Ɛgɛ Nɛ A Lɔfu Ya Aafu Nɛ A Lɛ A Lé A

1-2. (a) Ɛdɔ aafu nyá nɛ ācɛ o gba Ujehofa ɛ̄gbā ōhī lɔfu lɛ a? (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

ƐJƐƐJI alɔ ɔdaŋ nɛ alɔ kóō wɛ ɛdrɔ amāŋ kwu hilokplici ɛ gē lɛ aafua ekoohi ɔdaŋ ka alɔ tiile lɛ Ujehofa, amāŋ lɛyikwu aōmiya nɛ alɔ ya ŋma igbihi ɛ ma. Ocabɔ mafu, ɔcɛ o tɔɔna ɛlā Ɔwɔico nōo wɛ ɛdrɔ lɔfu yɔ i gbɛla ɔdaŋ ka Ujehofa lɛ ɛlá wu ɔ ɔkwɔɔkwɛyi. Ohigbu ɛnyā, ó lɔfu jé kpɔcii ɔdaŋ ka ó cɛgbá kóō lɛ ubatisim ya ŋ. Ocabɔ ɔhá a wɛ ocabɔ ku ɔyinɛ alɔ nɔnyilɔ éyi nōo miya eko nɛ ó wɛ ɛdrɔ a, ō lɛ ɛ̄gbā ō gba ku Ujehofa ta aflɛyi ipu oyeeyi ku nu ikɔkɔ ō ya ije nwune fiyɛ a. Babanya ó kwu gbo ɔnyakwɔcɛ ɛ, ó kē lɛ ije nwune ō ya ɛgbá ku ācɛ apɔlɛ ku nu ŋ. Ó lɔfu lɛ aafu ɔdaŋ ka ōmiya olɔhi a nɛ ó ya eko nɛ ó wɛ ɛdrɔ a. Amāŋ ó lɔfu lɛ ɔyinɛ alɔ nɔnya éyi nōo le hilokplici nōó lɛ ɔfu nɛɛnɛhi lɛ a gɛ ŋ. Ɔtu lɔfu gbenyi lɛ ɔ ohigbu ka ó tɔɔtɛ lɛ ɔ ō ya ɔdā nɛ ó tɛtɛ gē ya a gɛ ŋ. A da iyi uwɔ aɔka nōo ba nyā jejee ɛ: ‘Ujehofa lɛ ɛlá wu um ɔkwɔɔkwɛyi? Ó cɛgbá ku um leyi gwu aɔdā nɛ um leyi gwu uwa bonu ohigbu Ujehofa a ɔkwɔɔkwɛyi? N tiile lɛ Ujehofa kpɔ ɛ?’

² Ɔdaŋ ka alɔ i ceyitikwu ō dɔka ohi ku aɔka ɛgɛnyā nɛ alɔ lɛ a ŋ, ó lɔfu ya ku alɔ hii kpɔtuce Ujehofa gɛ ŋ, klla lɔfu ya ku alɔ ma ō gba ɔ ɛ̄gbā. Ipu ikpɛyi ɛlā nyā, alɔ géē kɛla lɛyikwu ɛgɛ nōo lɛ ɔtu ku alɔ kwu aukɔ́ ku Ubáyíbu lɔfu ta alɔ abɔ ɔdaŋ ka alɔ yɔ i lɛ aafu (1) ka Ujehofa i lɛ ɛlá wu alɔ ŋ, (2) ka aōmiya nɛ alɔ ya ŋma igbihi a i lɔhi ŋ, amāŋ (3) yɔ i lɛ aafu ɔdaŋ ka alɔ tiile lɛ Ujehofa kpɔ ɛ.

ƆDĀ NŌO LƆFU TA ALƆ ABƆ Ō YA AAFU LÉ A

3. Ɔwɛ éyi nyá nɛ alɔ lɔfu ya aafu nɛ alɔ lɛ a lé a?

³ Ɔwɛ éyi nɛ alɔ lɔfu ya aafu nɛ alɔ lɛ a lé a, wɛ ō jé Ɛlā ku Ɔwɔico o ya ɛɛ ku alɔ dɔka ohi ku aɔka nɛ alɔ lɛ a. Ɔdaŋ ka alɔ ya lɛ a, ɔtu nɛ alɔ kpɔtuce Ujehofa mla ɛma nɛ alɔ lɛ mla ɔ a géē je lɔfu tōōtɔ̄ɔ̄ fiyɛ, ó klla géē tɔɔtɛ lɛ alɔ ō “háyi lɔfú ipú ɔtōōce Ɔwɔicō.”—1 Ukɔ́r. 16:13.

4. Ɛgɛnyá nɛ alɔ lɔfu bu “ɔkwu olɛhɔ̄ ā”? (1 Ācɛ Utesaloníka 5:21)

⁴ Jé 1 Ācɛ Utesaloníka 5:21. Leyi bi ɔ ka Ubáyíbu ta alɔ ɔtu kwu ɔtu ō lɛ “ɔkwu olɛhɔ̄ ā bū.” Ɛgɛnyá nɛ alɔ lɔfu ya ɛnyā a? Ɔdaŋ ka ó lɛ odee nōó ta alɔ eyī peee duudu ŋ, alɔ cika ō jila ɛlā nɛ Ubáyíbu ka lɛyikwu ɔ a. Ocabɔ mafu, gbɛla lɛyikwu ɔcɛ o tɔɔna ɛlā Ɔwɔico nɛ alɔ kɛla lɛyikwu ɔ gbɔbu nōó jé kpɔcii ɔdaŋ ka Ujehofa lɛ ɛlá wu ɔ ɔkwɔɔkwɛyi a ŋ ma. Ó cika ō gbɛla ka abɔ ó lɛ ɛdɔ ɔka ɛgɔɔma a wɛ ka Ujehofa i lɛ ɛla wu ɔ ŋ ɔkwɔɔkwɛyi nɛɛ? Ehee, ó cika ō lɛ “ɔkwu olɛhɔ̄ ā bū,” ŋma lɛ ō klɔcɛ ku Ubáyíbu o ya ɛɛ kóō nwu ɛlā lɛyikwu ɔdā nɛ Ujehofa gē gbɛla lɛyikwu ɔ a.

5. Ɛgɛnyá nɛ alɔ lɔfu má ōhī nɛ Ujehofa lɛ lɛ aɔka ku alɔ a?

⁵ Eko duuma nɛ alɔ yɔ i jé Ubáyíbu, ó lɛbɛɛka Ujehofa abɔyinu yɔ i kɛla lɛ alɔ a. Amáŋ alɔ cɛgbá ō ya fiyɛ ō jé Ubáyíbu anca, ɔdaŋ ka alɔ dɔka ō má ohi nɛ Ujehofa lɛ lɛ aɔka ku alɔ a ɔkwɔɔkwɛyi. Alɔ cɛgbá ō lɛ ɔtu ku alɔ kwu ō jé Ubáyíbu nōo tɛɛma kwu āhɔ̄ ku alɔ a. O ya ɛɛ ku alɔ ya ɔɔma, alɔ lɔfu jila ɛlā má ŋma ipu aɔkpá ku alɔ. (Aíit. 2:​3-6) Alɔ cɛgbá ō gbɔɔkɔ lɛ Ujehofa cɛɛ ku alɔ ba ɔ kóō ta alɔ abɔ ō má ohi ku aɔka ku alɔ a. Oŋma ɔɔma, alɔ lɔfu dɔka aukɔ́ ku Ubáyíbu mla aɛlā ocɛgbá nōo lɔfu ta alɔ abɔ ipu āhɔ̄ ku alɔ a. Ó klla lɔhi ku alɔ jé aɔ̄kā nōo yɔ ipu Ubáyíbu nōo kɛla lɛyikwu ācɛ nōo gba Ujehofa ɛ̄gbā kpaakpa nōo lɛ ɛlá ō gbo amāŋ nɛ ɔtu ya uwa bɛɛka alɔ a.

6. Ɛgɛnyá nɛ ōjila ku ujɔ gē ta alɔ abɔ ō ya aafu nɛ alɔ lɛ a lé a?

⁶ Ujehofa klla gē kɛla lɛ alɔ eko duuma nɛ alɔ yɔ ōjila ku ujɔ. Ɔdaŋ ka alɔ gē gā ōjila ku ujɔ ojigogo, alɔ lɔfu po ɛlā éyi ipu ɛlā ō ka tɛɛcɛ amāŋ ohi nɛ ɔyinɛ éyi ta nōo wɛ ɔdā nɛ alɔ cɛgbá yiili o ya ɛɛ ku alɔ ya aafu nɛ alɔ lɛ a lé a. (Aíit. 27:17) Babanya alɔ kɛla lɛyikwu ɛgɛ nɛ alɔ lɔfu ya aafu ōhī nɛ alɔ lɛ a lé a.

EKO DUUMA NƐ A YƆ I LƐ AAFU ƆDAŊ KA UJEHOFA LƐ ƐLÁ WU UWƆ ƆKWƆƆKWƐYI

7. Ɔka nyá nɛ ācɛ ōhī lɔfu da a?

⁷ A da iyi uwɔ ɔka nyā jejee ɛ, ‘Ujehofa lɛ ɛlá wu um ɔkwɔɔkwɛyi?’ Ɔdaŋ ka ɔtu ya uwɔ ku á cɛgbá ŋ, a lɔfu gbɛla ka ó gáā tɔɔtɛ gā uwɔ ō je piya ɔya ku Ɔcɛ Nōo Ya Oduudu Odee a ŋ. Udefidi nōo wɛ Ɔcɛ́ a lɔfu gbɛla lɛ a duu ɛ. Ó gbɛla ka ó wɛ ɔdā ohidaago ka Ujehofa lɛ ɛlá wu alɛɛcɛ. Ó kahinii: “Óndú, ɔdí nɛ̄ ɔ̄cɛ wɛ ɛ́ɛ́ nāa gē lɛ ɛlá kwu ɔ́ ā? Ɔdí nɛ̄ alɛɛcɛ wɛ ɛ́ɛ́ nāa gē gbɛlá kwu ɔ́ ā?” (Aíjē 144:3) Imi nɛ a lɔfu má ohi ku ɔka ɛgɛnyā a, “Ujehofa lɛ ɛlá wu ācɛ ɔkwɔɔkwɛyi?”

8. Ɛgɛ nɛ ɔkpá ku 1 Usámuwɛ̄lu 16:​6, 7, 10-12 ka a, ɔdi nɛ Ujehofa gē má ɛgiyi ācɛ a?

⁸ Ubáyíbu nwu alɔ ka Ujehofa lɛ ɛlá wu ācɛ nɛ ācɛ ɔhá leyi má uwa bɛɛka é cɛgbá ŋ ma. Ocabɔ mafu, Ujehofa lɛ Usamuwɛlu tɛhɔ gā ɔlɛ ku Ujese o ya ɛɛ kóō lɛ anɔ tu ɔyinɔnyilɔ ku nu éyi ɛyi kóō kwu piya ɔcɛ́ ku ācɛ Isrɛlu ɛcɔbu. Ujese lɛ ayinɔnyilɔ ahaapa ku nu higwu kéē gáā ta Usamuwɛlu, amáŋ ó hi Udefidi nōo wɛ ɛnɛ̄ŋcɛ́ ku uwa a igwú ŋ.b Naana kpɔ a, Udefidi nɛ Ujehofa kē fu a. (Jé 1 Usámuwɛ̄lu 16:​6, 7, 10-12.) Ujehofa má ɛdɔ ɔcɛ nɛ Udefidi wɛ ɔkwɔɔkwɛyi a. Ó jé ka oklobiya nyā yihɔtu ku nu nɛɛnɛhi.

9. Ɔdiya nɛ a lɔfu lɔtuce kpɔcii ka Ujehofa lɛ ɛlá wu ɔ a? (Má ifoto a.)

⁹ Gbɛla lɛyikwu ɛgɛ nɛ Ujehofa mafu ka ó lɛ ɛlá wu uwɔ ɛ ma. Ó gē je ukɔ́ nōo lɔhi fiyɛ duu a gā uwɔ nōo tɛɛma kwu āhɔ̄ nɛ a yɔ anu piii a. (Aíjē 32:8) Ɛnyā mafu ka ó lɛ uwɔ jé lɔɔlɔhi gbɔbu ɛ. (Aíjē 139:1) Eko duuma nɛ a bi ukɔ́ ku Ujehofa le yuklɔ klla má ɛgɛ nɛ ó ta uwɔ abɔ lɛ a, ó géē gáā ta uwɔ eyī peee ka ɛlā ku uwɔ he ɔ ɔtu nɛhi. (1 Uklɔ. 28:9; Ācot. 17:​26, 27) Ujehofa gē má ɛjɛɛji ɔdā nɛ a gē ya o ya ɛɛ ku a gba ɔ ɛ̄gbā mla ō lɛyitaajɛ lɛ ɔ a. Ó klla gē má auce ō ya olɔhi nɛ a lɛ a klla dɔka ō wɛ ɔya ku uwɔ. (Ujɛr. 17:10) Ó kē géē gweeye nɛhi ɔdaŋ ku a cɛ ō wɛ Ɔya ku nu duu.—1 Ujɔ́n. 4:19.

EKO DUUMA NƐ A YƆ I LƐ AAFU ƆDAŊ KA AŌMIYA NƐ A YA ŊMA IGBIHI A I LƆHI Ŋ

10. Eko duuma nɛ alɔ gbɛla lɛyikwu aōmiya nɛ alɔ ya ŋma ighihi ɛ ma, ɔka nyá nɛ alɔ lɔfu da a?

¹⁰ Ekoohi, ācɛ ōhī lɔfu gbɛla lɛyikwu aōmiya néē ya ŋma igbihi ɛ ma, cɛɛ é gbɔɔ ō gbɛla ɔdaŋ ka ōmiya olɔhi a néē ya a. Á jé ŋ, é lɛ abɔ ci uklɔ néē gē gba ije nwune lɛ uwa, amāŋ le miya ku aa i gáā gbɔɔ ɔhi ō ta ŋ o ya ɛɛ ka é lɔfu lɛ eko nwune fiyɛ ō gba Ujehofa ɛ̄gbā. Amáŋ ɔɔma lɔfu wɛ ihayi alɛwa nōo gáā yɛ ɛ ma. É lɔfu gbɛla lɛyikwu ācɛ ōhī néē jé nōo ya ōmiya nōo wɛ ɛyɛɛyi gwu aku uwa ta, babanya ó ke lɛbɛɛka ācɛ nyā lɛ ije nɛɛnɛhi klla yɔ i lā oyeeyi olɔhi a. Ohigbu ɛnyā, é lɔfu gbɛla kahinii: ‘Aōmiya nɛ um ya o ya ɛɛ ku um gba Ujehofa ɛ̄gbā a wɛ aɛ̄nɛ̄ ō lɔhi fiyɛ duu a? Kɛɛ ku um gē yɛ i yuklɔ nwune fiyɛ eko ɔɔma o ya ɛɛ ku um lɛ ije nwune fiyɛ babanya?’

11. Ɔdiya nɛ ɔtu gbenyi lɛ ɔcɛ nōo ta ɔkpá ku Aíjē Kú Ɛ̄gbā 73 a?

¹¹ Ɔdaŋ ku a da iyi uwɔ ɔka ɛgɛnyā jejee ɛ, leyi bi ɛlā nɛ Ubáyíbu ka lɛyikwu ɛgɛ nɛ ɔtu ya ɔcɛ nōo ta ɔkpá ku Aíjē Kú Ɛ̄gbā 73 lɛ a. Ó má ācɛ nōó gē gba Ujehofa ɛ̄gbā ŋ amāŋ nōo lɛ ɔbɔla ku ɔkpiye, gba agbenu, klla lɛbɛɛka é lɛ unwalu duuma ŋ ma. (Aíjē 73:​3-5, 12) Eko nɛ ó má ku oyeeyi ku uwa lɛbɛɛka ó yɔ i nyɔ lɔɔlɔhi a, ɔɔma cɛ lɛ ɔtu ya ɔ bɛɛka ōmiya nɛ ó ya ō gba Ujehofa ɛ̄gbā a i wɛ ōmiya olɔhi ŋ ma. Ó “móōwē [amāŋ yɔ ipu ɔtu nobi] ɛ̄cī [alɛwa]” ohigbu ɛlá ō gbo nōo cɛ lɛ ɔtu gbenyi lɛ ɔ nyā. (Aíjē 73:​13, 14) Ɛgɛnyá nɛ ó ya ɔwɛ obɔbi nɛ ɔtu yɔ i ya ɔ lɛ a lé a?

12. Ɛgɛ nɛ ɔkpá ku Aíjē Kú Ɛ̄gbā 73:​16-18 ka a, ɛgɛnyá nɛ ɔcɛ nōo ta ɔkpá ku Aíjē Kú Ɛ̄gbā nyā ya ɔwɛ obɔbi nɛ ɔtu yɔ i ya ɔ lɛ a lé a?

¹² Jé Aíjē Kú Ɛ̄gbā 73:​16-18. Ɔcɛ nōo ta ɔkpá ku Aíjē Kú Ɛ̄gbā ɔɔma le yɛ gā ipu agbliihɔ ku Ujehofa. Abɔɔ ɔtahɛ ku ācɛ ɔlɛ Ujehofa, ó le tɔɔtɛ lɛ ɔ ō gbɛla lɔɔlɔhi. Ó jé ka naana nɛ ācɛ ōhī lɔfu yɔ i lā oyeeyi olɔhi a, é lɛ eyiyoce ku ɛcɔbu duuma ŋ. Ohigbu ɛnyā ɔtu i gbenyi lɛ ɔ gɛ ŋ, ó klla jé kpɔcii kóō je Ujehofa ta aflɛyi ipu oyeeyi ku nu wɛ ōmiya nōo lɔhi fiyɛ duu a. Ɔɔma ya kóō lɛ ɔtu ku nu ya ekponu ō gɔbu yɔ i gba Ujehofa ɛ̄gbā.—Aíjē 73:​23-28.

13. Ɔdi nɛ a lɔfu ya ɔdaŋ ku a yɔ i hijema ku aōmiya ōhī nɛ a ya ŋma igbihi a? (Má ifoto a.)

¹³ Ɛgɛ nɛ ɔcɛ nōo ta ɔkpá ku Aíjē Kú Ɛ̄gbā ɔɔma ya a, awɔ abɔyi uwɔ lɔfu ya ɔwɛ obɔbi nɛ ɔtu yɔ i ya uwɔ lɛ a lé duu. Ɛgɛnyá a? Gbɛla lɛyikwu aɔdā olɔhi nɛ a lɛ a kwu ɔhā ku Ujehofa, ku a klla bla ka ācɛ nōó gē gba Ujehofa ɛ̄gbā ŋ ma i gē miyɛ otabɔ ku nu ŋ. Lɛ ācɛ nōó gē gba Ujehofa ɛ̄gbā ŋ ma, ō lā oyeeyi olɔhi wɛ ɔdā nōo cɛgbá lɛ uwa fiyɛ duu a, ohigbu ka é lɛ eyiyoce ku ɛcɔbu duuma ŋ. Amáŋ awɔ a, á lɛ ɛnɛɛnɛ ɛhi alɛwa ŋma ɛgiyi Ujehofa babanya foofunu ŋ, amáŋ ó cokonu ō je ɛnɛɛnɛ aɔdā alɛwa gā uwɔ ɛcɔbu. (Aíjē 145:16) Gbɛla lɛyikwu ɛlā nyā: Á gáā lɔfu jé kpɔcii ɛgɛ nɛ oyeeyi ku uwɔ gē yɛ i lɛ icɛ ɔdaŋ ku a gē yɛ i lɛ ōmiya ɛyɛɛyi ya ŋ. Amáŋ ó lɛ odee nɛ a lɔfu jé kpɔcii: Eko duuma nɛ a ya ōmiya ohigbu ihɔtu nɛ a lɛ lɛ Ujehofa mla ācɛ ɔhá, a géē lɛ aɔdā nōo géē cɛ gā uwɔ wɛ ɔcɛ nōo lɛ eeye fiyɛ duu ipu oyeeyi a eko doodu.

EKO DUUMA NƐ A YƆ I LƐ AAFU ƆDAŊ KU A TIILE LƐ UJEHOFA

14. Āhɔ̄ ōhī nyá nɛ ācɛ ōhī lɔfu yɔ anu a, ɔka nyá néē kē lɔfu da iyi uwa a?

¹⁴ Ōhī ku ācɛ ɔlɛ Ujehofa i lɔfu yuklɔ nwune lɛ Ujehofa ɛgɛ néē géē dɔka ō ya a ŋ, ohigbu ka é kwu hilokplici ɛ, yɔ i doōcē amāŋ le nyɔnyi. Ohigbu ɛnyā ɔtu lɔfu ya uwa bɛɛka é cɛgbá lɛ Ujehofa ŋ. É lɔfu da ɔka kahinii: ‘N tiile lɛ Ujehofa kpɔ ɛ?’

15. Ɔdi nɛ ɔcɛ nōo ta ɔkpá ku Aíjē Kú Ɛ̄gbā 71 a jé kpɔcii a?

¹⁵ Ɔcɛ nōo ta ɔkpá ku Aíjē Kú Ɛ̄gbā 71 a yɔ i lɛ ɔtooplico, ohigbu ka ó lɛ ɔfu nɛ ó cɛgbá a ŋ. Ó gbɔɔkɔ kahinii: “[A hii] mabɔ̄ um tá eko nyā nɛ̄ ń lɔfú gɛ ŋ́ mā ŋ́.” (Aíjē 71:​9, 18) Naana nɛ ɔtu ya ɔ bɛɛka ó lɔfu ŋ ma, ɔcɛ nōo ta ɔkpá ku Aíjē Kú Ɛ̄gbā nyā a jé ka ɔdaŋ nɛ ó gɔbu yɔ i gba Ɔwɔico ku nu ɛ̄gbā kpaakpa, Ujehofa géē ta ɔ abɔ. Ɔcɛ nōo ta ɔkpá ku Aíjē Kú Ɛ̄gbā ɔɔma le nwu ka Ujehofa gē gweeye mla ācɛ nōo gē ya ɛji ɔfu ku uwa ō gba ɔ ɛ̄gbā, naana nōó lɛ aɔdā ōhī nōo lɔfu ci uwa ŋma ō ya lɛ a.—Aíjē 37:​23-25.

16. Ɔwɛ ɛyɛɛyɛyi nyá nɛ ayinɛ alɔ nōo kwu hilokplici ɛ ma tiile lɛ Ujehofa a? (Aíjē Kú Ɛ̄gbā 92:​12-15)

¹⁶ Ɔdaŋ ku a kwu hilokplici ɛ, gbɛla lɛyikwu ɛgɛ nɛ ɔtu gē ya Ujehofa lɛyikwu uwɔ a. Ó lɔfu ta uwɔ abɔ ku a gɔbu yɔ i gba ɔ ɛ̄gbā kpaakpa naana nɛ a kwu hilokplici ɛ, nɛ a lɔfu yɔ i doōcē, amāŋ le nyɔnyi a. (Jé Aíjē Kú Ɛ̄gbā 92:​12-15.) Ikɔkɔ nɛ a géē lɛ ɔtu ku uwɔ kwu aɔdā nōó tɔɔtɛ gā uwɔ ō ya gla gɛ ŋ ma, lɛ ɔtu ku uwɔ kwu ɔdā nɛ a lɔfu ya gla a. Ocabɔ mafu, a lɔfu ta ācɛ ɔhá abɔ oŋma lɛ ocabɔ kóō hayi kpaakpa ku uwɔ mla ɛgɛ nɛ a gē mafu ku a lɛ ɛlá wu ācɛ a. A lɔfu da ācɛ ɔhá lɛyikwu ɛgɛ nɛ Ujehofa je otabɔ gā uwɔ ihayi alɛwa nōo gáā yɛ ɛ ma, mla aokonu ō ce ku Ubáyíbu nɛ a yɔ i leyice kóō ya jila ɛcɔbu a. A kē hii je mlanyi ka ɔkɔ nɛ a gē gba kwɛyi ācɛ ɔhá a gē tabɔ nɛɛnɛhi ŋ. (1 Upít. 3:12) Ɛgɛ duuma nɛ āhɔ̄ nɛ alɔ yɔ anu a kóō lɛ a, ɛjɛɛji alɔ lɔfu ya odee lɛ Ujehofa mla ācɛ ɔhá.

17. Ɔdiya nɛ alɔ i cika ō miya iyi alɔ mla ācɛ ɔhá ŋ ma?

¹⁷ Ɔdaŋ ka ɔtu yɔ i biya gā uwɔ nɛɛnɛhi ohigbu ku á lɔfu ya nwune ipu ɛ̄gbā ō gba ku Ujehofa gla gɛ ŋ, a lɔfu lɔtuce kpɔcii ka ɔdā duuma nōo tɔɔtɛ gā uwɔ ō ya gla a jɛ ɔ eyī nɛhi. A lɔfu yɔ i ceyitikwu ō miya ɔdā nɛ a yɔ i ya a mla ɔdā nɛ ācɛ ɔhá lɔfu ya a. Amáŋ a hii ya lɛ a ŋ! Ɔdiya a? Ohigbu ka Ujehofa i gē ya lɛ a ŋ. (Ugal. 6:4) Ocabɔ mafu, Umeri lɛ anɔ nōo gbɔɔla nɛɛnɛhi a nya Ujisɔsi iyē. (Ujɔ́n. 12:​3-5) Abɔ ɔhá ku nu, ɔnyā okwū nōo wɛ ogbɛha a je andeli ɛpa ku ije nōo nyɛ nɛɛnɛhi a ta ipu ikpati. (Ulúk. 21:​1-4) Amáŋ, Ujisɔsi i miya ɔdā nɛ acɛnya ɛpa nyā ya a mla iyi uwa ŋ. Ikɔkɔ ɔɔma, ó má ka Umeri mla ɔnyā okwū nōo wɛ ogbɛha a lɛ ɔtu okpoce. Ujisɔsi gbla ocabɔ ku Adā nu ya mɛɛlɛ. Ohigbu ɛnyā, a lɔfu lɔtuce kpɔcii ka Ujehofa gē má ɛjɛɛji ɔdā nɛ a gē ya ohigbu ku a kpɔtuce ɔ klla yihɔtu ku nu a, ó kē jɛ ɔ eyī nɛhi, ɔdaŋ nɛ ɔtu ya uwɔ ka ó le ligii naana.

18. Ɔdi lɔfu ta alɔ abɔ ō ya aafu nɛ alɔ lɛ a lé a? (Má ikpati nyā nōo kahinii: “Ɛlā Ku Ujehofa Lɔfu Ta Uwɔ Abɔ Ō Ya Aafu Nɛ A Lɛ A Lé.”)

¹⁸ Ɛjɛɛji alɔ gē lɛ aafu ekoohi. Amáŋ ɛgɛ nɛ alɔ má ɛ ma, Ubáyíbu lɔfu ta alɔ abɔ ō ya uwa lé. Ohigbu ɛnyā, ceyitikwu lɔfu lɔfu ku á lɛ aafu nɛ a lɛ a yale, ku a klla jɛga lɛ ɔtu ō ce kóō kwɛyi aafu nɛ a lɛ a. Ujehofa jé uwɔ lɔɔlɔhi. Ɛjɛɛji aōmiya nɛ a ya o ya ɛɛ ku a je ɔ ta aflɛyi ipu oyeeyi ku uwɔ a jɛ ɔ eyī nɛhi, ó kē géē ya okonu nɛ ó ce a jila ō cila uwɔ ule. Ujehofa yihɔtu eyeeye ku ācɛ ɔlɛ nu nōo gē gba ɔ ɛ̄gbā kpaakpa a klla lɛ ɛlá wu uwa nɛhi.