2. Baka ni gaya dunya enggau ulah orang kenyau ari taun 1914?

Bala murid Jesus nanya iya: “Nama tanda ti nunjukka nuan deka datai baru, enggau pengujung dunya?” (Matthew 24:3) Jesus madahka sekeda utai baka perang, lapar pungkang enggau tanah berenyang deka suah nyadi. (Bacha Matthew 24:7.) Bup Kudus mega madahka, ulah orang “ba hari ti penudi” deka ngasuh “mayuh penusah nyadi” ba pengidup. (2 Timoti 3:1-5) Semua jaku benabi pasal utai tu enggau terang ulih dipeda kenyau ari taun 1914.

3. Nama kebuah gaya dunya tu nyadi majak jai kenyau ari maya Perintah Petara berengkah merintah?

Enda lama pengudah Jesus nyadi Raja Perintah Petara, iya beperang ngelaban Sitan enggau bala melikat ti jai lalu ngalahka sida. Udah nya, “Sitan enggau semua bala melikat iya dibuai ke baruh ngagai dunya.” (Pemandang 12:9, 10, 12) Sitan amat ringat laban iya nemu iya deka dirusakka. Nya alai, iya ngasuh mayuh penusah nyadi ba dunya tu sereta mai mayuh pemerinsa. Nya meh kebuah gaya ba dunya tu nyadi balat jai! Tang Perintah Petara deka muai semua pemerinsa ba dunya tu.