PELAJAR 28
Ayanka Diri Beterima Kasih ngagai Jehovah enggau Jesus
Nama asai ati nuan pengudah nerima pemeri ti spesial ari kaban nuan? Nuan tentu amat gaga ati lalu deka ngayanka diri beterima kasih. Jehovah enggau Jesus udah meri kitai pemeri ti amat berega. Nama pemeri nya? Lalu baka ni kitai ulih ngayanka diri beterima kasih ngagai seduai iya?
1. Nama siti chara kena ngayanka diri beterima kasih?
Bup Kudus madahka kitai, “genap iku orang ke arapka [Jesus]” deka bulih pengidup ti meruan belama iya. (John 3:16) Nya alai, siti chara kitai ngayanka diri beterima kasih iya nya, ngembuan pengarap ngagai Jesus. Baka ni kitai ulih ngereja nya? Kitai patut ngayanka pengarap nengah jaku, ulah, sereta pemutus ke digaga kitai. (James 2:17) Enti kitai bebendar ngayanka pengarap ba pengidup kitai, kitai deka negapka kaul kitai enggau Jehovah sereta Jesus.—Bacha John 14:21.
2. Nama pengawa ti spesial ke nulung kitai ngayanka diri beterima kasihka utai ti udah digaga Jehovah enggau Jesus?
Malam sebedau Jesus mati, iya ngepunka siti pengawa ti spesial ke dikumbai “Makai Malam Tuan,” tauka pengawa Ngingatka Pemati Jesus. (1 Korint 11:20) Bekaul enggau pengawa tu, Jesus madahka: ‘Kereja tu kena ngingatka aku.’ (Luke 22:19) Bala rasul enggau semua murid Kristus ulih ngingatka pemati Jesus lebuh sida sama enggau pengawa tu. Baka ni nuan ulih nunjukka diri beterima kasih? Nuan ulih ngereja nya lebuh nuan datai ba pengawa ti spesial tu.
BELAJAR MAYUH AGI
Peratika chara bukai kena malas pengerindu Jehovah enggau Jesus. Belajar mega kebuah ngintu pengawa Ngingatka Pemati Jesus nya utai ti amat beguna.
3. Nama ulih digaga kitai kena nunjukka diri beterima kasih?
Gambarka nuan nyauka lemas lalu bisi orang nyelamatka nuan. Kati nuan enda ingatka utai ti udah dikereja iya? Tentu enda. Nuan tentu deka bebendar malas pemanah iya.
Jehovah mega udah nyelamatka kitai sereta meri kitai peluang bulih pengidup ti bendar. Bacha 1 John 4:8-10, lalu kerandauka tanya tu:
Nama kebuah genselan tebus Jesus nya pemeri ti amat spesial?
Nama asai ati nuan pasal utai ti dikereja Jehovah enggau Jesus ke nuan?
Baka ni kitai ulih nunjukka diri beterima kasih ngagai seduai iya? Bacha 2 Korint 5:15 enggau 1 John 4:11; 5:3. Pengudah macha tiap iti ayat, kerandauka tanya tu:
Baka ni kitai ulih nunjukka diri beterima kasih?
4. Tunda meh teladan Jesus
Siti agi chara kitai ngayanka diri beterima kasih iya nya, enggau nunda teladan Jesus. Bacha 1 Peter 2:21, lalu kerandauka tanya tu:
Baka ni nuan ulih bebendar nitihka singkang Jesus?
Jesus rinduka Jaku Petara, nginjil pasal berita manah, sereta rindu nulung orang
5. Sama enggau pengawa Ngingatka Pemati Jesus
Peda meh utai ti nyadi ba pengawa Makai Malam Tuan ti keterubah. Bacha Luke 22:14, 19, 20, lalu kerandauka tanya tu:
Nama utai ti nyadi maya pengawa Makai Malam Tuan?
Nama digambarka roti enggau wain?—Peda ayat 19 enggau 20.
Jesus deka bala murid iya ngintu pengawa Makai Malam Tuan setaun sekali ba haribulan iya mati. Saksi-Saksi Jehovah nitihka pesan Jesus lalu ngintu pengawa tu ninting taun. Kena nemu mayuh agi, mainka VIDEO, lalu kerandauka tanya tu.
Nama utai ti nyadi maya pengawa Ngingatka Pemati Jesus?
Roti enggau wain ngambarka siti-siti utai. Roti ngambarka tubuh Jesus ti sempurna ke diserahka iya kena ngarika kitai. Wain ngambarka darah iya
BISI ORANG MADAH: “Ngambika ulih selamat, kitai semina patut pechayaka Jesus aja.”
Baka ni nuan deka ngena John 3:16 enggau James 2:17 kena nulung iya mereti, semina pechaya aja enda chukup?
LANSA
Kitai nunjukka diri beterima kasih ngagai Jesus enggau arapka sereta datai ngagai pengawa ngingatka pemati iya.
Ulang Kaji
Baka ni nuan nunjukka diri arapka Jesus?
Nama ulih dikereja nuan kena nunjukka diri beterima kasih ngagai Jehovah enggau Jesus?
Nama kebuah nya beguna sama enggau pengawa Ngingatka Pemati Jesus?
ARAM BELAJAR
Pemati Jesus meransang kitai ngereja nama?
Belajar mayuh agi pasal reti pengarap sereta chara ngayanka iya.
Bacha cherita “Aku Enda Agi Berasai Besalah sereta Ulih Idup enggau Lantang,” kena meda baka ni genselan tebus Jesus udah ngubah pengidup seiku indu.
Peratika kebuah semina mimit aja orang makai roti enggau ngirup wain maya pengawa Ngingatka Pemati Jesus.