MAGIGIAMMU NGA ARTIKULO 26

KANSION 123 Matalo nga Maki-unnug

Mappakalinno nu Egga i Ariammu Ammu

“Ariattam mawayya nga alippawatan i ngamin nga gannug meyannung ta Makapangngua-sa-Ngamin.”—JOB 37:23.

I MAGIGIAMMU TAM

Makapagattam ittam nu mappakalinno ittam anna akseptattam nga egga ira i ari tam ammu, nu nonopattam i gannug ira nga ammu tam, anna nu mattalo ittam kani Jehova.

1. Anni ira i niyawa ni Jehova nittam, anna ngatta?

I tabbag mu

PINARATU ittam ni Jehova nga mawayya tam mannono, maggigiammu tu bagu ira nga gannug, anna kuan ira i nagigiammu tam. Ngatta kunnatun i pamaratu na ta nittam? Ikaya na gare tu ‘malegattam i pakannammu meyannung ta Dios’ anna usan yatun tapenu makangngua ittam tu makasta ira nga desision ta passerbi tam nisa.—Prov. 2:1-5; Roma 12:1.

2. (a) Anni i limitasiottam? (Job 37:23, 24) (Innan gapa i letratu.) (b) Anni i pammakapiattam nu akseptattam nga limitadu i ammu tam?

I tabbag mu ira

² Maski nu mawayya tam nga gigiammuan i aru nga gannug, limitadu i ammu tam. (Bibbigan i Job 37:23, 24.) Pannonopattam i meyannung kani Job. Matturunug i niyavu ni Jehova kani Job tapenu malippawa na nga aru paga i arian na ammu. Nakoffun yatun ta nisa tapenu mappakalinno yayya anna ulian i appana-panono na. (Job 42:3-6) Mammakapia ittam gapa nu akseptattam tu ariattam ammu i ngamin. Nu kuattam yatun, mas mattalo ittam nga ipakannammu ni Jehova i talaga mawag tam tapenu makangngua ittam tu mapia ira nga desision.—Prov. 2:6.

Kannan na nawag nga maggafu ta kunam si Job habang kibbidan yayya ni Jehova. Nasingan yatun ni Elihu anna na tallu nga minaggappappe nga mamanna-bannay. — Kagitta ni Job, mammakapia ittam nu akseptattam nga egga ira i ariattam ammu (Innan i parapo 2)

3. Anni i gigiammuattam taw nga artikulo?

I tabbag mu

³ Taw nga artikulo, gigiammuattam i gannug ira nga ariattam ammu anna i efekto natun nittam. Gigiammuattam gapa nu ngatta makasta tu ariattam ammu i karuan nga gannug. Makoffun danatun tapenu mas mattalo ittam nga ipakannammu ni Jehova i talaga mawag tam megafu ta yayya “i makannammu ta ngamin nga gannug.”—Job 37:16.

ARIATTAM AMMU NU SONU ANNI I PANUPPALAN

4. Base ta Mateo 24:36, anni i ariattam ammu?

I tabbag mu

⁴ Bibbigan i Mateo 24:36. Ariattam ammu nu sonu anni i panuppalan na mundo. Maski si Jesus arianna ammu nu sonu anni i “aggaw onu oras” natun turi ta kegga na ta davvun.a Turi kua, nikagi na ta apostoles na nga si Jehova laman i makapaddesision nu sonu anni mesimmu i tadday nga gannug. (King. 1:6, 7) Egga ngana i aggaw nga sinunno ni Jehova nu sonu anni i panuppalan. Ngem ariattam ammu yatun.

5. Anni i efekto na ta nittam nga ariattam ammu nu sonu anni i panuppalan?

I tabbag mu

⁵ Ariattam ammu nu kunnasi kabayag i paginnag tam nage na panuppalan. Megafu tatun, baka mofu i pasensia tam onu madismaya ittam, mas ngana nu nabayag tam ngana nga innaggan yatun. Baka marigatan ittam paga lagu nga attamman i panguyu-uyaw na kafamilia onu na tanakuan. (2 Ped. 3:3, 4) Baka nonopattam tu mas makasta nakuan nu ammu tam i eksakto nga aggaw na panuppalan. Ta nu kunnatun, mas makapasensia ittam anna mas maattammattam i panguyu-uyaw.

6. Ngatta makasta tu ariattam ammu nu sonu anni i panuppalan?

I tabbag mu

⁶ Megafu ta ari nga kinagi ni Jehova i eksakto nga aggaw na panuppalan, egga i chansa tam nga ipasingan tu passerbiattam yayya megafu ta iddukan anna pattalakkattam yayya. Kayà tam nga passerbian si Jehova tu mannanayun, ari laman nga adde ta panuppalan. Imbes gafu tu agga-nono tam nu sonu anni i aggaw ni Jehova, nonopattam nakuan i makasta ira nga mesimmu sonu duttal yatun. Nu kunnatun, mas mattalo ittam ta nisa anna kuattam i adde na mawayya tam tapenu pagayayyatan yayya.—2 Ped. 3:11, 12.

7. Anni i ammu tam?

I tabbag mu

⁷ Mawag tu nonopattam nu anni i ammu tam. Ammu tam tu namegafu ta 1914 i pangurianan nga aggaw. Ta Biblia, nipakannammu ni Jehova i profesiya ira nga mamakurug tatun. Nikagi na gapa i napakaru nga detalye na mesimmu ta mundo kabalin natun nga dagun. Megafu tatun, kumbinsidu ittam nga “aranni ngana i dakal nga aggaw ni Jehova.” (Zef. 1:14) Ammu tam gapa tu ikaya ni Jehova nga ikagi tam ta aru nga totolay i ‘mapia nga dumug na Pammaguray na Dios.’ (Mat. 24:14) Ilayyagayya tam ngana yatun ta ma-240 nga nasion anna ta maturu tu 1,000 lengguahe. Ariattam mawag kannammuan i “aggaw onu oras” tapenu laman mallallappo ittam ta pallayyagayya.

ARIATTAM AMMU I EKSAKTO NGA KUAN NI JEHOVA TAPENU UFFUNAN ITTAM

8. Anni i tukuyan na “annangngua na kurug nga Dios”? (Eclesiastes 11:5)

I tabbag mu

⁸ Ariattam kanayun ammu i “annangngua na kurug nga Dios.” (Bibbigan i Eclesiastes 11:5.) Anni kari yatun? Tumukoy yatun ta kuan ni Jehova tapenu mesimmu i tadday nga gannug onu i ipamavulun na nga mesimmu tapenu matuppal i uray na. Ari tam ammu nu ngatta ipamavulun ni Jehova nga mesimmu i tadday nga gannug. Ari tam gapa ammu nu anni i eksakto nga kuan na tapenu uffunan ittam. (Sal. 37:5) Egga talaga ira i ariattam nga ammu. Angngarigan na, ari tam ammu nu kunnasi dumakal i abbing ta san na yena. Maski lagu i sientista ira, ari da kuruga ammu yatun. Kunnatun gapa, ari tam ammu i eksakto nga kuan ni Jehova tapenu uffunan ittam.

9. Anni ira i manono tam nu ari tam ammu i eksakto nga kuan ni Jehova tapenu uffunan ittam?

I tabbag mu

⁹ Baka manono tam nga mariga i maddesision megafu ta ari tam ammu i eksakto nga kuan ni Jehova tapenu uffunan ittam. Baka magalangan ittam nga mappasimple ta pattoletam onu magali nu sitaw mas dakal i pakawagan. Kunnasi gapa nu ari tam nga nadde i goal tam, awan tu makasta nga resulta na ministerio tam, onu nakkaproblema ittam ta tadday nga proyekto na organisasion? Gafu ta ari tam ammu i eksakto nga kuan ni Jehova, baka nonopattam tu ari na ittam nga uffunan.

10. Anni ira i mapakasta tam nu ariattam ammu i eksakto nga kuan ni Jehova?

I tabbag mu

¹⁰ Anni i meyuffun na nu ari tam ammu i eksakto nga kuan ni Jehova para nittam? Mapakasta tam i kualidad tam ira kagitta na kinapakalinno. Nu mapakalinno ittam gare, kurugattam nga ammu ni Jehova i kapianan para nittam. (Isa. 55:8, 9) Mas mattalo ittam gapa kani Jehova megafu ta ammu tam nga yayya i mamendision ta kukukuattam. Nu makasta i resulta na ministerio tam onu na tadday nga proyekto na organisasion, idayaw tam si Jehova. (Sal. 127:1; 1 Cor. 3:7) Ngem nu ari nga mesimmu i ekspektattam, daddammattam tu ammu ni Jehova yatun. (Isa. 26:12) Kuattam laman i mawayya tam anna mattalo nga kanayun ittam nga uffunan ni Jehova. Magga igiya na ittam maski nu ari yayya mammilagro kagitta na ta nappasa.—King. 16:6-10.

11. Anni i ammu tam nga makaduffun ta nittam?

I tabbag mu

¹¹ Ammu tam tu minaggiddu, patas, anna masirib si Jehova. Ammu tam tu tagibaloran na i kuattam para ta nisa anna ta wawwaragi tam. Ammu tam gapa tu kanayun nga bendisionan ni Jehova danuri matalo ta nisa.—Heb. 11:6.

ARIATTAM AMMU I MESIMMU NITTAM SONU UMMA

12. Anni i ariattam ammu base ta Santiago 4:13, 14?

I tabbag mu

¹² Bibbigan i Santiago 4:13, 14. Ariattam ammu i mesimmu nittam sonu umma. Afektadu gare ittam na “tiempo anna ari ekspektan nga mesimmu.” (Ecl. 9:11) Megafu tatun, ariattam masiguradu nu matuloy i plano tam ira. Ariattam gapa ammu nu matolay ittam paga tapenu kuan yatun.

13. Anni i efekto ta nittam nga ariattam ammu i eksakto nga mesimmu ta mappange?

I tabbag mu

¹³ Megafu ta ari tam ammu i eksakto nga mesimmu ta mappange, baka ari ittam nga makapagattam. Nu sobra gare i vurung tam ta awayya na nga mesimmu, ari ittam ngana nga magayayya. Awayya na gapa tu mamroblema ittam nu gavva nga manguli i pattoletam onu nu egga ira i mesimmu nga trahedia. Nu ari gapa nga mesimmu i ekspektattam ira, baka madismaya ittam anna makkafi i nono tam.—Prov. 13:12.

14. Anni i kurug nga mamagayayya nittam? (Innan gapa i letratu ira.)

I tabbag mu

¹⁴ Nu attammattam i ziga, mapakurug tam tu passerbiattam si Jehova megafu ta iddukattam yayya, ari tu megafu ta egga i mala tam nisa. Ipasingan na Biblia nga ari ittam nga protektan ni Jehova ta ngamin nga ziga anna ari na dati plinano i mesimmu ta pattoletam. Ammu na nga mabbalin ittam tu magayayya nu mappegiya anna mattuppal ittam nisa maski nu ariattam ammu i ngamin nga mesimmu ta mappange. (Jer. 10:23) Parigattam nakuan si Santiago ta nattalo yayya kani Jehova ta desision ira nga kingngua na. Kinagi na: “Nu ipamavulun na Yafu tu matolay kami paga, kuam-mi yaw onu yatun.”—Sant. 4:15.

Letratu ira: 1. Mattama nga iprepara da i go bag da. Mangipay ira ta bag tu Biblia anna mawag da ira nu emergency. 2. Nassigong i yama, yena, anna i ana da nga lalaki ta tolda habang magurang. Usadda i nipeda ira ta go bag da. — Maprotektan ittam nu tuttulattam i pangigiya ni Jehova (Innan i parapo 14-15)b

15. Anni i ammu tam ta mappange?

I tabbag mu

¹⁵ Ariattam ammu nu anni i mesimmu ta kada aggaw. Ngem ammu tam tu nipromesa ni Jehova tu mattolay ittam tu mannanayun ta langi onu ta davvun. Ammu tam gapa tu ari yayya vuluvuga malladdug anna awan tu maski anni nga makagamma nisa ta pangituppal na ta ngamin nga promesa na. (Tito 1:2) Yayya laman i ‘makeprofesiya ta mesimmu anna ikagi na i ari paga ira nga nesimmu.’ Kunnatun i kingngua na ta nappasa anna kunnatun gapa i kuan na ta mappange. (Isa. 46:10) Makasiguradu ittam nga awan tu makagamma kani Jehova nga ayatan ittam. (Roma 8:35-39) Iyawa na nittam i ka-uto, banna-bannay, anna sikan nga kawagattam tapenu maattammattam i maski anni. Makasiguradu ittam nga uffunan anna bendisionan ittam ni Jehova.—Jer. 17:7, 8.

ARIATTAM MALIPPAWA NGA AMMAMMU ITTAM TU MAPIA NI JEHOVA

16. Kagitta na nakagi ta Salmo 139:1-6, anni i ammu ni Jehova ta nittam nga ariattam kuruga malippawa?

I tabbag mu

¹⁶ Bibbigan i Salmo 139:1-6. Ammammu ittam tu mapia ni Jehova. Ammu na nu kunnasi ittam mannono anna nu ngatta matageno tam i tadday nga gannug. Ammu na gapa i kakkagiattam anna nu anni talaga i ikaya tam kagian. Ammu na gapa i kukukuattam anna nu ngatta kuattam yatun. Kinagi ni Patul David nga kanayun ittam nga uffunan ni Jehova anna mawayya na nga kuan yatun. Fugurammu yatun! Ikavurungan naka na Makapangngua-sa-Ngamin nga Namaratu ta langi anna ta davvun. Fustu i kinagi ni David: “Kuruga makapabbaw i pakannammum niakan; ariak-ku matuku-tukug nga nonopan.”—Sal. 139:6.

17. Ngatta mariga nga kurugan tu ammammu ittam tu mapia ni Jehova?

I tabbag mu

¹⁷ Baka ari tam malippawa nga kayà ittam nga mas mammammu ni Jehova. Awayya na nga matageno tam yatun gafu ta nikapadakal tam onu ta dati ira nga kurugattam. Awayya na gapa tu matageno tam yatun megafu ta kiteddake i nappasa ira nga nakkamaliattam. Megafu tatun, nonopattam nga manaki ittam nga mammammu ni Jehova anna ari tu posible nga makiddukko nisa. Natageno gapa yatun ni David. (Sal. 38:18, 21) Baka ikakkaguman na tadday i manguli tapenu mapagayayya na i Dios. Yatutta nonopan na, ‘Nu talaga ammammu nà tu mapia na Dios, ngatta kayà na tu uliakku i pattolè nu ammu na mabba tu marigatan ngà nga kuan yatun?’

18. Anni i pammakapiattam nu kurugattam nga mas ammammu ittam ni Jehova anne ta pakannammu tam ta baggi tam? (Innan gapa i letratu ira.)

I tabbag mu

¹⁸ Mas ammammu ittam ni Jehova anne ta pakannammu tam ta baggi tam. Ammu na gapa i mapia ira ta nittam nga ariattam masingan. Masingan na i pakkamaliattam ira. Ngem ammu na i klase na kata-katolay nga kayà tam pabbalinan anna iddeddu na ittam. Ari tu mabi nga kurugan danatun. (Roma 7:15) Ngem anni i pammakapiattam nu kurugattam danatun? Mas makapasserbi ittam ta nisa tu matalo anna magayayya tam nga kuan yatun.

Letratu ira: 1. Massigig ta benta i maraddam nga brother. Magurorang ta lawan. 2. Ta Paraiso, mappasia-pasiar i brother kavulu i kokkofun na anna magayayya ira ta makasta nga pallevu. — Pasikannan ni Jehova i pangurug tam ta makasta nga pattolay nga nipromesa na. Megafu tatun, maattammattam i problema ira nga ari tam ekspektan (Innan i parapo ira 18-19)c

19. Anni i ariattam paddudan meyannung kani Jehova?

I tabbag mu

¹⁹ Ari ittam madduda nga si Jehova ay aya. (1 Juan 4:8) Ammu tam tu ngamin nga ipakua onu igamma na nittam ay megafu ta iddukan na ittam anna kanayun na nga agga-nono i pammakapiattam. Ammu tam nga niyawa ni Jehova i tavvu megafu ta kayà na nga mattolay ittam tu mannanayun. Megafu tatun, makasiguradu ittam nga mapagayayya tam lagapa si Jehova maski nu egga ira i pakkamaliattam. (Roma 7:24, 25) Ammu tam gapa tu “mas makawayya i Dios anne ta konsensia tam anna ammu na ngamin i adde na ganna-gannug.” (1 Juan 3:19, 20) Ammammu ittam tu mapia ni Jehova anna mattalo yayya nga makua tam i uray na.

20. Anni i makoffun tapenu ari ittam kuruga mavurung sangawe?

I tabbag mu

²⁰ Ikagi ni Jehova i ngamin nga mawag tam nga mammuan. Yari tu ari tam mavurung ta gannug ira nga ariattam ammu. Mas makasta gafu nu nonopattam nu anni talaga i importante. Nu kuattam yatun, mepasingattam tu mattalo ittam kani Jehova, “i makannammu ta ngamin nga gannug.” (Job 36:4) Maski nu ari tam paga ammu sangawe i karuan nga gannug, ammu tam tu tulu-tuloy ittam nga tudduan ni Jehova. Aru paga saw nga bagu nga gannug i mammuattam meyannung ta nisa.—Ecl. 3:11.

KANSION 104 Regalu na Dios nga Masanto nga Espiritu

a Irolluan saw ni Jesus i pakiggerra ta kitaddake nga mundo ni Satanas. Yari tu mepangngo laman nga kagian nga ammu na ngana sangawe i aggaw na Armagedon anna nu sonu anni na nga ‘patulukan i kontra na ira.’—Nep. 6:2; 19:11-16.

b DESKRIPSION NA LETRATU: Iprepara na mattama i go bag da tapenu ready i familia da ta emergency.

c DESKRIPSION NA LETRATU: Tadday nga brother nga problemadu ngem imajinan na i kappagayayya nga pattolay sonu paraiso.