Penerang ke Bup Kereja Pengidup enggau Pengawa Kristian
© 2023 Watch Tower Bible and Tract Society of Pennsylvania
1-7 MEI
RETA ARI BUP KUDUS | 2 BANSA ISRAEL 17-19
“Titihka Chara Jehovah Meda Orang Bukai”
Kati Kitai Deka Beratika Utai Ti Ditulis?
7 Aram kitai diatu berandau pasal chunto anak Asa, Jehosapat. Iya ngembuan mayuh kualiti manah ti ngelantangka ati Jehovah. Lalu lebuh iya bepanggai ba Jehovah, iya ngereja mayuh utai ti manah. Tang iya mega ngaga sekeda pemutus ti enda manah. Ngambika chunto, iya ngatur anak lelaki iya jadi enggau anak indu Raja Ahap, raja ti jai. Udah nya, Jehosapat setanah enggau Ahap lebuh beperang ngelaban orang Siria, taja pan nabi Mikaiah udah nangkan iya ari setanah enggau Ahap. Lebuh beperang, orang Siria nyerang Jehosapat, lalu nguji deka munuh iya. (2 Ban. 18:1-32) Lebuh iya pulai ngagai Jerusalem, nabi Jehu nanya iya: ‘Kati nuan ngumbai diri ngereja utai ti ngena nulung orang ke jai, lalu setanah enggau orang ke begedika Jehovah?’—Bacha 2 Bansa Israel 19:1-3.
Belematika Pengerindu Jehovah ti Meruan
8 Jehovah deka kitai nemu Iya rinduka kitai, lalu Iya meda pemanah ke bisi ba kitai. Iya ukai meda pengurang kitai. (2 Ban. 16:9) Aram kitai beratika baka ni Jehovah meda pemanah ke bisi ba Raja Jehosapat ari menua Judah. Jehosapat ngaga pemutus ke enda manah, laban iya enggau Raja Ahap ari menua Israel beperang ngelaban soldadu orang Siria ba Ramot-giliat. Taja pan 400 iku nabi pelesu madahka Ahap ke jai deka menang ba perang nya, tang nabi ke amat ari Jehovah iya nya Mikaiah madahka dua iku raja nya deka alah, enti sida beperang. Lalu utai nya endang amat nyadi. Ahap mati ba perang, lalu Jehosapat nyau deka kena bunuh. Pengudah perang nya, Jehovah ngena Jehu meri jaku lalau ngagai Jehosapat ketegal penyalah iya. Taja pia, Jehu mega madahka iya: “Nuan bisi pemadas ba nuan empu.”—2 Ban. 18:4, 5, 18-22, 33, 34; 19:1-3.
9 Beberapa taun sebedau nya, Jehosapat ngasuh bala pemesai, orang Lewi, enggau bala imam ngagai semua nengeri ba menua Judah ngambika ngajar orang Adat Jehovah. Sida mujur amat nyentukka orang ari bansa bukai mega nemu pasal Jehovah. (2 Ban. 17:3-10) Taja pan Jehosapat ngaga pemutus ti enda manah udah nya, Jehovah agi ingatka pemanah ke udah digaga iya. Chunto tu ngelantangka ati kitai laban kekadang kitai ngereja penyalah. Taja pia, enti kitai enggau naka ulih nyembah Jehovah, Iya deka terus rinduka kitai sereta ingatka pemanah ke udah digaga kitai.
Penemu Bup Kudus ti Berega
Nyembah Jehovah Enggau Pengabis Ati!
10 Jehosapat “baka apai iya [Asa] ke dulu ari iya.” (2 Ban. 20:31, 32) Baka ni? Baka apai iya, Jehosapat meransang rayat iya terus nyembah Jehovah. Iya nganjung bala pemesai ngagai semua nengeri di menua Judah ngajar orang ari ‘Bup Adat Jehovah.’ (2 Ban. 17:7-10) Iya indah ngagai perintah ti di utara menua Israel, ngagai orang di menua Epraim ti bebukit, ‘mai orang mayuh pulai baru ngagai Jehovah.’ (2 Ban. 19:4) Jehosapat nya raja ‘ke udah enggau naka ulih betuaika Jehovah.’—2 Ban. 22:9.
11 Kemaya hari tu, Jehovah deka orang di serata dunya belajar pasal Iya, lalu semua kitai ulih nulung ba pengawa tu. Kati nya juluk ati nuan deka enggau pengawa tu ninting bulan? Kati nuan deka ngajar orang bukai pasal Bup Kudus ngambika sida mega ulih berengkah nyembah Jehovah? Bisi nuan besampi ke utai tu? Enti nuan bebendar, Jehovah ulih nulung nuan ngepunka pengawa belajarka Bup Kudus. Enti orang deka belajarka Bup Kudus lebuh nuan patut belelak, kati deka nuan belajar enggau iya? Lalu sama baka Jehosapat ke nguji nulung orang bukai berengkah nyembah Jehovah baru, kitai ulih nguji nulung orang ke enda aktif agi. Pia mega, bala tuai gempuru ngatur pengawa ngabas sereta meri bantu ngagai orang ke udah dibuai ari eklisia sida ke engka udah ninggalka ulah lama ti bedosa.
8-14 MEI
RETA ARI BUP KUDUS | 2 BANSA ISRAEL 20-21
‘Arapka Jehovah Petara Kita’
w14 15/12 23 ¶8
Begulai Napi Pengujung Dunya Tu
8 Ba jeman Raja Jehosapat, mayuh bala soldadu datai nyerang nembiak Petara. (2 Ban. 20:1, 2) Nama utai ti dikereja orang Israel lebuh sida dikelulung bala munsuh? Sida arapka Jehovah sereta minta iring ari Iya. (Bacha 2 Bansa Israel 20:3, 4.) Sida enda nguji ngereja tu kediri, tang sida begulai ngereja nya. Bup Kudus madahka: “Semua orang Judah, sama enggau bini enggau anak sida, bediri magang dia di mua Rumah Sembiang.” (2 Ban. 20:13) Enda ngira biak tauka tuai, semua sida arap sereta nitihka iring ari Jehovah, lalu Jehovah nyaga sida ari bala munsuh. (2 Ban. 20:20-27) Cherita tu nunjukka chara nembiak Petara kemayaharitu ulih begulai napi serang ari bala munsuh.
Laki Bini ke Baru Jadi—Kenuluka Pengawa Jehovah ba Pengidup Kita
7 Jehovah nyaut sampi Jehosapat nengah seiku orang Lewi ke benama Jahasil. Jehovah madah: ‘Belatur aja, lalu diau jenuh nengkilaka Jehovah menang beperang ngarika kita.’ (2 Ban. 20:13-17) Nya chara beperang ti nyelai! Taja pia, iring nya ukai datai ari mensia tang datai ari Jehovah. Ketegal Jehosapat andalka Jehovah, iya ngereja utai ke diasuh Jehovah. Lebuh iya enggau bala rayat mansang ngagai endur beperang, Jehosapat enda ngengkahka bala soldadu ba mua. Tang iya ngengkahka bala lelaki ke enda besenyata, ke muji Jehovah nengah lagu. Jehovah ngamatka semaya Iya ngagai Jehosapat lalu ngalahka bala munsuh nya.—2 Ban. 20:18-23.
Penemu Bup Kudus ti Berega
it-1 1271 ¶1-2
Jehoram
Jehoram enda nitihka teladan manah apai iya, Jehosapat. Tu engka ketegal ulah bini iya, Ataliah, ti enda manah. (2Ra 8:18) Jehoram ukai aja munuh enam iku madi iya sereta beberapa iku bala pemesai, tang iya mega ngasuh rayat iya limpang ari Jehovah sereta nyembah bala petara ti pelesu. (2Ba 21:1-6, 11-14) Sepemanjai jeman iya merintah, bisi mayuh penanggul nyadi ari dalam sereta luar perintah iya. Keterubah, Edom angkat ngelaban; udah nya Libnah angkat ngelaban Judah. (2Ra 8:20-22) Dalam siti surat ke nuju ngagai Jehoram, nabi Elijah nangkan: ‘Jehovah deka balat ngukum bala nembiak nuan, bala anak nuan enggau bala bini nuan, lalu deka ngerusak pesaka nuan.’ Nambahka nya, Raja Jehoram ‘deka ngidap penyakit pedis perut, ti deka majak balat-sebalat ari hari siti ngagai hari siti.’— 2Ba 21:12-15.
Semua utai nya amat nyadi. Jehovah nejuka orang Arab enggau orang Pilistin nyerang menua nya lalu naban bala bini sereta bala anak lelaki Jehoram. Petara semina nejuka anak Jehoram ti pemadu biak, Jehoahas (ke mega dikumbai Ahasiah), ngerarika diri. Lalu nya pan ketegal sempekat Perintah Petara ke digaga enggau David. ‘Udah nya Jehovah lalu ngasuh Raja Jehoram sakit pedis perut ti enda nemu gerai.’ Dua taun udah nya, usus iya pansut lalu tu ngujungka iya mati. Nya meh pengujung pengidup lelaki ti jai tu, lalu “nadai orang ngulitka iya lebuh iya mati.” Iya dikuburka ba Nengeri David, “tang ukai ba lumbung [tauka pendam] bala raja.” Pengudah nya anak lelaki iya, Ahasiah, nyadi raja.—2Ba 21:7, 16-20; 22:1; 1Ba 3:10, 11.
15-21 MEI
RETA ARI BUP KUDUS | 2 BANSA ISRAEL 22-24
“Jehovah Merekatka Ulah ti Berani”
Pemerani Jehoiada
Jesebel bisi seiku anak indu ke benama Ataliah ti sama jai baka iya. Ataliah jadi enggau raja menua Judah. Lebuh laki iya mati, anak lelaki iya berengkah merintah. Tang lebuh anak lelaki iya mati, Ataliah milih diri empu nyadi pemerintah menua Judah. Udah nya iya nguji deka munuh sapa-sapa ke ulih nyadi raja, nyengkaum bala uchu lelaki iya empu. Semua orang takutka iya.
Imam Besai Jehoiada enggau bini iya, Jehoseba, nemu utai ke digaga Ataliah nya amat jai. Seduai iya berambunka nyawa ngelalaika seiku ari uchu Ataliah ke benama Joas. Seduai ngemesaika iya ba rumah sembiang.
Pemerani Jehoiada
Lebuh Joas beumur tujuh taun, Jehoiada ngempuruka bala pemesai enggau orang Lewi lalu madahka sida: ‘Jaga pintu rumah sembiang, lalu anang ngasuh sapa-sapa tama.’ Jehoiada lalu ngiri Joas nyadi raja menua Judah sereta ngengkahka makota ba pala iya. Orang Judah manjung: ‘Gayu-guru meh raja!’
Kuin Ataliah ninga munyi panjung lalu beguai ngagai rumah sembiang. Lebuh iya meda raja ti baru, iya nyerauh: “Penipu! Penipu!” Bala pemesai ngambi kuin ti jai nya, mai iya pansut ari rumah sembiang lalu munuh iya. Tang nama nyadi enggau pengawa jai iya ba menua nya?
it-1 379 ¶5
Kubur, Pendam
Imam Besai Jehoiada ti lurus dikuburka ba pendam “bala raja di Nengeri David.” Iya siku aja ke ukai peturun raja ti diberi basa ke baka tu.—2Ba 24:15, 16
Penemu Bup Kudus ti Berega
it-2 1223 ¶13
Sekariah
12. Anak lelaki Imam Besai Jehoiada. Pengudah Jehoiada mati, Raja Joas enda agi nyembah Jehovah laban iya rindu agi ninga jaku ajar ti enda manah ari ke ninga jaku ajar ari bala nabi Jehovah. Sekariah nya petunggal Joas (2Ba 22:11), iya nangkan orang pasal utai tu, tang ari ke nesal ati, sida nuku iya ngena batu ba tengah laman Rumah Sembiang. Sekariah meri jaku benabi ti penudi tu sebedau iya mati: ‘Awakka Jehovah meda lalu malas!’ Jaku benabi tu dikeamatka. Siria mai pengerusak ti besai ngagai Judah; Joas mega dibunuh dua iku orang gaji iya “laban iya udah munuh anak Imam Jehoiada.” Septuagint Gerika enggau Vulgate Latin madahka, Joas dibunuh kena malas dendam laban Joas udah munuh “anak” Jehoiada. Taja pia, teks Masoret enggau Peshitta Siria, ngena rambai jaku “bala anak.” Tu engka nunjukka mulia sereta pemayuh utai ke ulih dikereja anak Jehoiada, Sekariah, ke mega nyadi imam sereta nabi.—2Ba 24:17-22, 25.
22-28 MEI
RETA ARI BUP KUDUS | 2 BANSA ISRAEL 25-27
“Jehovah Ulih Meri Nuan Mayuh Agi ari Nya”
it-1 1266 ¶6
Joas
Raja Judah ngaji seratus ribu iku soldadu Joas kena beperang ngelaban orang Edom. Taja pia, “siku nabi” ngasuh sida dianjung pulai, taja pan sida udah dibayar seratus talenta pirak ($660,600). Bala soldadu nya ringat laban diasuh pulai. Tu engka ketegal sida nadai peluang bulih utai ke dirampas ti dianti sida. Nya alai pengudah sida pulai ke utara, sida nyerang kuta ba perintah di selatan ari Samaria (engka kem soldadu sida) nyentuk ngagai Beth-horon.—2Ba 25:6-10, 13.
Baka Ni Kitai Ulih “Ngasaika” Pemadas Jehovah?
16 Sanggup ngelengkaka utai ke Jehovah. Ngambika kitai ngelantangka ati Jehovah, kitai enda ibuh ngelengkaka semua utai ti dikerinduka kitai. (P-jar. 5:19, 20) Taja pia, enti kitai milih enggai ngereja mayuh ke Jehovah ketegal kitai enggai ngelengkaka sekeda utai ti dikerinduka kitai, kitai nyau baka seiku lelaki ba sempama Jesus ke bebendar ngulihka mayuh utai ti manah tang enda ibuhka Petara. (Bacha Luke 12:16-21.) Seiku menyadi lelaki ke benama Christian, ke diau di Perancis, madahka, “Aku ngasaika diri enda meri utai ti pemadu manah ngagai Jehovah sereta diri sebilik.” Iya enggau bini iya mutuska deka ngerintis. Tang kena nyapai juluk ati nya, seduai iya patut badu kereja. Kena ngiga belanja, seduai iya berengkah meresi rumah tauka opis orang lalu belajar puas ati enggau utai ti dikemisi seduai iya, taja pan penatai pemisi seduai iya engka kurang agi ari ngelama tu. Kati seduai iya gaga ati pengudah ngelengkaka sekeda utai ngambika ulih ngerintis? Ku Christian madah, “Diatu kami duai gaga agi ba pengawa nginjil lalu gaga ati meda pemelajar Bup Kudus sereta orang ke diabas kami belajar pasal Jehovah.”
Penemu Bup Kudus ti Berega
w07 15/12 10 ¶1-2
Kati Nuan Bisi Siku Menyadi Kristian ke Ulih Ngiring Nuan ba Pengawa Rohani?
LEBUH Usiah beumur 16 taun, iya nyadi raja perintah Judah ba selatan. Iya merintah pengelama lebih ari 50 taun, ari ujung abad kesemilan nyentuk ngagai pun abad kelapan S.M. Kenyau ari maya iya agi biak, Usiah ‘ngereja utai ti ngerinduka ati Jehovah.’ Nama utai ke ngasuh iya nitihka jalai pengidup ti betul? Bup Kudus madahka: ‘Sekumbang Sekariah, ti nyadi penyanding penemu iya, agi idup, Usiah betuaika Jehovah enggau ati ti tetap, lalu Petara merekatka iya.’—2 Bansa Israel 26:1, 4, 5.
Kelimpah ari ayat Bup Kudus tu, kitai enda nemu mayuh utai pasal Sekariah, penyanding penemu raja. Tang ketegal iya pengajar ti nangika Petara, Sekariah ulih meri iring ti manah ngagai Usiah kena ngereja utai ti betul. The Expositor’s Bible madahka Sekariah nya “siku lelaki ti landik pasal Bup Kudus, mayuh penemu pasal utai rohani, sereta ulih mantaika utai ti ditemu iya.” Siku pakar Bup Kudus madahka tu pasal Sekariah: “Iya amat nemu pasal jaku benabi lalu . . . iya mega siku lelaki ti pandai, alim, sereta manah; lalu iya mega bisi empas ti besai ba pengidup Usiah.”
29 MEI–4 JUN
RETA ARI BUP KUDUS | 2 BANSA ISRAEL 28-29
“Nuan Ulih Nyembah Jehovah taja pan Apai Indai Nuan Ukai Chunto ti Manah”
Neladan Kawan Rapat Jehovah
8 Sejarah pengidup Hesekiah enda sebaka enggau enggi Rut. Iya nyadi sebegian ari bansa ke udah nyerahka diri ngagai Petara. Tang ukai semua orang Israel mengkang tetap ati. Apai Hesekiah, Raja Ahas nya jai. Iya enda bebasaka Rumah Sembiang Petara, lalu ngansak orang nyembah petara bukai. Ahas indah nyerahka sekeda menyadi lelaki Hesekiah ditunu idup-idup nyadika pemeri ngagai seiku petara pelesu. Tu ngenakutka Hesekiah lebuh iya agi mit!—2 Raj. 16:2-4, 10-17; 2 Ban. 28:1-3.
Neladan Kawan Rapat Jehovah
9 Pengawa Ahas ke jai engka ngasuh anak iya Hesekiah ringat ngagai Jehovah. Kemaya hari tu, sekeda orang ke natka penanggul ti mit agi ari enggi Hesekiah ngasaika diri bisi kebuah ‘nyalahka Jehovah’ tauka ringat ngagai gerempung Iya. (J-lam. 19:3) Sida ke bukai ngasaika sejarah pengidup sida sebilik ke enda manah ulih ngasuh sida bisi pengidup ke enda manah tauka ngulang penyalah apai indai sida. (Esk. 18:2, 3) Kati tu amat?
10 Pengidup Hesekiah nunjukka saut iya enda! Nadai kebuah tau ringat ngagai Jehovah. Iya nadai ngereja utai ti enda manah ngagai orang. (Jop 34:10) Endang amat, apai indai ulih ngajar bala anak sida ngereja utai ti manah tauka enda manah. (J-lam. 22:6; Kol. 3:21) Tang tu ukai reti sejarah pengidup diri sebilik ulih nentuka kitai deka nyadi orang ke baka ni. Nama kebuah? Laban Jehovah udah meri kitai pemeri ulih bebas milih. Reti nya kitai ulih milih ngereja utai ti manah tauka enda manah. (U-dat. 30:19) Baka ni Hesekiah ngena pemeri ti berega nya?
11 Taja pan apai Hesekiah nya seiku ari raja ti pemadu jai ba menua Judah, tang Hesekiah nyadi seiku ari raja ti pemadu manah. (Bacha 2 Raja 18:5, 6.) Iya milih enda nitihka pengawa apai iya ti jai. Tang, iya milih mendingka bala nabi Jehovah iya nya Isaiah, Mikah sereta Hosia. Iya beratika jaku lalau enggau jaku ajar ari sida. Tu meransang iya mutarka mayuh penusah ke udah digaga apai iya. Iya nuchi Rumah Sembiang, minta Petara ngampunka dosa orang Israel sereta muai semua engkeramba ke bisi ba menua nya. (2 Ban. 29:1-11, 18-24; 31:1) Udah nya, lebuh raja Senakrip menua Asiria ngemba deka nyerang Jerusalem, Hesekiah nunjukka diri ngembuan pemerani sereta pengarap ti besai. Iya arapka jaga ari Jehovah sereta ngeringka rayat iya. (2 Ban. 32:7, 8) Hesekiah kala nyadi sumbung, tang lebuh Jehovah ngajar iya, iya ngemaruhka diri empu. (2 Ban. 32:24-26) Endang amat, Hesekiah nya teladan ti manah ke patut dititihka kitai. Iya enda ngelakka sejarah pengidup sida sebilik ngerusakka pengidup iya. Tang, iya nunjukka diri kawan Jehovah.
Penemu Bup Kudus ti Berega
w12 15/2 24-25
Natan—Penyukung Sembah ti Bendar ke Tetap Ati
Natan nya penyembah Jehovah ti tetap ati, iya nyukung pelan David kedeka nirika endur sembah ti tuchi ti keterubah ba dunya tu. Tang maya nya, Natan madahka runding diri empu, ukai runding Jehovah. Malam nya, Jehovah ngasuh Natan ngenataika pesan ti bebida ngagai raja: Ukai David ke deka nirika Rumah Petara, tang anak iya. Natan mega madahka pasal sempekat Petara tu ngagai David: “Perintah nuan enda nemu abis.”—2 Sam. 7:4-16.
Jaku Natan pasal pengawa nirika Rumah Petara enda sejalai enggau penaka Petara. Taja pia, Natan enda mutap. Iya enggau baruh ati ngereja utai sejalai enggau tuju Petara. Lebuh dirara Petara, kitai mega patut neladan Natan. Bup Kudus madahka Jehovah terus ngena Natan. Jehovah udah ngena iya enggau Gad, siku nabi kebukai, kena nulung David ngatur 4,000 iku pemusik kena gawa ba Rumah Petara.—1 Ban. 23:1-5; 2 Ban. 29:25.
5-11 JUN
RETA ARI BUP KUDUS | 2 BANSA ISRAEL 30-31
“Begulai Begempuru Nya Manah ke Kitai”
it-1 1103 ¶2
Hesekiah
Pengeransing Iya ke Sembah ti Bendar. Hesekiah ngayanka pengeransing iya ke sembah ti tuchi ngagai Jehovah sepengudah iya nyadi raja lebuh iya beumur 25 taun. Utai keterubah ke dikereja iya, ngaduka baru sereta muka Rumah Sembiang nya. Udah nya, pengudah ngelumuka bala imam sereta orang Lewi, iya madah ngagai sida: ‘Aku udah mutuska runding deka ngaga siti sempekat enggau Jehovah Petara ke disembah orang Israel.’ Taja pan sempekat Adat agi dikena tang orang Israel enda nitihka adat nya. Nyadi, lebuh Hesekiah ngaga sempekat penetap ati tu, nya baka ke ngumbai sempekat Adat nya digaga baru ba Judah. Enggau pengeransing ti besai, iya ngatur pengawa orang Lewi, sereta ngatur baru perengka musik sereta pengawa belagu muji Jehovah. Maya nya bulan Nisan, alai pengerami Paska patut diintu, tang Rumah Sembiang, bala imam, sereta orang Lewi, enda tuchi. Ba hari ke-16 bulan Nisan, Rumah Sembiang dikuduska lalu perengka nya dikena baru. Udah nya, siti pemeri ti spesial patut digaga ke orang Israel. Keterubah, bala pemesai mai pemeri, pemeri dosa ke perintah, rumah sembiang, sereta orang Israel. Pengudah nya, orang Israel meri beribu iti pemeri tunu.—2Ba 29:1-36.
it-1 1103 ¶3
Hesekiah
Orang Israel enda tuchi. Nya kebuah sida enda ulih ngintu Pengerami Paska ba maya ke udah ditetapka. Nya alai, Hesekiah ngena atur ba adat ke ngemendarka orang ti enda tuchi ngintu Pengerami Paska sebulan udah nya. Iya ukai aja ngangau orang Judah, tang mega orang Israel nengah surat ke dibai orang ke mai pesan ngagai serata nengeri, ari Beerseba ngagai Dan. Orang ke mai pesan balat dikelese mayuh orang; tang orang ari raban bansa bukai ngemaruhka ati sida lalu datai, kelebih agi sida ke ari raban bansa Aser, Manasi, enggau Sebulun. Sekeda orang ari raban bansa Epraim enggau Isakar mega datai. Kelimpah ari nya, mayuh penyembah Jehovah ke ukai orang Israel mega bisi enggau. Sida ke nyukung sembah ti bendar ba perintah di utara engka tusah deka datai. Baka orang ke mai pesan nya, sida mega deka napi sakal sereta kelese. Tu ketegal perintah sepuluh raban bansa nya benung dalam situasi ti enda manah laban sida balat nyembah petara ti pelesu sereta dikachau orang Asiria.—2Ba 30:1-20; Ppau 9:10-13.
it-1 1103 ¶4-5
Hesekiah
Pengudah Pengerami Paska, Pengerami Roti ti Enda Beragi diintu pengelama tujuh hari. Sida balat amat gaga ati nyentukka semua orang ngaga pemutus deka nampung pengerami nya tujuh hari agi. Taja pan ba maya ti tusah nya, berekat ari Jehovah mengkang bisi nyentukka “semua orang di nengeri Jerusalem gaga ati magang, laban nadai utai ti baka nya udah kala nyadi kenyau ari rambau Raja Solomon, anak Raja David.”—2Ba 30:21-27.
Utai ti nyadi pengudah nya nunjukka pengawa tu ukai semina mai pengaga ati ti sementara aja, tang pengawa tu deka ngaduka baru sereta mulaika baru sembah ti bendar. Sebedau orang ke ngintu pengerami nya pulai, sida ngagai serata menua Judah enggau Benjamin, indah ngagai Epraim enggau Manasi, kena ngerusak tiang batu, nebang tanda petara pelesu sida lalu ngerusak alta enggau endur alai orang kapir nyembah petara sida. (2Ba 31:1) Hesekiah netapka teladan nya lebuh iya ngeredakka ular temaga ti udah digaga Moses laban orang Israel nyadika ular temaga nya engkeramba sida lalu nunu menyan ke ular nya. (2Ra 18:4) Pengudah pengerami nya tembu, Hesekiah nentuka sembah ti bendar terus dipejalaika. Iya magi bala imam nitihka raban sereta ngatur sida kena neruska pengawa ba Rumah Sembiang; iya mega ngingatka orang pasal penetap ati sida ngagai Adat, baka utai ti bekaul enggau pemeri persepuluh sereta pemeri asil ti keterubah ngagai orang Lewi sereta bala imam. Bala rayat iya nyukung atur tu enggau pengabis ati.—2Ba 31:2-12.
Penemu Bup Kudus ti Berega
Nama Patut Digaga Kitai enti Deka Gaga Ati?
14 Siti agi chara kitai mandangka diri baruh ati nya enggau nyadi peninga ti manah. James 1:19 ngasuh kitai “jampat mending.” Jehovah nya peninga ti pemadu badas. (P-kal. 18:32; Jos. 10:14) Ambika chunto, bacha randau ke bisi ba Pemansut 32:11-14. (Bacha.) Taja pan Jehovah enda begunaka penemu ari Moses, tang Iya ngawakka Moses madahka asai ati diri. Enti sema orang ke kala meri penemu ti salah mansutka runding iya, deka nuan ningaka utai ti disebut iya lalu udah nya nitihka utai ku iya? Indah Jehovah ningaka sampi semua mensia ti disebut ngena pengarap.
15 Tanya diri empu: ‘Enti Jehovah ulih enggau ati ti baruh mendingka Abraham, Rachel, Moses, Josua, Manoah, Elijah, enggau Hesekiah, endaka aku pan patut baka nya? Ulih aku bebasa agi ke semua bala menyadi Kristian aku enggau mending sereta nitihka penemu sida? Kati bisi bala menyadi Kristian bukai ba eklisia tauka ba ruang bilik aku ke patut ditulung aku? Nama patut digaga aku?’—P-kal. 30:6; P-ulu. 13:9; 1 Raj. 17:22; 2 Ban. 30:20.
12-18 JUN
RETA ARI BUP KUDUS | 2 BANSA ISRAEL 32-33
“Tegapka Bala Menyadi Kristian Nuan ba Maya ti Tusah”
it-1 204 ¶5
Asiria
Senakerip. Senakerip, anak Sargon II, nyerang perintah Judah ba taun ke-14 Hesekiah merintah (732 S.M.). (2Ra 18:13; Isa 36:1) Hesekiah udah angkat ngelaban Asiria ke nekan sida ketegal utai ti udah digaga Ahas, apai Hesekiah. (2Ra 18:7) Ketegal nya, Senakerip nyerang Judah, lalu nitihka siti riput, iya ngalahka 46 buah kuta, (banding Isa 36:1, 2), lalu udah nya, ari kem iya ba Lakis, iya minta duit pampas ari Hesekiah penyampau 30 talenta emas (kira-kira $11,560,000) enggau 300 talenta pirak (kira-kira $1,982,000). (2Ra 18:14-16; 2Ba 32:1; banding Isa 8:5-8.) Taja pan duit pampas udah dibayar, tang Senakerip tetap nganjung siku pemesai orang Asiria kena ngasuh Jerusalem nyerahka diri ngagai iya enggau nadai syarat. (2Ra 18:17–19:34; 2Ba 32:2-20) Lebuh Jehovah munuh 185,000 iku soldadu Asiria dalam timpuh satu malam, Senakerip ti sumbung nya tepaksa nyurutka diri lalu pulai ngagai Nineweh. (2Ra 19:35, 36) Ba dia iya dibunuh dua iku anak lelaki iya. Lalu anak lelaki iya ke siku agi ke benama Esar-hadon, nganti iya nyadi raja. (2Ra 19:37; 2Ba 32:21, 22; Isa 37:36-38) Semua utai ke nyadi tu, kelimpah ari pengerusak soldadu Asiria, ditulis ba Prisma Senakerip enggau Prisma Esar-hadon.—GAMBAR, Vol. 1, lamb. 957.
w13 15/11 19 ¶12
Bala Tuai ke Pemadu Kering—Nama Reti Iya ke Kitai Kemayaharitu
12 Enti kitai enda ulih mutarka sesiti penanggul, Jehovah seruran sedia deka nulung. Tang Iya ngarapka kitai bebendar nguji mutarka nya. Pengudah Hesekiah berandau enggau “bala pemesai iya,” iya ngaga pemutus ngambika “nutup semua penatai ai di luar nengeri . . . Raja Hesekiah lalu bebendar amat gawa ngaduka kuta ti udah runtuh, lalu nirika menara ba kuta nya, lalu ngaga dinding ari luar dinding kuta nya. . . . Iya mega ngasuh orang begagaka sangkuh enggau terabai.” (2 Ban. 32:3-5) Maya nya, Jehovah ngena Hesekiah, bala pemesai enggau bala nabi ti tetap ati kena nyaga sereta ngibun bala nembiak Iya.
w13 15/11 19 ¶13
Bala Tuai ke Pemadu Kering—Nama Reti Iya ke Kitai Kemayaharitu
13 Udah nya, Hesekiah ngaga utai ti penting agi ari nutup penatai ai tauka ngaduka dinding kuta. Ketegal iya pengibun ti bisi pengibuh, Hesekiah ngempuruka rayat iya lalu meransang sida. Iya madah: ‘Anang takutka raja orang Asiria . . . , laban kuasa ti setanah enggau kitai besai agi ari kuasa ti setanah enggau iya. Iya semina bisi kuasa mensia, tang kitai bisi Jehovah Petara kitai nulung kitai, lalu beperang ngarika kitai.’ Au, Jehovah deka beperang ngarika nembiak Iya! Orang Judah “berasai diperansang ninga jaku raja sida.” Peratika, “jaku raja” nya meh ke, ngasuh sida berani sereta arapka Jehovah. Hesekiah enggau bala pemesai, sereta nabi Mikah enggau Isaiah, nunjukka diri bala pengibun ti manah. Tu sama baka utai ti dipadah Jehovah nengah nabi Iya.—2 Ban. 32:7, 8; bacha Mikah 5:5, 6.
Penemu Bup Kudus ti Berega
Nama Reti Nesal Ati?
11 Jehovah nyaut sampi Manasi. Ari sampi Manasi, Jehovah nemu Manasi udah berubah. Jehovah ninga lebuh Manasi minta ampun lalu ngasuh iya nyadi raja sekali agi. Manasi ngena peluang kedua nya kena nunjukka diri amat nesal ati. Iya ngereja utai ke nadai kala dikereja Ahap. Iya ngubah ulah iya. Manasi mega ngelaban sembah ti pelesu lalu meransang orang nyembah Jehovah. (Bacha 2 Bansa Israel 33:15, 16.) Kena ngereja tu, Manasi begunaka pemerani enggau pengarap ti tegap. Tu ketegal Manasi udah lama nyadi chunto ti enda manah ngagai ruang bilik iya, orang ke gawa enggau iya ba istana, sereta rayat iya. Lebuh Manasi udah tuai, iya bebendar mutarka semua penanggul ke nyadi ketegal penyalah iya. Nya kebuah iya ulih nyadi teladan ti manah ngagai uchu iya, iya nya Josiah, ke udah nya deka nyadi raja ti manah.—2 Raj. 22:1, 2.
12 Nama ulih dipelajarka kitai ari teladan Manasi? Iya ukai semina ngemaruhka diri aja, tang iya mega ngereja utai bukai. Iya besampi minta pengasih ari Jehovah lalu ngubah ulah iya ti enda manah. Iya bebendar deka mutarka penanggul ti udah nyadi ketegal penyalah iya empu, lalu nyembah Jehovah sereta meransang orang bukai ngereja utai ti sama. Chunto Manasi ulih nulung sida ke kala ngereja utai ti amat jai. Ari cherita tu, kitai nemu Petara Jehovah nya “endang manah sereta ngampun.” (Mas. 86:5) Jehovah tentu deka ngampunka sida ti amat nesal ati.
19-25 JUN
RETA ARI BUP KUDUS | 2 BANSA ISRAEL 34-36
“Kati Nuan Bulih Penguntung ti Pemadu Mayuh ari Jaku Petara?”
it-1 1157 ¶4
Huldah
Imam Besai Hilkia bisi tetemuka siti “Bup Adat” lebuh ngaduka baru Rumah Sembiang Jehovah. Lebuh Josiah ninga “Bup Adat” nya dibacha, iya nganjung orang kena minta iring ari Jehovah. Sida betemu enggau Huldah. Lalu Huldah ngenataika jaku Jehovah, iya nya pasal semua penusah ke ditulis dalam “bup” nya ke deka ninggang bansa ti udah limpang ari Jehovah. Penusah nya nyadi ketegal sida enda ngasika Jehovah. Huldah mega madah, ketegal Josiah ngemaruhka diri ba mua Jehovah, iya enda ibuh meda penusah nya nyadi. Tang iya deka mati enggau lantang.—2Ra 22:8-20; 2Ba 34:14-28.
w09 15/6 10 ¶20
Ayanka Pengeransing ke Rumah Jehovah!
20 Sekumbang pengawa ngaduka Rumah Sembiang ke diatur Raja Josiah, Imam Besai Hilkiah ‘tetemuka Bup Adat Jehovah, iya nya Adat ti udah diberi Petara ngagai Moses.’ Iya nyuaka bup nya ngagai sekretari diraja, iya nya Sapan. Lalu Sapan berengkah macha bup nya ngagai Josiah. (Bacha 2 Bansa Israel 34:14-18.) Nama kesan iya? Raja tekala nya berasai tusah ati lalu nyarikka gari diri lalu ngasuh sida minta iring ari Jehovah. Nengah nabi Huldah, Petara ngenataika berita ti ngutuk sekeda pengawa pengarap ti dipejalaika ba Judah. Tang, usaha Josiah ke deka muai pengawa engkeramba bisi diperatika, lalu iya terus diterima Jehovah taja pan bisi jaku benabi ke madahka penusah deka ninggang semua raban bansa nya. (2 Ban. 34:19-28) Nama ulih dipelajarka kitai ari tu? Kitai tentu bisi pengeran ti sama baka Josiah. Kitai deka enggau jejampat nitihka iring ari Jehovah, lalu ingatka utai ti ulih nyadi enti kitai nejuka ajar ti limpang ari Jehovah sereta ati ti enda taluk ngachau sembah kitai ngagai Jehovah. Lalu, kitai ulih andal Jehovah deka beratika sereta nerima pengeransing kitai ke sembah ti bendar, baka ke digaga Iya ngagai Josiah.
Penemu Bup Kudus ti Berega
Kati Kitai Deka Beratika Utai Ti Ditulis?
15 Pengujung iya, nama ulih dipelajarka kitai ari Josiah? Taja pan Josiah nya raja ti manah, tang iya ngereja penyalah ti ngujungka pemati iya. (Bacha 2 Bansa Israel 35:20-22.) Nama nyadi? Josiah ngepunka perang enggau Neko, raja ari menua Ejip, taja pan nadai kebuah patut beperang. Indah, Neko empu madah ngagai Josiah, iya enggai beperang. Bup Kudus madahka, jaku Neko nya ‘jaku ti disebut Petara.’ Tang Josiah mansang beperang, lalu iya mati ba perang nya. Nya alai, nama kebuah Josiah beperang ngelaban Neko? Bup Kudus nadai madahka kebuah.
16 Josiah patut mansik dulu sekalika utai ti disebut Neko nya amat ari Jehovah tauka enda. Baka ni? Iya ulih nanya Jeremiah, seiku ari nabi Jehovah. (2 Ban. 35:23, 25) Pia mega, Josiah patut beratika fakta. Neko mansang ngagai Karkemis nyerang bansa bukai, ukai deka nyerang menua Jerusalem. Lalu Neko enda bejai Jehovah tauka nembiak Iya. Josiah enda berundingka pasal utai tu enggau manah sebedau iya ngaga pemutus. Nama ulih dipelajarka kitai? Lebuh kitai napi siti-siti penanggul lalu patut ngaga pemutus, kitai patut mikirka dulu utai ke diasuh Jehovah kereja kitai.
17 Lebuh kitai patut ngaga siti-siti pemutus, kitai patut mikirka dulu ni bagi prinsip Bup Kudus ke ulih nulung kitai sereta baka ni kitai ulih nitihka prinsip nya. Ba sekeda pekara, kitai engka patut ngaga mayuh agi pansik ba litaricha kitai tauka minta jaku ajar ari tuai gempuru. Tuai gempuru ulih nulung kitai beratika prinsip Bup Kudus ke bukai. Uji pikirka tu: Seiku menyadi Kristian indu jadi enggau orang ke ukai Saksi. Iya deka enggau nginjil ba siti-siti hari. (SKR. 4:20) Tang ba hari nya, laki iya enda ngasuh iya enggau nginjil. Laki iya madahka, seduai iya jarang bisi awak begulai enggau pangan diri, lalu laki iya deka mai iya bejalai. Nya alai, menyadi Kristian indu nya beratika ayat Bup Kudus ke ulih nulung iya ngaga pemutus ti manah. Iya nemu, iya enda tau enda ngasika Petara sereta nemu Jesus ngasuh kitai nyadika orang murid. (Mat. 28:19, 20; SKR. 5:29) Tang iya mega nemu, bini patut nunduk ngagai laki, lalu nembiak Petara patut nemu berunding. (Eps. 5:22-24; Plp. 4:5) Kati laki iya nguji nagang iya nginjil, tauka kati iya semina deka begulai enggau bini iya ba hari nya? Kitai ke nyadi nembiak Jehovah deka ngaga pemutus ke patut sereta ngelantangka ati Jehovah.
26 JUN–2 JULAI
RETA ARI BUP KUDUS | ESRA 1-3
“Awakka Jehovah Ngena Nuan”
Kati Nuan Meda Utai ke Dipeda Sekariah?
ORANG Judah amat gagit ati. Petara Jehovah udah “nyungkak Sairus,” raja menua Persia ngelepaska orang Israel. Orang Israel udah lama diau di Babilon ketegal nyadi orang tangkap. Raja madahka, orang Judah ulih pulai baru ngagai menua asal sida ‘lalu nirika baru Rumah Jehovah Petara ke disembah orang Israel.’ (Esr. 1:1, 3) Atur tu tentu ngasuh sida berasai gaga ati laban sembah ti bendar deka diaduka baru ba menua ti diberi Petara ngagai sida.
Kerita Perang enggau Makota Nyaga Nuan
2 Sekariah nemu, orang Judah ke pulai baru ngagai menua Jerusalem nya penyembah Jehovah. Sida nya ‘semua orang bukai ti udah ditegu Petara ati’ ngambika ninggalka rumah sereta pengawa dagang sida di menua Babilon. (Esr. 1:2, 3, 5) Sida ninggalka menua ti dikelala sida lalu pindah ngagai menua ti enda kala dipeda sekeda ari sida. Pengawa ngaga baru Rumah Sembiang Jehovah nya besai amat reti ba orang Judah, nya alai sida sanggup berantuka nyawa bejalai penyauh kira-kira 1,600 kilometer (1,000 batu) nengah menua ti bebukit sereta enda rata.
Penemu Bup Kudus ti Berega
w06 15/1 19 ¶1
Penerang ari Bup Esra
1:3-6. Bisi mega penanggul ke enda ulih diseliahka baka pengerai ke enda manah, umur tuai, sereta tanggungjawap ba ruang bilik ngasuh sekeda orang enda ulih pulai baru. Baka sekeda orang Israel ke agi mengkang ba Babilon, mayuh ari Saksi-Saksi Jehovah enda ulih bekereja ke Jehovah aja tauka gawa ba endur ke begunaka mayuh penginjil. Tang, sida nyukung sereta meransang orang ke ulih, lalu meri duit pemeri ngambika dikena ngerembaika Perintah Petara sereta ngaga orang nyadi murid.