3. Jaga meh pengerai nuan

Lebuh kitai nyerahka diri ngagai Jehovah, kitai besemaya deka ngena pengidup, nyawa sereta tubuh kitai gawa ke Iya. Bacha Rome 12:1, 2, lalu kerandauka tanya tu:

• Nama kebuah nuan patut nyaga pengerai nuan?

• Baka ni nuan ulih ngereja nya?

Ke diatu, nuan udah belajar mayuh utai pasal Jehovah sereta engka udah ngaga mayuh ubah ba pengidup. Tang, baka ni enti sema bisi utai nagang nuan ari nyerahka diri ngagai Jehovah sereta dibaptisa? Pelajar tu deka berandauka sekeda penanggul ke ditapi orang ke deka dibaptisa sereta chara mutarka nya.

1. Ni penalam penemu ke patut dikembuan nuan sebedau dibaptisa?

Bup Kudus madahka, kitai patut bisi “penemu pasal pemendar.” (1 Timoti 2:4) Tu ukai reti iya nuan patut nemu semua saut ngagai tiap iti tanya ari Bup Kudus sebedau nuan dibaptisa. Kebendar iya, orang ke udah dibaptisa betaun-taun pan agi terus belajarka Bup Kudus. (Kolosi 1:9, 10) Tang utai ke patut ditemu nuan iya nya, batang ajar ari Bup Kudus. Bala tuai gempuru ulih nulung nuan nemu sekalika nuan chukup penemu tauka enda ngambika ulih dibaptisa.

2. Nama utai bukai ke patut digaga nuan sebedau dibaptisa?

Bup Kudus madahka, ‘Nesal ati meh kita . . . lalu pulai baru ngagai Petara.’ (Bacha Surat Kereja Rasul 3:19.) Reti nya, nuan udah nesal ati ke penyalah ti udah digaga nuan, lalu minta ampun ngagai Petara. Nuan mega bebendar deka nulak utai ti dipegedika Petara lalu idup enggau chara ti ngerinduka ati Iya. Kelimpah ari nya, nuan udah enggau pengawa ba eklisia baka datai ke gempuru enggau tetap sereta begulai nginjil enggau eklisia nyadi penginjil ke bedau dibaptisa.

3. Nama kebuah asai ati ti takut enda patut nagang nuan ari dibaptisa?

Sekeda orang takut sida enda ulih ngereja utai ti udah disemaya sida enggau Jehovah. Kebendar iya, nembiak Petara maya jeman suba kala ngaga penyalah. Tang Jehovah agi sayauka sida. Iya enda ngarapka kitai sempurna. (Bacha Masmur 103:13, 14.) Iya amat gaga ati lebuh meda kitai bebendar meri utai ti pemadu manah ngagai Iya! Lalu Iya besemaya deka nulung kitai. Bup Kudus madahka, ‘Nadai utai ke ulih nyeraraka kitai ari pengerindu Petara.’—Bacha Rome 8:38, 39.

BELAJAR MAYUH AGI

4. Kelala meh Jehovah enggau manah agi

Ni penalam penemu ke patut dikembuan nuan pasal Jehovah sebedau dibaptisa? Nuan patut bisi penemu ti chukup ngambika ulih ngerinduka Iya sereta deka ngagaka ati Iya. Mainka VIDEO kena meda baka ni pemelajar Bup Kudus di serata dunya bebendar ngereja utai ti sama. Udah nya, kerandauka tanya tu.

VIDEO: Jalai Nuju Baptisa (3:56)

• Ba dalam video tu, nama utai ke nulung sida besedia ngambika ulih dibaptisa?

Bacha Rome 12:2, lalu kerandauka tanya tu:

• Kati nuan kakang ati pasal ajar Bup Kudus tauka sekalika Saksi-Saksi Jehovah ngajar utai ti bendar tauka enda?

• Enti au, nama patut digaga nuan?

5. Putarka utai ti ulih nagang nuan ari dibaptisa

Orang ke deka nyerahka diri ngagai Jehovah sereta dibaptisa, deka napi penguji. Mainka VIDEO kena meda siti chunto, lalu kerandauka tanya tu.

VIDEO: Pengerindu ke Jehovah Ngalahka Penguji (5:22)

• Nama penanggul ke patut diputarka Narangerel ngambika ulih nyembah Jehovah?

• Baka ni pengerindu iya ngagai Jehovah nulung iya mujur?

Bacha Jaku Dalam 29:25 enggau 2 Timoti 1:7, lalu kerandauka tanya tu:

• Nama utai ke ngasuh kitai berani napi penguji?

6. Andal meh ke tulung ari Jehovah

Jehovah deka nulung nuan idup nitihka peneka Iya. Mainka VIDEO, lalu kerandauka tanya tu.

VIDEO: Petara Jehovah Deka Nulung Nuan (2:50)

• Ba dalam video tu, nama utai ke nagang pemelajar Bup Kudus nya ari dibaptisa?

• Nama utai ke ngasuh iya andal agi ke Jehovah?

Bacha Isaiah 41:10, 13, lalu kerandauka tanya tu:

• Nama kebuah nuan ulih pechaya, nuan deka mujur ngamatka semaya ke udah digaga nuan ngagai Jehovah lebuh nuan nyerahka diri ngagai Iya?

7. Ngenalamka agi asai ati terima kasih nuan ngagai pengerindu Jehovah

Lebuh nuan belematika pengerindu Jehovah ti dalam ngagai nuan, nuan deka beterima kasih agi ngagai Jehovah lalu nyembah Iya belama iya. Bacha Masmur 40:5, lalu kerandauka tanya tu:

• Nama berekat ari Jehovah ti amat berega ba nuan?

Nabi Jeremiah amat rinduka Jehovah enggau Jaku Iya. Jeremiah gaga ati laban iya ulih ngarika Jehovah. Ku iya: ‘Aku endang enggi Nuan, Jehovah Petara ti Pemadu Bekuasa, lalu leka jaku Nuan ngasuh ati aku gaga sereta lantang.’ (Jeremiah 15:16) Kerandauka tanya tu:

• Nama kebuah nyadi Saksi-Saksi Jehovah nya pekara ti amat spesial?

• Kati nuan deka dibaptisa nyadi seiku ari Saksi-Saksi Jehovah?

• Kati bisi utai nagang nuan ari ngereja nya?

• Ba runding nuan, nama utai ke patut digaga nuan ngambika ulih dibaptisa?

LANSA

Enggau bantu ari Jehovah, nuan ulih mutarka sebarang penanggul ngambika ulih dibaptisa.

Ulang Kaji

• Ni penalam penemu Bup Kudus ke patut ditemu nuan sebedau dibaptisa?

• Nama ubah ke engka patut digaga nuan sebedau dibaptisa?

• Nama kebuah asai ati ti takut enda patut nagang nuan ari dibaptisa?

ARAM BELAJAR

Peratika utai ke patut meransang nuan deka dibaptisa.

“Kati Nuan Udah Sedia Deka Dibaptisa?” (Menara Jaga, Mac 2020)

Belajarka chara kena mutarka utai ti nagang nuan ari dibaptisa.

“Nama Utai ke Nagang Aku Ari Dibaptisa?” (Menara Jaga, Mac 2019)

Peda baka ni seiku lelaki mujur mutarka penanggul ti besai lalu dibaptisa.

‘Nama Kebuah Nuan Ngelubahka Diri ari Dibaptisa?’ (1:10)

Terubah, seiku lelaki ke benama Ataa kakang ati deka dibaptisa. Peratika utai ti meransang iya ngaga pemutus ti besai tu.

Kati Aku Layak Nerima Semua Utai Tu? (7:21)