PELAJAR 49
Baka Ni Ruang Bilik Nuan Ulih Lantang?—Begian 1
Orang ke baru jadi tentu ngarapka tikah sida meruan belama iya. Kebendar iya, tu ulih mujur digaga. Mayuh laki bini Kristian ti udah lama kawin ke nitihka jaku lalau Bup Kudus udah ngasaika tikah sida lantang sereta meruan.
1. Nama jaku lalau Bup Kudus ngagai bala laki?
Jehovah milih laki nyadi tuai bilik. (Bacha Epesus 5:23.) Jehovah ngarapka sida ngaga pemutus ti manah ke sida sebilik. Ba Bup Kudus, laki diasuh terus ‘rinduka bini sida.’ (Epesus 5:25) Nama reti tu? Laki ke rinduka bini deka ngintu bini iya enggau manah, enda ngira ba mua orang mayuh tauka lebuh ba rumah. Iya ngelindung bini iya sereta nyaga utai ti diguna ba tubuh sereta emosi bini iya. (1 Timoti 5:8) Keamat beguna agi, iya deka nyaga utai ti diguna bini iya ba pengarap. (Matthew 4:4) Ambika chunto, sida ulih begulai besampi sereta macha Bup Kudus. Lebuh laki nyaga bini iya enggau manah, kaul iya enggau Jehovah deka rapat agi.—Bacha 1 Peter 3:7.
2. Nama jaku lalau Bup Kudus ngagai bala bini?
Bup Kudus madahka, bini ‘enda tau enda bebasaka laki.’ (Epesus 5:33) Baka ni iya ulih ngereja nya? Enda ngira laki iya dalam pemendar tauka enda, iya ulih berundingka pemanah ti dikembuan laki iya sereta utai ke digaga laki iya kena nyaga diri sebilik. Kelimpah ari nya, iya patut nelap sereta nyukung pemutus laki iya. Pia mega, bini enda patut ngemaluka laki iya ba mua orang bukai.
3. Baka ni laki bini ulih negapka tikah sida?
Ngagai orang ke jadi melaki-bini, Bup Kudus madahka: “Seduai iya deka nyadi setubuh.” (Matthew 19:5) Nya alai, laki bini enda patut nejuka sebarang utai ngachau kaul entara seduai iya. Seduai iya ulih negapka agi kaul lebuh seduai iya seruran nyediaka awak enggau pangan diri. Pia mega, seduai iya enda patut ngelalaika sebarang utai ari kaling pengidup sida. Seduai iya mega patut ngenuluka Jehovah sereta pangan diri, lalu bejimat ngambika enda kelalu rapat enggau orang bukai kelimpah ari kaling pengidup sida empu.
BELAJAR MAYUH AGI
Pansik prinsip Bup Kudus ke ulih negapka tikah nuan.
4. Laki—rindu sereta intu meh bini nuan
Bup Kudus madahka, “laki patut rinduka bini diri, baka iya ke rinduka tubuh diri empu.” (Epesus 5:28, 29) Nama reti nya? Mainka VIDEO, lalu kerandauka tanya tu.
Baka ni laki ngayanka diri rindu sereta ibuhka bini iya?
Bacha Kolosi 3:12, lalu kerandauka tanya tu:
Baka ni laki ulih ngayanka ulah tu ba tikah iya?
5. Bini—rindu sereta basa meh laki nuan
Jehovah dekaka bini rinduka laki iya taja pan iya enda sama pengarap. Bacha 1 Peter 3:1, 2, lalu kerandauka tanya tu:
Enti laki nuan enda sama pengarap, nuan tentu dekaka iya nyadi penyembah Jehovah. Ba runding nuan, baka ni nuan ulih nulung iya—seruran nginjil ngagai iya tauka nyadi bini ti manah, nelap sereta ngayanka basa ngagai iya? Nama kebuah?
Lebuh laki bini bisi kaul ti tegap, seduai iya ulih ngaga pemutus ti manah. Taja pia, kadang-kadang bini engka enda sepenemu enggau laki iya. Enti tu nyadi, bini ulih madahka runding iya enggau manah sereta basa. Tang, iya mega patut ingat, Jehovah udah meri laki tanggungjawap kena ngaga pemutus ba ruang bilik. Nya alai, iya patut nyukung pemutus ke digaga laki iya. Enggau ngereja nya, iya ulih ngasuh ruang bilik iya gaga ati. Bacha 1 Peter 3:3-5, lalu kerandauka tanya tu:
Nama asai ati Jehovah lebuh bini bebasaka laki iya?
6. Nuan ulih mutarka penanggul ba tikah nuan
Nadai tikah ti sempurna. Laki bini patut bebendar mutarka penanggul sida. Mainka VIDEO, lalu kerandauka tanya tu.
Ba video tu, nama utai ke nunjukka laki bini nya enda agi rapat enggau pangan diri?
Nama utai ti digaga seduai iya kena negapka kaul ba tikah?
Bacha 1 Korint 10:24 enggau Kolosi 3:13. Pengudah macha tiap iti ayat, kerandauka tanya tu:
Baka ni jaku lalau ba ayat tu ulih negapka tikah?
Bup Kudus madahka, kitai patut ngayanka basa sereta ngintu pangan diri enggau manah. Bacha Rome 12:10, lalu kerandauka tanya tu:
Patut laki tauka bini nganti nyentukka kaling pengidup sida dulu nunjukka basa? Nama kebuah?
BISI ORANG MADAH: “Kami enda rapat agi baka suba.”
Baka ni nuan deka nerangka pasal Bup Kudus ke ulih nulung tikah sida?
LANSA
Laki bini deka gaga ati enti sida rindu, bebasaka pangan diri, sereta nitihka prinsip Bup Kudus.
Ulang Kaji
Baka ni laki ulih ngasuh tikah iya lantang?
Baka ni bini ulih ngasuh tikah iya lantang?
Enti nuan udah kawin, ni bagi prinsip Bup Kudus ke ulih negapka tikah nuan?
ARAM BELAJAR
Belajarka jaku lalau ke ulih nulung nuan bulih ruang bilik ti lantang.
Peda video musik ke nunjukka berekat ketegal nitihka jaku lalau ari Petara ba tikah.
Pansik meh reti bebasaka laki ti nyadi tuai bilik.
“Nama Kebuah Indu Patut Tunduk ngagai Lelaki?” (Menara Jaga, 15 Mei 2010)
Baka ni sepasang laki bini mutarka penanggul sida ti besai ba tikah, nyengkaum sarak?