Begian Darah ke Mit Agi Enggau Chara Beputung

Begian darah ke mit agi. Begian darah ke mit agi diambi ari empat bengkah bansa darah—sel darah mirah, sel darah burak, platelet enggau plasma. Chunto, darah mirah ngundan protein hemoglobin. Darah ke digaga ari hemoglobin mensia tauka jelu dikena ngubat pesakit ke kurang darah tauka lenyau mayuh darah.

Plasma ngembuan 90 pesen ai. Iya ngundan hormon, garam ukai organik, enzim, sereta nutrien, nyengkaum mineral enggau gula. Plasma mega ulih ngasuh darah meku, ngundan antibodi kena ngelaban penyakit, sereta protein baka albumin. Enti orang kena penyakit, lutur engka ngejik iya ngena gamma globulin ke diambi ari plasma orang ke ulih ngelaban penyakit nya. Darah burak ngundan interferon enggau interleukin, ke dikena ngubat virus enggau kanser.

Patut orang Kristian ngena chara berubat ke begunaka begian darah ke mit agi? Bup Kudus nadai madah enggau terang pasal pekara tu. Nya alai, genap iku kitai patut ngaga pemutus nitihka ati diri ti udah dilatih ngena ajar Bup Kudus, laban kitai betanggungjawap ngagai Petara. Sekeda orang nulak ngena semua bansa begian darah ke mit agi, laban Ukum Petara ngasuh orang Israel nuang darah nya “ngagai tanah.” (Ulang Adat 12:22-24) Sekeda orang nulak empat bengkah bansa darah, tang engka nerima chara berubat ngena begian darah ke mit agi. Sida ngumbai sekeda begian darah ke mit agi, iya ke diambi ari empat bengkah bansa darah, nadai ngundan seput.

Lebuh ngaga pemutus, tanya diri empu: Kati aku nemu enti aku nulak semua begian darah ke mit agi, reti iya aku nulak semua chara berubat ke ngena darah kena ngelaban penyakit, tauka kena mekuka darah ngambika ngetu bedarah? Ulih aku nerangka ngagai lutur kebuah aku nulak tauka nerima sekeda begian darah ke mit agi?

Chara beputung. Tu nyengkaum nganchurka darah (hemodilution), enggau nyelamatka darah (cell salvage). Lebuh nganchurka darah, darah ke dipansutka ari tubuh diganti ngena ai ubat kena ngimbang penyampau darah dalam tubuh, udah nya darah dipulaika baru ngagai tubuh pesakit. Nyelamatka darah reti iya ngumpul darah ke lenyau maya beputung, lalu mulaika iya baru ke dalam tubuh. Darah deka digumpul ari abi telih tauka ruang dalam tubuh, dituchi tauka ditapis, lalu udah nya dipulaika baru ngagai pesakit. Ketegal chara berubat tu enda sebaka nitihka seiku-seiku lutur, orang Kristian patut nemu nama runding lutur sida ba pekara tu.

Maya ngaga pemutus pasal chara berubat tu, tanya diri empu: ‘Enti sekeda darah aku dipansutka ari tubuh lalu disimpan enda lama sebedau dipulaika baru ngagai tubuh aku, kati ati aku agi ngemendarka aku nerima darah nya tauka nuang darah nya “ngagai tanah”? (Ulang Adat 12:23, 24) Kati ati aku ke dilatih ngena ajar Bup Kudus, ngasuh aku enda nyamai ati enti darah aku dipansutka, dichampur enggau ubat, lalu dipulaika baru ke dalam tubuh aku? Kati aku nemu, enggau nulak semua chara berubat ngena darah aku empu, reti iya aku enggai beperesa darah, betuchi buah pinggang, tauka ngena mesin jantung?’

Orang Kristian patut mutuska diri empu baka ni darah iya dikena maya beputung. Pia mega, maya iya beperesa tauka ngena chara berubat kemaya hari tu ke bekaul enggau ngena darah, nyampur darah enggau ubat, lalu mulaika iya baru ngagai tubuh.