PELAJAR 07
Nama Ditemu Kitai pasal Jehovah?
Lebuh bejaku pasal Petara Jehovah, nama utai ti keterubah ke diperundingka nuan? Kati Jehovah nya Petara ti besai kuasa lalu amat jauh ari mensia, baka bintang ba dunya raya? Tauka kati Iya baka kilat ti ngalitka ati, tang nadai personaliti tauka kualiti? Kati nuan deka nemu mayuh agi pasal Jehovah? Bup Kudus, madahka kitai pasal kualiti Jehovah, sereta pengibuh Iya ke kitai.
1. Nama kebuah kitai enda ulih meda Petara?
‘Petara endang Roh.’ (John 4:24) Iya nadai ngembuan tubuh baka kitai. Ukai semina nya aja, Iya mega diau ba endur ti enda ulih dipeda kitai, iya nya ba serega.
2. Nama sekeda kualiti Petara Jehovah?
Taja pan kitai enda ulih meda Jehovah, tang kitai ulih ngelala kualiti Iya. Bup Kudus madahka: ‘Jehovah rinduka atur ti lurus; Iya enda ninggalka bala nembiak Iya ke tetap ati ngagai Iya.’ (Masmur 37:28) Iya mega “penuh laban penyiru enggau pengasih,” kelebih agi ngagai sida ke napi penusah. (James 5:11) ‘Jehovah diau semak orang ke tusah ati, lalu ngidupka sida ke nadai agi pengadang.’ (Masmur 34:18) Endaka semua tu ngasuh kitai deka semak agi ngagai Iya? Kelimpah ari nya, utai ke digaga kitai bisi kaul enggau asai ati Iya. Enti kitai ngereja utai ti jai, Iya deka berasai tusah ati. (Masmur 78:40, 41) Tang enti kitai ngereja utai ti manah, Iya tentu gaga ati.—Bacha Jaku Dalam 27:11.
3. Baka ni Jehovah ngayanka pengerindu Iya ke kitai?
Pengerindu nya kualiti Jehovah ti nyulut. Bup Kudus madahka, ‘Petara endang pengerindu.’ (1 John 4:8) Kitai ulih belajar pasal pengerindu Jehovah, nengah Bup Kudus sereta utai ti ditempa Iya. (Bacha Surat Kereja Rasul 14:17.) Ambika chunto, mensia ditempa enggau spesial. Kitai ulih meda mayuh macham warna, ninga musik ti manah, sereta ngasaika pemakai ti amat nyamai. Amat, Jehovah deka kitai ngasaika pengidup ti lantang.
BELAJAR MAYUH AGI
Belajar meh baka ni Jehovah ulih ngereja mayuh utai ti ngalitka ati, sereta baka ni Iya ngayanka kualiti Iya ti manah.
4. Roh kudus—kuasa Petara
Kitai ngena jari kitai ngereja mayuh pengawa. Baka ni enggau Jehovah? Iya ngena roh kudus Iya, tauka kuasa Iya ti kudus. Bup Kudus madahka, roh kudus nya ukai seiku orang. Bacha Luke 11:13 enggau Surat Kereja Rasul 2:17, lalu kerandauka tanya tu:
Petara deka “nuangka” roh kudus Iya ngagai sida ke minta. Nyadi, ba runding nuan kati roh kudus nya seiku orang, tauka kuasa kudus ari Petara? Nama kebuah nuan madah baka nya?
Jehovah ngena roh kudus Iya ngereja mayuh utai ti ngalitka ati. Bacha Masmur 33:6 enggau 2 Peter 1:20, 21, lalu kerandauka tanya tu:
Baka ni Jehovah ngena roh kudus Iya?
5. Jehovah ngembuan kualiti ti ngalitka ati
Moses nya penyembah Petara ti tetap ati, lalu iya deka ngelala Petara enggau dalam agi. Ku Moses: “Padahka pelan Nuan ngagai aku, ngambika aku ulih nemu Nuan enggau dalam agi.” (Pemansut 33:13) Jehovah pan, madah ngagai Moses sekeda kualiti Iya. Bacha Pemansut 34:4-6, lalu kerandauka tanya tu:
Nama dipadah Jehovah ngagai Moses pasal kualiti Iya?
Nama kualiti Jehovah ti amat dikerinduka nuan?
6. Jehovah ibuhka orang
Orang Hebrew nya, nembiak Petara, lalu sida nyadi ulun ba menua Ejip. Nama asai ati Jehovah lebuh meda pemerinsa ke ditapi sida? Mainka AUDIO lalu titihka utai ti dibacha, tauka bacha Pemansut 3:1-10. Udah nya, kerandauka tanya tu.
Ari cherita tu, nama utai ke ulih dipelajarka nuan pasal asai ati Jehovah lebuh meda mensia merinsa?—Peda ayat 7 enggau 8.
Ba runding nuan, kati Jehovah amat deka nulung orang ke merinsa? Kati Iya ulih ngereja nya? Nama kebuah nuan bisi runding baka nya?
7. Utai ti ditempa ngajar kitai pasal kualiti Jehovah
Jehovah ngajar kitai pasal kualiti Iya nengah utai ti udah ditempa Iya. Mainka VIDEO. Udahnya bacha Rome 1:20, lalu kerandauka tanya tu.
Lebuh nuan beratika utai ti ditempa ke ngelingi nuan, nama ulih dipelajarka nuan pasal kualiti Jehovah?
BISI ORANG MADAH: “Petara enda ibuhka aku.”
Nama runding nuan?
Nama kebuah nuan berunding baka nya?
LANSA
Jehovah nya Roh ti enda ulih dipeda. Iya ngembuan kualiti ti manah. Kualiti Iya ti nyulut nya, pengerindu.
Ulang Kaji
Nama kebuah kitai enda ulih meda Jehovah?
Nama reti roh kudus?
Nama sekeda kualiti Jehovah?
ARAM BELAJAR
Nemu mayuh agi pasal Jehovah lebuh belajarka empat kualiti Iya ti nyulut.
Pansik bukti ke nunjukka Petara nya ukai kuasa ke bisi ba sebarang alai.
“Kati Petara Bisi ba Barang Alai sereta ba Barang Maya?” (Artikel ba laman web jw.org)
Peresa meh kebuah Bup Kudus madahka roh kudus Petara nya baka jari Iya.
“Nama nya Kuasa Kudus tauka Roh Kudus Petara?” (Artikel ba laman web jw.org)
Seiku lelaki buta tusah deka pechayaka Petara ibuhka iya. Nama utai ke ngubah runding iya?
“Diatu Aku Ulih Nulung Orang Bukai” (Artikel ari Menara Jaga)