PELAJAR 46
Nama Kebuah Nuan Patut Nyerahka Diri ngagai Jehovah lalu Dibaptisa?
Lebuh seseiku orang nyerahka diri ngagai Jehovah, iya besemaya nengah sampi deka nyembah Jehovah seiku aja sereta ngenuluka Jehovah ba pengidup iya. (Masmur 40:8) Pengudah nya, baru meh iya ulih dibaptisa. Baptisa nya kena nunjuk ngagai semua orang, iya udah nyerahka diri ngagai Jehovah. Pemutus deka nyerahka diri sereta dibaptisa nya pemutus ti pemadu besai ba pengidup nuan. Pemutus tu deka ngubah pengidup nuan. Nama ulih meransang nuan ngaga pemutus ti besai tu?
1. Nama utai ke meransang nuan nyerahka diri ngagai Petara?
Kitai nyerahka diri ngagai Jehovah laban kitai rinduka Iya. (1 John 4:10, 19) Bup Kudus madahka: ‘Kita enda tau enda rinduka Jehovah Petara kita, enggau pengabis ati kita, enggau pengabis semengat kita, enggau pengabis runding kita, enggau pengabis pengering kita.’ (Mark 12:30) Kitai nunjukka diri rinduka Jehovah ukai aja nengah jaku, tang mega nengah pengawa. Perundingka chunto tu. Seiku lelaki enggau seiku indu ke rinduka pangan diri tentu deka ngaga pemutus ngambika seduai iya ulih kawin. Pia mega, pengerindu kitai ngagai Jehovah deka meransang kitai nyerahka diri ngagai Iya sereta dibaptisa.
2. Nama berekat ke deka diulih nuan enti dibaptisa?
Sekeda berekat ke deka diterima nuan iya nya, ngembuan ruang bilik ti sama pengarap di serata dunya ke rinduka nuan enggau Jehovah. (Bacha Mark 10:29, 30.) Jehovah deka nyadi Apai nuan. Lalu, nuan deka ngasaika pengerindu Jehovah nengah mayuh chara. Tu deka ngasuh nuan majak agi semak ngagai Iya. (Bacha Malaki 3:16-18.) Endaka nya berekat ti amat berega? Au. Tang, ngambika bulih berekat nya, nuan patut nitihka sekeda syarat lalu dibaptisa. Nuan patut belajar pasal Jehovah, rinduka Iya, sereta bisi pengarap ba anak Iya. Udah nya, nuan patut nyerahka diri ngagai Jehovah. Enti nuan ngereja tu lalu dibaptisa, nuan ulih idup enggau lantang belama iya. Bup Kudus madahka: “Pemaptisa . . . nyelamatka kita.”—1 Peter 3:21.
BELAJAR MAYUH AGI
Peratika kebuah nya beguna nuan nyerahka diri ngagai Jehovah sereta dibaptisa.
3. Pilih meh sapa ke patut disembah kitai
Ba jeman Israel kelia, sekeda orang ngumbai sida ulih nyembah Jehovah enggau petara pelesu Baal ba maya ti sama. Tang Jehovah nganjung nabi Elijah kena ngemetulka runding sida. Bacha 1 Raja 18:21, lalu kerandauka tanya tu:
Nama pemutus ke patut digaga orang Israel?
Baka orang Israel, kitai mega patut milih sapa ke deka disembah kitai. Bacha Luke 16:13, lalu kerandauka tanya tu:
Nama kebuah kitai enda ulih nyembah Jehovah lalu ba maya ti sama nyembah utai tauka petara bukai?
Baka ni kitai nunjukka diri semina nyembah Jehovah seiku aja?
4. Belematika pengerindu Jehovah ke nuan
Jehovah udah meri kitai mayuh pemeri ti berega. Nama ulih diberi kitai ngagai Iya? Mainka VIDEO.
Baka ni Jehovah ngayanka pengerindu Iya ngagai nuan? Bacha Masmur 104:14, 15 enggau 1 John 4:9, 10, lalu kerandauka tanya tu:
Nama pemeri ari Jehovah ke amat berega ba nuan?
Nama asai ati nuan ngagai Jehovah ke udah meri semua utai nya ngagai nuan?
Lebuh kitai nerima hadiah ti dikerinduka kitai, kitai tentu ngayanka diri beterima kasih ngagai orang ke meri pemeri nya. Bacha Ulang Adat 16:17, lalu kerandauka tanya tu:
Ketegal Jehovah udah meri mayuh berekat ngagai nuan, baka ni nuan ulih malas pengerindu Iya?
5. Nyerahka diri ngagai Jehovah mai mayuh berekat
Mayuh orang pechaya, duit, kereja ti manah, sereta penuduk ti tebilang deka ngasuh sida gaga ati. Kati tu amat? Mainka VIDEO, lalu kerandauka tanya tu.
Taja pan menyadi ba dalam video tu rindu main bul, nama kebuah iya ninggalka pengawa nya?
Iya milih deka ngenuluka Jehovah, lalu ukai main bul. Ba runding nuan, kati iya ngaga pemutus ti betul? Nama kebuah?
Sebedau rasul Paul nyadi orang Kristian, iya bisi kereja ti manah. Iya belajarka undang-undang orang Judah ari pengajar ti tebilang. Tang iya nulak semua utai nya lalu nyadi seiku ari orang Kristian. Kati iya nesal ati? Bacha Pilipi 3:8, lalu kerandauka tanya tu:
Nama kebuah Paul madahka utai ti diulih iya sebedau nyadi orang Kristian nya “uras magang”?
Nama berekat ke diulih iya?
Ba nuan, kati nya manah agi nyembah Jehovah tauka milih jalai pengidup bukai? Terangka.
Lebuh Paul nyadi orang Kristian, utai ke diterima iya mayuh agi ari utai ti udah dilengkaka iya
BISI ORANG MADAH: “Chukup meh rinduka Petara aja. Tau enda ibuh muai semua utai ketegal Iya.”
Ba nuan, nama kebuah nya manah nyerahka diri ngagai Jehovah?
LANSA
Pengerindu meransang kitai nyerahka diri ngagai Jehovah lalu dibaptisa.
Ulang Kaji
Nama kebuah Jehovah patut nerima sembah sereta pengerindu kitai ti diberi enggau pengabis ati?
Baka ni Jehovah merekatka bala Saksi Iya ke udah dibaptisa?
Kati nuan deka nyerahka diri ngagai Jehovah?
ARAM BELAJAR
Peratika kebuah seiku penanyi enggau atlet sukan nyerahka diri ngagai Petara Jehovah.
Tanya ari Bala Nembiak—Baka Ni Aku Ngena Pengidup Aku?—Ngenang Baru (6:54)
Peratika kebuah bukai nuan patut nyerahka diri ngagai Petara.
“Nama Kebuah Nyerahka Diri ngagai Jehovah?” (Menara Jaga, 15 Januari 2010)
Ba video musik tu, peda pengaga ati ti diasaika orang ke nyerahka diri ngagai Jehovah.
Bacha cherita “Betaun Aku Berunding, ‘Nama Kebuah Kami Ditu?’” kena meda utai ti nulung seiku indu ngubah utai ti dikenuluka iya ba pengidup.