Jehovah Deka Nyaga Nuan—Baka Ni?

1. Nama kebuah Jesus minta Jehovah nyaga bala murid iya?

BA MALAM iya ti penudi sebedau iya dibunuh, Jesus agi berundingka pasal penanggul ke deka ditapi bala murid iya. Ketegal iya rinduka sida, Jesus minta Apai iya “nyaga sida ari iya ti jai.” (Jhn. 17:14, 15) Jesus nemu pengudah iya pulai ke serega, Sitan deka terus ngelaban semua murid ke deka nyembah Jehovah. Endang terang, nembiak Jehovah begunaka jaga.

2. Nama kebuah kitai pechaya Jehovah deka nyaut sampi kitai?

² Jehovah nyaut sampi Jesus laban Iya rinduka Anak Iya. Enti kitai enggau naka ulih ngelantangka ati Jehovah, Iya mega deka rinduka kitai lalu ningaka sampi kitai ti minta tulung sereta jaga. Laban Jehovah Apai ti bepengerindu, Iya deka terus nyaga bala anak Iya. Enti Iya enda ngereja nya, tu deka ngenyaika nama Iya!

3. Nama kebuah kitai begunaka jaga ari Jehovah kemayaharitu?

³ Kemayaharitu, kitai bendar agi begunaka jaga ari Jehovah. Sitan udah dibuai ari serega, lalu iya “balat pedis ati.” (Pem. 12:12) Sitan udah ngasuh sekeda orang pechaya lebuh sida merinsaka kitai, sida ‘ngereja nya ke Petara.’ (Jhn. 16:2) Orang bukai ke enda pechayaka Petara merinsaka kitai ketegal kitai enda nitihka standard dunya. Enda ngira nama kebuah orang merinsaka kitai, kitai enda takut. Nama kebuah? Laban Bup Kudus madah: “Tuhan endang tau dikarapka. Iya deka meri kita pengering, lalu nyaga kita ari iya ti jai.” (2 Tes. 3:3) Baka ni Jehovah nyaga kitai? Aram kitai berandauka dua iti utai ke udah diberi Iya ngagai kitai.

JEHOVAH NYEDIAKA KEREBAN PERANG

4. Nitihka Epesus 6:13-17, nama udah diberi Jehovah kena nyaga kitai?

⁴ Jehovah udah meri kitai kereban perang ke ulih nyaga kitai ari serang Sitan. (Bacha Epesus 6:13-17.) Kereban perang ari Petara tu amat beguna sereta kering! Tang enti kitai deka dilindung, kitai patut seruran ngena tiap iti kereban perang tu. Nama digambarka tiap iti kereban tu? Aram kitai berandauka nya.

5. Nama digambarka belulang, lalu nama kebuah kitai patut ngena nya?

⁵ Belulang ngambarka pemendar ke ditemu ba Bup Kudus. Nama kebuah kitai patut ngena belulang tu? Laban Sitan nya “apai pemula.” (Jhn. 8:44) Beribu-ribu taun, iya udah bebula lalu “nipu semua dunya”! (Pem. 12:9) Tang pemendar ba Bup Kudus ulih nyeliahka kitai ari ditipu. Baka ni kitai ulih ngena belulang tu? Kitai ngereja nya lebuh kitai belajarka pemendar pasal Jehovah, nyembah Iya dalam ‘roh enggau pemendar,’ sereta ngereja utai ti lurus ba semua pekara.—Jhn. 4:24; Eps. 4:25; Heb. 13:18.

6. Nama digambarka terabai dada, lalu nama kebuah kitai patut ngena nya?

⁶ Terabai dada ngambarka standard pengelurus Jehovah. Nama kebuah kitai patut ngena terabai dada tu? Baka terabai dada ke nyaga jantung seiku soldadu ari diserang, terabai dada pengelurus nulung nyaga ati kitai ngambika enda nitihka chara dunya tu. (J-lam. 4:23) Jehovah deka kitai rindu sereta nyembah Iya enggau pengabis ati. (Mat. 22:36, 37) Tang Sitan deka ati kitai bebagi! Nya alai, iya deka kitai rinduka utai ba dunya tu—utai ti dipegedika Jehovah. (Jas. 4:4; 1 Jhn. 2:15, 16) Lalu enti iya enda mujur, iya deka ngemba tauka merinsaka kitai ngambika kitai ngereja utai ti enda ngelantangka ati Jehovah.

7. Baka ni kitai ulih ngena terabai dada?

⁷ Kitai ulih ngena terabai dada enti kitai nerima standard Jehovah bekaul enggau utai ti betul enggau salah, sereta nitihka standard nya ba pengidup kitai. (Mas. 97:10) Sekeda orang ngumbai standard Jehovah nya kelalu terit. Tang enti kitai badu nitihka standard Bup Kudus ba pengidup, kitai tau disemaka baka soldadu ti muka terabai dada iya maya beperang. Tu ketegal iya ngumbai terabai nya berat. Endaka nya ulah ti beli? Ba orang ke rinduka Jehovah, pesan Iya “ukai utai ti mar,” tang ulih nyelamatka nyawa sida.—1 Jhn. 5:3.

8. Nama reti iya seruran sedia deka nusui berita manah nyadika kasut kitai?

⁸ Paul mega meransang kitai seruran sedia deka nusui berita manah pasal pemaik nyadika kasut kitai. Reti iya, kitai patut seruran sedia madah pasal Perintah Petara. Lebuh kitai bekunsika pesan Bup Kudus enggau orang bukai, pengarap kitai deka ditegapka. Kitai berasai diperansang lebuh kitai meda nembiak Jehovah ba serata dunya ngena tiap iti peluang nginjil ba endur gawa, sekula, endur dagang, lebuh nginjil ari rumah ke rumah, lebuh bebelika barang, lebuh ngabas kaban belayan ke ukai Saksi, lebuh berandau enggau orang ti dikelala sida tauka lama enda ulih pansut ari rumah. Enti kitai berasai takut lalu badu nginjil, kitai baka soldadu ke muka kasut iya maya beperang. Tu tau ngujungka kaki iya senang telih. Asil iya, iya tusah ngelindung diri lebuh diserang, lalu enda ulih nitihka iring ari tuai soldadu.

9. Nama kebuah kitai begunaka terabai?

⁹ Terabai ngambarka pengarap kitai ba Jehovah. Kitai pechaya Iya deka ngamatka semua semaya Iya. Pengarap nya deka nulung kitai “madamka semua laja ti beapi-api ti ditimbakka Sitan.” Nama kebuah kitai begunaka terabai? Laban tu ulih nyaga kitai ari dikuingka ajar orang ti limpang ari pengarap tauka berasai asa lebuh orang bejaika jalai pengarap kitai. Enti kitai nadai pengarap, kitai engka enda ulih nulak lebuh orang ngasuh kitai ngereja utai ti enda dikerinduka Jehovah. Tang tiap kali kitai ngetanka pengarap kitai ba endur gawa tauka ba sekula, tauka kitai nulak kereja ti begaji besai ke ulih ngachau pengawa sembah kitai ngagai Jehovah, pengarap deka nyaga kitai. (Heb. 13:5, 6; 1 Pet. 3:15) Lalu tiap kali kitai nyembah Jehovah taja pan disakal, pengarap kitai nyaga kitai. —1 Tes. 2:2.

10. Nama digambarka selapuk kebal, lalu nama kebuah kitai patut ngena nya?

¹⁰ Selapuk kebal nya pengadang ke diberi Jehovah ngagai kitai, iya nya Iya ngupah orang ti ngereja peneka Iya. Lalu taja pan kitai engka lenyau nyawa, Iya ulih ngangkatka kitai idup baru. (1 Tes. 5:8; 1 Tim. 4:10; Tit. 1:1, 2) Baka selapuk kebal ti ngelindung pala seiku soldadu, pengadang nyaga runding kitai. Baka ni? Pengadang nulung kitai betatika semaya Petara, lalu enda kelalu irau lebuh napi penanggul. Baka ni kitai ulih ngena selapuk kebal tu? Kitai ngereja nya enggau nentuka runding kitai sejalai enggau runding Petara. Ambika chunto, kitai enda bepanggai ba pengaya tang bepanggai ba Petara.—Mas. 26:2; 104:34; 1 Tim. 6:17.

11. Nama digambarka pedang, lalu nama kebuah kitai begunaka nya?

¹¹ Pedang ngambarka Jaku Petara, iya nya Bup Kudus. Pedang tu bisi kuasa nulung kitai ngelala sebarang pemula lalu ngelepaska orang ari ajar pelesu sereta ulah ti tau ngemediska. (2 Kor. 10:4, 5; 2 Tim. 3:16, 17; Heb. 4:12) Kitai belajar chara ngena pedang tu enggau manah lebuh kitai belajarka Bup Kudus kediri empu sereta latih ke diterima kitai ari gerempung Petara. (2 Tim. 2:15) Kelimpah ari kereban perang tu, Jehovah mega meri kitai siti agi utai kena nyaga kitai. Nama utai nya?

KITAI ENDA IBUH BELABAN KEDIRI

12. Nama utai bukai ke diguna kitai, lalu nama kebuah?

¹² Soldadu ti bepeneleba nemu iya enda ulih mujur ngelaban raban soldadu munsuh ti besai ngena pengering diri empu. Iya begunaka tulung ari bala soldadu iya. Sama mega, kitai enda ulih mujur ngelaban Sitan enggau nembiak iya ngena pengering diri empu. Kitai begunaka sukung ari bala menyadi Kristian. Jehovah udah nyediaka bala menyadi Kristian ba serata dunya ke ulih nulung kitai.—1 Pet. 2:17.

13. Nitihka Hebrew 10:24, 25, nama penguntung ke diulih kitai lebuh datai begempuru?

¹³ Siti chara kitai nerima sukung, iya nya datai begempuru. (Bacha Hebrew 10:24, 25.) Kekadang kitai berasai enda diperansang. Tang gempuru ulih meransang kitai. Kitai diperansang lebuh ninga saut ari bala menyadi Kristian. Cheramah ari Bup Kudus sereta lakun ke dikenataika sida mega ngeringka kitai ngambika terus nyembah Jehovah. Lalu randau kitai sebedau sereta pengudah gempuru ulih meransang kitai. (1 Tes. 5:14) Nambahka nya, kitai bisi peluang nulung orang ba gempuru lalu tu ngasuh kitai gaga ati. (SKR. 20:35; Rom. 1:11, 12) Gempuru kitai mega ulih nulung kitai ngena chara bukai. Kitai dilatih nyadi penginjil sereta pengajar ti landik. Ambika chunto, kitai belajar chara ngena litaricha dalam Perengka Kena Ngajar. Nya alai, besedia meh enggau manah sebedau gempuru. Maya gempuru, dinga meh enggau manah. Lalu pengudah gempuru, kena meh latih ke udah diterima nuan. Enggau chara nya, nuan ulih nyadi “soldadu Jesus Kristus.”—2 Tim. 2:3.

14. Nama agi tulung ke diberi ngagai kitai?

¹⁴ Kitai mega nerima sukung ari bejuta iku melikat ti bekuasa. Perundingka pemesai utai ke ulih digaga seiku melikat! (Isa. 37:36) Lalu gambarka nama ulih digaga seraban melikat ti bekuasa. Nadai mensia tauka roh jai ti ulih ngelaban raban soldadu Jehovah tu. Jehovah nya pemadu bekuasa. Nya alai lebuh Iya enggau kitai, kitai ulih nyadi kering agi ari bala munsuh, enda ngira berapa penyampau sida. (P-ulu. 6:16) Nya alai, kingatka tu lebuh nuan berasai takut ketegal utai ke disebut tauka dikereja orang ba endur gawa, ba sekula tauka kaban belayan ti ukai Saksi. Nuan ulih andal, enti nuan nitihka iring Jehovah, nuan enda belaban kediri.

JEHOVAH DEKA TERUS NYAGA KITAI

15. Nitihka Isaiah 54:15, 17, nama kebuah nadai orang ulih nagang nembiak Petara ari terus nginjil?

¹⁵ Dunya ke dipegai Sitan bisi mayuh kebuah begedika kitai. Kitai mengkang neutral ba pengawa politik, lalu enda enggau beperang. Kitai madahka nama Petara, nginjil pasal Perintah Iya ke ulih mai pemaik, sereta ngasika standard pengelurus Iya. Kitai madah ngagai orang, dunya tu di baruh kuasa Sitan, apai pemula sereta pemunuh. (Jhn. 8:44) Lalu kitai madahka pasal dunya Sitan ke deka dirusak. Sitan enggau bala nembiak iya enda ulih nagang pengawa nginjil kitai. Taja pan Sitan bisi kuasa ti besai, tang iya enda ulih nagang kitai ari terus muji Jehovah sereta nusui pesan pasal Perintah Petara ngagai serata dunya. Tu ketegal Jehovah bisi nyaga kitai.—Bacha Isaiah 54:15, 17.

16. Nama deka digaga Jehovah ke nembiak Iya maya penusah ti besai?

¹⁶ Nama deka nyadi enda lama agi? Ba maya penusah ti besai, Jehovah deka nyelamatka kitai ngena dua iti chara ti ngalitka ati. Kesatu, Iya deka nyelamatka bala nembiak Iya ti tetap ati lebuh Iya ngasuh bala raja di dunya ngerusak Babilon ti Besai, iya nya gerempung pengarap pelesu. (Pem. 17:16-18; 18:2, 4) Kedua, Jehovah deka nyelamatka nembiak Iya lebuh Iya ngerusak utai ke tinggal ba dunya Sitan maya Armagedon.—Pem. 7:9, 10; 16:14, 16.

17. Baka ni kitai tau bulih penguntung enti terus semak enggau Jehovah?

¹⁷ Lebuh kitai mengkang semak enggau Jehovah, Sitan enda ulih ngemediska kitai belama iya. Tang iya ke deka dirusak. (Rom. 16:20) Nya alai, kena meh kereban perang lalu anang ngetu ngena nya! Anang nguji belaban enggau Sitan sereta dunya iya ngena pengering diri empu. Sukung meh bala menyadi Kristian. Lalu titihka iring ari Jehovah. Enti nuan ngereja nya, nuan ulih andal Apai nuan ti di serega deka ngeringka sereta nyaga nuan.—Isa. 41:10.