PELAJAR 20
Baka Ni Eklisia Diatur?
Bup Kudus madahka, Jehovah ukai Petara ti charut. (1 Korint 14:33) Nya alai, penyembah Iya patut teratur. Baka ni gempuru Kristian diatur? Nama tanggung pengawa tiap iku kitai ngambika pengawa tu ulih mujur?
1. Sapa kepala eklisia?
Bup Kudus madahka, “Kristus ke nyadi kepala eklisia.” (Epesus 5:23) Iya ngemataka eklisia ari serega. Jesus milih seraban mit bala tuai gempuru nyadi “ulun ke tetap ati sereta bepenemu-dalam.” Sida mega dikumbai Raban ti Ngiring. (Bacha Matthew 24:45-47.) Baka bala rasul enggau tuai gempuru ba Jerusalem ba abad keterubah, Raban ti Ngiring mega meri atur ngagai eklisia ba serata dunya. (Surat Kereja Rasul 15:2) Sida ukai kepala kitai. Tang sida bepanggai ba Jehovah enggau Jaku Iya sereta nitihka iring Jesus.
2. Nama tanggung pengawa bala tuai gempuru?
Bala tuai gempuru nya menyadi lelaki ke dipilih kena ngiring sereta ngajar eklisia bepelasarka Jaku Petara. Sida mega nulung sereta meransang bala menyadi Kristian ba eklisia. Sida enda digaji. Sida ngereja nya ‘ukai ari pejal, tang enggau ati ti ransing, baka ti dikedekaka Petara kereja’ sida. (1 Peter 5:1, 2) Bala tuai gempuru mega dibantu bala penulung gempuru. Ila, penulung gempuru ke layak ulih dipilih nyadi tuai gempuru.
Sekeda tuai gempuru mega dipilih Raban ti Ngiring nyadi tuai ti ngabas. Nama pengawa sida? Tuai ti ngabas ngelawa eklisia lalu meri iring sereta peransang. Tuai ti ngabas ngena syarat ari Bup Kudus kena milih menyadi lelaki nyadi tuai gempuru sereta penulung gempuru.—1 Timoti 3:1-10, 12; Titus 1:5-9.
3. Nama tanggung pengawa tiap iku Saksi?
Semua ba eklisia bisi peluang ‘muji nama Jehovah.’ (Bacha Masmur 148:12, 13.) Sida ngereja nya lebuh sida ngambi begian ba gempuru sereta ba pengawa nginjil.
BELAJAR MAYUH AGI
Belajarka chara Jesus ngiring, chara bala tuai gempuru neladan Jesus, sereta chara kitai ulih bekerejasama enggau Jesus sereta bala tuai gempuru.
4. Jesus nya kepala ti manah
Peratika kangau Jesus ke ngalitka ati tu. Bacha Matthew 11:28-30, lalu kerandauka tanya tu:
Nama ulah ti diayanka Jesus ngagai bala murid iya? Iya deka kitai ngasaika nama?
Baka ni bala tuai gempuru neladan Jesus? Mainka VIDEO.
Bup Kudus meri iring ti nyemetak pasal chara bala tuai gempuru patut bejalaika tanggung pengawa sida.
Bacha Isaiah 32:2 enggau 1 Peter 5:1-3, lalu kerandauka tanya tu:
Baka ni asai ati nuan lebuh nemu bala tuai gempuru enggau naka ulih ngelantang sereta meransang orang bukai baka Jesus?
Nama chara bukai bala tuai gempuru ulih neladan Jesus?
5. Tuai gempuru ngajar ngena teladan sida
Jesus deka bala tuai gempuru bisi runding ti baka ni ngagai tanggung pengawa sida? Mainka VIDEO.
Bala tuai gempuru patut neladan chara Jesus ngiring ba eklisia. Bacha Matthew 23:8-12, lalu kerandauka tanya tu:
Nitihka ayat tu, nama ulah ke patut diayanka bala tuai gempuru? Baka ni enggau ulah sekeda tuai pengarap kemayaharitu?
Bala tuai gempuru jaga pengarap diri sereta sida sebilik
Bala tuai gempuru ibuhka tiap iku bala menyadi ba eklisia
Bala tuai gempuru bagas nginjil
Bala tuai gempuru ngajar ba eklisia. Sida mega nulung ba pengawa meresi sereta ba pengawa bukai
6. Kitai patut bekerejasama enggau tuai gempuru
Bup Kudus madahka siti kebuah ti beguna kitai patut bekerejasama enggau bala tuai gempuru. Bacha Hebrew 13:17, lalu kerandauka tanya tu:
Bup Kudus meransang kitai ngasika bala menyadi ti ngiring enggau ati ti deka. Kati nuan ngasaika jaku lalau tu manah? Nama kebuah?
Bacha Luke 16:10, lalu kerandauka tanya tu:
Nama kebuah kitai patut bekerejasama enggau bala tuai gempuru indah ba utai ti mit?
BISI ORANG MADAH: “Nuan tau enda ibuh nitih siti-siti raban pengarap.”
Ba runding nuan, nama penguntung enti seseiku orang nyembah Petara begulai enggau orang bukai ba eklisia?
LANSA
Jesus nya kepala eklisia. Bala tuai gempuru nitihka iring ari Jesus. Kitai bekerejasama enggau bala tuai gempuru laban sida meransang, ngelantang sereta ngajar kitai nengah teladan sida.
Ulang Kaji
Sapa kepala eklisia?
Baka ni bala tuai gempuru nulung eklisia?
Nama tanggung pengawa tiap iku orang ke nyembah Jehovah?
ARAM BELAJAR
Peratika chara Raban ti Ngiring sereta bala tuai gempuru ngayanka diri ibuhka bala menyadi Kristian ba eklisia.
Peratika pengawa ke digaga tuai ti ngabas.
Peratika tanggung pengawa sida ke indu ba eklisia.
“Kati Saksi-Saksi Jehovah Bisi Penginjil ke Indu?” (Menara Jaga, 1 September 2012)
Peratika baka ni bala tuai gempuru bebendar meransang sida ke sama pengarap.
“Bala Tuai Gempuru ‘Bekerja enggau Kitai ke Pengaga Kitai’” (Menara Jaga, 15 Januari 2013)