Kati Tubuh Jesus Betubuh Mensia Tauka Betubuh Roh Maya Iya Diidupka Baru?
Saut ari Bup Kudus
Bup Kudus madah, Jesus “dibunuh batang tubuh, tang diidupka dalam roh.”—1 Peter 3:18; Kereja Rasul 13:34; 1 Korint 15:45; 2 Korint 5:16.
Jesus empu mega madahka, iya enda diidupka baru betubuh mensia ti ngembuan dagin. Iya madah, iya deka nyerahka “tubuh” diri “kena nebus orang mayuh.” (John 6:51; Matthew 20:28) Enti sema Jesus diidupka baru enggau tubuh mensia, tu reti iya, iya narit baru genselan tebus ke udah diserahka iya. Tu tentu ukai baka nya, laban dalam Bup Kudus madahka, Jesus nyerahka tubuh enggau darah iya “sekali aja ke belama-lama iya.”—Hebrew 9:11, 12.
Enti Jesus diidupka enggau tubuh roh, nama kebuah murid iya agi ulih meda Jesus?
Orang ke betubuh roh agi ulih nyadi mensia. Ngambika chunto, melikat ari serega kala makai ngirup begulai enggau mensia. (Pemungkal 18:1-8; 19:1-3) Tang, sida agi orang ke betubuh roh, sereta ulih ninggalka dunya.—Pengulu 13:15-21.
Pengudah Jesus idup baru, iya pan nyadi mensia enda lama, sama baka bala melikat ke suba. Tang, laban iya betubuh roh, nya alai iya ulih enda disadang bisi lalu enda disadang ulih lenyau mega. (Luke 24:31; John 20:19, 26) Jesus mega ayan ngena tubuh mensia ti enda sama. Nya kebuah, bala murid iya enda ngelala. Sida semina ngelala iya ketegal ulah enggau jaku ke disebut iya.—Luke 24:30, 31, 35; John 20:14-16; 21:6, 7.
Maya Jesus ayan ba mua rasul Thomas, iya ayan enggau tubuh mensia ti bisi bakal. Iya ngayanka diri enggau chara baka nya, laban iya deka pengarap Thomas nyadi tegap agi, laban Thomas kakang ati sekalika Jesus amat udah diidupka baru tauka enda.—John 20:24-29.