PELAJAR 52
Nama Kebuah Gari enggau Chara Kitai Begari Nya Beguna
Semua kitai bisi chara kediri empu bekaul enggau gari sereta chara begari. Enti kitai nitihka sekeda prinsip Bup Kudus, kitai agi ulih milih ni bagi utai ke deka dikena kitai tang ba maya ti sama ngerinduka ati Jehovah. Aram kitai beratika sekeda prinsip tu.
1. Nama sekeda prinsip ke ulih nulung kitai ngaga pemutus bekaul enggau gari sereta chara kitai begari?
Bup Kudus madahka, kitai patut “begari penumbas iya sereta menyana, ngena gari ti patut,” sereta seruran beresi ngambika orang ulih meda nuan nya ‘nangika Petara.’ (1 Timoti 2:9, 10) Aram kitai meda empat iti prinsip ari ayat tu: (1) Baka ke dipeda nuan ba gempuru, semua kitai bisi chara begari ti bebida, tang kitai patut nentuka gari sereta gaya buk kitai “menyana” sereta nunjukka basa ngagai Petara Jehovah. (2) Chara begari ti “penumbas iya” mai reti kitai nyeliah ari ngena gari tauka gaya gari ti seksi, tauka minta diri dipeda orang. (3) Enti kitai ngena gari ti menyana, kitai enda nitihka tiap iti gaya tauka ngena pisin ti dikerinduka orang kemayaharitu. (4) Chara kitai begari nunjukka kitai semina nyembah Petara ti bendar.—1 Korint 10:31.
2. Nama kebuah kitai patut berundingka bala menyadi lebuh kitai milih gari ke deka dikena kitai?
Taja pan kitai ulih milih gari sereta chara begari ti dikedekaka kitai, tang kitai patut berundingka asai ati orang bukai sereta enggai ngasuh sida enda nyamai ati. Kitai deka “ngelantangka ati pangan kitai, kena nulung sida mansang.”—Bacha Rome 15:1, 2.
3. Baka ni chara kitai begari ulih ngasuh orang deka agi nemu pasal Jehovah?
Kitai nusui berita manah ari Bup Kudus ngagai orang. Nya alai, chara kitai begari ulih ngachau runding orang pasal berita ke dibai kitai, kelebih agi lebuh kitai ngagai gempuru tauka nginjil. Kitai patut nentuka chara kitai begari enda ngasuh orang limpang ari pesan kitai, tang ngasuh orang nemu ‘ajar ti diberi Petara ti Juruselamat kitai.’—Titus 2:10.
BELAJAR MAYUH AGI
Peratika baka ni kitai ulih nentuka gaya sereta chara kitai begari ulih nulung orang bukai nemu kitai nya orang Kristian ti bendar.
Chara kitai begari nunjukka kitai bebasaka orang ti bekuasa. Taja pan Jehovah nemu asai ati kitai, tang Iya deka kitai nunjukka basa ngagai Iya ari chara kitai begari
4. Chara begari ti manah nunjukka basa ngagai Jehovah
Nama kebuah kitai patut nyaga chara kitai begari? Bacha Masmur 47:2, lalu kerandauka tanya tu:
Baka ni chara kitai begari bisi kaul enggau Jehovah?
Ba runding nuan, kati kitai patut berundingka chara kitai begari lebuh datai ke gempuru sereta ba pengawa nginjil? Nama kebuah?
5. Nama ulih nulung kitai ngaga pemutus ti manah bekaul enggau gari sereta chara begari
Gari kitai tau enda ibuh mar, tang patut kemas, beresi sereta ngena ba siti-siti endur. Bacha 1 Korint 10:24 enggau 1 Timoti 2:9, 10. Lalu, kerandauka kebuah kitai patut nyeliah ari gari ti . . .
enda kemas tauka kelalu biasa.
sendat, ngayanka tubuh, tauka seksi.
Orang Kristian enda ibuh nitihka Adat Moses, tang kitai ulih belajar pasal runding Jehovah lebuh kitai mansik Adat nya. Bacha Ulang Adat 22:5, lalu kerandauka tanya tu:
Nama kebuah kitai patut nyeliahka gari tauka stail ti ngasuh lelaki baka indu tauka indu baka lelaki?
Bacha 1 Korint 10:32, 33 enggau 1 John 2:15, 16, lalu kerandauka tanya tu:
Nama kebuah nya beguna kitai nentuka chara kitai begari enda ngasuh orang enda nyamai ati ba gempuru tauka ba kandang endur kitai diau?
Nama stail buk tauka gari ti selalu dikena orang ba kandang endur nuan diau?
Kati semua stail nya manah ke orang Kristian tauka enda? Nama kebuah?
Kitai ulih milih bemacham bansa gari sereta chara begari ti ngerinduka ati kitai tang ba maya ti sama ngerinduka ati Jehovah
BISI ORANG MADAH: “Peneka aku meh ka ngena gari nama.”
Kati nuan setuju tauka enda? Nama kebuah?
LANSA
Enti kitai milih gari sereta chara begari enggau manah, kitai nunjukka diri bebasaka Jehovah enggau orang bukai.
Ulang Kaji
Nama kebuah gari sereta chara kitai begari nya beguna ba Jehovah?
Nama sekeda prinsip Bup Kudus ke ulih nulung kitai milih gari sereta chara begari ti manah?
Baka ni chara kitai begari mai empas ngagai runding orang pasal sembah ti bendar?
ARAM BELAJAR
Nama runding orang pasal nuan pengudah sida meda chara nuan begari?
Berunding dulu sebedau ngaga pantang.
“Nama Runding Petara Pasal Pantang?” (Artikel ba laman web jw.org)
Peratika prinsip bukai ke ulih nulung nuan ngaga pemutus ti manah.
“Kati Stail Gari Nuan Ngemuliaka Petara?” (Menara Jaga, September 2016)
Baka ni seiku indu ngemansangka runding ti manah pasal chara orang bukai begari?
“Penanggul ti Besai ba Aku Nya Gari enggau Chara Begari” (Peratika!, 22 Disember 2003)