“Ime Njem n’Osimiri n’Oge Oké Ifufe”

Ị́ GAGHỊ ele ime njem dị otú ahụ anya dị ka nke e mere n’oge na-ekwesịghị ekwesị, nke nzuzu, na nke pụrụ iweta ọdachi? Otú ọ dị, ụfọdụ na-etinye onwe ha n’ọnọdụ dị otú ahụ n’ụzọ ihe atụ. N’ụzọ dị aṅaa? Onye dere akwụkwọ na narị afọ nke 17 bụ́ Thomas Fuller kwuru, sị: “Emela ihe mgbe oké iwe ji gị. O yiri ime njem n’osimiri n’oge oké ifufe.”

Ime ihe mgbe ị nọ n’iwe a na-achịkwaghị achịkwa pụrụ ịrụpụta ọdachi. Otu ihe omume e dekọrọ n’ime Bible gosipụtara nke a. Simeon na Livaị, bụ́ ụmụ ndị ikom nke nna ochie ahụ bụ́ Jekọb, meghachiri omume nye mmerụ e merụrụ nwanne ha nwanyị bụ́ Daịna site n’iji ọnụma nke ịbọ ọbọ mee mwakpo. Ihe si na ya pụta bụ oké mgbukpọ na ịkwakọrọ ihe onwunwe. Ọ bụghị ihe ijuanya na Jekọb katọrọ omume ọjọọ ha, na-asị: “Unu emekpawo m ahụ, n’ime m ka m sie ísì n’etiti ndị bi n’ala nke a.”—Jenesis 34:25-30.

N’ụzọ amamihe dị na ya, Okwu Chineke, bụ́ Bible, na-atụ aro ka a gbasoo ụzọ dị iche. Ọ na-asị: “Haa aka iwe iwe, hapụkwa ọnụma: emela ka iwe gị dị ọkụ, ọ na-eduba nanị n’ime ihe ọjọọ.” (Abụ Ọma 37:8) Ịgbaso ndụmọdụ ahụ pụrụ igbochi mmehie ndị dị ukwuu.—Eklisiastis 10:4; leekwa Ilu 22:24, 25.