Tanya Ari Pemacha

Kati jaku ke ditulis Paul ba 1 Korint 15:29 mai reti sekeda orang Kristian dibaptisa ketegal ngarika orang ke udah mati?

Enda. Bup Kudus tauka bup sejarah nadai kala nulis utai tu kala nyadi.

Chara ayat tu disalin ngasuh orang ngumbai pengawa dibaptisa ngarika orang ke udah mati bisi nyadi ba maya Paul. Ambika chunto, Bup Kudus Baru nyalin ayat tu: “Enti nadai pengangkat ari mati, nama kebuah orang dibaptisa ngarika orang ke mati?”

Taja pia, peratika utai ke dipadah dua iku pakar Bup Kudus. Nitihka pakar Bup Kudus ke benama Dr. Gregory Lockwood, nadai bukti dalam Bup Kudus tauka bup sejarah ti madahka orang dibaptisa ngarika orang ke mati. Profesor Gordon D. Fee setuju enggau tu. Ku iya: “Bup Kudus tauka bup sejarah nadai kala nulis pasal utai tu. Pia mega, nadai bukti ba Sempekat Baru ti nunjukka orang Kristian ba kurun keterubah tauka gerija ti ditumbuhka pengudah bala rasul udah nadai ngereja pengawa tu.”

Ku Bup Kudus, bala murid Jesus diasuh “bejalai . . . ngagai semua bansa lalu gaga sida nyadi murid . . . , maptisa sida . . . , lalu ajar sida ngasika semua pesan” ti udah diberi Jesus. (Mat. 28:19, 20) Sebedau orang dibaptisa, iya patut belajar, pechaya sereta ngasika Jehovah enggau Anak Iya. Orang ke mati enda ulih ngereja tu, lalu nadai orang ulih ngarika iya ngereja nya.—P-jar. 9:5, 10; Jhn. 4:1; 1 Kor. 1:14-16.

Nyadi, nama reti ku Paul?

Sekeda orang Korint madahka nadai pengangkat ari mati. (1 Kor. 15:12) Paul enda setuju enggau penemu sida. Ku Paul, “iya mati tiap hari [‘napi pemati genap hari,’ Bup Kudus Berita Manah Ka Rebak Diatu].” Taja pan Paul napi penguji ke ulih nganu nyawa iya, iya ulih arap pengudah iya mati, iya deka diangkatka idup baru ke serega baka Jesus.—1 Kor. 15:30-32, 42-44.

Orang Kristian ba Korint patut sedar pengudah sida dibaptisa, sida deka napi penguji tiap hari lalu patut mati sebedau sida ulih diangkatka idup baru ke serega. Lebuh sida “dibaptisa ke dalam Jesus Kristus,” tu mega reti iya sida ‘dibaptisa ke dalam pemati iya.’—Rom. 6:3.

Pengudah dua taun Jesus dibaptisa, iya madahka dua iku rasul iya: ‘Seduai deka dibaptisa ngena baptisa ti dikena maptisa aku.’ (Mrk. 10:38, 39) Ba ditu, Jesus ukai bejaku pasal baptisa ba ai. Tang iya bejaku pasal “dibaptisa ke dalam pemati.” Reti ku Jesus, ketegal taluk ngagai Petara, tu deka ngujungka pemati iya. Paul nulis, sida ke deka dipilih ke serega deka “merinsa sama enggau Kristus” ngambika sida ‘dimuliaka sama enggau iya.’ (Rom. 8:16, 17; 2 Kor. 4:17) Nya alai, sida patut mati ngambika ulih diangkat ke serega.

Nya alai, utai ku Paul ulih disalin baka tu: “Enti nadai pengangkat ari mati, nama kebuah sida dibaptisa dalam pemati? Enti orang ke mati enda diangkatka idup baru, nama kebuah sida nerima baptisa tu?”