Peda Meh Pemanah Orang Bukai

Penanggul Iya

Penyumbung ngujungka ulah ti bepilih mata. Orang ke sumbung ngumbai diri pama agi ari orang bukai, lalu ngumbai orang ke enda setipak enggau iya, nya baruh agi. Semua orang ulih kena panjuk tu. Nitihka Encyclopædia Britannica: “Enda ngira mimit tauka balat, nyauka semua raban bansa ngasaika chara pengidup, pemakai, gari, adat, ulah, tauka pengarap sida manah agi ari raban bansa bukai.” Baka ni kitai nyeliahka diri ari runding ti salah tu?

Lalau ari Bup Kudus

“Enggau ati ti baruh, seruran ngumbai orang bukai pama agi ari kita.”—PILIPI 2:3.

Nama dipelajar kitai ari ayat tu? Kena ngelaban penyumbung, kitai patut baruh ati. Enti kitai baruh ati, kitai ulih meda pemanah orang bukai ba sekeda pekara. Nadai siti pan raban orang ke pemadu manah ba semua pekara.

Peratika utai ke nyadi ba Stefan. Taja iya dibesaika ba menua ke ngumbai diri manah agi ari menua bukai, iya ulih ngalahka runding ti bepilih mata ngagai orang ari menua bukai. Ku iya: “Aku pechaya, ulah ti ngumbai orang bukai pama agi nulung kitai ngalahka runding ti bepilih mata. Aku patut ngaku diri enda nemu semua utai. Aku ngasaika, bisi utai ke ulih dipelajarka aku ari tiap iku orang.”

Utai ke Ulih Digaga Nuan

Anang nipu diri. Nuan mega ngereja penyalah. Ngaku diri lemi ba sekeda pekara, lalu orang bukai engka ulih ngereja nya. Anang nyimpulka semua orang ke datai ari sesiti raban ngembuan pengurang ti sama.

Kena ngelaban runding ti enda manah pasal seseiku orang, tanya diri empu:

Ngaku diri lemi ba sekeda pekara, lalu orang bukai engka ulih ngereja nya.

‘Kati perangai ke dikeenggaika aku pasal orang nya, bangat jai tauka semina bebida aja?’
‘Kati bisi utai ke dikeenggaika orang nya ba aku?’
‘Ba senentang ni orang nya landik agi ari aku?’

Saut meh tanya tu enggau lurus. Enggau chara tu, nuan ukai semina ngalahka runding ti bepilih mata, tang nuan mega ulih berengkah rinduka orang nya.

Cherita Pengidup: Nelson (Amerika Serikat)

“Maya aku agi biak, aku diau ba endur alai mayuh orang ke datai ari bansa sereta chara pengidup ti sama. Lebuh umur aku 19 taun, aku pindah ngagai bandar besai lalu gawa ba sebuah kilang. Ba ditu, aku gawa lalu begulai diau enggau orang ke datai ari mayuh macham bansa, chara pengidup sereta adat.

Seraya kami ke begulai, aku belubah-lubah ngelala bala kaban ke sama enggau aku gawa. Ari tu aku belajar, chura kulit, bansa, enggau bansa jaku enda nentuka sekalika orang nya ulih dikearapka, pemagas sida gawa, sereta asai ati orang nya.

Ujung iya aku jadi enggau seiku indu ke enda sama bansa sereta menua aku. Aku rindu belajar pasal mayuh macham pemakai enggau musik ke enda ditemu aku sebedau tu. Utai ke nyadi ba pengidup aku, nulung aku nemu semua kitai bisi pengurang enggau pemanah. Iya ke amat, ketegal aku belajar nerima lalu neladan pemanah orang bansa bukai, aku ulih ngelaban runding ti bepilih mata.”