Ajar ti Meri Pengadang

Petara Deka Munaska Orang ke Jai

“Orang ke jai nyangka ulih tumbuh baka rumput, orang ke ngereja penyalah nyangka tau nyadi kaya-raja, tang sida deka dirusak abis lengis.”​—MASMUR 92:7.

Baka ke ditemu kitai ba artikel sebedau tu, penyai majak balat nyadi. Kitai enda ibuh tekenyit pasal utai tu, laban tu udah dipadahka dalam Bup Kudus ba 2 Timoti 3:1-5 ke madahka, “ba hari ti penudi” mensia deka balat agi jai. Nama reti “hari ti penudi”? Tu reti iya, enda lama da agi, Petara deka ngemunaska orang ke enda ngasika Iya sereta enggai berubah. Nyadi, semina orang ke manah, iya nya orang ke ngasika Petara deka terus diau ba dunya. “Orang ke lurus deka bempu menua tu lalu diau ditu belama iya.”—Masmur 37:29.

Petara Deka Munaska Sitan

‘Petara ke pun pemaik, deka ngeredakka Sitan.’​—ROME 16:20.

Lebuh Sitan, bala antu, enggau semua orang ke jai nadai agi, dunya deka penuh enggau pemaik. Ku Petara besemaya: “Nadai agi orang deka ngemba [nuan.]”—Mikah 4:4.

Petara Deka Ngetuka Penyakit enggau Pemati

‘Petara deka diau enggau nembiak Iya! . . . Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis.’​—PEMANDANG 21:3, 4.

Pemerinsa enggau penyakit deka badu agi nyadi, laban Petara deka ngaduka semua penusah ke dibai Sitan, Adam, Awa enggau penyalah kitai empu. Asil iya, dudi hari “pemati nadai agi.” Mensia ke rindu sereta ngasika Petara deka idup belama iya. Tang dini alai sida idup?

Petara Deka Ngaga Dunya Kitai Nyadi Paradais

“Menua puang deka rami gaga, lalu bungai deka tumbuh di menua ti kusi.”​—ISAIAH 35:1.

Pengudah semua penyai dilenyauka, dunya deka nyadi Paradais. Ba Paradais deka ngembuan mayuh taman ti lawa, kebun ti lawa, sereta mayuh pemakai. (Masmur 72:16) Tasik, danau, enggau sungai deka nyadi beresi sereta penuh enggau utai idup. Maya tu, mensia enda nemu reti pengamah agi. Mensia ulih ngaga kediri empu rumah lalu diau dia. Sida enda ibuh agi irau pasal nadai rumah, lapar tauka suntuk.—Isaiah 65:21, 22.

Petara Deka Ngidupka Orang Mati

“Semua orang ke lurus enggau ke enda lurus deka diangkatka ari mati.”​—SURAT KEREJA RASUL 24:15.

Kati nuan deka betemu baru enggau orang ke dikesayauka nuan ti udah nadai? Petara ti Pemadu Bekuasa deka ngidupka sida baru lalu diau ba dunya Paradais. Lebuh nuan tepedaka sida, nuan deka terus ngelala sida. Gambarka pengaga ati nuan enggau sida. Nama kebuah kitai ulih arapka pengadang tu? Laban dalam Bup Kudus bisi mayuh chunto pasal orang sereta bala anak mit ke diidupka baru lalu begulai enggau diri sebilik ba mua mayuh orang.—Luke 8:49-56; John 11:11-14, 38-44.