Ma Fu Jisọs Mu

Jisọs kp’amẹnukpuchẹ-wñ daba Ukpolo Kidrọn alu ku ma alo t’Ojuwo Olif. Odu oñ ma lale-i, ochu la afanẹ nyọnyọ odu lẹ. Alu ku ma lewa ef’uchẹ Gẹtsẹmani, Jisọs ka ñwu ma kakini: “Mẹ j’emi ku mẹ gwẹkẹ adide.” Taki Jisọs le t’ọgba pẹẹ ef’uchẹ lẹ, oñ i kwo danyekwu. Ef’ẹdekpabiẹ, i ch’adua ru Jihofa kakini: “Unekwu-wẹ ki che.” Ubilẹ, Jihofa kp’onuchẹ-wñ ka ki d’ugbẹdọ ñwu Jisọs. Alu ki Jisọs dabi t’ugbo k’amẹnukpuchẹ-wñ dẹ, i li kaki ama mẹtẹta lẹ dọmọ al’olu. Oñ i ka ñwu ma kakini: ‘Mẹ kwanẹ! I ch’iko ki dukpẹ ku mẹ na l’olu dẹ-i n! Iko lewa mẹ ku ma am’umi du ñw amẹnọla-mi mu.’

Alu ki dẹ pẹẹ, Judas n’amonẹ wewe ki n’ugbada kpai ugbolo w’efuchẹ lẹ. Judas onugo che m’efuchẹ lẹ todu Jisọs kp’amẹnukpuchẹ-wñ tẹtẹ aw’ọmọ. I ka ñwu am’isoja kak’owñ ajẹñwu-ma m’ẹnẹ ki che Jisọs. Alu ki Judas le w’ugbo Jisọs, i ka ñwu kakini: ‘Agba-oo Akonẹwñ,’ tak i d’alu k’ọ alu. Amaa, Jisọs ka ñwu kakini: ‘Ẹ d’alu k’umi alu k’ẹ neke du mi ñwu ma mu?’

Oñ Jisọs tẹ w’ọgba, i la t’uma ene kakini: “Ẹnẹ mẹ atene?” Oñ ma dohi kakini: “Jisọs e-Nazarẹt.” Jisọs la ka ñwu ma kakini: “Omi dẹ.” Ẹrẹrẹ lẹ, ma l’ubi ubi ananẹ chakaa. Jisọs ñọ dabi t’uma ene kakini: “Ẹnẹ mẹ atene?” Oñ ma ñọ dabi dohi kakini: “Jisọs e-Nazarẹt.” Taku Jisọs dabi ka ñwu ma kakini: ‘U chẹ ka ñwu mẹ kak’omi dẹ. Mẹ t’abokẹlẹ-i nọ ku ma lo.’

Alu ki Pita li ẹñwu ki na che lẹ, i m’ugbada-wñ wọ, i la m’eti Malkus ki ch’adu agboji amatama kọda. Amaa, Jisọs d’ọwọ kad’eti ọnẹkẹlẹ lẹ, i la f’u ñwọche. Tak i ka ñwu Pita kakini: ‘M’ugbada-wẹ du dabi t’uña-wñ todu ẹnẹ duu ki ad’ugbada j’uja, ugbada ma adu kpa.’ Am’isoja lẹ fu Jisọs mu, ma la f’u ji. Tak’ẹ ma, amẹnukpuchẹ-wñ ra b’ọ tẹ. Amonẹ wewe lẹ la mu Jisọs du le t’ugbo Anas ki ch’atama ogijo. Ubi ki Anas ti Jisọs ene kpa, i du kp’uchẹ ru Kayafas ki ch’Agboji Amatama. Amaa, ẹñwu kẹrẹbọ amẹnukpuchẹ Jisọs ubilẹ?