dalam balai Kunsil nya, “Menyadi, aku tu orang Parisi, anak orang Parisi. Aku kena pechara laban aku arapka orang deka diangkatka ari mati!”
nota pelajar nwtsty ke SKR. 23:6
Aku tu orang Parisi: Orang Parisi ke dalam balai Kunsil nya ngelala Paul. (SKR. 22:5) Lebuh Paul madahka diri anak orang Parisi, tu nunjukka suba iya orang Parisi baka sida. Tang sida mega nemu iya udah nyadi orang Kristian. Ba maya tu, Paul madahka diri orang Parisi laban iya nemu orang Parisi mega pechayaka pengangkat ari mati. Enggau chara tu, Paul ngarapka sekeda orang Parisi ari raban Kunsil setuju enggau penerang ke diberi iya. Lalu tu amat nyadi. (SKR. 23:7-9) Paul mega madahka diri orang Parisi lebuh iya ngetanka diri ba mua Raja Agripa. (SKR. 26:5) Lebuh iya nulis surat ari Rome ngagai menyadi Kristian di Pilipi, iya mega madahka diri orang Parisi. (Plp. 3:5) Pia mega, sekeda orang Parisi ke nyadi Kristian dikumbai raban orang Parisi ba ayat SKR. 15:5.
(Kereja Rasul 24:24) Kira dua tiga hari udah bekau nya, Peliks datai enggau bini iya Drusila, ke bansa orang Judah. Iya lalu mesanka Paul, lalu mendingka Paul bejakuka pasal pengarap ke Jesus Kristus.
(Kereja Rasul 24:27) Dua taun udah lepas nya, Peliks lalu diganti Porkius Pestus nyadi gabenor. Kena Peliks ngenyamaika ati orang Judah, iya nejuka Paul mengkang ditan dalam rumah jil.
nota pelajar nwtsty ke SKR. 24:24
Drusila: Iya anak ketiga sereta anak indu ke biak Herod Agripa I. Iya ada kira-kira 38 M. Iya menyadi indu Agripa II enggau Bernice. Laki dulu iya benama Raja Azizus ari Emesa, Siria. Tang, udah nya seduai iya sarak lalu iya jadi enggau gabenor Peliks ba taun 54 M. Maya nya umur Drusila kira-kira 16 taun. Lebuh Paul bejaku enggau Peliks “pasal pengelurus, pasal nagang diri, enggau pasal Hari Pechara ti deka datai,” Drusila engka bisi ba dia. (SKR. 24:25) Sekeda orang ngumbai Peliks nejuka Paul terus ditan dalam rumah jil laban iya deka “ngenyamaika ati orang Judah,” kelebih agi bini iya ke mega orang Judah.—SKR. 24:27.
Macha Bup Kudus
(Kereja Rasul 23:1-15) Paul merening ngagai raban Kunsil lalu bejaku, ‘Menyadi! Nyentuk ngagai sehari tu aku udah idup enggau ati ti beresi di mua Petara.’ 2 Imam Besai Ananias lalu ngasuh orang ke bediri semak Paul nampar mulut Paul. 3 Paul lalu bejaku ngagai iya, ‘Petara deka nampar nuan, nuan ti pura-pura ngapa! Kati nuan ngakim aku nitihka Adat, tang nuan empu ngelanggar Adat ngasuh orang nampar aku?’ 4 Orang ke semak Paul lalu bejaku, ‘Berani amat nuan mechat imam besai Petara!’ 5 Paul lalu bejaku, “Menyadi, aku enda nemu iya imam besai. Laban endang udah ditulis, ‘Anang bejaku jai pasal kepala bansa kita.’” 6 Lebuh Paul nemu sekeda orang ke dia nya orang Saduki, lalu sekeda ti bukai orang Parisi, iya lalu bejaku enggau nyawa ti inggar dalam balai Kunsil nya, “Menyadi, aku tu orang Parisi, anak orang Parisi. Aku kena pechara laban aku arapka orang deka diangkatka ari mati!” 7 Lebuh iya udah nyebut nya, orang Parisi enggau orang Saduki lalu belabuh bekelikuh, lalu raban Kunsil beserekang penemu, (8 laban orang Saduki madahka nadai utai ti dikumbai pengangkat ari mati, tauka melikat, tauka roh, tang orang Parisi ngumbai semua utai nya bisi magang.) 9 Sida lalu inggar amat. Sekeda pengajar Adat ke orang Parisi bediri lalu bejaku, “Kami nadai nemu penyalah orang tu! Kada enda roh tauka melikat udah bejaku ngagai iya.” 10 Lebuh sida majak balat agi bekelikuh, kepala soldadu lalu irau ati enggai ke Paul abis dipecharikka sida. Nya alai iya lalu ngasuh bala soldadu nurun lalu ngerampas Paul ari jari sida, lalu mai iya ngagai berek. 11 Malam nya Tuan bediri ngimbai Paul, lalu bejaku, ‘Anang takut! Baka nuan ke udah besaksika pasal aku di Jerusalem, baka nya mega nuan deka besaksika pasal aku di Rome.’ 12 Pagi hari siti, orang Judah lalu bepekat. Sida besumpah enda makai, enda ngirup, datai ke sida udah munuh Paul. 13 Lebih empat puluh iku sida ke bepekat nya. 14 Sida lalu mansang ngagai sida tuai imam, enggau tuai bansa, lalu bejaku, “Kami udah besumpah enda makai, enda ngirup, datai ke kami udah munuh Paul. 15 Nya alai kita enggau raban Kunsil enda tau enda ngirumka pesan ngagai kepala soldadu, minta iya mai Paul betemu enggau kita, lalu kita ngaga diri baka ke deka mansik pekara pasal iya enggau silik agi. Lalu kami deka sedia munuh iya sebedau iya datai ditu.”
21-27 JANUARI
RETA ARI BUP KUDUS | KEREJA RASUL 25-26
“Paul Minta Betemu enggau Raja Besai lalu Meri Saksi ngagai Raja Herod Agripa”
(Kereja Rasul 25:11) Nya alai, enti aku bisi udah ngereja penyalah lalu udah ngereja utai ti tau ngasuh aku patut kena ukum bunuh, aku ukai minta diri enda diukum mati. Tang enti sida nadai kebuah bedawaka aku, nadai orang ulih nyerahka aku ngagai sida. Aku ngapil ngagai Raja Besai.”
“Aku Ngapil Ngagai Raja Besai”
6 Pengingin Pestus ke deka ngelantangka ati orang Judah ulih ngujungka Paul diukum bunuh. Nya alai, Paul ngena hak peranak Rome iya. Iya madahka Pestus: “Aku diatu bediri dalam kot Raja Besai, alai aku ke endang patut kena pechara. Lalu nuan empu nemu, aku nadai kala ngereja utai ti salah ngagai orang Judah. . . . Aku ngapil ngagai Raja Besai.” Ku Pestus nyaut Paul: “Nuan udah ngapil ngagai Raja Besai. Ngagai Raja Besai meh nuan deka mupuk.” (SKR. 25:10-12) Enggau chara tu, Paul nunjukka teladan ti manah ngagai nembiak Petara kemayaharitu. Lebuh orang ke ngelaban “ngaga atur ti jai,” Saksi-Saksi Jehovah ulih ngena atur perintah menua sida lebuh ngetan pengarap sida.—Mas. 94:20.
(Kereja Rasul 26:1-3) Agripa lalu bejaku ngagai Paul, “Nuan tau bejaku ngarika diri empu.” Paul lalu ngangkatka jari iya, lalu bejaku ngarika diri empu munyi tu: 2 “Raja Agripa, aku gaga amat ati laban sehari tu aku diberi peluang bejaku ngarika diri empu di mua nuan, ngelaban semua dawa orang Judah, 3 laban nuan nemu semua adat asal enggau pasal semua kelikuh orang Judah ti ngasuh sida beserekang penemu. Nya alai, aku minta nuan liat ati mendingka aku.
“Aku Ngapil Ngagai Raja Besai”
10 Paul enggau basa meri terima kasih ngagai Raja Agripa laban diberi peluang bejaku ngarika diri empu. Paul madahka raja nya nemu semua adat asal enggau semua kelikuh orang Judah. Udah nya Paul madahka pasal pengidup iya ke suba: “Pasal aku ke nyadi raban orang ke pemadu terit dalam agama kitai, lalu idup nyadi orang Parisi.” (SKR. 26:5) Paul enggau orang ke ngelaban iya pechayaka penatai Messiah. Pengudah iya nyadi orang Kristian, Paul enggau berani madahka Jesus Kristus nya Messiah ti dianti sida. Tang iya dipechara taja pan sida ngembuan pengarap ti sama iya nya Petara deka ngamatka semaya ke digaga enggau aki ini sida. Tu ngasuh Agripa majak deka nemu utai ke deka dipadah Paul maya nya.
11 Paul ngenang utai jai ke digaga iya ngagai orang Kristian kelia. Ku iya: “Aku menya udah ngumbai diri patut ngereja mayuh macham utai kena ngelaban nama Jesus orang Nasaret. . . . laban aku balat pedis ati ngagai sida [bala murid Jesus], aku lalu begagaika sida nyentuk ngagai nengeri di menua bukai.” (SKR. 26:9-11) Tu endang amat. Mayuh orang nemu penyai ke digaga iya ngagai orang Kristian maya nya. (Gal. 1:13, 23) Agripa engka berunding, ‘Nama kebuah iya ulih berubah?’
12 Paul meri saut ba jaku ti nangkanka nya: “Lebuh aku di rantau jalai, aku meda siti penampak manchar ari langit, ti terang agi ari mata hari, ti manchar ngelingi aku enggau ngelingi orang ke bejalai enggau aku. Lebuh semua kami udah rebah ke tanah, aku lalu ninga nyawa bejaku ngagai aku ngena jaku Hebrew, ‘Saul, Saul! Nama kebuah nuan merinsaka aku? Nuan semina ngemediska diri empu ngapa ngelaban aku.’ Aku lalu bejaku, ‘Sapa nuan, Tuan?’ Tuan lalu nyaut, ‘Aku tu Jesus ke diperinsaka nuan.’”—SKR. 26:12-15.
13 Sebedau utai ti ngalitka ati tu nyadi, Paul ngereja pengawa ti “ngemediska diri empu.” Iya ngemediska diri empu lebuh ngelaban peneka Petara. Maya Paul mansang ngagai Damaskus, Jesus ti udah diangkatka idup baru ngayanka diri ba mua iya. Utai ti nyadi nya, nulung Paul berubah.—Jhn. 16:1, 2.
14 Paul ngaga ubah ba pengidup iya. Iya madah ngagai Agripa: ‘Aku enda kala enda ngasika genera ti datai ari serega, tang madahka, keterubah iya, ngagai sida ke diau di Damaskus, lalu udah nya ngagai sida ke diau di Jerusalem, enggau di serata menua Judea, lalu mega ngagai orang bansa bukai, madahka sida enda tau enda nesal ati ke dosa sida lalu nguing ngagai Petara, lalu ngereja utai ti nunjukka sida amat udah nesal ati.’ (SKR. 26:19, 20) Betaun-taun, Paul ngereja pengawa ke diberi Jesus Kristus ngagai iya. Nama asil iya? Mayuh orang nesal ati lalu enda agi ngereja ulah seks ti kamah sereta pengawa ti enda lurus. Sida nyadi rayat ti manah lalu bebasaka atur perintah menua nya.
15 Tang orang Judah ke ngelaban Paul enda ibuhka asil ari ubah ti manah tu. Ku Paul: ‘Nya meh kebuah orang Judah nangkap aku dalam Rumah Sembiang, lalu nguji munuh aku. Tang aku disaup Petara nyentuk ngagai sehari tu. Nya alai aku diatu bediri ditu besaksi ngagai semua orang ke mit enggau ke besai.’—SKR. 26:21, 22.
16 Kitai mega patut “seruran besedia deka nyaut” sida ke ngelaban pengarap kitai. (1 Pet. 3:15) Paul nyediaka teladan ti manah ke kitai lebuh bejaku enggau Agripa sereta Pestus. Kitai mega ulih ngena chara ti sama lebuh bejaku enggau bala hakim enggau bala pemesai. Enggau chara ti bebasa, kitai ulih madahka sida baka ni Bup Kudus udah ngubah pengidup kitai sereta orang bukai nyadi manah agi. Tu engka ulih negu ati sida.
(Kereja Rasul 26:28) Agripa lalu bejaku enggau Paul, “Kati nuan ngenyampat nya ngumbuk aku nyadi orang Kristian?”
“Aku Ngapil Ngagai Raja Besai”
18 Tang saut Paul ngagai gabenor: “Aku ukai gila, Tuan Gabenor, tang nyebut utai ti bendar. Raja empu nemu pasal utai nya, . . . Raja Agripa, kati nuan arapka sida nabi? Aku nemu nuan arap!” Agripa lalu bejaku enggau Paul: “Kati nuan ngenyampat nya ngumbuk aku nyadi orang Kristian?” (SKR. 26:25-28) Ari jaku Agripa nya, kitai nemu jaku Paul bisi negu ati iya.
Ngulihka Penemu Bup Kudus ti Berega
(Kereja Rasul 26:20) tang madahka, keterubah iya, ngagai sida ke diau di Damaskus, lalu udah nya ngagai sida ke diau di Jerusalem, enggau di serata menua Judea, lalu mega ngagai orang bansa bukai, madahka sida enda tau enda nesal ati ke dosa sida lalu nguing ngagai Petara, lalu ngereja utai ti nunjukka sida amat udah nesal ati.
nota pelajar nwtsty ke SKR. 26:20
nesal ati: Leka jaku Gerika ke dikena ba ditu ulih disalin “ngubah runding.” Tu nyengkaum ubah ba runding, ulah tauka tuju. Ba ayat tu, “nesal ati” bisi kaul enggau rambai jaku “lalu nguing ngagai Petara.” Tu ditujuka ngagai kaul orang nya enggau Petara. Enti orang nya amat nesal ati, iya patut ngereja utai ti nunjukka iya amat udah nesal ati. Reti iya, pengawa ke digaga iya nunjukka iya udah ngubah runding tauka ulah iya.
(Kereja Rasul 26:27) Raja Agripa, kati nuan arapka sida nabi? Aku nemu nuan arap!”
w03 15/11 16-17 ¶14
Nulung Orang Bukai Nerima Berita Manah
14 Paul nemu Agripa orang Judah. Agripa mega tentu nemu pasal pengarap Judah. Nya alai, Paul madah ngagai Agripa, iya semina “nyebut utai ti udah dipadahka sida nabi enggau Moses” pasal pemati Jesus sereta pengangkat iya ari mati. (SKR. 26:22, 23) Paul nanya Agripa: “Raja Agripa, kati nuan arapka sida nabi?” Agripa tusah deka nyaut tanya tu. Enti iya madah diri enda arap, reti nya iya enda layak megai pengarap Judah. Tang enti iya madah diri arap, reti nya iya setuju enggau utai ke dipadahka Paul lalu orang deka ngumbai iya orang Kristian. Udah nya Paul madah: “Aku nemu nuan arap!” Nama saut Agripa? Ku iya: “Kati nuan ngenyampat nya ngumbuk aku nyadi orang Kristian?” (SKR. 26:27, 28) Taja pan Agripa enda nyadi orang Kristian, pesan ke dipadahka Paul tentu bisi negu ati iya.—Heb. 4:12.
Macha Bup Kudus
(Kereja Rasul 25:1-12) Tiga hari udah bekau Pestus datai di menua nya, iya lalu mansang ari Siseria ngagai Jerusalem. 2 Sida tuai imam, enggau bala tuai orang Judah lalu mantaika dawa ti dikena sida ngelaban Paul. Lalu sida minta Pestus 3 ngasuh orang mai Paul ngagai Jerusalem, laban sida deka ngipa lalu munuh iya di rantau jalai. 4 Pestus lalu nyaut, madahka Paul agi ditanka dalam rumah jil di Siseria, lalu Pestus empu deka mansang kin enda lama da agi. 5 “ Nya alai,” ku iya bejaku, “awakka bala tuai kita mupuk enggau aku ngagai Siseria, lalu enti orang nya bisi udah ngereja penyalah, awakka sida bedawaka iya.” 6 Lebuh iya udah diau enggau sida lapan ngagai sepuluh hari, iya lalu mupuk ngagai Siseria. Hari siti iya lalu duduk ba penuduk hakim, lalu ngasuh orang mai Paul tama. 7 Lebuh Paul datai, bala orang Judah ke udah datai ari Jerusalem, bediri ngelingi iya, mantaika dawa ti berat ngelaban iya. Tang sida enda ulih nunjukka pengamat dawa nya. 8 Paul lalu bejaku ngarika diri empu. Ku iya, “Aku nadai kala ngelanggar Adat orang Judah tauka ngelaban Rumah Sembiang, tauka ngelaban Raja Besai.” 9 Tang Pestus minta diri dikerinduka orang Judah, nya alai iya nanya Paul, “Kati nuan deka mupuk ngagai Jerusalem lalu kena pechara din ba pasal semua pekara tu di mua aku empu?” 10 Paul lalu nyaut, “Aku diatu bediri dalam kot Raja Besai, alai aku ke endang patut kena pechara. Lalu nuan empu nemu, aku nadai kala ngereja utai ti salah ngagai orang Judah. 11 Nya alai, enti aku bisi udah ngereja penyalah lalu udah ngereja utai ti tau ngasuh aku patut kena ukum bunuh, aku ukai minta diri enda diukum mati. Tang enti sida nadai kebuah bedawaka aku, nadai orang ulih nyerahka aku ngagai sida. Aku ngapil ngagai Raja Besai.” 12 Lebuh Pestus udah berunding enggau bala penyanding penemu iya, iya lalu nyaut, “Nuan udah ngapil ngagai Raja Besai. Ngagai Raja Besai meh nuan deka mupuk.”
28 JANUARI–3 FEBRUARI
RETA ARI BUP KUDUS | KEREJA RASUL 27-28
“Paul Mansang ngagai Rome”
(Kereja Rasul 27:23, 24) laban malam tadi siku melikat Petara, iya nya Petara ke dipetuaika sereta disembah aku, bisi bediri ngimbai aku, 24 lalu bejaku, ‘Anang takut, Paul. Nuan enda tau enda bediri di mua Raja Besai. Lalu Petara deka nyelamatka semua orang ke belayar enggau nuan.’
“Nadai Seiku Kita Deka Mati”
15 Paul tentu nginjil ngagai orang ke ba kapal pasal ‘semaya ti udah digaga Petara.’ (SKR. 26:6; Kol. 1:5) Diatu, kapal sida nyauka karam, nya alai Paul tentu bisi kebuah madahka sida deka selamat. Ku iya: ‘Malam tadi siku melikat Petara bediri ngimbai aku lalu bejaku, “Anang takut, Paul. Nuan enda tau enda bediri di mua Raja Besai. Lalu Petara deka nyelamatka semua orang ke belayar enggau nuan.”’ Paul meransang sida: ‘Nya alai, anang takut, laban aku arapka Petara deka ngereja utai munyi ti udah dipadahka Iya ngagai aku. Tang kitai deka tepanggai ba tebing pulau siti.’—SKR. 27:23-26.
(Kereja Rasul 28:1, 2) Lebuh semua kami udah datai ba tebing, nya baru kami nemu pulau nya dikumbai Malta. 2 Orang ba pulau nya manah amat enggau kami. Laban hari nyau belabuh ujan sereta chelap, sida lalu nungkun api lalu ngelaluka penatai semua kami.
“Nadai Seiku Kita Deka Mati”
18 Pengudah kapal sida karam, sida tepanggai ba Pulau Malta. Orang ba pulau nya amat manah enggau sida taja pan enda sama jaku. (SKR. 28:2) Hari nyau belabuh ujan. Nyadi, orang ba Pulau Malta nungkun api ke sida Paul ke benung chelap sereta basah. Enda lama udah nya, siti kereja ajih nyadi.
“Nadai Seiku Kita Deka Mati”
21 Ba pulau nya, bisi seiku orang kaya ke benama Publius. Iya mega engka orang ke besai pangkat. Luke ngumbai iya “tuai ba pulau nya.” Iya ngelaluka sereta ngintu Paul sereta orang ke enggau Paul pengelama tiga hari. Maya nya, apai Publius benung sakit. Luke madahka “apai Publius gali sakit chelap angat sereta pedis perut.” Paul besampi lalu ngengkahka jari iya atas apai Publius, lalu ngeraika iya. Kereja ajih nya narit ati mayuh orang nyentukka semua orang ke sakit ba pulau nya datai lalu digeraika magang. Sida mega meri mayuh utai ke diguna bala sida Paul.—SKR. 28:7-10.
(Kereja Rasul 28:16, 17) Lebuh kami datai di Rome, Paul disagi diau kediri, dijaga siku soldadu. 17 Tiga hari udah bekau kami datai, Paul lalu ngempuruka bala tuai orang Judah di nengeri nya. Lebuh sida udah begempuru magang, iya lalu bejaku ngagai sida, “Menyadi, taja pen aku nadai ngereja utai ngelaban bansa kitai, tauka ngelaban adat asal aki ini kitai, tang aku udah ditangkap di Jerusalem, lalu diserahka ngagai orang Rome.
“Besaksika Pasal Perintah Petara”
10 Lebuh sida datai ba Rome, “Paul disagi diau kediri, dijaga siku soldadu.” (SKR. 28:16) Ngambika iya enda ngerarika diri, jari iya ditanchangka ba seiku soldadu. Taja pan iya ditanchang, Paul enda ngetu nginjil. Pengudah tiga hari iya belelak, Paul lalu ngempuruka bala tuai orang Judah di nengeri nya ngambika iya ulih madahka diri lalu meri saksi.
Ngulihka Penemu Bup Kudus ti Berega
(Kereja Rasul 27:9, NW) Laban mayuh jam udah tebasau, lalu belayar pen tau mega ngasuh bebadi, laban pasa Hari Pengampun Dosa udah ngelebus, nya alai Paul ngelalau sida enggau jaku.
nota pelajar nwtsty ke SKR. 27:9, NW
pasa Hari Pengampun Dosa: Seharinya, orang Judah ngereja bemacham bengkah pengawa ti nunjukka sida nesal ati. Siti ari chara sida nunjukka diri nesal ati iya nya enggau bepasa. (Lew. 16:29) Pasa Hari Pengampun Dosa diintu ba ujung bulan September tauka pun bulan Oktober.
(Kereja Rasul 28:11) Tiga bulan udah bekau nya kami lalu belayar ngena sebuah kapal ti datai ari Aleksandria, ti dikumbai “Menyadi Lelaki Ti Besapit,” ti udah ngenduh ba pulau nya lebuh musin chelap nya.
nota pelajar nwtsty ke SKR. 28:11
Menyadi lelaki ti besapit (anak Seus): Nitihka ensera orang Gerika enggau Rome, “Menyadi lelaki ti besapit” (jaku Gerika, Di·oʹskou·roi) nya benama Kastor enggau Poluks. Seduai iya anak petara Seus (Jupiter) enggau Kuin Sparta ke benama Leda. Kastor enggau Poluks dikumbai penyaga enggau penyelamat orang ke benung belayar ba tasik. Penerang pasal kapal tu nunjukka penulis ayat tu empu kala meda kapal nya.
Macha Bup Kudus
(Kereja Rasul 27:1-12) Lebuh kami udah diatur belayar ngagai menua Itali, sida lalu nyerahka Paul enggau sekeda orang tutup ti bukai ngagai Julius, siku pemesai ari regimen ti dikumbai “Regimen Raja Besai.” 2 Kami lalu nepan sebuah kapal ti datai ari Adramitium, ti baru deka belayar ngagai mayuh bengkah penyangkai kapal ba sebelah tebing menua Asia, lalu bekejang, disempulang Aristarkus, orang Masedonia ke datai ari Tesalonika. 3 Hari siti kami sangkai di Sidon. Nyadi Julius manah amat enggau Paul, lalu ngemendarka iya betemu enggau pangan iya, ngambika sida ngintu iya. 4 Kami bekejang ari Sidon lalu laban kami nanjak ribut, kami lalu belayar mansa Pulau Saiprus nengah endur ti kurang agi ribut. 5 Lebuh kami udah belayar meraka tasik semak Silisia enggau Pampilia, kami datai di Mira di menua Lisia. 6 Dia pemesai soldadu tetemuka sebuah kapal ti datai ari Aleksandria, ti deka belayar ngagai menua Itali. Iya lalu ngengkahka kami ba kapal nya. 7 Kami belayar lubah amat dalam berapa hari, lalu nyau ka enda ulih datai semak nengeri Nidus. Lalu laban kami nanjak ribut, nya alai kami belayar belindung ba pulau Krit semak Salmoni. 8 Kami belayar lubah amat, lalu datai ba endur siti ti dikumbai Pengkalan ti Likun, ti semak nengeri Lasea. 9 Laban mayuh jam udah tebasau, lalu belayar pen tau mega ngasuh bebadi, laban Hari Pengampun Dosa udah ngelebus, nya alai Paul ngelalau sida enggau jaku. 10 Ku iya, “Tuan, asai sepi aku, pejalai kitai tu tau ngasuh kitai bebadi sereta mayuh rugi, ukai semina rugi barang enggau kapal, tang nyawa kitai mega.” 11 Tang pemesai soldadu bechaya agi ke juragan kapal, enggau orang ke bempu kapal nya, ari ke arapka jaku Paul. 12 Laban penyangkai kapal nya enda manah alai ngenduh lebuh musin chelap, mayuh sida mai belayar ari endur nya, ngarapka diri ulih datai di Poeniks, lalu ngenduh dia lebuh musin chelap. Poeniks nya penyangkai kapal ti nunga ngagai selatan-barat enggau utara-barat pulau nya.