Pengudah Adam enggau Awa ninggalka taman Eden, seduai iya bisi mayuh anak. Anak tuai seduai iya Kain, nyadi orang betanam, lalu anak kedua, Abel, nyadi pengibun bedus.

Bisi sekali Kain enggau Abel meri pemeri ngagai Jehovah. Jehovah rindu enggau pemeri Abel, tang Iya enda rindu enggau pemeri Kain. Tu ngasuh Kain amat ringat. Jehovah nangkan Kain, pengeringat ulih ngasuh iya ngereja utai ti jai. Tang Kain enda mending.

Kain bejaku enggau Abel: “Aram tua bejalai.” Lebuh seduai kediri ba babas, Kain nyerang lalu munuh menyadi iya. Nama deka digaga Jehovah pasal tu? Jehovah ngukum Kain enggau muru iya jauh ari diri sebilik iya. Kain enda ulih pulai agi.

Nama utai ke dipelajar kitai ari tu? Kitai engka berasai ringat enti sekeda utai nyadi enda nitihka peneka kitai. Enti kitai ngasaika diri majak ringat—tauka orang bukai nangkan kitai ketegal sida meda pengeringat kitai—kitai patut jampat ngubah sereta nagang diri sebedau pengeringat ngalahka kitai.

Laban Abel rinduka Jehovah sereta ngereja utai ti betul, Jehovah seruran ingatka iya. Petara deka ngidupka Abel baru lebuh Iya ngaga dunya nyadi paradais.

Nyau kelama, bisi mayuh mensia diau ba dunya. Mayuh ari sida nya jai. Indah sekeda melikat ba serega mega nyadi jai. Sida ninggalka serega lalu nurun ngagai dunya. Nemu nuan kebuah sida ngereja tu? Ngambika sida ulih ngena tubuh mensia lalu jadi enggau indu ba dunya.

Melikat enggau bala indu nya bisi anak. Anak sida iya mansang besai lalu nyadi amat kering sereta jai. Sida ngemediska orang. Jehovah enda ulih nejuka utai tu terus nyadi. Nya kebuah, Iya deka ngerusak orang jai ngena ai bah.

Tang bisi siku lelaki ke enda sebaka. Iya rinduka Jehovah. Nama iya Noah. Iya bisi siku bini enggau tiga iku anak lelaki, iya nya Sem, Ham enggau Japet lalu sida bisi bini magang. Jehovah ngasuh Noah ngaga bandung besai ngambika sida sebilik ulih selamat maya Bah Besai. Bandung nya baka siti kutak ti amat besai ke ulih melepung ba ai. Jehovah mega ngasuh Noah mai mayuh jelu tama ngagai bandung nya ngambika sida mega ulih selamat.

Noah lalu berengkah ngaga bandung. Sida sebilik ngaga bandung nya kira-kira 50 taun. Sida ngaga bandung nitihka iring ari Jehovah. Ba maya nya, Noah nangkan orang pasal Bah Besai. Tang, nadai siku mendingka iya.

Nyau kelama, maya tama ngagai bandung pan datai. Aram kitai meda nama nyadi udah nya.