Ɛgɛ Nɛ A Géē Lɔtu Eko Néē Yɔ I Ya Ɛlā Mla Uwɔ Ɔwɛ Obɔbi

Jé Ohútu 37:​23-28; 39:​17-23 o ya ɛɛ ku a nwu ɛlā ŋma ɔ̄kā ku Ujosɛfu lɛyikwu ō lɔtu eko néē yɔ i ya ɛlā mla ɔ ɔwɛ obɔbi.

Leyi yɛ ɔ̄kā a lɔɔlɔhi. Ɔdiya nɛ ācɛ ɔhá ya ɛlā mla Ujosɛfu ɔwɛ obɔbi a? (Ohút. 37:​3-11; 39:​1, 6-10) Eko nyá nɛ Ujosɛfu cɛgbá ō lɔtu gáā kwu a? (Ohút. 37:2; 41:46) Ɛpleeko ɔɔma, ɔdi nɛ Ujehofa ya lɛ Ujosɛfu a, amáŋ ɔdi nɛ ó kē ya ŋ ma?—Ohút. 39:​2, 21; w23.01 17 ¶13.

Jé Gɔbu. Naana nɛ ɛlā nɛ ɔnyā ku Upɔtifa ka lɛyikwu Ujosɛfu a i wɛ ɔkwɛyi ŋ ma, Ubáyíbu i da alɔ ka Ujosɛfu da ɔ ɛga duuma ka ó yɔ i kɛmgbɛ ŋ. Ɛgɛnyá nɛ aɛga ku Ubáyíbu nōo ba nyā ta alɔ abɔ ō gbɛla tu ɔdā nōo ya ɛɛ nɛ Ujosɛfu fu ō kɛla duuma ŋ, amāŋ ɔdā nōo ya ɛɛ nɛ alɔ i cɛgbá ō jé ɛjɛɛji ɔdā nōo ya piii a ŋ ma? (Aíit. 20:2; Ujɔ́n. 21:25; Ācot. 21:37) Ɛdɔ auce ō ya nyá lɔfu ta Ujosɛfu abɔ ō lɔtu eko néē yɔ i ya ɛlā mla ɔ ɔwɛ obɔbi a?—Umáy. 7:7; Ulúk. 14:11; Ujɛ́m. 1:​2, 3.

Ɔdi wɛ ɛlā ō nwu a. Da iyi uwɔ ɔka kahinii:

• ‘Ɔwɛ obɔbi nyá nɛ um lɔfu leyice ka ācɛ géē ya ɛlā mla um, abɔ um wɛ Ɔcɛ O Yɛce Ukraist ɔkwɛyi a?’ (Ulúk. 21:​12, 16, 17; Uhíb. 10:​33, 34)

• ‘Ɔdi nɛ um lɔfu ya babanya nōo géē lɔfu ta um abɔ ō lɔtu eko nɛ ācɛ gbɔɔ ō ya ɛlā mla um ɔwɛ obɔbi a?’ (Aíjē 62:​7, 8; 105:​17-19; w19.07 2-7)