PELAJAR 6

Terangka Ayat Bup Kudus ke Dikena

Kereja Rasul 17:2, 3

NAMA PATUT DIGAGA: Pengudah macha ayat Bup Kudus, terangka ayat nya. Anang terus nyebut poin ke bukai. Tentuka peninga nuan ulih meda enggau terang kaul entara ayat ke dibacha nuan enggau poin ke dipadahka nuan.

BAKA NI NGEREJA NYA:

Pilih leka jaku ke patut diterangka. Pengudah macha ayat Bup Kudus, pilih leka jaku ari ayat nya, lalu terangka iya sejalai enggau poin nuan. Nuan ulih nandu leka jaku nya baru, tauka ngena siti tanya ke ngasuh peninga nuan nemu ni bagi leka jaku ke diterangka nuan.

Enti nuan milih leka jaku bukai lebuh nerangka poin ari ayat nya, tentuka peninga nuan agi ulih meda baka ni ayat ari Bup Kudus nya bekaul enggau utai ke deka diterangka nuan.
Terangka poin ke patut dikingatka peninga nuan. Enti nuan udah nyebut kebuah nuan deka macha ayat nya, terangka baka ni leka jaku ke udah dipilih nuan ari ayat nya nyukung poin ke disebut nuan.

Lebuh nerangka ayat, tentuka Bup Kudus nuan mengkang tebuka. Tu ulih nulung peninga nuan meda, kaul entara poin ke disebut nuan enggau ayat ke udah dibacha nuan.
Tentuka penerang nuan pasal ayat Bup Kudus nya senang dimeretika. Anang nyebut utai ke enda bekaul enggau poin ti deka dipadahka nuan. Perundingka utai ti udah ditemu peninga nuan, lalu pikirka ni penyampau utai ke patut diterangka nuan kena ngasuh poin nuan senang dimeretika.