Penerang ke Bup Kereja Pengidup enggau Pengawa Kristian
5-11 NOVEMBER
RETA ARI BUP KUDUS | JOHN 20-21
“Kati Nuan Rinduka Aku Lebih Ari Utai Tu?”
(John 21:1-3) Udah nya, Jesus mandangka diri baru ngagai sida murid iya ba tebing Tasik Tiberias. Baka tu ku jalai iya mandangka diri. 2 Nyadi Simon Peter, Thomas (ke dikumbai Besapit), Natanel (ke datai ari nengeri Kana di Galili), anak Sebedi ke dua iku, enggau dua iku murid ti bukai, begempuru. 3 Simon Peter lalu bejaku ngagai sida, “Aku deka berikan.” Sida lalu nyebut, “Kami pen ka meh enggau nuan.” Sida mupuk lalu nepan sebuah perau, tang malam nya sida nadai bulih utai.
(John 21:4-14) Lebuh mata panas baru tumbuh, Jesus bediri ba tebing, tang sida murid enda ngelala orang nya Jesus. 5 Jesus lalu bejaku ngagai sida, “Anak, bisi bulih utai?” Sida lalu nyaut, “Nadai.” 6 Iya lalu bejaku ngagai sida, “Tibarka jala kita ari tisi kanan perau. Nya baru kita deka bulih ikan.” Sida lalu nibarka jala sida, lalu sida enda ulih narit jala nya, empa pemayuh ikan. 7 Murid ke dikerinduka Jesus lalu bejaku ngagai Peter, ‘Tuan nya!’ Lebuh Simon Peter ninga orang nya Tuan, iya lalu ngerasukka serayung iya (laban iya udah muka serayung iya) lalu terejun ke ai. 8 Tang sida murid ti bukai mansang ke tebing ngena perau nya, narit jala ti penuh laban ikan, laban sida enda jauh ari tebing, semina kira seratus meter aja. 9 Lebuh sida udah niki ke tebing, sida meda api endang udah menyadi lalu ikan enggau roti benung dipanggang ba api nya. 10 Jesus lalu bejaku ngagai sida, “Bai kitu sekeda ikan ti baru udah ulih kita nya.” 11 Simon Peter lalu nepan ngagai perau nya, lalu narit jala nya ke tebing, penuh laban ikan ti besai, seratus lima puluh tiga iku semua ikan nya. Tang taja pen ikan nya mayuh, jala nya enda charik. 12 Ku Jesus bejaku ngagai sida, “Aram makai.” Siku pen nadai ga sida murid berani nanya iya, ‘Sapa nuan tu?’ laban sida nemu iya endang amat Tuan. 13 Jesus mansang ngagai sida, ngambi roti, lalu nyuaka roti nya ngagai sida. Iya mega nyuaka ikan ngagai sida. 14 Tu ketiga kali Jesus udah mandangka diri ngagai sida murid udah bekau iya ke diangkatka ari mati.
(John 21:15-19) Lebuh sida udah badu makai, Jesus lalu bejaku ngagai Simon Peter, ‘Simon anak John, kati nuan rinduka aku lebih ari sida ti bukai tu rinduka aku?’ Disaut Peter, ‘Sigi amat, Tuan. Nuan nemu aku rinduka nuan.’ Lalu ku Jesus bejaku ngagai iya, ‘Beri anak domba aku makai.’ 16 Jesus lalu nanya iya kedua kali, ‘Simon anak John, kati nuan rinduka aku?’ Peter lalu nyaut iya, ‘Sigi amat, Tuan. Nuan nemu aku rinduka nuan.’ Jesus lalu bejaku ngagai iya, ‘Ibun bedus aku.’ 17 Jesus lalu nanya iya ketiga kali, ‘Simon anak John, kati nuan rinduka aku?’ Peter lalu tusah ati laban Jesus nanya iya ketiga kali, ‘Kati nuan rinduka aku?’ Nya alai ku iya bejaku ngagai Jesus, ‘Tuan, nuan nemu semua utai. Nuan nemu aku rinduka nuan!’ Jesus lalu bejaku ngagai iya, ‘Beri bedus aku makai. 18 Enggau bendar aku madah ngagai nuan, lebuh nuan agi biak, nuan nanchangka belulang ke diri empu, lalu nuan bejalai ngagai sebarang endur nuan deka. Tang lebuh nuan nyau tuai, nuan deka ngunjurka jari nuan, lalu orang bukai deka nanchangka belulang ba nuan, lalu mai nuan ngagai endur ti enggai digusung nuan.” 19 (Jesus nyebut nya kena iya madahka gaya pemati Peter kena Peter ngemuliaka Petara.) Udah nya Jesus lalu bejaku ngagai iya, ‘Titihka aku!’
nota pelajar nwtsty ke Jhn. 21:15, 17
Jesus lalu bejaku ngagai Simon Peter: Randau tu entara Jesus enggau Peter pengudah Peter besangkalka Jesus tiga kali. Jesus nanya tiga tanya pasal asai ati Peter ngagai iya, nyentukka “Peter lalu tusah ati.” (Jhn. 21:17) Utai ke ditulis John ba Jhn. 21:15-17 ngena dua iti jaku pengawa Gerika: a·ga·paʹo enggau phi·leʹo. Dalam bansa jaku Iban, jaku pengawa tu mai reti pengerindu. Jesus nanya Peter tiga kali: ‘Kati nuan rinduka aku?’ Ketiga-tiga kali nya, Peter madah iya rinduka Jesus. Tiap kali Peter madahka iya rinduka Jesus, Jesus nekanka pengerindu nya patut meransang Peter ngintu enggau “ngibun” pengarap murid Jesus ke disemaka baka anak domba tauka “bedus.” (Jhn. 21:16, 17; 1 Pet. 5:1-3) Jesus ngasuh Peter nentuka pengerindu iya tiga kali lalu meri iya tanggung pengawa ngibun bedus iya. Enggau chara tu, Jesus nunjukka iya udah ngampun Peter ke besangkalka iya tiga kali.
kati nuan rinduka aku lebih ari sida ti bukai tu rinduka aku?: Rambai jaku “lebih ari” ulih dimeretika enggau mayuh chara. Sekeda pakar madahka reti tu “kati nuan rinduka aku lebih ari nuan rinduka bala murid ti bukai tu?” tauka “kati nuan rinduka aku lebih ari murid ti bukai tu rinduka aku?” Tang reti ke bendar iya “kati nuan rinduka aku lebih ari utai tu?” iya nya ikan ke diulih sida tauka utai ti bekaul enggau bisnes berikan. Nya alai, reti ku ayat tu baka: ‘Kati nuan rinduka aku lebih agi ari reta tengkira? Enti pia, beri bedus aku makai.’ Tanya tu ngena bekaul enggau pengidup Peter ke suba. Taja pan, Peter seiku ari murid Jesus (Jhn. 1:35-42), iya enda nitihka Jesus tekala nya. Tang iya berikan baru. Beberapa bulan udah nya, ari ke ngereja pengawa berikan, Jesus mai Peter “ngulihka mensia.” (Mat. 4:18-20; Luk. 5:1-11) Sekali agi, bedau lama pengudah Jesus mati, Peter madahka iya deka berikan, lalu bala rasul ke bukai mega enggau iya. (Jhn. 21:2, 3) Nya alai, Jesus baka ke deka ngasuh Peter ngaga pemutus: Kati iya patut ngenuluka bisnes berikan, ti ngambarka ikan ke betugung ba mua sida, tauka ngenuluka pengawa negapka pengarap bedus Jesus?—Jhn. 21:4-8.
ketiga kali: Peter udah besangkalka Tuan iya tiga kali; diatu Jesus meri iya peluang madahka asai ati iya tiga kali. Lebuh Peter ngereja nya, Jesus ngasuh iya nunjukka pengerindu enggau ngenuluka pengawa ke Jehovah lebih ari utai bukai. Peter enggau bala menyadi lelaki bukai ke megai tanggung pengawa, deka ngintu, ngering sereta ngibun bala murid Jesus ke tetap ati. Taja pan sida orang ke dipilih ngagai serega, tang sida mega patut ditegapka ba pengarap.—Luk. 22:32.
Ngulihka Penemu Bup Kudus ti Berega
(John 20:17) Ku Jesus bejaku ngagai iya, ‘Anang megai aku, laban aku apin niki ngagai Apai. Tang mupuk nuan ngagai sida menyadi aku, lalu padahka ngagai sida, aku niki ngagai Apai aku enggau Apai kita, ngagai Petara aku enggau Petara kita.’
nota pelajar nwtsty ke Jhn. 20:17
Anang megai aku: Jaku pengawa Gerika haʹpto·mai reti iya “negu” tauka “bepaut.” Sekeda salin madahka jaku Jesus: “Anang negu aku.” Taja pia, Jesus ukai enda ngasuh Maria Magdalin negu iya, laban iya enda nagang indu bukai ‘megai kaki iya’ pengudah sida meda iya udah diangkatka idup baru. (Mat. 28:9) Maria Magdalin takut Jesus deka niki ke serega. Laban iya amat keran deka enggau Tuan iya, iya enggai ngelepaska Jesus. Ngambika Maria nemu iya bedau mupuk, Jesus ngasuh Maria anang megai iya tang mansang ngagai bala murid iya lalu madahka iya udah diangkatka ari mati.
(John 20:28) Thomas lalu nyaut iya, ‘Tuan aku, Petara aku!’
nota pelajar nwtsty ke Jhn. 20:28
Tuan aku, Petara aku!: Sekeda pakar ngumbai rambai jaku tu dikena ngayanka pengalit ati ngagai Jesus, tang ke amat jaku nya ditujuka ngagai Petara, Apai Jesus. Ke bukai ngumbai jaku Gerika ti asal tu endang ditujuka ngagai Jesus. Enti pia, rambai jaku “Tuan aku enggau Petara aku” ulih dimeretika enggau manah agi ari konteks ayat ke bukai. Lebuh Jesus madah ngagai bala rasul iya, ‘Aku niki ngagai Apai aku enggau Apai kita, ngagai Petara aku enggau Petara kita,’ tu ukai reti iya Thomas ngumbai Jesus nya Petara ti pemadu bekuasa. (Peda nota pelajar ke Jhn. 20:17.) Thomas kala ninga Jesus besampi ngagai “Apai,” lalu ngumbai Iya ‘Petara ti bendar.’ (Jhn. 17:1-3) Nya alai, bisi kebuah Thomas engka ngangau Jesus ‘Petara aku’ iya nya: Iya ngumbai Jesus nya ‘petara’ tang ukai Petara ti pemadu bekuasa. (Peda nota pelajar ke Jhn. 1:1.) Tauka iya engka ngangau Jesus sama baka chara nembiak Petara ngangauka bala melikat ke mai pesan Jehovah ba Sempekat Lama. Ambika chunto, kekadang penulis Bup Kudus tauka orang bukai ngumbai melikat ke mai pesan Petara nya, baka Petara Jehovah empu. (Banding P-kal. 16:7-11, 13; 18:1-5, 22-33; 32:24-30; P-ulu. 6:11-15; 13:20-22.) Nya alai, Thomas engka ngangau Jesus ‘Petara aku’ laban iya nemu Jesus nya tuai pengari jaku Petara ti bendar.
Macha Bup Kudus
(John 20:1-18) Tumu pagi hari Minggu, lebuh hari agi petang, Maria Magdalin mansang ngagai kubur, lalu meda batu nya endang udah dibaringka ari mua kubur nya. 2 Iya lalu belanda mansang ngagai Simon Peter, enggau ngagai siku murid ke dikerinduka Jesus, lalu madah ngagai seduai iya, ‘Sida udah ngambi Tuan ari kubur, lalu kami enda nemu endur alai sida udah ngengkahka iya!’ 3 Peter enggau murid nya mupuk lalu mansang ngagai kubur. 4 Seduai iya sama belanda, tang murid ti siku nya laju agi ari Peter, lalu dulu agi datai ba kubur. 5 Iya engkenduk lalu nilik ke dalam kubur, lalu tepedaka kain linin ti dikena mungkus Jesus, tang iya enda tama. 6 Udah nya Peter, ke datai dudi ari iya, tama ke dalam kubur nya, lalu tepedaka kain linin nya dia, 7 enggau kain ti udah dikena mungkus pala Jesus. Kain nya digulungka kediri, enda digulungka sama enggau kain linin. 8 Udah nya murid ti siku nya, ke dulu agi datai ba kubur nya, mega tama. Iya meda, lalu arap, 9 laban nyentuk ngagai maya nya, seduai iya apin meretika Bup Kudus ti madahka Jesus enda tau enda angkat ari mati. 10 Udah nya murid ke dua iku nya lalu pulai. 11 Tang Maria bediri nyabak di luar kubur. Lebuh iya nyabak, iya engkenduk lalu nilik ke dalam kubur. 12 Iya lalu tepedaka dua iku melikat ke ngena gari burak, duduk ba endur alai bangkai Jesus udah digalika, siku muak ari pala, lalu siku muak ari kaki. 13 Ku seduai iya bejaku ngagai Maria, “Indu, nama kebuah nuan nyabak?” Maria lalu bejaku ngagai seduai iya, ‘Sida udah ngambi Tuan aku, lalu aku enda nemu dini alai sida udah engkah iya!’ 14 Lebuh Maria udah nyebut nya, iya nguing, lalu tepedaka Jesus bediri dia, tang iya enda ngelala orang nya Jesus. 15 Jesus lalu bejaku ngagai iya, “Indu, nama kebuah nuan nyabak? Sapa digiga nuan?” Maria ngumbai orang nya tukang kebun, nya alai ku iya bejaku, ‘Tuan, enti nuan udah mai iya kebukai, padahka ngagai aku endur alai nuan udah ngengkahka iya, ngambika aku ngambi iya.’ 16 Jesus lalu bejaku ngagai iya, “Maria!” Maria nguing lalu bejaku ngagai iya ngena jaku orang Hebrew, “Rabbouni!” (Reti nya “Pengajar.”) 17 Ku Jesus bejaku ngagai iya, ‘Anang megai aku, laban aku apin niki ngagai Apai. Tang mupuk nuan ngagai sida menyadi aku, lalu padahka ngagai sida, aku niki ngagai Apai aku enggau Apai kita, ngagai Petara aku enggau Petara kita.’ 18 Maria Magdalin mupuk lalu madah ngagai sida murid, ‘Aku udah meda Tuan.’ Iya lalu madah ngagai sida utai ti udah disebut Tuan ngagai iya.
12-18 NOVEMBER
RETA ARI BUP KUDUS | KEREJA RASUL 1-3
“Eklisia Kristian Nerima Roh Kudus”
(Kereja Rasul 2:1-8) Lebuh hari Pentikos udah datai, semua sida begempuru ba endur siti. 2 Tekala nya utai ti munyi ribut biaubalai lalu datai ari langit, lalu ngemenuhka rumah ti alai sida duduk. 3 Utai ti baka daun api lalu pegari ba tengah-tengah sida, ti bechabang lalu inggap ba genap iku sida. 4 Semua sida lalu dipenuhka enggau Roh Kudus, lalu belabuh bejaku ngena jaku orang bansa bukai nitihka penau ti diberi Roh Kudus. 5 Nyadi di Jerusalem lebuh maya nya bisi orang Judah ke angkunka Petara, ke datai ari semua menua di dunya tu. 6 Lebuh sida ninga munyi utai nya, sida lalu begelumu, lalu semua sida tekenyit ati, laban genap iku sida bela ninga bala orang ke arap nya bejaku ngena jaku bansa sida. 7 Sida balat alit ati sereta iran, lalu nanya, “Ukai enda semua sida ke bejaku tu orang Galili magang? 8 Nya alai nama kebuah kitai bela ninga sida tu bejaku ngena jaku kitai empu?
(Kereja Rasul 2:14) Tang Peter, ke bediri enggau sida ke sebelas iku, lalu bejaku enggau nyawa ti inggar ngagai orang mayuh: “Kita orang Judah, enggau semua kita ke diau di Jerusalem, awakka kita nemu utai tu, lalu pendingka utai ti disebut aku.
(Kereja Rasul 2:37, 38) Lebuh orang mayuh ninga nya, ati sida balat tusah. Sida lalu bejaku ngagai Peter enggau ngagai sida rasul ti bukai, “Menyadi, nama utai ti patut dikereja kami?” 38 Ku Peter bejaku ngagai sida, ‘Nesal ati ke dosa kita, genap iku kita, lalu dibaptisa dalam nama Jesus Kristus, ngambika dosa kita diampun, lalu kita deka nerima Roh Kudus nyadika pemeri ti diberi Petara.
(Kereja Rasul 2:41) Sida ke arapka pesan iya, lalu dibaptisa. Kira tiga ribu iku orang ditambahka ngagai bala sida sehari nya.
(Kereja Rasul 2:42-47) Sida angkun belajar ari sida rasul, begempuru enggau sida, makai roti, sereta besampi. 43 Genap iku orang bela nangi laban mayuh kereja ajih enggau kereja ti nyelai dikereja sida rasul. 44 Semua orang ke arap begulai enggau pangan diri lalu bekunsika pemisi sida enggau pangan diri. 45 Sida nyual reta tengkira sida, lalu nyadung duit ti ulih sida ari nya ngagai semua bala sida, nitihka guna sida siku-siku. 46 Tiap hari sida begempuru dalam Rumah Sembiang. Sida makai roti dalam rumah sida. Sida beserumpu makai lalu bekunsika pemakai enggau ati ti gerah mudah sereta gaga, 47 muji Petara sereta dikerinduka semua orang. Lalu tiap hari Tuhan nambahka orang ke diselamatka ngagai bala sida.
w86 1/12 29 ¶4-5, 7
Pemeri ti Ngagaka Ati
Ba hari keterubah eklisia Kristian ditumbuhka ba taun 33 M., 3,000 iku orang ke baru dibaptisa sama ‘begempuru, makai roti, sereta besampi.’ Nama kebuah? Ngambika sida ulih negapka pengarap “enggau angkun belajar ari sida rasul.”—Kereja Rasul 2:41, 42.
Orang Judah enggau orang bansa bukai ke nemuai ngagai Jerusalem semina deka diau dia sepemanjai Pengerami Pentikos diintu. Tang sida ke udah nyadi Kristian deka nemuai lama agi sereta belajar mayuh agi kena negapka pengarap baru sida. Ketegal tu, sida begunaka pemakai sereta endur diau. Sekeda temuai nadai mai duit ti chukup lalu sekeda bisi mai duit lebih. Nya alai sida ke diau ba Jerusalem bekunsika utai sereta meri utai ti diguna ngagai menyadi ke begunaka bantu.—Kereja Rasul 2:43-47.
Pengawa nyual reta tengkira sereta bekunsika utai dikereja enggau ati ti deka. Nadai seiku pan ditating ngambika nyual tauka meri utai sida, pia mega pengawa tu ukai meransang bala menyadi nyadi seranta. Tu ukai reti iya menyadi ti kaya agi patut nyual semua reta sida lalu nyadi seranta. Tang, ketegal sida siruka bala menyadi ke napi penusah ba maya nya, sida nyual reta tengkira lalu meri duit ke diulih ngambika ulih ngemansangka pengawa bekaul enggau Perintah Petara.—Banding 2 Korint 8:12-15.
Ngulihka Penemu Bup Kudus ti Berega
(Kereja Rasul 3:15, NW) lalu kita munuh iya ti Tuai Pengiring pengidup. Tang Petara udah ngangkatka iya ari mati. Kami empu nyadika saksi nya.
it-2 61 ¶1
Jesus Kristus
“Tuai Pengiring pengidup.” Jesus Kristus meri pengidup mensia iya ti sempurna nyadika tebus kena ngambarka pengasih Apai iya. Tu muka jalai ngagai bala nembiak Jesus ke dipilih merintah enggau iya ba serega sereta bala murid ke bukai nyadi rayat Perintah Petara ba dunya. (Mat. 6:10; Jhn. 3:16; Eps. 1:7; Heb. 2:5) Nya alai iya dikumbai “Tuai Pengiring pengidup” ke semua mensia. (SKR. 3:15) Reti jaku Gerika tu “tuai pengiring,” bekaul enggau Moses (SKR. 7:27, 35) ke “merintah” ba Israel.
(Kereja Rasul 3:19) Nya alai, nesal ati meh kita lalu pulai baru ngagai Petara, ngambika dosa kita diampun,
cl 265 ¶14
Petara ke “Sedia Deka Ngampun”
14 Pengampun Jehovah digambarka enggau dalam agi ba Kereja Rasul 3:19: ‘Nya alai, nesal ati meh kita lalu pulai baru ngagai Petara, ngambika dosa kita diampun.’ Leka jaku ke penudi dalam jaku pengawa Gerika ulih mai reti “dipadam, . . . dikinsil tauka dibuai.” Nitihka sekeda pakar, pengampun Petara ulih digambarka lebuh madam utai ke ditulis. Baka ni tu dikereja? Ba jeman kelia, dawat digaga ngena arang, getah enggau ai. Utai ke ditulis ulih dipadam ngena span ti basah. Tu ngambarka pengasih Petara. Lebuh Iya ngampunka dosa kitai, Iya baka ke ngambi span lalu madam dosa kitai.
Macha Bup Kudus
(Kereja Rasul 2:1-21) Lebuh hari Pentikos udah datai, semua sida begempuru ba endur siti. 2 Tekala nya utai ti munyi ribut biaubalai lalu datai ari langit, lalu ngemenuhka rumah ti alai sida duduk. 3 Utai ti baka daun api lalu pegari ba tengah-tengah sida, ti bechabang lalu inggap ba genap iku sida. 4 Semua sida lalu dipenuhka enggau Roh Kudus, lalu belabuh bejaku ngena jaku orang bansa bukai nitihka penau ti diberi Roh Kudus. 5 Nyadi di Jerusalem lebuh maya nya bisi orang Judah ke angkunka Petara, ke datai ari semua menua di dunya tu. 6 Lebuh sida ninga munyi utai nya, sida lalu begelumu, lalu semua sida tekenyit ati, laban genap iku sida bela ninga bala orang ke arap nya bejaku ngena jaku bansa sida. 7 Sida balat alit ati sereta iran, lalu nanya, ‘Ukai enda semua sida ke bejaku tu orang Galili magang? 8 Nya alai nama kebuah kitai bela ninga sida tu bejaku ngena jaku kitai empu? 9 Kitai tu datai ari menua Partia, Media enggau Elam, Mesopotamia, Judea, enggau Kapadosia, Pontus enggau Asia, 10 Prigia enggau Pampilia, Ejip enggau Libia semak Sairin, enggau temuai ari Rome, nyengkaum orang Judah enggau orang bansa bukai ke udah masuk pengarap orang Judah, 11 orang ari Krit enggau Arabia. Tang semua kitai bela ninga sida tu bejaku ngena jaku kitai empu, madahka pasal pemesai pengawa Petara!’ 12 Semua sida balat alit ati sereta beba penemu. Ku sida bejaku enggau pangan diri, “Nama reti utai tu?” 13 Tang sida ti bukai ngelese, ku sida “Sida tu mabuk!” 14 Tang Peter, ke bediri enggau sida ke sebelas iku, lalu bejaku enggau nyawa ti inggar ngagai orang mayuh: “Kita orang Judah, enggau semua kita ke diau di Jerusalem, awakka kita nemu utai tu, lalu pendingka utai ti disebut aku. 15 Iya ti bendar, orang tu ukai mabuk munyi ti disangka kita, laban jam diatu baru pukul semilan pagi. 16 Tu meh utai ti udah disebut nabi Joel: 17 ‘Ba hari ti penudi, ku Petara bejaku, Aku deka nuang Roh Aku ngagai semua mensia, lalu anak lelaki enggau anak indu kita deka benabi, lalu anak bujang kita deka meda genera, lalu sida ke tuai deka bemimpi. 18 Sigi amat. Lebuh maya nya Aku deka nuang Roh Aku ngagai bala ulun ti indu enggau bala ulun Aku ti lelaki, lalu sida deka benabi. 19 Lalu Aku deka ngayanka tanda ti nyelai di langit enggau kereja ti nyelai ba dunya di baruh, darah, api enggau sebun ti baka asap. 20 Mata hari deka piam, lalu bulan deka bebali mirah baka darah, sebedau Hari Tuhan datai hari ti besai sereta bemulia nya. 21 Lalu barang sapa ngangauka nama Tuhan, deka diselamatka.’
19-25 NOVEMBER
RETA ARI BUP KUDUS | KEREJA RASUL 4-5
“Sida Berani Nusui Pesan Petara”
(Kereja Rasul 4:5-13) Hari siti, bala orang ke megai perintah, sida tuai bansa enggau sida pengajar Adat begempuru di Jerusalem 6 sama enggau Imam Besai Anas, enggau Kaiapas, John, Aleksander, enggau sida ti bukai ke ari ruang bilik imam besai. 7 Lebuh sida udah ngasuh Peter seduai John bediri di mua sida, sida lalu nanya, “Ngena kuasa apa tauka ngena nama sapa seduai ngereja utai tu?” 8 Peter, ke penuh laban Roh Kudus, lalu bejaku ngagai sida, ‘Kita orang perintah, enggau kita ke tuai bansa: 9 enti kami duai sehari tu ditanyaka pasal kereja ti manah ti udah dikereja ba orang ke enda ulih bejalai, pasal jalai orang tu udah digeraika, 10 awakka semua kita nemu, lalu awakka semua orang Israel nemu, orang ke bediri di mua kita ditu diatu, udah digeraika ulih kuasa nama Jesus Kristus orang Nasaret, ke udah [“dipantang,” NW] kita, lalu udah diangkatka Petara idup baru ari mati. 11 Jesus nya meh “batu ti ditulak kita ke tukang rumah, tang udah nyadi batu ti pemadu beguna.” 12 Pengelepas semina ditemu dalam orang siku aja, laban nadai nama bukai di baruh langit ti diberi ngagai mensia ti ulih nyelamatka kitai.” 13 Lebuh sida meda pemerani Peter seduai John, lalu nemu seduai iya ukai orang ke bepelajar, tang orang ke sengapa-dia, sida balat alit ati. Nya baru sida nemu seduai iya udah bekaling enggau Jesus.
w08 1/9 15, kutak
Ari Jaku ngagai Ayat ti Kudus—Utai ke Ditulis sereta Orang Kristian ba Abad ti Keterubah
Kati Bala Rasul Nemu Macha enggau Nulis?
Lebuh orang ke megai perintah sereta tuai bansa ba Jerusalem “meda pemerani Peter seduai John, lalu nemu seduai iya ukai orang ke bepelajar, tang orang ke sengapa-dia, sida balat alit ati.” (Kereja Rasul 4:13) Kati bala rasul ukai orang ti bepelajar tauka enda nemu macha? Nitihka utai ke dipadah tu, The New Interpreter’s Bible madahka: “Rambai jaku tu ukai reti iya Peter [enggau John] nadai besekula sereta enda nemu macha enggau nulis. Rambai jaku tu semina nunjukka tikas sosial ti bebida entara bala rasul enggau orang ti ngakim sida.”
w08 15/5 30 ¶6
Penerang ari Bup Kereja Rasul
4:13—Kati Peter enggau John enda bepelajar sereta enda nemu macha enggau nulis? Enda. Peter enggau John dikumbai “ukai orang ke bepelajar, tang orang ke sengapa-dia” laban seduai iya enda nerima latih ba sekula jalai pengarap orang Judah.
(Kereja Rasul 4:18-20) Nya alai sida lalu ngangauka Peter seduai John tama baru, lalu enda nyagi seduai iya bejaku tauka ngajar dalam nama Jesus. 19 Tang ku Peter seduai John nyaut sida, ‘Sekalika kami, di mua Petara, patut mendingka kita, lalu enda mendingka Petara, awakka kita empu berunding, 20 laban kami enda ulih nagang diri bejakuka pasal utai ti udah dipeda enggau didinga kami.’
(Kereja Rasul 4:23-31) Lebuh Peter seduai John udah dilepaska, seduai iya lalu pulai ngagai raban sida empu, lalu madahka jaku ti udah disebut sida tuai imam, enggau bala tuai bansa, ngagai seduai iya. 24 Lebuh sida ninga nya, semua sida lalu besampi enggau nyawa ti inggar ngagai Petara. Ku sida, ‘Tuhan ti Pemadu Tinggi, ke ngaga langit, tanah, enggau tasik, enggau semua utai ti dalam sida, 25 ke udah bejaku ngena Roh Kudus nengah mulut nembiak Nuan David, ‘Nama kebuah orang bansa bukai pedis ati, lalu semua bansa berundingka utai ti nadai guna? 26 Bala raja dunya angkat bediri, lalu orang ke megai perintah udah begempuru ngelaban Jehovah enggau ngelaban Kristus Iya.’ 27 Laban dalam nengeri tu, iya ti bendar, Herod seduai Pontius Pilate, enggau orang bansa bukai, enggau orang Israel, udah begempuru ngelaban Nembiak Nuan ti kudus, Jesus ke udah dipilih Nuan, 28 ngambika sida ngereja utai ti endang udah dulu diletak Nuan deka nyadi. 29 Nya alai diatu, Jehovah, peda Nuan pemalat sida ngemba kami, lalu beri pemerani ngagai nembiak nuan kena sida nusui pesan Nuan, 30 lebuh Nuan ngunjurka jari Nuan lalu ngeraika orang, lalu tanda ti nyelai enggau kereja ajih dikereja dalam nama Jesus, nembiak Nuan ti kudus.’ 31 Lebuh sida udah besampi, endur alai sida ke begempuru lalu berenyang. Semua sida lalu dipenuhka enggau Roh Kudus, lalu sida berani nusui pesan Petara.
it-1 128 ¶3
Rasul
Pengawa ba Eklisia Kristian. Roh kudus ke diterima maya Pentikos balat ngeringka bala rasul. Lima iti bagi ti keterubah ba bup Kereja Rasul madahka pemerani bala rasul lebuh ngerembaika berita manah sereta pengangkat Jesus ari mati taja pan sida dijil, dipalu sereta diemba deka dibunuh bala orang ke merintah. Pengudah Pentikos, ketegal iring ari bala rasul enggau kuasa roh kudus, eklisia Kristian majak besai. (SKR. 2:41; 4:4) Pengawa nginjil sida keterubah iya dikereja semina ba Jerusalem, tang udah nya ngerembai ngagai Samaria lalu nyau kelama ngagai serata dunya.—SKR. 5:42; 6:7; 8:5-17, 25; 1:8.
Ngulihka Penemu Bup Kudus ti Berega
(Kereja Rasul 4:11, NW) Jesus nya meh “batu ti ditulak kita ke tukang rumah, tang udah nyadi batu sukut ti pemadu beguna.”
it-1 514 ¶4
Batu Sukut
Masmur 118:22 nerangka batu ti enda diguna tukang rumah deka nyadi “batu sukut ti pemadu beguna” (Heb., roʼsh pin·nahʹ). Jesus nyebut lalu ngereja utai ti dipadah ngagai iya empu ke nyadi “batu sukut ti pemadu beguna” (Gr., ke·pha·leʹ go·niʹas, batu sukut ti pemadu beguna). (Mat. 21:42; Mrk. 12:10, 11; Luk. 20:17) Baka batu ba atas siti begunan ke terang dipeda, Jesus Kristus dipilih nyadi batu sukut ke eklisia Kristian ke orang ti dipilih ke serega, ke disamaka enggau Rumah Sembiang. Peter mega nyebut Masmur 118:22 dikeamatka ba Kristus, nunjukka iya “batu” ke enda diguna mensia tang dipilih Petara nyadi “batu sukut ti pemadu beguna.”—SKR. 4:8-12; peda mega 1 Pet. 2:4-7.
(Kereja Rasul 5:1) Tang siku lelaki ke benama Ananias enggau bini iya Sapira nyual sebidang tanah.
Peter enggau Ananias Bula—Nama Ulih Dipelajarka Kitai?
Ananias enggau bini iya nyual sekeda reta tengkira kena ngulihka duit ngambika nulung sida ke baru dibaptisa. Lebuh Ananias mai duit nya ngagai bala rasul, iya madahka nya semua penyampau duit asil ari tanah ke dijual. Tu enda amat! Iya nyimpan sekeda duit nya ke iya empu! Petara ngasuh Peter nemu tu, lalu Peter madahka Ananias: ‘Nuan ukai ngemulaka kami, tang ngemulaka Petara.’ Pengudah nya, Ananias rebah lalu mati. Tiga jam udah nya, bini iya tama. Enda nemu utai ke udah nyadi ngagai laki iya, iya mega bejaku bula, rebah lalu mati.
Macha Bup Kudus
(Kereja Rasul 5:27-42) Lebuh sida udah mai sida rasul, sida lalu ngasuh sida rasul bediri di mua raban Kunsil. Imam besai lalu nanya sida. 28 Ku iya, ‘Kami udah meri atur ti terit, enda nyagi kita ngajar dalam nama tu, tang diatu kita udah ngisi Jerusalem ngena ajar kita, lalu kita keras deka ngasuh kami betanggungjawapka pemati iya!’ 29 Tang ku Peter enggau sida rasul bukai nyaut, ‘Kami enda tau enda ngasika Petara, ukai ngasika mensia. 30 Petara aki ini kitai udah ngangkatka Jesus ari mati, ke udah dibunuh kita ba [“tiang perinsa,” NW]. 31 Petara udah ngangkatka iya muak ari kanan Iya nyadi Kepala enggau Juruselamat, ngambika Iya ulih meri orang Israel peluang nesal ati lalu dosa sida diampun. 32 Lalu kami empu nyadi saksi ke utai nya, lalu baka nya mega Roh Kudus ke udah diberi Petara ngagai orang ke ngasika Iya.’ 33 Lebuh sida ninga nya, sida balat amat pedis ati, lalu deka munuh sida rasul. 34 Tang siku orang Parisi ke benama Gamaliel ke dalam Kunsil nya, ke nyadi pengajar Adat sereta dibasa orang mayuh, bediri lalu ngasuh orang mai sida rasul pansut enda lama. 35 Udah nya iya lalu bejaku ngagai raban Kunsil, ‘Kita orang Israel, perundingka enggau manah utai ti deka dikereja kita ngagai orang tu. 36 Laban dulu suba Tadeus angkat ngelaban, ngumbai diri orang ke besai, lalu kira empat ratus iku orang nitihka iya. Tang iya dibunuh, lalu semua orang ke nitihka iya pambar lalu lesap. 37 Udah nya Judas ari Galili angkat ngelaban lebuh maya ngitung tubuh, lalu mai orang enggau iya. Iya mega dibunuh, lalu semua orang ke nitihka iya pambar magang. 38 Nya alai, ba pekara ke diatu, aku madah ngagai kita, anang ngereja sebarang utai ngagai sida. Awakka sida pia aja! Laban enti pelan tauka pengawa tu datai ari mensia, iya deka puntan. 39 Tang enti utai tu datai ari Petara, kita enda ulih ngalahka sida, lalu kita deka ditemu ngelaban Petara!’ Sida lalu besetuju enggau penemu Gamaliel. 40 Lebuh sida udah ngasuh sida rasul tama, sida lalu ngasuh sida disipat. Udah nya sida enda nyagi sida bejaku dalam nama Jesus, lalu ngelepaska sida. 41 Lebuh sida rasul angkat ari balai Kunsil, sida lalu rami gaga ati ke diri ke udah dikira patut kena perinsa ketegal nama Jesus. 42 Lalu tiap hari, dalam Rumah Sembiang enggau dalam rumah sida empu, sida enda ngetu-ngetu ngajar sereta madahka Jesus nya Kristus.
26 NOVEMBER–2 DISEMBER
RETA ARI BUP KUDUS | KEREJA RASUL 6-8
“Eklisia Kristian ti Baru Diuji”
(Kereja Rasul 6:1) Lebuh maya nya menya, lebuh bala murid nyau majak nambah-menambah, orang Judah ke bejaku ngena jaku Gerika mutap ngelaban orang Hebrew, laban indu balu sida enda dikibuhka orang lebuh orang nyadung pemakai tiap hari.
“Kami Enda Tau Enda Ngasika Petara”
17 Eklisia ke agi baru napi penanggul ke ulih ngachau ari dalam. Nama nya? Mayuh ari bala murid ke udah dibaptisa nya temuai ke datai ngagai Jerusalem lalu sida deka belajar mayuh agi sebedau sida pulai ngagai menua sida empu. Bala murid ke diau ba Jerusalem meri duit kena meli pemakai sereta utai ke diguna enggau ati ti deka. (Kereja Rasul 2:44-46; 4:34-37) Maya nya, bisi penanggul nyadi. “Lebuh orang nyadung pemakai tiap hari,” indu balu ke bejaku ngena jaku Gerika “enda dikibuhka.” (Kereja Rasul 6:1) Tang, indu balu ke bejaku ngena jaku Hebrew dikibuhka. Tu nyadi ketegal bechiping. Penanggul tu ulih ngerusak penyerakup.
(Kereja Rasul 6:2-7) Sida rasul ke dua belas lalu ngempuruka semua orang ke arap, lalu bejaku ngagai sida, ‘Kami enda patut ngelengkaka pengawa nusui jaku Petara, lalu meri orang makai. 3 Nya alai, menyadi, pilih ari bala kita empu tujuh iku orang ke manah perangai, ke penuh laban roh kudus sereta bepenemu-dalam, ke tau diasuh kitai ngereja pengawa tu, 4 lalu kami empu deka ngemeranka pengawa besampi enggau nusui Berita Manah.’ 5 Utai ti disebut sida ngelantangka ati semua sida, lalu sida milih Stepen ke penuh laban pengarap enggau roh kudus, sama enggau Philip, Prokorus, Nikanor, Timon, Parmenas enggau Nikolaus, siku orang bansa bukai ke datai ari Antiok ke udah masuk pengarap orang Judah. 6 Sida lalu ngasuh orang nya bediri di mua sida rasul, ke besampi lalu ngengkahka jari atas sida. 7 Jaku Petara majak ngelekai. Pemayuh murid lalu balat amat majak nambah-menambah di Jerusalem, lalu mayuh amat mega sida imam nerima pengarap nya.
“Kami Enda Tau Enda Ngasika Petara”
18 Bala rasul ke nyadi raban ti ngiring nemu sida enda patut “ngelengkaka jaku Petara lalu meri orang makai” laban eklisia maya nya majak nambah. (Kereja Rasul 6:2) Kena mutarka penanggul tu, sida ngasuh bala murid ngiga tujuh iku menyadi Kristian ke lelaki ti ‘penuh laban roh kudus sereta bepenemu-dalam’ ngambika sida ulih megai “pengawa tu.” (Kereja Rasul 6:3) Menyadi Kristian ke lelaki ti ulih dikena ukai semina meri pemakai tang sida mega megai duit, meli utai ti dikena sereta nulis semua utai ke diguna. Semua sida ke dipilih ngundan nama Gerika lalu tu kena ngenyamaika ati indu balu ke bejaku ngena jaku Gerika. Pengudah besampika tu, bala rasul milih tujuh iku bala menyadi kena megai “pengawa tu.”
(Kereja Rasul 7:58–8:1) Sida lalu ngirit iya pansut ari nengeri, lalu belabuh nuku iya ngena batu. Orang ke besalah iya lalu ngengkahka serayung sida ba kaki orang bujang siku ke benama Saul. 59 Lebuh sida benung nuku Stepen ngena batu, iya besampi, ‘Tuan Jesus, sambut semengat aku!’ 60 Iya lalu besugang, lalu ngangau enggau nyawa ti inggar, ‘Jehovah! Anang besalahka sida ketegal dosa tu!’ Lebuh iya udah nyebut nya, iya lalu mati.
8 Saul rindu meda Stepen kena bunuh. Berengkah ari sehari nya raban eklisia di Jerusalem balat amat kena perinsa, lalu kelimpah ari sida rasul, semua sida pambar ngagai serata menua Judea enggau Samaria.
Ngulihka Penemu Bup Kudus ti Berega
(Kereja Rasul 6:15) Semua orang ke duduk dalam Kunsil nya bela merening magang ngagai Stepen, lalu sida meda mua iya baka mua melikat.
Stepen—“Penuh Laban Berekat enggau Kuasa”
2 Bisi utai ti ngalitka ati pasal mua Stepen ba maya tu. Bala hakim merening iya lalu meda mua iya “baka mua melikat.” (Kereja Rasul 6:15) Bala melikat mai pesan Petara Jehovah lalu sida lantang sereta enda takut. Pia mega enggau Stepen lalu bala hakim ti begedika iya ulih meda nya ba Stepen. Nama kebuah iya enda takut?
(Kereja Rasul 8:26-30) Udah nya siku melikat Jehovah bejaku ngagai Philip, “Angkat nuan, lalu bejalai tunga ke selatan ngagai jalai raya ti nuju ari Jerusalem ngagai Gasa.” (Jalai raya nya ngerenchah menua puang.) 27 Philip angkat lalu mupuk. Nyadi siku pemesai ari Etiopia, ke udah dipeliri, ke ngemataka sarang wang Kuin Kandas menua Etiopia, udah mansang ngagai Jerusalem deka nyembah Petara. 28 Lalu iya diatu benung mulaika diri ngagai menua iya empu, duduk dalam kerita kuda iya, lalu macha bup nabi Isaiah. 29 Roh Kudus lalu bejaku ngagai Philip, “Alai nuan mansang ngagai kerita kuda nya.” 30 Philip lalu belanda ngagai kerita kuda nya, lalu ninga orang nya macha bup nabi Isaiah. Philip lalu nanya iya, “Kati nuan meretika utai ti dibacha nuan?”
Ngerembaika “Berita Manah Pasal Jesus”
16 Orang Kristian kemayaharitu ngereja pengawa nginjil baka ke digaga Philip. Selalu iya, sida ulih madahka berita Perintah Petara ngagai orang ti ditemu sida ba maya ti enda formal, baka lebuh sida bejalai. Kesuah agi, kitai enda tekenyit tetemuka orang ke lurus ati. Tu endang udah dijangka, laban Bup Kudus madahka melikat bisi ngiring pengawa nginjil ngerembaika pesan “ngagai semua bansa, raban bansa jaku enggau menua.” (Pem. 14:6) Iring ari bala melikat ba pengawa nginjil udah dipadahka Jesus. Ba sempama pasal gandum enggau rumput, Jesus madahka maya ngetau—pengujung sistem tu—“orang ke ngetau nya bala melikat.” Iya madahka bala melikat tu “deka muai ari Perintah Iya semua utai ti ngasuh bedosa, enggau semua orang ke ngereja penyai.” (Mat. 13:37-41) Ba maya ti sama, bala melikat tu mega deka ngumpul sida ke dipilih merintah enggau Jesus ba serega—udah nya “mayuh amat orang” ari “bedus ti bukai”—ke deka dibai Jehovah ngagai gerempung Iya.—Pem. 7:9; John 6:44, 65; 10:16.
Macha Bup Kudus
(Kereja Rasul 6:1-15) Lebuh maya nya menya, lebuh bala murid nyau majak nambah-menambah, orang Judah ke bejaku ngena jaku Gerika mutap ngelaban orang Hebrew, laban indu balu sida enda dikibuhka orang lebuh orang nyadung pemakai tiap hari. 2 Sida rasul ke dua belas lalu ngempuruka semua orang ke arap, lalu bejaku ngagai sida, ‘Kami enda patut ngelengkaka pengawa nusui jaku Petara, lalu meri orang makai. 3 Nya alai, menyadi, pilih ari bala kita empu tujuh iku orang ke manah perangai, ke penuh laban Roh Kudus sereta bepenemu-dalam, ke tau diasuh kitai ngereja pengawa tu, 4 lalu kami empu deka ngemeranka pengawa besampi enggau nusui Berita Manah.’ 5 Utai ti disebut sida ngelantangka ati semua sida, lalu sida milih Stepen ke penuh laban pengarap enggau Roh Kudus, sama enggau Philip, Prokorus, Nikanor, Timon, Parmenas enggau Nikolaus, siku orang bansa bukai ke datai ari Antiok ke udah masuk pengarap orang Judah. 6 Sida lalu ngasuh orang nya bediri di mua sida rasul, ke besampi lalu ngengkahka jari atas sida. 7 Jaku Petara majak ngelekai. Pemayuh murid lalu balat amat majak nambah-menambah di Jerusalem, lalu mayuh amat mega sida imam nerima pengarap nya. 8 Stepen, ke penuh laban berekat enggau kuasa, ngereja mayuh kereja ajih enggau kereja ti nyelai ba orang mayuh. 9 Udah nya sekeda orang ari raban Balai Gempuru Orang Ke Udah Dilepaska enggau orang Judah ke datai ari menua Sairin, ari Aleksandria, enggau ari menua Silisia enggau Asia, belabuh betalat enggau Stepen. 10 Tang sida enda ulih ngelaban penemu-dalam enggau kuasa Roh Kudus ti dikena iya bejaku. 11 Sida lalu belalai nyungkak orang nyebut, ‘Kami udah ninga iya bejaku busung ngelaban Moses, enggau ngelaban Petara!’ 12 Lalu sida nyungkak orang mayuh, enggau sida tuai bansa, enggau sida pengajar Adat. Sida lalu nangkap Stepen lalu mai iya ngagai Kunsil. 13 Sida ngasuh orang besaksi bula ngelaban iya, munyi tu, “Orang tu enda ngetu-ngetu bejaku ngelaban endur ti kudus tu, enggau ngelaban Adat, 14 laban kami udah ninga iya madahka Jesus orang Nasaret deka ngerusak endur tu, lalu ngubah semua adat asal ti diberi Moses ngagai kitai!” 15 Semua orang ke duduk dalam Kunsil nya bela merening magang ngagai Stepen, lalu sida meda mua iya baka mua melikat.