3. (a) Baka ni Timoti berengkah nyadi orang Kristian, lalu nama digaga iya pengudah iya bulih penemu? (b) Nama tiga bengkah chara belajar ti dikemeratka Paul ngagai Timoti?

³ Terubah iya rasul Paul ngelawa Listra nya ba taun 47. Maya nya Timoti ke engka beumur bebelas taun, belajarka ajar ari Jesus. Timoti nitihka utai ti dipelajarka iya, lalu dua taun udah nya iya berengkah bejalai jauh enggau Paul. Kira-kira 16 taun udah nya, Paul nulis surat ngagai Timoti: “Nuan enda tau enda majak bepegai ba utai ti udah dipelajar sereta dikarapka nuan laban nuan nemu sapa ke udah ngajar nuan utai nya, lalu nuan, kenyau ari nuan agi mit, endang udah nemu Bup Kudus [Bup Kudus Jaku Hebrew] ulih ngajar nuan ngulihka pengelepas ulih pengarap ke Jesus Kristus.” (2 Tim. 3:14, 15) Peratika, Paul madahka Timoti (1) nemu Bup Kudus, (2) arapka utai ti udah dipelajarka iya, (3) ngulihka pengelepas ketegal arapka Jesus Kristus.

‘BEPEGAI BA UTAI TI UDAH DIKARAPKA’

5. (a) Nama reti ‘bepegai ba utai ti udah dikarapka’? (b) Baka ni kitai nemu Timoti arapka berita manah pasal Jesus?

⁵ Enda chukup semina ngajar anak pasal orang enggau pekara ke bisi dalam Bup Kudus. Kingatka, Timoti mega ‘bepegai ba utai ti udah dikarapka.’ Timoti nemu Bup Kudus “kenyau ari . . . agi mit,” iya nya, kenyau ari iya agi biak. Udah nya, iya arapka Jesus nya endang Messiah. Pengarap Timoti amat tegap, nya alai iya deka dibaptisa lalu gawa enggau Paul nyadi pengerintis seberai tasik.

6. Baka ni nuan ulih nulung anak nuan ngemansangka pengarap ba Jaku Petara?

⁶ Baka ni nuan ulih nulung anak nuan ngemansangka pengarap baka Timoti, ngambika sida mega deka ‘bepegai ba utai ti udah dikarapka’? Keterubah, sabar. Ngemansangka pengarap ngambika tegap begunaka awak. Lalu enti sema nuan arapka siti-siti utai ukai reti anak nuan mega deka arapka utai nya. Tiap iku anak patut ngena penau iya “ngelala bida entara utai ti badas enggau utai ti jai” kena ngemansangka pengarap ba Bup Kudus. (Bacha Hebrew 5:14.) Ketegal nyadi apai indai, nuan ulih ngereja mayuh utai kena nulung anak nuan ngeringka pengarap sida, kelebih agi lebuh sida bisi tanya. Aram kitai meda utai ke ulih dipelajarka kitai ari chunto seiku apai.

7, 8. (a) Baka ni seiku apai ke Kristian ngayanka diri bisi ati ti liat lebuh ngajar anak indu iya? (b) Ni maya nuan patut liat ati enggau anak nuan?

⁷ Thomas, ke bisi anak indu beumur 11 taun, madahka anak indu iya kekadang nanya iya sekeda tanya baka: “Kati bisi Jehovah ngena evolusi ngemunka utai idup ba bumi?” tauka “Nama kebuah kitai nadai enggau pengawa ke digaga orang, ambika chunto baka ngundi, kena nguji ngemanahka utai?” Kekadang, Thomas patut nagang diri ari semina madah ngagai anak iya utai ti patut dikearapka. Thomas nemu, utai ke ngasuh orang arapka pemendar nya ukai datai ari siti fakta ti besai tang datai ari mayuh bukti ti mit.

⁸ Thomas mega nemu, iya begunaka ati ti liat ngambika ulih ngajar anak indu iya. Kebendar, semua orang Kristian patut liat ati. (Kol. 3:12) Thomas nemu, kena nulung anak iya mansang ba utai ti dikearapka iya, nya begunaka awak lalu seduai iya patut suah berandau. Iya patut nerangka ngagai anak iya pasal utai ti dipelajarka anak iya ari Bup Kudus. Thomas madahka: “Kelebih agi ba pekara ke berat agi, aku enggau bini aku deka nemu sekalika anak indu kami amat arapka utai ti dipelajarka iya lalu sekalika utai nya ulih diterima iya. Enti iya bisi tanya, nya manah. Kebendar, aku irau enti iya nadai nanya nama-nama utai lebuh iya arapka siti-siti utai.”

9. Baka ni nuan ulih nulung anak nuan arapka Jaku Petara?

⁹ Lebuh apai indai ngajar enggau ati ti liat, anak sida deka belubah-lubah berengkah “nemu pemesai, pemanjai, peninggi enggau penalam” pengarap. (Eps. 3:18) Kitai ulih ngajar sida ngena chara ti patut nitihka umur sereta pemereti ati sida. Lebuh pengarap sida ba utai ti dipelajarka sida majak teguh, sida deka senang agi ngetanka utai ti dipechaya sida ngagai orang bukai, nyengkaum nembiak ke sama sekula enggau sida. (1 Pet. 3:15) Ambika chunto, ulih anak nuan ngena Bup Kudus nerangka utai ke nyadi lebuh orang mati? Kati sida arapka utai ti diterangka ngena Bup Kudus?a (Peda nota kaki.) Kingatka, taja pan enda senang, tang enti nuan liat ati nulung anak nuan ngemansangka pengarap ba Jaku Petara, nuan deka bulih asil ti manah.—U-dat. 6:6, 7.

10. Nama utai ke beguna kena ngemansangka pengarap anak nuan?

¹⁰ Amat, teladan nuan empu mega beguna kena nulung anak nuan ngemansangka pengarap. Stephanie, seiku indai ke bisi tiga iku anak indu, madahka: “Kenyau ari anak aku agi mit, aku patut nanya diri empu. ‘Kati aku bisi berandau enggau anak aku pasal kebuah aku arapka Jehovah nya endang bisi, pengerindu Iya, sereta jalai Iya ti lurus? Ulih anak aku beratika aku amat rinduka Jehovah?’ Aku enda ulih ngumbai anak aku arap enti aku empu enda arap.”