Jisọs Ch’ọga Onẹ Kpa Ọjọ Uñmi

AmiFarisi ach’ulaka Jisọs nyọnyọ. Todulẹ ma atene ẹñwu ki ache kp’ẹñwu ki aka ki ajẹñwu ma f’u mu. Ma ka ñwu ki we ch’ọga amonẹ kpa ọjọ uñmi. I n’ọjọ uñmi ka ki Jisọs li ọnẹkẹlẹ afeju ka ki abi-ebi ej’ọna. Jisọs ka ñwu amakọchẹ-wñ kakini: ‘Mẹ g’alu k’ukpahiu Ọjọ akpo tejugede ef ọlai ọnẹkẹlẹ-i.’ Jisọs f’itọ tọ janẹ tak i n’itọ lẹ f’ẹpiọ fọ tak i mudu kwulu eju afeju lẹ. Jisọs la ka ñwu ọnẹkẹlẹ lẹ kakini: ‘Lo k’ẹ f’ẹpiọ lẹ gwẹ rinyọ ef’omi ki gbagwu Sailoam.’ Ọnẹkẹlẹ lẹ nya f’ẹpiọ lẹ gwẹ rinyọ dabalu ki Jisọs ka ñwu ki che. Ẹrẹrẹ lẹ eju-wñ mu chi, i la chanẹ eganẹ ẹgba ejodudu ef’ọlai-wñ.

Awuwu f’amonẹ mu, taku ma kakini: ‘I ch’ẹnẹ ki agwugwu abi-ebi lẹ dẹ-i n? Abẹk onẹ biu onẹ-i lẹ?’ Tak ọnẹkẹlẹ lẹ kakini: ‘Omi afeju lẹ dẹ!’ Oñ amonẹ lẹ t’ọ ene kakini: ‘Abile k’ẹ chanẹ eganẹ-i taa?’ Alu ki ka ñwu ma ẹñwu ki che, ma m’u du le t’ugbo amiFarisi.

Ọnẹkẹlẹ lẹ ka ñwu amiFarisi kakini: ‘Jisọs m’ẹpiọ du kwulu eju-mi, tak i ka ñwu mi k’u f’u gwẹ rinyọ. Oñ u ch’abalẹ, abajọ-i u la chanẹ eganẹ mẹ.’ Tak amiFarisi lẹ la kakini: ‘Ichẹñwu ki Jisọs ach’ọga amonẹ kpa ọjọ uñmi, abẹk ukpahiu-wñ ch’ugbo Ọjọ i kwo n.’ Amaa, abomunẹ dọmọ aka kakini: ‘Ichẹñwu k’ukpahiu-wñ ma kwugbo Ọjọ n, i neke ch’ukọlọ awuwu aba-i n.’

AmiFarisi lẹ t’ata kp’iye ọnẹkẹlẹ lẹ ene kakini: ‘Abile k’ọma-mẹ chanẹ eganẹ abajọ-i?’ Ata kp’iye-wñ dọmọ ach’okpo todu amiFarisi chẹ f’alu jọ dama kakini ẹnẹ duu ki gbalu kaki Jisọs che Kraist, ma am’ẹnẹ lẹ du rikpolo kwef Unyi Ujeju dufu. Todulẹ ma dohi kakini: ‘Ọkonẹ i che, mẹ t’ọ ene.’ Onukeji ma ñọ f’ene t’ẹnẹ ki ch’afeju lẹ. Oñ i kakini: ‘U che ka ñwu mẹ mẹ le, mẹ la neti n, ẹñwu chi ku mẹ tene egbọ gẹ?’ Tak amiFarisi kpo wẹdọ ma la mu du rikpolo t’ọdọda.

Jisọs tene ugbo k’ọnẹkẹlẹ lẹ dẹ. Alu ki f’u li, i t’ọ ene kakini: ‘Ẹ kẹdọno Mẹsaya?’ Oñ ọnẹkẹlẹ lẹ dohi kakini: ‘Na kẹdọno ichẹñwu k’u m’ẹnẹ ki che.’ Oñ Jisọs ka ñwu kakini: ‘Omi che Mẹsaya lẹ.’ Mẹ neju kaki ẹñwu ọmẹmẹlẹ Jisọs che-i? I che kaki ọga ọnẹkẹlẹ lẹ kate owñ i che kpa n, i ñọ jẹñwu ki n’ukẹdọno ugbo Mẹsaya.