Kati Ulih Aku Tetemuka Jaku ti Ngelantangka Ati dalam Bup Kudus?
Saut ari Bup Kudus
Au ulih. (Rome 15:4) Peratika sekeda ayat Bup Kudus ke udah ngelantangka ati mayuh orang ke bisi penanggul sereta tekanan ba emosi.
Ba artikel tu
Pemerinsa
Masmur 23:4: “Taja pen aku bejalai nengah darung kelemayang pemati, aku enda takut, laban Nuan bisi enggau aku.”
Reti: Lebuh nuan besampi ngagai Petara, lalu ngiga iring Iya dalam Bup Kudus, nuan ulih tan napi pemerinsa nya.
Pilipi 4:13: “Aku ulih napi semua utai ketegal pengering ke diberi Petara ngagai aku.”
Lenyau orang ke dikesayau
Pengajar 9:10: ‘Di dunya pemati [“pendam,” NWT] ila endang nadai pengawa, nadai runding, nadai penemu, nadai penemu-dalam.”
Reti: Orang ke udah mati nadai nemu utai agi. Sida enda pedis tauka enda ulih ngemediska kitai.
Surat Kereja Rasul 24:15: “Petara deka ngidupka orang ke lurus enggau orang ke enda lurus.”
Reti: Petara deka ngidupka orang ke dikesayauka nuan, ti udah mati.
Balat nyalahka diri
Masmur 86:5: “Nuan [Jehovah]a endang manah enggau kami, sereta ngampun. Nuan penuh laban pengerindu ke semua orang ke besampi ngagai Nuan.”
Reti: Petara ngampunka orang ti amat-amat udah nesal ati, sereta orang ke bebendar enggai ngereja penyalah nya agi.
Masmur 103:12: “Baka timur ti jauh ari barat, baka nya meh penyauh Iya muai dosa kitai.”
Reti: Lebuh Petara ngampunka kitai, Iya deka muai dosa kitai enggau naka penyauh, nyentukka kitai pan enda ulih ngambarka nya. Iya mega enda ngungkit tauka nyebut baru penyalah kitai, tauka ngakim tauka ngukum kitai.
Penusah ati
Masmur 31:7: “Nuan udah meda pemerinsa aku. Nuan nemu penusah aku.”
Reti: Petara amat-amat nemu semua penusah ati ke diasaika nuan. Taja pan orang bukai enda faham pasal asai ati nuan, tang Petara meda ati nuan.
Masmur 34:18: “Jehovah diau semak orang ke tusah ati lalu ngidupka sida ke nadai agi pengadang.”
Reti: Petara besemaya deka ngelantangka ati nuan lebuh nuan tusah ati. Iya ulih meri nuan pengering kena napi semua penguji nuan.
Penyakit
Masmur 41:3: “Jehovah deka nulung sida lebuh sida sakit lalu deka ngeraika sida.”
Reti: Lebuh nuan balat sakit, Petara ulih meri nuan ati ti tenang, pengering, liat ati, sereta penemu-dalam ngambika ulih ngaga pemutus ti manah.
Isaiah 33:24: “Nadai orang ke diau dalam menua kitai deka mutap madahka diri sakit.”
Stres enggau pengirau
Masmur 94:19: “Lebuh ati aku mayuh pengirau, Nuan merindang aku, lalu ngasuh ati aku gaga.”
Reti: Enti kitai bepanggai ngagai Jehovah lebuh bisi pengirau, Iya deka nulung kitai ngembuan ati ti tenang.
1 Peter 5:7: “Buai semua pengirau kita ngagai Petara laban Iya ibuhka kita.”
Reti: Petara amat ibuhka kitai. Iya meransang kitai besampi, lalu madahka semua pengirau kitai ngagai Iya.
Perang
Masmur 46:9: “Iya ngasuh perang badu agi nyadi di serata dunya.”
Reti: Perintah Petara deka ngetuka perang enda lama da agi.
Masmur 37:11, 29: “Orang ke baruh ati deka bempu menua tu lalu diau lantang. . . . Orang ke lurus deka bempu menua tu lalu diau ditu belama iya.”
Reti: Orang ke manah deka ngasaika pengelantang ba dunya belama iya.
Irau pasal utai ke dudi hari
Jeremiah 29:11: “Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila.”
Reti: Petara deka penyembah Iya andal, sida deka ngembuan harapan ti manah dudi hari.
Pemandang 21:4: “Iya deka ngendas semua ai mata ari mata sida, lalu pemati deka nadai agi. Nadai agi balat tusah ati, nadai agi nyabak, nadai agi pedis. Semua utai ti lama udah nadai agi.”
Reti: Petara besemaya, Iya deka muai semua utai ti jai ke dipeda sereta diasaika nuan diatu.
a Jehovah nya nama Petara ke bisi ayan ba senentang Jaku Penerang dalam Bup Kudus