Mammakapia Ittam nu Maddukko Ittam ta Wawwaragi!

1-2. Anni i tadday nga gannug nga importante kani Jehova, anna anni i kayà na nga kuattam?

KURUGA importante kani Jehova i pattratu tam ta kasittoletam. Nituddu ni Jesus nga mawag tu ayatattam i kasittoletam nga kunna pangaya tam ta baggi tam. (Mat. 22:​37-39) Masippo ittam gapa maski tari ira ta ari tam kapangngurug. Nu mangipasingan ittam tu kunnatun nga kinasippo, paparigattam si Jehova nga Dios nga ‘parehu nga nawagan na ta bilag na i marakay anna mapia nga totolay anna parehu gapa nga iddan na tu uran i mangngua ta mapia tuange ta mangngua ta marakay.’—Mat. 5:45.

² Kurug tu iddukan ni Jehova i ngamin nga totolay. Ngem neruma i pangiddu na tari ira ta mattuttul ta nisa. (Juan 14:21) Ikaya na nga parigattam yayya. Pagaramman na ittam nga mapeggan tu ‘napafutu nga aya’ ta wawwaragi tam anna ipasingan ta nira i ‘napasikkal nga aya.’ (1 Ped. 4:8; Roma 12:10) Yatun nga pangaya ay kagitta na pangaya tam ta tadday nga meddu nga kafamilia onu kofuttam.

3. Anni nakuan i daddammattam meyannung ta aya?

³ I aya ay megitta ta tadday nga masetas ta balay. Mawag natun i maalagaan tapenu dumakal. Kunnaw i nitabarang ni apostol Pablo ta Cristiano ira: “Arian nu nga immangan i pakka-aya-aya nu nga kunna mawwaragi kani Cristo.” (Heb. 13:1) Kayà ni Jehova nga kanayun ittam nga mangipasingan tu aya ta tanakuan. Magigiammu taw nga artikulo nu ngatta mawag tu mas maddukko ittam ta kapangngurug tam ira anna nu kunnasi tam nga tulu-tuloy nga makua yatun.

NU NGATTA MAWAG TU MAS MADDUKKO ITTAM TA KATAGGI-TADDAY

4. Anni i kuattam tapenu ari lagapa mawawan i pangappresia tam ta pattaradday tam nga nakagi ta Salmo 133:1? (Innan gapa i letratu ira.)

⁴ Bibbigan i Salmo 133:1. Umanugu ittam ta nitura na salmista nga “makapabbaw” anna “makasta” nu kokkofuttam danuri mangiddu kani Jehova. Ngem nonopammu yaw: Nu kadaggaw ngana laman nga masingan na tadday nga tolay i makakkasta anna kakkadakal nga kayu, baka ari na ngana kuruga maappresia yatun. Megafu gapa ta mamippiga tam nga masingan i wawwaragi tam kada ligguan, baka ari tam ngana kuruga maappresia i kasta na pattaradday tam. Anni gafu i kuattam tapenu ari lagapa mawawan i pangappresia tam ta wawwaragi? Makasta nu egga i tiempo tam nga nonopan nu kunnasi kabalor i kada tadday ta kongregasion tapenu mas iddukattam ira.

5. Anni i efekto na ta tanakuan nu masingadda i pakka-aya-aya tam?

⁵ Kuruga nagustuan na karuan i pakka-aya-aya tam ta first time nga pakistudy da. Tatun pagalaman nga masingadda, awayya na tu makumbinsi ngana ira nga nalegadda i kinakurug. Kinagi ni Jesus: “Nu egga nikamu i pakka-aya-aya, kannammuan ngamin na totolay tu disipulo takamu.” (Juan 13:35) Kunnatun i naekspiriensa ni Chaithra nga college student anna Bible study na Saksi ira ni Jehova. Nagatende yayya ta rehional nga kombensiottam. Kabalin na ollu aggaw nga pagatende na, kinagi na ta mangistudy nisa: “I magana ku ira, kaddà vuluvuga ginakkopan. Ngem ta kombension nu, mami-52 ngà nga nagakkopan ta tangaggaw laman! Inusa ni Jehova i espiritual nga familia na tapenu mepatageno ta nio i pangaya na. Kayà ku nga mabbalin tu parte natun nga familia.” Tulu-tuloy nga napprogreso si Chaithra adde ta na-baptize yayya turi ta 2024. Nu masingan gafu na bagu ira i makasta nga annangngua tam kunne na gapa i pakka-aya-aya tam, maruddu nga mapaguyu ira nga passerbian si Jehova.—Mat. 5:16.

6. Ngatta proteksion para ta nittam nu mas maddukko ittam ta wawwaragi?

⁶ Proteksion ta nittam nu mas maddukko ittam ta wawwaragi. Nitabarang ni Pablo ta kasi-Cristiano na ira: “Makkapasa-pasikak-kamu lagu tu nono ta kaggaggaw . . . tapenu ari nga mataggatan i futu na sinni laman nikamu megafu ta pangilogo na katagarulian.” (Heb. 3:13) Anni i kuan ni Jehova nu marigatan ittam ngana nga kuan i fustu? Awayya na nga paguyuan i tadday nga alerto nga kapangngurug tam nga makapansin tatun tapenu iyawa i uffun nga kawagattam. (Sal. 73:​2, 17, 23) Talaga pammakapiattam i kunnatun nga pamasikan.

7. Anni i koneksion na aya ta pattaradday? (Colosas 3:​13, 14)

⁷ Parte ittam na grupo na totolay nga mangikakkaguman nga makka-aya-aya, yatutta aru i bendisiottam. (1 Juan 4:11) Angngarigan na, paguyuan ittam na aya nga “makkapasa-pasensia” anna yatun i makaduffun tapenu egga i pattaradday tam. (Bibbigan i Colosas 3:​13, 14; Efe. 4:​2-6) Yayya nga nu egga ittam ta study, makapagayayya i pavvurulu tam. Ari tam nga masingan yatun ta maski anni paga nga grupo ta interu mundo.

IPASINGAN I PANGIKAKUA TA KATAGGI-TADDAY

8. Kunnasi ittam nga maduffunan ni Jehova tapenu egga i pattaraddetam?

⁸ Tadday nga milagro i pattaraddetam ta interu mundo. Pinapposible ni Jehova yatun maski nu imperfekto ittam. (1 Cor. 12:25) Kagian na Biblia nga ‘mismu i Dios i nangituddu nittam tu makka-aya-aya ittam.’ (1 Tes. 4:9) Usu-usan gafu ni Jehova i Biblia tapenu ikagi i mawag tu kuattam tapenu mas maddukko ittam ta kataggi-tadday. ‘Matudduan ittam na Dios’ nu gigiammuattam i tuddu na ira anna iyaplika danatun. (Heb. 4:12; Sant. 1:25) Yatun mismu i ikakkaguman nga kuan na Saksi ira ni Jehova.

9. Anni i magigiammu tam ta Roma 12:​9-13 meyannung ta pangikakua ta kataggi-tadday?

⁹ Kunnasi ittam nga tudduan na Uvovug na Dios nga mas maddukko ta kataggi-tadday? Ikonsidera i kinagi ni Pablo meyannung tatun ta Roma 12:​9-13. (Bibbigan.) Sifutan i kinagi na nga “ipasingan nu i aya nu nga mangikakua ta kataggi-tadday.” Anni nakuan i kuattam? Sittam nakuan i magollu nga mangipasingan tu ‘napasikkal nga aya’ ta tanakuan gukaban na pabbalin tu minammakoma, minammadulo, anna vuka-palag. (Efe. 4:32) Ari mu nakuan nga innaggan nga i kapangngurug mu i umaranni niko. Siko ngana i magollu nga mangipasingan tu aya ta nisa. Nu kuammu yatun, mapakurug mu i nipromesa ni Jesus turi ta kinagi na yaw: “Mas dakal i pagayaya ta pangiyawa anne ta pangalawa.”—King. 20:35.

10. Kunnasi tam nga talakkurugan i ‘pangikakua ta kataggi-tadday’? (Innan gapa i letratu.)

¹⁰ Makapa-interes ta kabalin laman nga kinagi ni Pablo nga ipasingattam i aya tam nga mangikakua ta kataggi-tadday, sinabarangngan na ittam nga ‘talakkurugattam i attrabahu tam anna ari ittam nga mattala-talakag.’ Nu talakkurugan na tadday nga tolay i attrabahu na, kuan na i adde na mawayya na nga balinan yatun. Pagaramman ittam gapa na Proverbio 3:​27, 28: “Ariammu iyetu i mapia tari ira ta magawag tu uffun, nu mawayyam mabba nga kuan yatun.” Nu egga gafu i magawag, kuattam i adde na mawayya tam nga uffunan yayya. Ari tam nga italattan i panguffuttam anna ari tam nga nonopan tu egga mabba saw i magangngua tatun.—1 Juan 3:​17, 18.

11. Anni i makaduffun tapenu mas maddukko ittam ta kataggi-tadday?

¹¹ Anni paga i makua tam tapenu mepasingattam i pangikakua ta tanakuan? Mabi tam laman nakuan nga pakoman ira nu matakitadda ittam. Kagian na Efeso 4:26: ‘Nu mappatu i ulu nu, arian nu yaw nga pabbayagan.’ Ta ngatta? Kagian gare na versikulo 27 nga nu kuattam yatun, ‘iddattam i Demonio ta lugar na.’ Ta Uvovug ni Jehova, pakatotoli nga kagian na tu makkapaka-pakoma ittam. Ipagaram nittam na Colosas 3:13 nga itulu-tuloy tam i “makkapaka-pakoma.” I pamakoma ta nakaliwatan na tanakuan i tadday ta kakastan nga makua tam tapenu mas maddukko ittam ta nira. Nu kuattam yatun, makaduffun ittam tapenu kanayun ittam nga memammo anna memmuguran i pattaraddetam nga resulta na masanto nga espiritu. (Efe. 4:3) Dakal gafu i meyuffun na nu mamakoma ittam.

12. Kunnasi ittam nga duffunan ni Jehova nga mabbalin tu minammakoma?

¹² Kurug gapa tu mariga nu mittan nga pakoman danuri nakataki ta nittam. Ngem makua tam yatun ta uffun na espiritu na Dios. Kabalin nga netabarang nittam nga ‘napasikkal nakuan i pakka-aya-aya tam’ anna ‘talakkurugattam i attrabahu tam,’ nakagi gapa nga ‘mattalikarag ittam gukaban na espiritu.’ (Innan i study note na Roma 12:​11, NW.) Maduffunan ittam gafu na espiritu na Dios tapenu makepasingan ittam tu napasikkal nga aya anna tapenu makkapaka-pakoma. Yayya nga ipakimemallo tam nakuan kani Jehova nga duffunan na ittam.—Luc. 11:13.

AWAN NAKUAN TU PASSIRINA TA NALLATANAN NU

13. Anni i awayya na nga mamassirina ta nittam?

¹³ Ta unag na kongregasion, madduruma i klase na totolay anna madduruma gapa i nikapadakal tam. (1 Tim. 2:​3, 4) Nu ari ittam nga magimmugug, awayya na tu mamassirina i padduruma na pili-piliattam ta assissinnun anna itchura, klase na papporu, anna ta kukukuattam nu marrelaks ittam. (Roma 14:4; 1 Cor. 1:10) Megafu ta ‘sinudduan ittam na Dios nga makka-aya-aya,’ ari tam nakuan nga ifersa ta tanakuan nga mas makasta i pinili tam anne ta nira.—Fil. 2:3.

14. Anni nakuan i kanayuttam nga ikaguman nga kuan, anna ngatta?

¹⁴ Malisiattam gapa i passirina ta unag na kongregasion nu ikagumattam i mabbalin tu kanayun nga makapabannay anna makapagaram. (1 Tes. 5:11) Ta nappasa laman ira nga dagun, aru nga dati nga inactive onu nalsa ta kongregasion i nanoli. Meddu nakuan nga alawatattam ira! (2 Cor. 2:8) Egga i tadday nga sister nga mafulu ragun nga naginactive tapus nanono na i umay ta Kingdom Hall. Istorian na: “Agga-ngizzi ira ngamin ta nio anna inala-alamanu dà.” (King. 3:19) Anni i efekto ta nisa na kunnatun nga kinasippo? Istorian na, “Natageno ku nga dudduffunan nà ni Jehova nga mabbalin uli tu magayayya.” Nu makapagaram ittam ta ngamin, meyusa ittam ni Cristo tapenu mamanna-bannay tari ira ta “nabanna-bannag anna agga-kattu ta madammo.”—Mat. 11:​28, 29.

15. Anni paga i tadday nga makua tam tapenu makaduffun ittam ta pattaradday? (Innan gapa i letratu.)

¹⁵ I tadday paga nga makua tam tapenu makaduffun ta pattaradday ay gukaban na paguvovug tam. Kagian na Job 12:11: “Ari kari nga purueban na talinga i uvovug ira nu kunnasi nga sissiman na zila i makan?” Nonopammu yaw: Sissiman labbi na malalaki nga kusineru i nilutu na nage na nga itunnag yatun. Kunnatun gapa ta paguvovug tam. Nage tam nga ikagi yatun, nonopattam labbi nu anni i ikagi tam. (Sal. 141:3) Kanayun nakuan nga siguraduattam nga i ikagi tam ay makapagaram, makapabannay, anna “makoffun ta magginna.”—Efe. 4:29.

16. Sinni nakuan i mas mangikaguman nga mabbalin tu makapagaram ta paguvovug da?

¹⁶ Mas nakuan nga ikaguman na attawa nga lalaki anna mappagana i mabbalin tu makapagaram ta paguvovug da. (Col. 3:​19, 21; Tito 2:4) Maski gapa i elder ira, mawag nakuan tu makapabannay ira ta karneru ni Jehova. (Isa. 32:​1, 2; Gal. 6:1) Iperaddam nittam na Biblia: “I uvovug nga nekagi ta mepangngo nga tiempo—anni mabba kasta natun!”—Prov. 15:23.

PAKURUGAN ANNA IPASINGAN I AYA TAM

17. Kunnasi tam masiguradu nga kuru-kurug i pangaya tam ta wawwaragi?

¹⁷ Pagaramman ittam ni apostol Juan nga “mawag tu i pangaya ay mapakurug anna mepasingan ta pangnga-pangngua.” (1 Juan 3:18) Kayà tam tu napafutuan i pangaya tam ta wawwaragi tam. Kunnasi tam nga makua yatun? Nu mas makikavulu ittam ta wawwaragi, mas madukko i relasiottam ta kataggi-tadday anna mas ayatattam ira. Approbetchattam gafu i tiempo ira nga kavulu tam ira, kagitta na ta study onu ta ministerio. Pasiarattam nakuan gapa ira ta baleda. Nu kuattam yatun, mepasingattam nga ‘Dios i nangituddu nittam nga makka-aya-aya.’ (1 Tes. 4:9) Kanayuttam gapa nga mapakurug tu “kuruga makapabbaw, kuruga makasta nu i totolay na Dios ay mattaradday ira!”—Sal. 133:1.